1, 2. a) ¿Ambe arhiaspi Jesusi imeri apostulichani ante de uarhini? (Exe je dibujuni enga uénakuarhu jaka). b) ¿Andisï jukaparhakue parachi kurhanguni andichisï eianhpijki? c) ¿Ambechi exea ini artikulurhu?

IMA chúri ante de uarhini, Jesusi ióni uandontskuarhispti imeri apostulicha jingoni. Arhiaspti eska kánikua uékaasïrenga. Ka eskachi na exekia máteru artikulurhu, Jesusi úraspti ilustrasioni ma ubasïri. Ini ilustrasioni jimbo, arhiaspti imeri disipuluechani eskaksï seguiripiringa kánikua frutu jukani, o sea paraksï no kuatantani eianhpini Reinueri ambe (Juanu 15:8).

² Peru Jesusi no solu arhiaspti ambe engaksï jatsipiringa para úni, sino ístu andiksïsï jatsipirini para ísï úni. Íntsaaspti rasonichani paraksï seguirini eianhpini. ¿Andisï jukaparhakue parachi sési kurhanguni ini ambe? Jimbokajtsïni jarhuataaka seguirini “eianhpi[ni] iápuru parhakpinirhu” (Mat. 24:13, 14). Ísï jimbo, exeakachi tʼámu rasonichani engajtsïni Biblia íntsaajka parachi seguirini jarhani eianhpini. Ka ístu tʼámu ambe engajtsïni Jeoba íntskujka ka engajtsïni jarhuatajka parachi seguirini jarhani eianhpini.

3. a) ¿Náki rasonijtsïni íntskusïni Juanu 15:8 para eianhpini? b) Jesusiri ilustrasionirhu, ¿ambeksï arhikuekasïni ubecha ka andisï ambakiti ejemplu máe?

³ Rasoni enga sánderu jukaparhakueka para eianhpini, jindesti  jimbokachi ísï kʼéri ambe arhisïnga Jeobani ka pímbinhajkuntanchi imeri nombri (arhinta je Juanu 15:1, 8). Ju je exeni eska ini ilustrasionirhu, Jesusi terokutantaspka imeri Tátembani komu nema enga ubasï jatsikujka. Ka Jesusi terokukuarhintaspti komu ubasïri planta ma ka uandaspti eska imeri chúxapatichaksï jindespka ramecha (Juanu 15:5). Jimajkani, ini ilustrasionirhu ubechaksï arhikuekasïndi Reinueri frutu engaksï Kristueri chúxapaticha niárajka úni. Jesusi arhiaspti apostulichani: “Engajtsï cha jukaaka kánikua fruta, indeni jimbo kʼéri ambe arhinhaati juchiti Táti”. Ísï eska ánchikuarhiri ma na sési exenhajka enga planta ubasïri ambakiti uba jukajka, juchajtuchi kʼéri ambe arhisïnga Jeobani engachi eianhpijka Reinueri ambe xáni eskachi xáni uáka (Mat. 25:20-23).

4. a) ¿Nénachi xáni pímbinhajkuntasïni Tata Diosïri nombrini? b) ¿Nénajtsï pʼikuarherasïni pribilejiu jimbo para pímbinhajkuntani Tata Diosïri nombrini?

⁴ Eskachi na exekia, ístuchi pímbinhajkuntasïnga Tata Diosïri nombrini engachi eianhpijka. ¿Nénachi ísï úsïni? Ísïsti eskachi jucha no uáka sánderu pímbinhajkuntani, jimboka ima kʼamakʼamasï pímbinhasïska. Peru ju je exeni ambe enga karapka profeta Isaiasi: “Jeoba ejersituecheri... Imaesti engajtsï cha jatsika para pímbinhasï exeni” (Is. 8:13). Jimajkani, ma ambe engachi uáka úni para pímbinhajkuntani Tata Diosïri nombrini, jindesti ísï exeni eska kánikua jukaparhakueska, sánderu eska náki uéjki máteru nombri ka jarhuatapariani máteruechani kurhanguni eska pímbinhasïska (Mat. 6:9). Por ejemplu, engachi eianhpijka na enga jásïika Jeoba ka ambe enga aiakuajka kʼuiripuechani, kuájpini jarhasïngachi Tata Diosïri nombrini chkuanderakueri ambe enga Noambakiti uandapka para no sési pakatani imeri nombrini (Gén. 3:1-5). Ístuchi pímbinhajkuntasïnga engachi jánguarhintajka territoriurhu anapu kʼuiripuni jarhuatani kurhanguni eska Jeoba ‘jukanchaska tʼíntskua intsïnhani ka arhinhani eska kʼéri ambeeska ka uinhapikua jatsini’ (Jaŋ. 4:11). Rune, enga diesiseisi uéxurhini prekursorikia, uandasïndi: “Kánikua agradesidu pʼikuarherasïnga engarini Kuerajpiri íntskuka sésikua parani imeri testigueni. Inde amberini jarhuatasïndi parani seguirini jarhani eianhpini”.

