1, 2. (a) I yini leswi Yesu a swi byeleke vadyondzisiwa vakwe evusikwini byo hetelela a nga si fa? (Vona xifaniso lexi nga eku sunguleni.) (b)  Hikwalaho ka yini swi ri swa nkoka leswaku hi tshama hi ri karhi hi anakanya hi swivangelo leswi endlaka leswaku hi chumayela? (c) Hi ta kambisisa yini?

HI VUSIKU byakwe byo hetelela, Yesu u vulavule nkarhi wo leha ni vaapostola vakwe, a ri karhi a va tiyisekisa leswaku wa va rhandza. Nakambe u va byele xifaniso xa murhi wa vhinya, lexi hi buleke ha xona eka xihloko lexi nga hundza. Yesu u tirhise xifaniso xexo leswaku a khutaza vadyondzisiwa vakwe leswaku va ‘hambeta va tswala mihandzu yo tala’ ni ku tiyisela loko va ri karhi va chumayela rungula ra Mfumo.—Yoh. 15:8.

² Hambiswiritano, Yesu a nga byelanga vadyondzisiwa vakwe ntsena leswi va faneleke va swi endla kambe u tlhele a va byela ni leswaku hikwalaho ka yini va fanele va endla tano. U va byele swivangelo swo hambeta va endla ntirho wo chumayela. Hikwalaho ka yini swi ri swa nkoka leswaku hi kambisisa swivangelo sweswo? Loko hi tshamela ku anakanya hi swivangelo sweswo, swi ta hi khutaza leswaku hi tiyisela loko hi ri karhi hi nyikela “vumbhoni ematikweni hinkwawo.” (Mat. 24:13, 14) Hikwalaho, a hi kambisiseni swivangelo swa mune swa le  Matsalweni leswi endlaka hi chumayela. Hi ta tlhela hi kambisisa tinyiko ta mune leti humaka eka Yehovha, leti hi pfunaka leswaku hi tiyisela loko hi tswala mihandzu.

3. (a) Hi xihi xivangelo xo chumayela lexi kumekaka eka Yohane 15:8? (b) Xana madiriva lama nga exifanisweni xa Yesu ma fanekisela yini naswona hikwalaho ka yini xifaniso xexo xi fanela?

³ Xivangelonkulu lexi endlaka hi chumayela, i ku vangamisa Yehovha ni ku kwetsimisa vito rakwe. (Hlaya Yohane 15:1, 8.) Xiya leswaku Yesu u fanise Tata wakwe Yehovha ni murimi loyi a byaleke madiriva. Yesu u tifanise na murhi wa vhinya naswona u fanise valandzeri vakwe ni marhavi. (Yoh. 15:5) Hikwalaho, madiriva ma yi fanekisela kahle mihandzu ya Mfumo leyi humesiwaka hi valandzeri va Kreste. Yesu u byele vaapostola vakwe a ku: “Tatana u vangamisiwa hi sweswo, leswi mi hambetaka mi tswala mihandzu yo tala.” Tanihi leswi murhi wa vhinya lowu humesaka madiriva lamanene, wu yisaka ku dzuneka eka murimi, na hina hi yisa ku dzuneka kumbe ku vangama eka Yehovha loko hi twarisa rungula ra Mfumo hilaha hi nga kotaka hakona.—Mat. 25:20-23.

4. (a) Hi ri vangamisa hi tindlela tihi vito ra Xikwembu? (b) U titwa njhani hi lunghelo leri u nga na rona ro vangamisa vito ra Xikwembu?

⁴ Ntirho wa hina wo chumayela wu ri kwetsimisa njhani vito ra Xikwembu? A ku na nchumu lexi hi nga xi endlaka eka vito ra Xikwembu leswaku ri kwetsima ngopfu. Hikuva ra kwetsima hilaha ku heleleke. Xiya leswi muprofeta Esaya a swi vuleke, u te: “Yehovha wa mavuthu—hi yena Loyi mi faneleke mi n’wi teka a kwetsima.” (Esa. 8:13) Ndlela yin’wana yo kwetsimisa vito ra Xikwembu, i ku ri khoma hi ndlela leyi hambaneke ni mavito man’wana hinkwawo ni ku tlhela hi pfuna van’wana leswaku va ri teka ri ri leri kwetsimaka. (Mat. 6:9) Hi xikombiso, loko hi twarisa ntiyiso hi timfanelo ta Yehovha leti hlamarisaka ni xikongomelo xakwe lexi nga cinciki hi vanhu, hi va hi sirhelela vito ra Xikwembu eka mavunwa ya Sathana. (Gen. 3:1-5) Nakambe, hi va hi kwetsimisa vito ra Xikwembu loko hi tikarhatela ku pfuna vanhu va le nsin’wini ya hina va vona leswaku Yehovha u faneriwa hi “ku amukela ku vangama ni ku xiximiwa ni matimba.” (Nhlav. 4:11) Rune, loyi a nga ni malembe ya 16 a ri phayona u ri: “Ku tiva leswaku ndzi ni lunghelo ro va mbhoni ya Muvumbi wa vuako hinkwabyo swa ndzi tsakisa. Swi ndzi nyika matimba yo ya emahlweni ni ku chumayela.”

