1, 2. (a) Musi Yesu a sa athu u fa, ndi mini zwe a zwi vhudza vhafunziwa vhawe? (Sedzani tshifanyiso tsha u thoma.) (b) Ndi ngani zwi zwa ndeme uri ri dzule ri tshi humbula uri ndi ngani ri tshi huwelela? (c) Ri ḓo ṱolisisa mini?

VHUSIKUNI ha musi a sa athu u fa, Yesu o amba na vhaapostola vhawe nahone a vha khwaṱhisedza uri u a vha funa nga mbilu yoṱhe. Zwiṅwe hafhu, o dovha a vha vhudza nga ha tshifanyiso tsha munḓirivhe samusi ro zwi haseledza kha thero yo fhiraho. A tshi shumisa tshenetsho tshifanyiso, Yesu o ṱuṱuwedza vhafunziwa vhawe uri vha ‘dzule vha tshi aṋwa mitshelo minzhi’ na uri vha konḓelele musi vha tshi huwelela mulaedza wa Muvhuso.—Yoh. 15:8.

² Naho zwo ralo, Yesu ho ngo vhudza vhafunziwa vhawe zwe vha vha vha tshi fanela u zwi ita fhedzi, fhedzi o vha vhudza uri ndi ngani vha tshi fanela u zwi ita. O vha vhudza uri ndi ngani vha tshi fanela u bvela phanḓa vha tshi huwelela. Ndi ngani zwi zwa ndeme uri ri ṱolisise zwenezwo zwiitisi? Musi ri tshi dzula ri tshi humbula uri ndi ngani ri tshi fanela u bvela phanḓa ri tshi huwelela, zwi a ri ṱuṱuwedza uri ri konḓelele musi ri tshi ‘ṱanziela kha tshaka dzoṱhe.’ (Mat. 24:13, 14) Nga zwenezwo, kha ri ṱolisise zwiitisi zwiṋa zwi bvaho Maṅwaloni zwine zwa ita uri ri bvele phanḓa ri tshi huwelela. Zwiṅwe hafhu, ri ḓo ṱolisisa zwifhiwa zwiṋa zwi bvaho ha Yehova zwine zwa  ri thusa u konḓelela musi ri tshi aṋwa mitshelo.

3. (a) Ndi tshiitisi tshifhio tsha u huwelela tshi wanalaho kha Yohane 15:8? (b) Nḓirivhe dzi re kha tshifanyiso tsha Yesu dzi imela mini, nahone ndi ngani tshenetsho tshifanyiso tsho tea?

³ Tshiitisi tshihulwane tsha u shela mulenzhe kha mushumo wa u huwelela ndi u rendisa Yehova na u ita uri dzina ḽawe ḽi itwe ḽikhethwa. (Vhalani Yohane 15:1, 8.) Ṱhogomelani uri Yesu o fanyisa Khotsi awe Yehova na mulimi ane a vha na tsimu ya munḓirivhe. Yesu o ḓifanyisa na munḓirivhe kana tsinde nahone vhatevheli vhawe a vha fanyisa na matavhi. (Yoh. 15:5) Nga zwenezwo, nḓirivhe dzi fanyisela mitshelo ine vhatevheli vha Kristo vha i bveledza. Yesu o vhudza vhaapostola vhawe uri: “Khotsi anga u a ṋewa vhugala musi ni tshi dzula ni tshi aṋwa mitshelo minzhi.” Samusi munḓirivhe une wa aṋwa nḓirivhe dzavhuḓi u tshi ita uri mulimi a huliswe, nga nḓila i fanaho, ri rendisa Yehova kana u mu hulisa musi ri tshi ita zwoṱhe zwine ra nga kona u itela u huwelela mulaedza wa Muvhuso.—Mat. 25:20-23.

4. (a) Ri ita uri dzina ḽa Mudzimu ḽi itwe ḽikhethwa nga nḓila-ḓe? (b) Ni ḓipfa hani nga ndugelo ine na vha nayo ya u ita uri dzina ḽa Mudzimu ḽi itwe ḽikhethwa?