5. a) Seguni Juanu 15:9, 10, ¿náki jindeski máteru rasoni engachi jimbo eianhpijka? b) ¿Néna xarhataspi Jesusi eska uétarhisïnga tekantskua jatsini?

⁵ (Arhinta je Juanu 15:9, 10). Máteru rasoni engachi jimbo eianhpijka, jindesti jimbokachi kánikua xénchasïnga Jeobani ka Jesusini (Mar. 12:30; Juanu 14:15). Jesusi arhiaspti imeri chúxapatichani eskaksï méntku jauenapiringa imeri uékperakuarhu jarhani. ¿Andi? Jimboka uétarhisïnga tekantskua jatsini para méntkisï kristianu máeni. Jesusi xarhataspti na enga xáni jukaparhakueka tekantani, someni úraparini uandakuani méntku jauenani, karakatarhu enga Juanu 15:4-10 jaka.

6. ¿Nénachi xarhatasïni eskachi uékasïnga Jesusiri uékperakuarhu jarhani?

⁶ ¿Nénachi xarhatasïni eskachi uékasïnga Jesusiri uékperakuarhu jarhani ka eskajtsïni jeiapanhintaaka? Úparini ambe engajtsïni juramuchijka, o sea kurhajchani Jesusini. Imajtsïni imani ambejkusï kurhachijti enga ima mísmu újka, jimbosï uandapti: “Májku jásï eskani ji na janhanharhijka ambe engarini juchiti Táti juramuchika, jíksïni méntku jauenaaka uékani májku jásï eskarini Táti na uékajka jíndeni”. Ísïsti, ima jindesti juchari ambakiti ejemplu (Juanu 13:15).

7. ¿Néna sáno májkueniski kurhandirakua uékperakua jingoni?

⁷ Jesusi xarhataspti eska kurhandirakua ka uékperakua sáno májkueniska enga arhiapka imeri apostulichani: “Ima enga jatsiaka juchiti mandamientuechani ka úni eskani ji na uandajka, ima jindesti engarini uékajka” (Juanu 14:21). Ístu, engachi kurhajchajka Jesusini ka  niranchi eianhpini, xarhatani jarhasïngachi eskachi uékasïnga Tata Diosïni. ¿Andi? Jimboka ambe engajtsïni Jesusi juramuchijka terokuntasïnga imeri Tátemberi eratsikua jingoni (Mat. 17:5; Juanu 8:28). Jeoba ka Jesusi, ístujtsïni xarhatachisïndi uékperakua engachi juchajtu xarhatakuajka uékperakua.

8, 9. a) ¿Náki máteru rasoni jimbochi eianhpisïni? b) ¿Andijtsïnisï jarhuatajki parachi seguirini eianhpini ambe enga arhijka Ezequiel 3:18, 19 ka 18:23?

⁸ Ístu, máteru rasoni engachi jimbo seguirijka eianhpini, jindesti eskachi uékasïnga eianguni kʼuiripuni Jeobaeri juisiueri ambe. Biblia arhisïndi eska Noe jurhimbikueri ambe aianhpisïrenga (arhinta je 2 Pedru 2:5). Kurhangusïngachi eska imeri mensaji ístu jindespka aianhpini eska nóteru ióndani kʼamajkunhapiringa ambe ma. ¿Andichisï ísï uandajki? Ju je exeni ambe enga Jesusi uandapka: “Jimboka enga nótki janoaenga kʼéri janikua, tʼirenhaxapka ka itsïmanhani. Tembuchanhaxapti ka uambuchanhani asta imani jurhiatikua jimbo enga Noe jatapka barkurhu. Ka útasï nótkiksï jánhaskasïrendi [“nóksï kasu úspti”, TNM] astaka úndapka janini, ka iáminduecha ogarinksï. Ka ístu úkuarhiati enga Uájpa Achatiri junguaka” (Mat. 24:38, 39). Nájkirukaksï kʼuiripuecha no kurhajchenga, Noe kumplirispti ánchikuarhita jingoni de adbertirikuni kʼuiripuni.