5. (a) Hi xihi xivangelo xin’wana xo chumayela lexi boxiweke eka Yohane 15:9, 10? (b) Xana Yesu u xi kandziyise njhani xilaveko xo tiyisela?

⁵ Hlaya Yohane 15:9, 10. Rirhandzu ra hina eka Yehovha na Yesu, i xivangelo xa nkoka lexi endlaka leswaku hi chumayela rungula ra Mfumo. (Mar. 12:30; Yoh. 14:15) Yesu u byele valandzeri vakwe leswaku va ‘tshama erirhandzwini rakwe.’ Hikwalaho ka yini? Hikuva ku tshama u ri mudyondzisiwa wa ntiyiso wa Kreste, swi lava ku tiyisela. Yesu u kandziyise xilaveko xo tiyisela hi ku tirhisa xiga lexi nge, “tshamani” hi ku phindhaphindha eka Yohane 15:4-10.

6. Hi nga swi kombisa njhani leswaku hi lava ku tshama erirhandzwini ra Kreste?

⁶ Hi nga swi kombisa njhani leswaku hi lava ku tshama erirhandzwini ra Kreste ni ku amukeriwa hi yena? Hi ku hlayisa swileriso swakwe. Hi ku komisa, Yesu u hi byela a ku, ‘Ndzi yingiseni.’ Hambiswiritano, Yesu u lava leswaku hi endla leswi na yena a swi endleke hikuva u engete a ku: “Tanihi leswi ndzi hlayiseke swileriso swa Tatana ivi ndzi tshama erirhandzwini rakwe.” Yesu u hi vekele xikombiso.—Yoh. 13:15.

7. Xana ku yingisa ni rirhandzu swi fambisana njhani?

⁷ Loko Yesu a kombisa leswaku ku yingisa ni rirhandzu swa fambisana, u rhange a byela vaapostola vakwe a ku: “Loyi a nga ni swileriso swa mina a tlhela a swi hlayisa, hi yena loyi a ndzi  rhandzaka.” (Yoh. 14:21) Loko hi yingisa xileriso xa Yesu xo chumayela, hi va hi kombisa leswaku hi rhandza Xikwembu hikuva swileriso swa Yesu swi huma eka Tata wakwe. (Mat. 17:5; Yoh. 8:28) Loko hi endla tano, Yehovha na Yesu va ta hi hlayisa erirhandzwini ra vona.

8, 9. (a) Hi xihi xivangelo xin’wana xo chumayela lexi hi nga na xona? (b) Hikwalaho ka yini marito ya Yehovha lama kumekaka eka Ezekiyele 3:18, 19 na 18:23 ma hi susumetela leswaku hi ya emahlweni hi chumayela?

⁸ Hi ni xivangelo xin’wana xo ya emahlweni ni ntirho wa hina wo chumayela. Hi chumayela leswaku hi lemukisa vanhu. EBibeleni, Nowa u hlamuseriwa tanihi “muchumayeri.” (Hlaya 2 Petro 2:5.) A swi kanakanisi leswaku ntirho wolowo wo chumayela ku nga si fika ndhambi, a wu katsa xilemukiso xa ndzoviso lowu a wu ri eku teni. Hikwalaho ka yini? Xiya leswi Yesu a swi vuleke, u te: “Hikuva kukota leswi a va ri xiswona emasikwini wolawo ya le mahlweni ka ndhambi, va dya, va nwa, vavanuna va teka ni vavasati va hlomisiwa, ku fikela siku leri Nowa a ngheneke ha rona engalaveni; nileswi va nga lemukangiki nchumu ku fikela loko ndhambi yi fika yi va kukula hinkwavo, swi ta va tano ni hi vukona bya N’wana wa munhu.” (Mat. 24:38, 39) Ku nga khathariseki ndlela leyi vanhu a va angula ha yona, hi ku tshembeka, Nowa u twarise rungula ro lemukisa leri a nyikiwe rona.