⁴ Mushumo washu wa u huwelela u ita uri dzina ḽa Mudzimu ḽi itwe ḽikhethwa nga nḓila-ḓe? Ri nga si kone u ita uri dzina ḽa Mudzimu ḽi itwe ḽikhethwa nga ho engedzeaho. Ḽo no ḓi dzula ḽi ḽikhethwa. Fhedzi ṱhogomelani zwe muporofita Yesaya a zwi amba, o ri: “Ni ḓivhe uri Yehova wa Mavhuthu ndi Mukhethwa.” (Yes. 8:13) Ri ita uri dzina ḽa Mudzimu ḽi itwe ḽikhethwa nga u ḽi khetha kha maṅwe madzina na u thusa vhaṅwe uri vha ḽi dzhie ḽi ḽikhethwa. (Mat. 6:9) Sa tsumbo, musi ri tshi funza vhathu ngoho nga ha pfaneleo dzavhuḓi dza Yehova na nga ha uri vhathu vha ḓo tshila tshoṱhe paradisoni, ri vha ri tshi khou vha thusa uri vha ḓivhe uri zwithu zwoṱhe zwi si zwavhuḓi zwe Sathane a zwi amba nga ha Mudzimu ndi mazwifhi. (Gen. 3:1-5) Zwiṅwe hafhu, musi ri tshi lwela u thusa vhathu vha re tsimuni yashu u vhona uri Yehova o fanelwa nga u ṋewa “vhugala na u huliswa na maanḓa,” ri vha ri tshi khou ita uri dzina ḽawe ḽi itwe ḽikhethwa. (Nzumb. 4:11) Muṅwe wahashu ane a pfi Rune o no fhedzaho miṅwaha ya 16 e muvulanḓila, o ri: “Zwi a ntakadza vhukuma u ḓivha uri ndo ṋewa tshibuli tsha u ṱanziela nga ha Musiki wa fhethu hoṱhe. Zwi ita uri ndi takalele u bvela phanḓa ndi tshi huwelela.”

5. (a) Ndi tshiitisi tshifhio tsha u huwelela tsho bulwaho kha Yohane 15:9, 10? (b) Yesu o ombedzela hani nḓila ine u konḓelela zwa vha zwa ndeme ngayo?

⁵ Vhalani Yohane 15:9, 10. Tshiitisi tshihulwane tsha u huwelela mulaedza wa Muvhuso ndi uri ri funa Yehova na Yesu. (Marko 12:30; Yoh. 14:15) Yesu o vhudza vhafunziwa vhawe uri vha ‘dzule vha tshi mu funa.’ Ndi ngani? Ndi nga nṱhani ha uri ri fanela u konḓelela u itela uri ri tshile sa vhafunziwa vha Kristo vha ngoho. Kha Yohane 15:4-10, Yesu o shumisa lunzhi ipfi “dzulani,” u itela u ombedzela nḓila ine u konḓelela zwa vha zwa ndeme ngayo.

6. Ri sumbedza hani uri ri ṱoḓa u dzula ri tshi funwa nga Kristo?

⁶ Ri sumbedza hani uri ri ṱoḓa u dzula ri tshi funwa nga Kristo na u takalelwa ngae? Ri zwi sumbedza nga u tevhedza ndaela dza Yesu. Yesu o ri vhudza uri ri mu thetshelese. Yesu o ri humbela fhedzi uri ri ite zwe na ene muṋe a zwi ita, ngauri o dovha a ri: “Vhunga na nṋe ndo tevhedza ndaela dza Khotsi, nahone a dzula a tshi mpfuna.” Yesu o ri vhetshela tsumbo.—Yoh. 13:15.

7. U thetshelesa zwi tshimbidzana hani na lufuno?

⁷ Yesu o zwi sumbedzisa zwavhuḓi uri u thetshelesa zwi tshimbidzana na lufuno. O vhudza vhaapostola vhawe uri: “Ane a ḓivha ndaela dzanga nahone a dzi tevhedza ndi ene ane a mpfuna.” (Yoh. 14:21) Zwiṅwe hafhu, musi ri tshi thetshelesa ndaela ya Yesu ya u ya u huwelela, na riṋe ri vha ri tshi khou sumbedza uri ri  funa Mudzimu ngauri ndaela dza Yesu dzi sumbedza zwine Khotsi awe a zwi humbula. (Mat. 17:5; Yoh. 8:28) Musi ri tshi funa Yehova na Yesu, na vhone vha ḓo dzula vha tshi ri funa.

8, 9. (a) Ndi tshifhio tshiṅwe tshiitisi tsha u huwelela? (b) Ndi ngani maipfi a Yehova a re kha Hesekiele 3:18, 19 na 18:23 a tshi ri ṱuṱuwedza u bvela phanḓa ri tshi huwelela?

⁸ Hu na tshiṅwe tshiitisi tsha u bvela phanḓa ri tshi huwelela. Ri huwelela u itela u tsivhudza vhathu. Bivhilini, Noaxe o ṱaluswa sa muthu we a vha tshi “huwelela.” (Vhalani 2 Petro 2:5.) Musi hu sa athu u ḓa Maḓi Mahulu, mulaedza we Noaxe a u vhudza vhathu wo vha u tshi katela na tsivhudzo ya u fheliswa he ha vha hu tshi ḓo vha hone. Ndi ngani ri tshi nga amba nga u ralo? Ṱhogomelani zwe Yesu a zwi amba: “Samusi zwo vha zwo tou ralo musi hu sa athu vha na Maḓi Mahulu, vhathu vho vha vha tshi ḽa, vha tshi nwa, vha tshi vhinga vha tshi vhingwa, ha vhuya ha swika ḓuvha ḽe Noaxe a dzhena ngaḽo gungwani, nahone a vho ngo ṱhogomela tshithu u swika hu tshi vha na Maḓi Mahulu nahone a vha kumba vhoṱhe, na u vha hone ha Murwa-muthu zwi ḓo tou ralo.” (Mat. 24:38, 39) Hu sa londwi nḓila i si yavhuḓi ye vhathu vha aravha ngayo, Noaxe o bvela phanḓa a tshi tsivhudza vhathu nga u fulufhedzea samusi Mudzimu o vha o mu vhudza uri a ite nga u ralo.