⁹ Iásï, eiangusïngachi kʼuiripuni Reinueri ambe paraksï imecha úni mítini ambe enga Tata Diosï uéjka para kʼuiripuecha. Ísï eska Jeoba, juchajtuchi meru uékasïnga eskaksï kurhauaka ambe engachi eianhpijka ka eskaksï seguiriuaka irekani (Ezeq. 18:23). Ístu, eianhpini kʼumanchikuecharhu ka jimesï enga uánikua jánhajka, íntskusïndijtsïni sésikua parachi sánderu uánikuechani eianguani eska no ióndani Tata Diosïri Reinu kʼamajkuaka no sési jásï ambe (Ezeq. 3:18, 19; Dan. 2:44; Jaŋ. 14:6, 7).

10. a) Seguni Mateu 22:39, ¿náki jindeski máteru rasoni engachi jimbo eianhpijka? b) Uandanta je na engaksï Pablu ka Silasi jarhuatapka kárseliri kuárini jini Filipusi.

¹⁰ Ju je exeni máteru rasoni engachi jatsika para seguirini eianhpini: uékasïngachi kʼuiripuni (Mat. 22:39). Mítiskachi eska kʼuiripu mójtakurhisïnga enga no sési ambe nitamanchajka. Uékperakua imecha jimbo, jarhuatasïndijtsïni parachi seguirini eianhpini. Ju je eratsini ambe engaksï úkuarhinchapka Pablu ka Silasi, jini Filipusi. Ikiatspitichaksï ónhaaspti. Peru terujkani chúrisï, ma repentku kʼéri ma jenchespti ka iámindu kárseliri puertechaksï mítakuarhispti. Kárseliri kuári, chérakuarhispti jimboka eratsisïrenga eskaksï sïpakuarhispkia ima engaksï ónhakata japka, jimbosï uékaendi uándikukuarhini. Peru Pablu uinhachaparini arhispti eska no ísï úpiringa. Chéparini, kuári kurhanguarhispti: “¿Ambe uétarhisïni eskani uáka parani pʼímutantskata jarhani?”. Imaksï arhispti: “Jakajku tata Jesukristuni ka pʼímutantskateakari” (Uku. 16:25-34).

11, 12. a) ¿Ambejtsïni jorhendasïni eianhpikueri ambe, kuáriri uandantskua? b) ¿Andichisï uéjki seguirini eianhpini?

¹¹ ¿Ambejtsïni jorhendasïni i uandantskua eianhperakueri ambe? Exesïngachi eska kárseliri kuári mójtakuspka imeri eratsikuani  ka kurhajkuarhini jarhuajperata enga na nitamapkia jenchekua. Májkueni, a lo mejori máru engaksï no uéjka kurhani Bibliaeri ambe, jamberiksï jiáni mójtakuatia imecheri eratsikua ka kurhajkuarhinksï jarhuajperata engaksï no sési ambe nitamakuarhiaka. Por ejemplu, máruksï no jánhaskasïndi ambe úni engaksï tsïtajka ánchikuarhitani, diborsiarikuarhini, pʼamenchakua maksï exeminhantani oksï uarhiranchani nemani. Enga í jásï ambe úkuarhijka, kʼuiripu jiáni uénasïndia kurhamarhikuarhini tsípikueri ambe, ambe ma enga no méni kurhamarhikuarhipka. Jamberiksï ísï uandajti eska kárseliri kuári: “¿Ambe uétarhisïni eskani uáka parani pʼímutantskata jarhani?”. Engachi exeantajka eianhpikuarhu, jamberiksï jiáni uékaati kurhaani erokuarhikueri ambe.

