1, 2. (a) Kasi Yesu wakaŵaphalira vichi ŵasambiri ŵake mu usiku wakuti namachero wafwenge? (Wonani chithuzi chakwamba.) (b) Chifukwa wuli nyengo zose tikwenera kukumbuka chifukwa icho tikupharazgira? (c) Kasi tiwonenge vichi?

MU USIKU wakuti namachero wafwenge, Yesu wakadumbiskana na ŵapositole ŵake nyengo yitali. Iyo wakaŵasimikizgira kuti wakuŵatemwa. Kweniso wakaŵalongosolera ntharika ya mpheska, iyo tikadumbiskana mu nkhani iyo yajumpha. Yesu wakayowoya ntharika iyi kuti wakhozge ŵasambiri ŵake kuti ŵalutilire “kupambika vipambi vinandi,” icho chikung’anamura kuti ŵazizipizge pakupharazga uthenga wa Ufumu.—Yoh. 15:8.

² Kweni Yesu wakaŵaphalira waka ivyo ŵakwenera kuchita yayi, kweni wakaŵaphaliraso chifukwa icho ŵakwenera kuchitira nthena. Wakaŵaphalira vifukwa ivyo ŵakwenera kupharazgira. Chifukwa wuli ntchakuzirwa kuti nase timanye vifukwa ivi? Para tamanya vifukwa ivyo tikwenera kulutilira kupharazga, tilutilirenge kuchitira “ukaboni ku mitundu yose.” (Mat. 24:13, 14) Sono tiyeni tiwone vifukwa vinayi ivyo Malemba ghakuti tikwenera kulutilira kupharazga. Tiwonengeso vyawanangwa vinayi ivyo Yehova watipa kuti vitovwire kuzizipizga pa kupambika vipambi.

3. (a) Kasi pa Yohane 15:8 pali chifukwa wuli icho tikupharazgira? (b) Kasi mpheska zikwimira vichi mu ntharika ya Yesu, ndipo chifukwa wuli ichi ntchakupulikikwa?

³ Chifukwa chikuru icho tikupharazgira ntchakuti tikulumba Yehova na kutuŵiska zina lake. (Ŵerengani Yohane 15:1, 8.) Wonani kuti Yesu wakayaniska Adada ŵake a Yehova na mulimi wa mpheska. Yesu wakajiyaniska na mpheska ndipo ŵasambiri ŵake wakaŵayaniska na minthavi. (Yoh. 15:5) Ntheura mpheska zikwimira vipambi vya Ufumu ivyo awo ŵakulondezga Khristu ŵakupambika. Yesu wakaphalira ŵapositole ŵake kuti: “Adada ŵakupika uchindami para mukulutilira kupambika vipambi vinandi.” Mulimi wakulumbika para mpheska zake zapambika makora, ntheura nase tikulumba Yehova panji kumupa uchindami para tikulimbikira kupharazga uthenga wa Ufumu.—Mat. 25:20-23.

4. (a) Kasi tikutuŵiska wuli zina la Chiuta? (b) Kasi mukujipulika wuli kuti muli na mwaŵi wa kutuŵiska zina la Chiuta?

⁴ Kasi ntchito yithu yakupharazga yikutuŵiska wuli zina la Chiuta? Tingapangiska yayi kuti zina la Chiuta liŵe lituŵa chomene. Zina la Chiuta ndituŵa kale panji kuti ndakutowa. Wonani ivyo ntchimi Yesaya yikayowoya, yikati: “Yehova wa mawumba Ndiyo umuwonenge kuti ni mutuŵa.” (Yes. 8:13) Nthowa yimoza iyo tikutuŵiskira zina la Chiuta njakuti tikuwona kuti likuluska mazina ghose ndipo tikovwira ŵanthu kuti nawo ŵawonenge kuti ndakupatulika. (Mat. 6:9) Mwachiyelezgero, para tikupharazga tikuphalira ŵanthu mikhaliro yiwemi ya Yehova ndiposo chifukwa icho wakalengera ŵanthu. Ntheura tikuvikilira zina la Chiuta ku mautesi gha Satana. (Gen. 3:1-5) Kweniso tikutuŵiska zina la Chiuta para tikuyezgayezga kovwira ŵanthu mu chigaŵa chithu kuti ŵamanye kuti Yehova ngwakwenelera “kupokera uchindami, ntchindi na nkhongono.” (Chivu. 4:11) Rune uyo wachita upayiniya vyaka 16, wakati: “Nkhukondwa chomene kumanya kuti nili kupika mwaŵi kuchitira ukaboni Mlengi wa chilengiwa chose. Ichi chikunovwira kuti nilutilire kupharazga.”