⁹ Namuntlha hi chumayela rungula ra Mfumo leswaku hi nyika vanhu nkarhi wo dyondza hi ku rhandza ka Xikwembu hi vanhu. Ku fana na Yehovha, hi navela leswaku vanhu va amukela rungula rolero kutani va ‘hambeta va hanya.’ (Ezek. 18:23) Nakambe, loko hi chumayela hi yindlu na yindlu ni le tindhawini ta mani na mani, hi lava ku lemukisa vanhu vo tala hilaha hi nga kotaka hakona leswaku Mfumo wa Xikwembu wu ta herisa vanhu vo homboloka.—Ezek. 3:18, 19; Dan. 2:44; Nhlav. 14:6, 7.

10. (a) Hi xihi xivangelo xo chumayela lexi boxiweke eka Matewu 22:39? (b) Hlamusela ndlela leyi Pawulo na Silasi va n’wi pfuneke ha yona mulanguteri wa khotso eFilipiya.

¹⁰ Xivangelo xin’wana xa nkoka xo hambeta hi chumayela hi lexi: Hi chumayela hi leswi hi rhandzaka vaakelani va hina. (Mat. 22:39) Rirhandzu ro tano ri endla leswaku hi tiyisela entirhweni lowu ni ku tshama hi ri ni ntshembo wa leswaku vanhu va nga ha amukela rungula ra hina loko swiyimo swa vona swi cinca. Xiya leswi humeleleke Pawulo na Silasi. Loko va ri edorobeni ra Filipiya, vakaneti va vona va va pfalele ekhotsweni. Kutani exikarhi ka vusiku, hi xitshuketa ku ve ni ku tsekatseka ka misava loku ninginiseke ni ku pfula tinyangwa ta khotso. Leswi mulanguteri wa khotso a anakanya leswaku vabohiwa va balekile, a a lava ku tidlaya. Kambe Pawulo u n’wi huwelerile a ku: “U nga tivavisi!” Mulanguteri wa khotso la tshikilelekeke u vutise Pawulo a ku: “Xana ndzi fanele ku endla yini leswaku ndzi ponisiwa?” Va n’wi hlamule va ku: “Pfumela eka Hosi Yesu kutani u ta ponisiwa.”—Mint. 16:25-34.

11, 12. (a) Xana rungula ra mulanguteri wa khotso ri fambisana njhani ni vutirheli bya hina? (b) Loko hi hambeta hi chumayela hi ku tshembeka, i yini lexi hi nga tiyisekaka ha xona?

¹¹ Xana rungula ra mulanguteri wa khotso ri fambisana njhani ni ntirho wa hina wo  chumayela? Xiya leswi: Mulanguteri wa khotso u amukele rungula endzhaku ka loko ku ve ni ku tsekatseka ka misava. Hilaha ku fanaka, van’wana lava sweswi va nga amukeliki rungula ra Bibele, va nga ha ri amukela loko va langutane ni swiyimo swo tika. Hi xikombiso, van’wana ensin’wini ya hina va nga ha va va karhatekile hi leswi va lahlekeriweke hi ntirho va nga swi langutelanga. Van’wana va ha twa ku vava hileswi va ha ku dlayaka vukati. Kumbexana van’wana va karhatiwa hileswi va ha ku kumaka leswaku va ni vuvabyi lebyi nga tshungulekiki kumbe va ni gome hileswi va ha ku feriwaka hi loyi va n’wi rhandzaka. Loko swiyimo swo tano swi humelela, vanhu van’wana lava tshikilelekeke va nga ha lava ku tiva xikongomelo xa vutomi, leswi a va nga ri na mhaka na swona eku sunguleni. Kumbexana va tivutisa va ku: ‘Ndzi fanele ndzi endla yini leswaku ndzi ponisiwa?’ Loko hi hlangana na vona, va nga ha yingisela rungula ra hina ro sungula evuton’wini bya vona.