¹² Ísï jimbo, engachi seguiriska eianhpini, uákachi sési pʼikuastantaani kʼuiripuechani, jiáni engaksï uékaaka kurhani eianhpikuani (Is. 61:1). Charlotte, enga treintaiochu uéxurhini marhuakia tiempu kompletueri, uandasïndi: “Iásï anapu kʼuiripu, no jánhaskasïndi ambe úni. Uétarhinchasïndi kurhaani ambakiti eianhperakuani”. Ka Ejvor, pirenchi ma enga treintaikuatru uéxurhini prekursorekia, uandasïndi: “No méni xáni uáni kʼuiripu jarhaspti enga xáni no sési pʼikuarherajka. Uékasïnga jarhuataani, jimbosïni seguirini jaka predikarini”. Ísïsti, uékani kʼuiripuni ambakiti rasoni máesti parachi seguirini jarhani eianhpini.

13, 14. a) ¿Nákiski regalu enga Juanu 15:11 uandajka? b) ¿Nénachi uá juchajtu májkueni jásï tsípikuarhita jatsini eska Jesusi? c) ¿Nénajtsïni jarhuatasïni i tsípikuarhita juchari eianhpikuarhu?

¹³ Ima últimu chúri enga Jesusi Echerirhu japka, ístu arhiaspti apostulichani eska Jeoba uánikua regalu íntsaaspka enga jarhuataapiringa seguirini jarhani eianhpini. ¿Nákiskiksï? Ka ¿nénajtsïni marhuachisïni?

¹⁴ Tsípikuarhita. ¿Karga máe uá para jucha kumplirini Jesusiri juramukuani de eianhpini? Nómbe. Enga na ubasïri ambe uandapkia, Jesusijtsïni asegurarichispti eskachi májkueni jásï tsípikuarhita jatsiaka eska ima engachi eianhpiska Reinueri ambe (arhinta je Juanu 15:11). ¿Andi? Jimboka eskachi na exekia, ima ísï terokutakuarhispti komueska ubasïri planta ma ka uandaspti eskaksï imeri disipuluecha ramechespka. Ramechaksï itsurhisïndi plantarhu uératini itsï ka nutrientichani mientrasi engaksï jima jukaxkurhitini jauaka. Sáno májkueni, juchajtuchi ísï tsípini pʼikuarheraaka eska Jesusi enga újka ambe enga imeri Táti uéjka, mientrasi engachi no méni jurajkuska Jesusini ka chúngumanchi imeri ejemplu (Juanu 4:34; 17:13; 1 Ped. 2:21). Hanne, pirenchi ma enga jukari kuarenta uéxurhini prekursorekia, uandasïndi: “Tsípikuarhita engani pʼikuarherajka engani kʼamarajkia eianhpini, úsïndi eskani seguiriuaka marhuakuni Jeobani”. Ísïsti, i tsípikuarhita uinhaperantasïndijtsïni parachi seguirini predikarini, asta territoriuecharhu engaksï úkua jukaka (Mat. 5:10-12).

15. a) ¿Nákiski regalu enga Juanu 14:27 uandajka? b) ¿Nénajtsïni jarhuatasïni pínandikua parachi seguirini eianhpini?

¹⁵ Pínandikua (arhinta je Juanu 14:27). Ima mísmu chúri, Jesusi arhiaspti apostulichani: “Juchiti pínandikuani jíksïni íntskuaka”. ¿Nénajtsïni jarhuatasïni imeri pínandikua seguirini eianhpini? Engachi no jurajkujka eianhpini, jatsisïngachi pínandikua, jimbokachi mítiska eskajtsïni Jeoba ka Jesusi jeiapanhintasïnga (Sal. 149:4; Rom. 5:3, 4; Kol. 3:15). Ulf, erachi ma enga kuarentaisinku uéxurhini páni jakaia marhuani tiempu kompletueri, uandasïni: “Kánikua kuataratini junguasïnga eianhpikuarhu uératini, peru i ánchikuarhita úsïndi eskani agustu pʼikuarheraaka ka úsïndi eskani tsípikua jingoni irekaaka”. Ísïsti, kánikuachi agradeserisïnga méntkisï jatsini ini pínandikuani.