5. (a) Kasi pa Yohane 15:9, 10 pali chifukwa wuli icho tikupharazgira? (b) Kasi Yesu wakadidimizga wuli kuzirwa kwa kuzizipizga?

⁵ Ŵerengani Yohane 15:9, 10. Chifukwa chinyake icho tikupharazgira uthenga wa Ufumu ntchakuti tikutemwa Yehova na Yesu. (Mrk. 12:30; Yoh. 14:15) Yesu wakaphalira ŵasambiri ŵake kuti ŵaŵe waka mu chitemwa chake yayi kweni ‘ŵakhalilire mu chitemwa chake.’ Chifukwa wuli? Chifukwa munthu wakwenera kuzizipizga kuti walutilire kuŵa msambiri wanadi wa Khristu. Kuti wadidimizge kukhumbikwa kwa kuzizipizga, Yesu wakayowoya mwakuwerezgawerezga mazgu ghakuti “khalilirani” agho ghakusangika pa Yohane 15:4-10.

6. Kasi tingachita wuli kuti tilongore kuti tikukhumba kukhalilira mu chitemwa cha Khristu?

⁶ Kasi tingachita wuli kuti tilongore kuti tikukhumba kukhalilira mu chitemwa cha Khristu? Tikwenera kulondezga malango gha Yesu. Mwakudumura, tingati Yesu wakutiphalira kuti, ‘Munipulikirenge.’ Yesu wakutipempha kuti tichitenge ivyo iyo wakuchita chifukwa wakati: “Nga umo nane nasungililira malango gha Adada ndipo nkhukhalilira mu chitemwa chawo.” Tikusambirako kwa Yesu pa nkhani iyi.—Yoh. 13:15.

7. Kasi pali kukolerana wuli pakati pa kupulikira na chitemwa?

⁷ Kukwambilira, Yesu wakalongora kuti pali kukolerana pakati pa kumupulikira na kumutemwa. Iyo wakaphalira ŵapositole ŵake kuti: “Waliyose uyo wali na malango ghane na kughasungilira, ndiyo wakunitemwa.” (Yoh. 14:21) Nase tikulongora kuti tikutemwa Chiuta usange tikupulikira dango la Yesu lakuti tipharazgenge chifukwa Yesu wakayowoyanga ivyo vili mu mtima wa Adada ŵake. (Mat. 17:5; Yoh. 8:28)  Yehova na Yesu ŵalutilirenge kutitemwa usange tikulongora kuti tikuŵatemwa.

8, 9. (a) Kasi ntchifukwa wuli chinyake icho tikupharazgira? (b) Kasi mazgu gha Yehova agho ghali pa Ezekiyeli 3:18, 19; 18:23 ghakutichiska wuli kuti tilutilire kupharazga?

⁸ Tiliso na chifukwa chinyake icho tikwenera kulutilira kupharazga. Tikupharazga kuti tichenjezge ŵanthu. Baibolo likuti Nowa wakaŵa “mupharazgi.” (Ŵerengani 2 Petrosi 2:5.) Apo wakapharazganga pambere Chigumula chindachitike, wakwenera kuti wakachenjezgangaso ŵanthu za pharanyiko. Chifukwa wuli tikuyowoya nthena? Wonani ivyo Yesu wakayowoya, wakati: “Chifukwa nga umo ghakaŵira mazuŵa ghara pambere Chigumula chindize, ŵanthu ŵakaryanga, ŵakamwanga, ŵanalume ŵakatoranga na ŵanakazi kutengwa, m’paka zuŵa ilo Nowa wakanjilira mu chingalaŵa, ndipo ŵakaŵikako mahara chara m’paka Chigumula chikiza na kuŵayora wose, ndimo kuŵapo kwa Mwana wa munthu kuzamuŵira.” (Mat. 24:38, 39) Nangauli ŵanthu ŵakapulikanga yayi, Nowa wakalutilira kupharazga uthenga wakuchenjezga uwo wakatumika.