¹² Hikwalaho, loko hi hambeta hi chumayela hi ku tshembeka, hi nga tiyiseka leswaku hi ta swi kota ku chavelela vanhu hi nkarhi lowu va lavaka nchavelelo ha wona. (Esa. 61:1) Charlotte, loyi a nga ni malembe ya 38 a ri phayona u te: “Vanhu vo tala namuntlha va lava mpfuno. Va fanele va twa mahungu lamanene.” Ejvor, loyi a nga na malembe ya 34 a ri phayona u ri: “Ku tlula rini na rini, vanhu vo tala namuntlha a va na ku rhula. Ndzi navela ku va pfuna. Sweswo swi ndzi susumetela ku va chumayela.” Hakunene, ku rhandza vaakelani i xivangelo xa nkoka xo ya emahlweni ni vutirheli bya hina!

13, 14. (a) Hi yihi nyiko leyi boxiweke eka Yohane 15:11? (b) Xana ntsako wa Yesu wu ta va wa hina hi ndlela yihi? (c) Xana ntsako wu hi pfuna njhani ensin’wini?

¹³ Evusikwini byebyo byo hetelela a nga si fa, Yesu u tlhele a byela vaapostola vakwe hi tinyiko to hlaya leti a ti ta va pfuna leswaku va tiyisela loko va ri karhi veka mihandzu. Hi tihi tinyiko ta kona naswona hi vuyeriwa njhani eka tona?

¹⁴ Nyiko ya ntsako. Xana ku yingisa xileriso xa Yesu xo chumayela, swi nga hundzuka ndzhwalo? A swi tano. Endzhaku ko hlamusela xifaniso xa murhi wa vhinya, Yesu u vule leswaku leswi hi nga vachumayeri va Mfumo, hi ta kuma ntsako. (Hlaya Yohane 15:11.) Entiyisweni, u hi tiyisekise leswaku ntsako wakwe a wu ta va wa hina. Hi ndlela yihi? Hilaha swi boxiweke hakona, Yesu u tifanise ni murhi wa vhinya naswona vadyondzisiwa vakwe u va fanise ni marhavi. Murhi hi wona wu khomeke marhavi. Loko ntsena marhavi ma ha ri emurhini, ma ta kuma mati ni swakudya leswi humaka emurhini. Hilaha ku fanaka, loko ntsena hi tshama hi ri ni vun’we na Kreste hi ku landzelerisisa mikondzo yakwe, hi ta va ni ntsako lowu fanaka ni lowu a ri na wona loko a endla ku rhandza ka Tata wakwe. (Yoh. 4:34; 17:13; 1 Pet. 2:21) Xiya leswi Hanne, loyi a nga ni malembe yo tlula 40 a ri phayona a swi vuleke, u te: “Ntsako lowu ndzi vaka na wona loko ndzi vuya ensin’wini, wu ndzi susumetela ku ya emahlweni ni ntirho wa Yehovha.” A swi kanakanisi leswaku ntsako wu hi nyika matimba yo ya emahlweni hi chumayela hambiloko hi tirha ensin’wini ya vanhu lava nga tsakeliki.—Mat. 5:10-12.

15. (a) Hi yihi nyiko leyi boxiweke eka Yohane 14:27? (b) Xana ku rhula ku hi pfuna njhani leswaku hi hambeta hi veka mihandzu?

¹⁵ Nyiko ya ku rhula. (Hlaya Yohane 14:27.) Evusikwini byebyo byo hetelela a nga si fa, Yesu u rhange a byela vaapostola vakwe a ku: “Ndzi mi nyika ku rhula ka mina.” Xana ku rhula kakwe ku hi pfuna njhani leswaku hi veka mihandzu? Loko hi ri karhi hi tiyisela, hi titwa hi ri ni ku rhula etimbilwini ta hina loku tisiwaka hi ku tiva leswaku Yehovha na Yesu va hi rhandza. (Ps. 149:4; Rhom. 5:3, 4; Kol. 3:15) Ulf, loyi a nga na malembe ya 45 a ri eka ntirho wa nkarhi hinkwawo u ri: “Ntirho wo chumayela wa ndzi karharisa  kambe wu endla leswaku ndzi tsaka ni ku hanya vutomi lebyi nga ni xikongomelo.” Hakunene ha tsaka leswi hi katekisiweke hi ku rhula ka ntiyiso!

16. (a) Hi yihi nyiko leyi boxiweke eka Yohane 15:15? (b) I yini leswi vaapostola a va fanele va swi endla leswaku va tshama va ri vanghana va Yesu?