16. a) ¿Nákiski regalu enga Juanu 15:15 uandajka? b) ¿Ambeksï jatsispi para úni apostulicha paraksï seguirini jarhani Jesusiri amigueni?

 ¹⁶ Jesusiri amigueni. Enga Jesusi arhiapkia imeri apostulichani eska ima uékasïrenga eskaksï jatsipiringa tsípikuarhita, arhiaspti na enga xáni jukaparhakueka xarhatatspeni uékperakua no ma ambe erokuarhiparini (Juanu 15:11-13). Tátsekua, arhiaspti: “Jíksïni arhiska eskajtsï jindeska juchiti amiguecha”. Jesusiri amigueni, ambakiti intsïmperakua máesti. ¿Ka ambeksï jatsispi para úni apostulicha paraksï seguirini jarhani imeri amigueni? Seguirini jarhani aianhpini (arhinta je Juanu 15:14-16). Tsimani uéxurhinisï antesi, Jesusi arhiaspti apostulichani eskaksï uandantapiringa: “Auandarhu anapu juramukua janoxamtia” (Mat. 10:7). Ísï jimbo, últimu chúrikua enga Echerirhu japka, pʼímarhiaspti paraksï tekantani ka seguirini úni imani ánchikuarhitani (Mat. 24:13; Mar. 3:14). Úni ambe enga Jesusi juramupka no fásilispti, peruksï úpirindi kumplirini ka ísïksï, seguirini jarhani imeri amigueni. Ka útasteru jarhaspti máteru Jeobaeri regalu enga jarhuataapiringa.

17, 18. a) ¿Nákiski regalu enga Juanu 15:16 uandajka? b) ¿Néna jarhuataapirini inde regalu Jesusiri chúxapatichani? c) ¿Náki Jeobaeri regaluechajtsïni uinhaperantasïni iásï?

¹⁷ Mókuntskuecha juchari kómarhikuecheri. Jesusi arhiaspti apostulichani eska, méntkisï engaksï imeri nombri jimbo kurhajkuarhipiringa ambe ma, Jeoba íntsaapiringa (Juanu 15:16). I aiatsperakua kánikua uinhaperantaaspti. * Ísïspti eska Jesusi no ióni jimbo uarhipiringuia, ambe ma engaksï ima útasï no uénga kurhanguni sési. Peruksï intsïnhapirindi jarhuajperata. Engaksï kurhakupiringa Jeobani para jarhuataani eianhpini Reinueri ambe, ima mókukuantapirindi imecheri kómarhikuechani. Es masi, nóksï ióndaspti exeni na enga Jeoba mókukuantani japka (Uku. 4:29, 31).

¹⁸ Ka májkuenisti iásï. Mientrasi engachi seguirini jauaka eianhpini, Jesusiri amigueuakachi. Ístu, seguruchi jauaka eskajtsïni Jeoba mókuchentaaka engachi kurhakuaka jarhuajperata para orhepani uérakuani ójkutakuechani eianhpikuarhu (2 Kor. 4:7). Kánikuachi agradesidu jarhaska engajtsïni Jeoba mókuchentajka juchari kómarhikuechani ka eska Jesusi juchari amigueska. I ambejtsïni uinhaperantasïndi parachi seguirini jarhani eianhpini (Sant. 1:17).

19. a) ¿Andichisï seguirini jaki eianhpini? b) ¿Ambejtsïni jarhuata kʼamarani imani ánchikuarhitani engajtsïni Tata Diosï enkargarika?

¹⁹ Eskachi na exekia ini artikulurhu, seguirixakachi eianhpini jimbokachi uékasïnga kʼéri ambe arhini Jeobani ka pímbinhajkuntani imeri nombrini, xarhatani eskachi xénchasïnga Jeobani ka Jesusini, iámindu kʼuiripuechani adbertirikuani ka xarhatakuani eskachi uékaasïnga. Ístu, ima regaluecha engajtsïni Jeoba íntsaajka —tsípikuarhita, pínandikua, Jesusiri amigueni ka enga Jeoba mókuantajka juchari kómarhikuechani— uinhaperantasïndijtsïni parachi úni kʼamarani ánchikuarhitani engajtsïni Tata Diosï enkargarika. Jeoba kánikua tsípiati exeni na engachi xáni jánguarhintaaka seguirini jarhani eianhpini.