⁹ Mazuŵa ghano, tikupharazga uthenga wa Ufumu kuti ŵanthu ŵamanye khumbo la Chiuta kulazga ku ŵanthu. Nga ni Yehova, nase tikukhumba kuti ŵanthu ŵapulikire uthenga withu ‘kuti ŵaŵe ŵamoyo.’ (Ezek. 18:23) Kweniso para tikupharazga nyumba na nyumba na ku malo agho kukusangika ŵanthu ŵanandi, tikuchenjezga ŵanthu ŵanandi kuti Ufumu wa Chiuta wizenge na kuwuskapo charu cha Satana ichi.—Ezek. 3:18, 19; Dan. 2:44; Chivu. 14:6, 7.

10. (a) Kasi pa Mateyu 22:39 pali chifukwa wuli icho tikupharazgira? (b) Longosorani umo Paulosi na Sila ŵakawovwilira mulinda wa jele ku Filipi.

¹⁰ Chifukwa chinyake chakuzirwa icho tikulutilira kupharazga ntchakuti: Tikutemwa ŵazengezgani ŵithu. (Mat. 22:39) Chifukwa chakuti tikutemwa ŵazengezgani ŵithu lekani tikulutilira kupharazga, ndipo tikugomezga kuti ŵanthu ŵangasintha mitima yawo para vinthu vingasintha pa umoyo wawo. Ghanaghanirani ivyo vikachitikira mpositole Paulosi na Sila. Mu msumba wa Filipi, ŵakususka ŵakaŵaponya mu jele. Pakati pa usiku, mwamabuchi kukachitika chindindindi icho chikasunkhunya jele ndipo milyango ya jele yikajulika. Mulinda wa jele wakawopa kuti ŵakayidi ŵachimbira ndipo wakaŵa pafupi kujikoma. Kweni Paulosi wakachemerezga kuti: “Kujipweteka yayi.” Mulinda wa jele wakafumba kuti: “Kasi nichitechi kuti niponoskeke?” Iwo ŵakamuphalira kuti: “Gomezga Fumu Yesu ndipo uponoskekenge.”—Mil. 16:25-34.

11, 12. (a) Kasi nkhani ya mulinda wa jele yikutovwira wuli pa ntchito yithu yakupharazga? (b) Kasi tikwenera kuŵa ŵakunozgeka kuchita vichi?

¹¹ Kasi nkhani ya mulinda wa jele yingatovwira wuli pa ntchito yithu ya kupharazga? Wonani kuti chindindindi chikati chachitika, mulinda wa jele wakasintha mtima wake ndipo wakapempha wovwiri. Ndimo vikuŵiraso mazuŵa ghano. Ŵanthu ŵanyake awo ŵakakananga uthenga wa mu Baibolo ŵakusintha mitima yawo para vinthu viheni vyaŵachitikira. Mwachiyelezgero, ŵanyake mu chigaŵa chithu ntchito  izo ŵagwira kwa vyaka vinandi zikuŵamalira mwamabuchi ndipo ŵakuhangayika. Ŵanyake ŵakusuzgika maghanoghano para nthengwa zamara waka. Ŵanyake ŵakufipa mtima chifukwa ŵakuŵa kuti ŵaŵasanga waka na matenda ghakofya, ndipo ŵanji ŵakuŵa na chitima chifukwa cha nyifwa ya ŵakutemweka ŵawo. Para ivi vyachitika, ŵanyake mwa ŵanthu aŵa ŵakwamba kufumba mafumbo agho kumanyuma ŵakaŵikangako mahara yayi. Nyengo zinyake ŵangamba kujifumba kuti, ‘Ningachita wuli kuti niponoskeke?’ Para takumana na ŵanthu ŵanthena, ŵangatemwa kupulika makani ghawemi kakwamba.