¹⁶ Nyiko ya vunghana. Endzhaku ka loko Yesu a boxe ku navela kakwe ka leswaku ntsako lowu vaapostola a va ri na wona “wu tatiwa,” u va hlamusele nkoka wo kombisa rirhandzu ra ku tinyiketela. (Yoh. 15:11-13) U tlhele a ku: “Ndzi mi vitane vanakulorhi.” Ku va munghana wa Yesu, i nyiko ya nkoka hakunene! I yini leswi vaapostola a va fanele va swi endla leswaku va tshama va ri vanghana vakwe? A va fanele ‘va ya emahlweni ni ku tswala mihandzu.’ (Hlaya Yohane 15:14-16.) Loko ka ha sale malembe mambirhi a nga si vula sweswo,Yesu u lerise vaapostola vakwe a ku: “Loko mi ri karhi mi famba, chumayelani, mi ku, ‘Mfumo wa matilo wu tshinele.’” (Mat. 10:7) Hikwalaho, eka vusiku byebyo byo hetelela, u va khutaze leswaku va tiyisela, eka ntirho lowu a va ri karhi va wu endla. (Mat. 24:13; Mar. 3:14) Ku hetisisa xileriso xa Yesu a swi nga olovi kambe a va ta swi kota kutani va tshama va ri vanghana vakwe. Njhani? Hi ku pfuniwa hi nyiko yin’wana.

17, 18. (a) Hi yihi nyiko leyi boxiweke eka Yohane 15:16? (b) Xana nyiko yoleyo a yi ta va pfuna njhani vadyondzisiwa va Yesu? (c) Hi tihi tinyiko leti hi tiyisaka namuntlha?

¹⁷ Nyiko ya tinhlamulo ta swikhongelo. Yesu u te: ‘Xin’wana ni xin’wana lexi mi xi kombelaka eka Tatana hi vito ra mina u ta mi nyika xona.’ (Yoh. 15:16) Anakanya ndlela leyi xi va tiyiseke ha yona vaapostola xitshembiso xexo! * Hambileswi a va nga yi twisisi hilaha ku heleleke mhaka ya leswaku Murhangeri wa vona a ta dlayiwa ku nga ri khale kambe a nga ta va siya va nga ri na nseketelo. Yehovha a a lunghekele ku hlamula swikhongelo swa vona leswaku va ta ya emahlweni ni xileriso xo chumayela rungula ra Mfumo. Entiyisweni, endzhakunyana ka sweswo va vone ndlela leyi Yehovha a hlamuleke swikhongelo swa vona ha yona.—Mint. 4:29, 31.

¹⁸ Swi tano ninamuntlha. Hi va vanghana va Yesu loko hi veka mihandzu hi ku tiyisela. Ku engetela kwalaho, hi nga tiyiseka leswaku Yehovha u lunghekele ku hlamula swikhongelo swa hina leswaku hi kota ku hlula miringo leyi hi hlanganaka na yona loko hi ri karhi hi chumayela mahungu lamanene ya Mfumo. (Filp. 4:13) Hakunene ha tsaka leswi hi nga ni lunghelo ro kuma tinhlamulo ta swikhongelo swa hina ni ku va vanghana va Yesu! Tinyiko leti, ti huma eka Yehovha naswona ti hi nyika matimba yo hambeta hi tswala mihandzu.—Yak. 1:17.

19. (a) Hikwalaho ka yini hi hambeta hi chumayela? (b) I yini leswi hi pfunaka leswaku hi hetisisa ntirho wa Xikwembu?

¹⁹ Hilaha hi dyondzeke ha kona exihlokweni lexi, hi hambeta hi chumayela leswaku hi vangamisa Yehovha ni ku kwetsimisa vito rakwe, hi leswi hi rhandzaka Yehovha na Yesu, hi leswi hi lavaka ku lemukisa vanhu ni hi leswi hi rhandzaka vaakelani. Ku engetela kwalaho, nyiko ya ntsako, ku rhula, vunghana, ni tinhlamulo ta swikhongelo swi hi nyika matimba yo hetisisa ntirho wa Xikwembu. Anakanya ndlela leyi Yehovha a tsakaka ha yona loko a hi vona hi ri karhi hi tirha hi matimba ya hina hinkwawo leswaku ‘hi hambeta hi tswala mihandzu yo tala’!