¹² Ntheura para tikulutilira kuchita ntchito yakupharazga mwakugomezgeka, tiŵenge ŵakunozgeka kupembuzga ŵanthu pa nyengo iyo ŵangapulika makani ghawemi. (Yes. 61:1) Charlotte uyo wachita uteŵeti wanyengozose vyaka 38 wakati: “Mazuŵa ghano ŵanthu ŵakuwurawura waka. Ŵakukhumba chomene kupulika makani ghawemi.” Ejvor uyo wachita upayiniya vyaka 34, wakati: “Mazuŵa ghano ŵanthu ŵanandi ŵakusuzgika maghanoghano kuluska kumanyuma kose. Nkhukhumba chomene kuŵawovwira. Ichi ndicho chikunituma kuti nipharazgenge.” Kutemwa ŵanthu ntchifukwa chikuru icho chikutituma kuti tilutilire kupharazga.

13, 14. (a) Kasi ntchawanangwa wuli icho chikuyowoyeka pa Yohane 15:11? (b) Kasi chimwemwe cha Yesu chingaŵa wuli chithu? (c) Kasi chimwemwe chingatovwira wuli pa uteŵeti withu?

¹³ Pa usiku wakuti namachero wafwenge, Yesu wakaphalira ŵapositole ŵake vyawanangwa vyakuti viŵawovwire kuzizipizga apo ŵakupambika vipambi. Kasi vyawanangwa ivi ni vichi, ndipo vingatovwira wuli?

¹⁴ Chimwemwe. Kasi ntchakusuzga kupulikira dango la Yesu lakuti tipharazgenge? Yayi. Pamanyuma pakuti walongosora ntharika ya mpheska, Yesu wakati tiŵenge ŵachimwemwe para tikupharazga uthenga wa Ufumu. (Ŵerengani Yohane 15:11.) Iyo wakatisimikizgira kuti chimwemwe chake chiŵenge chithu. Munthowa wuli? Nga umo tanguyowoyera kale, Yesu wakajiyaniska na khuni la mpheska ndipo ŵasambiri ŵake wakaŵayaniska na minthavi. Khuni la mpheska likovwira minthavi kuti yikhore. Minthavi ya mpheska yikupokera maji na chakurya, chikuru yindafumeko ku khuni la mpheska. Mwakuyana waka, tikwenera kulutilira kulondezga mendero gha Khristu mwakugomezgeka kuti tilutilire kukhalilira mu umoza na iyo. Para tachita nthena, tiŵenge na chimwemwe icho Yesu wali nacho pakuchita khumbo la Adada ŵake. (Yoh. 4:34; 17:13; 1 Pet. 2:21) Hanne uyo wachita upayiniya vyaka vyakujumpha 40, wakati: “Chimwemwe icho nkhuŵa nacho para nafuma mu uteŵeti chikunituma kuti nilutilire kuteŵetera Yehova.” Chimwemwe chanadi chikutovwira kuti tilutilire kupharazga nanga nkhu malo uko ŵanthu ŵakukana makani ghawemi.—Mat. 5:10-12.

15. (a) Kasi ntchawanangwa wuli icho chikuyowoyeka pa Yohane 14:27? (b) Chifukwa wuli mtende ukutovwira kuti tilutilire kupambika vipambi?

¹⁵ Mtende. (Ŵerengani Yohane 14:27.) Pa usiku waumaliro pambere wandafwe, Yesu wakaphalira ŵapositole ŵake kuti: “Nkhumupani mtende wane.” Kasi mtende wa Yesu ukutovwira wuli kuti tipambikenge vipambi? Para tikuzizipizga apo tikupharazga, tikuŵa na mtende wambura kumara chifukwa tikumanya kuti tikukondweska Yehova na Yesu. (Sal. 149:4; Rom. 5:3, 4; Kol. 3:15) Ulf uyo wachita uteŵeti wanyengozose vyaka 45, wakati: “Ntchito yakupharazga yikunivuska, kweni yikunikondweska chomene ndipo yikunovwira kuti niŵe wakukhorwa.” Tikuwonga chomene kuti nyengo zose tikuŵa na mtende wa mu mtima.

16. (a) Kasi ntchawanangwa wuli icho chikuyowoyeka pa Yohane 15:15? (b) Kasi ŵapositole ŵakachita wuli kuti ŵalutilire kuŵa ŵabwezi ŵa Yesu?

 ¹⁶ Ubwezi. Yesu wakati waphalira ŵapositole ŵake kuti wakukhumba kuti chimwemwe chawo “chifuluke,” wakaŵalongosolera uwemi wa kulongora chitemwa cha kujipata. (Yoh. 15:11-13) Pamanyuma wakayowoyaso kuti: “Ine namuchemani ŵabwezi.” Kuŵa ŵabwezi ŵa Yesu ntchawanangwa chapachanya chomene. Kasi ŵapositole ŵakeneranga kuchita vichi kuti ŵalutilire kuŵa ŵabwezi ŵa Yesu? Ŵakeneranga ‘kuluta na kulutilira kupambika vipambi.’ (Ŵerengani Yohane 15:14-16.) Vyaka viŵiri kumanyuma, Yesu wakasambizga ŵapositole ŵake kuti: “Apo mukuluta, mupharazgenge kuti: ‘Ufumu wakuchanya waneng’enera.’” (Mat. 10:7) Ntheura pa usiku waumaliro, Yesu wakaŵakhozga kuti ŵazizipizgenge pa ntchito iyo ŵakayiyamba. (Mat. 24:13; Mrk. 3:14) Chikaŵa chakusuzga kuti ŵachite ntchito iyo Yesu wakaŵatuma, kweni ŵakayifiska ndipo ŵakalutilira kuŵa ŵabwezi ŵake. Chifukwa wuli ŵakafiska? Tiyeni tiwone chawanangwa chinyake icho chikaŵawovwira.

17, 18. (a) Ntchawanangwa wuli icho chikuyowoyeka pa Yohane 15:16? (b) Kasi chawanangwa ichi chikawovwira wuli ŵasambiri ŵake? (c) Ni vyawanangwa wuli ivyo vikutikhozga mazuŵa ghano?

¹⁷ Malurombo ghakuzgoreka. Yesu wakati: “Chilichose icho mulombenge kwa Adada mu zina lane ŵamupaninge.” (Yoh. 15:16) Ŵapositole ŵakwenera kuti ŵakakhozgeka chomene na mazgu agha. * Nangauli ŵakapulikiska chomene yayi fundo yakuti Mulongozgi wawo wakaŵa pafupi kufwa, kweni ŵakate ŵaŵenge ŵekha yayi kwambura movwiri. Yehova wakaŵa wakunozgeka kuzgora malurombo ghawo pa chilichose icho ŵakakhumbikwiranga kuti ŵafiske ntchito yakupharazga uthenga wa Ufumu. Ivi ndivyo vikachitika nadi. Pakati pajumpha nyengo yichoko waka kufuma apo Yesu wakafwira, ŵapositole ŵakajiwonera ŵekha umo Yehova wakazgolera malurombo ghawo.—Mil. 4:29, 31.

¹⁸ Ndimo viliriso mazuŵa ghano. Tikuŵa ŵabwezi ŵa Yesu para tikuzizipizga pakupambika vipambi. Tikugomezga kuti Yehova ngwakunozgeka kuzgora malurombo ghithu kuti titonde masuzgo agho tikusangana nagho para tikupharazga makani ghawemi gha Ufumu. (Fil. 4:13) Tikuwonga chomene kuti Yehova wakuzgora malurombo ghithu kweniso tili ŵabwezi ŵa Yesu. Vyawanangwa vyakufuma kwa Yehova ivi, vikutovwira kuti tilutilire kupambika vipambi.—Yak. 1:17.

19. (a) Chifukwa wuli tikulutilira kupharazga? (b) Kasi ntchivichi chikutovwira kuti tifiske ntchito iyo Chiuta watipa?

¹⁹ Mu nkhani iyi, tasambira kuti tikulutilira kupharazga chifukwa chakuti tikukhumba kulumba Yehova na kutuŵiska zina lake, tikutemwa Yehova na Yesu, tikutemwa ŵazengezgani ŵithu, kweniso kuti tichenjezge ŵanthu. Chiuta watipaso vyawanangwa ivyo vikutovwira kuti tifiske ntchito iyo watipa. Vyawanangwa ivi ntchimwemwe, mtende, kuŵa ŵabwezi ŵa Yesu, kweniso malurombo ghithu ghakuzgoreka. Yehova wakukondwa chomene para wakuwona kuti tikuŵikapo mtima “kulutilira kupambika vipambi.”