⁹ Ṋamusi, ri huwelela mulaedza wa Muvhuso u itela uri vhathu vha vhe na tshibuli tsha u guda nga ha zwine Mudzimu a ḓo zwi itela vhathu. U fana na Yehova, ri tama nga mbilu dzoṱhe uri vhathu vha ṱanganedze wonoyu mulaedza nahone vha ‘hanye.’ (Hesek. 18:23) Musi ri tshi huwelela nnḓu nga nnḓu na fhethu ha vhomuthumunzhi, ri tsivhudza vhathu vhanzhi nga hune zwa nga konadzea ngaho uri Muvhuso wa Mudzimu u ḓo ḓa nahone wa fhelisa vhathu vhavhi kha ḽino shango.—Hesek. 3:18, 19; Dan. 2:44; Nzumb. 14:6, 7.

10. (a) Ndi tshiitisi tshifhio tsha u huwelela tsho bulwaho kha Mateo 22:39? (b) Ṱalutshedzani nḓila ye Paulo na Silasi vha thusa ngayo mulindadzhele ngei Filipi.

¹⁰ Tshiṅwe tshiitisi tsha ndeme tsha u bvela phanḓa ri tshi huwelela ndi hetshi: Ri huwelela ngauri ri funa vhahura vhashu. (Mat. 22:39) Lwonolu lufuno lu ita uri ri konḓelele kha wonoyu mushumo wa u huwelela ngauri ri a ḓivha uri vhathu vha nga shanduka musi zwiimo zwavho zwi tshi shanduka. Ṱhogomelani zwe zwa itea kha muapostola Paulo na khonani yawe Silasi. Vhahanedzi vho vha valela dzhele ḓoroboni ya ngei Filipi. Nga zwenezwo, vhukati ha vhusiku ho vha na mudzinginyo muhulu we wa dzinginyisa dzhele nahone mavothi a vulea. Mulindadzhele o vha o tshuwa uri zwivhotshwa zwo shavha nahone o vha a tshi ṱoḓa u ḓivhulaya. Fhedzi Paulo o vhidzelela a ri: “U songo ḓihuvhadza!” Onoyo mulindadzhele o vhudzisa o ṱungufhala a ri: “Ndi fanela u ita mini uri ndi tshidzwe?” Vha mu vhudza uri: “Tenda Murena Yesu nahone u ḓo tshidzwa.”—Mish. 16:25-34.

11, 12. (a) Mafhungo a mulindadzhele a tshimbidzana hani na mushumo washu wa u huwelela? (b) Ndi ngani ri tshi ṱoḓa u bvela phanḓa ri tshi huwelela?

¹¹ Mafhungo a mulindadzhele a tshimbidzana hani na mushumo washu wa u huwelela? Ṱhogomelani uri ndi nga murahu ha mudzinginyo he mulindadzhele a shanduka nahone a  humbela thuso. Nga hu fanaho, vhaṅwe vhathu vhe mathomoni vha si ṱanganedze mulaedza wa Bivhili, vha nga shanduka nahone vha ṱoḓa thuso nga nṱhani ha zwithu zwi si zwavhuḓi zwe zwa itea vhutshiloni havho. Sa tsumbo, vhaṅwe vhane ra vha wana tsimuni yashu vha nga vha vho tsikeledzea nga nṱhani ha uri vho xelelwa nga mishumo vha songo zwi lavhelela. Vhaṅwe vha nga tsikeledzwa nga nṱhani ha u ṱaliwa. Nahone vhaṅwe vha nga tsikeledzwa nga nṱhani ha u vha na vhulwadze vhu sa lafhei kana u pfa vhuṱungu nge vha felwa nga ane vha mu funa. Musi zwenezwi zwithu zwi tshi itea, vhathu vho tsikeledzeaho vha nga vhudzisa mbudziso nga ha vhutshilo, mbudziso dze vha vha vha sa humbuli nga hadzo u thomani. Khamusi vha ita na u ḓivhudzisa uri, ‘Ndi fanela u ita mini uri ndi tshidzwe?’ Musi ri tshi ṱangana navho, vha nga ṱoḓa u thetshelesa lwa u tou thoma mulaedza washu u ambaho nga ha fulufhelo.

¹² Nga zwenezwo, musi ri tshi bvela phanḓa ri tshi huwelela nga u fulufhedzea, ri vha ri tshi khou ita vhungoho ha uri ri ḓo kona u khuthadza vhathu musi vho no lugela u ṱanganedza mulaedza washu. (Yes. 61:1) Charlotte o no fhedzaho miṅwaha ya 38 e tshumeloni ya tshifhinga tsho ḓalaho, o ri: “Vhathu musalauno vho xela. Vha fanela u vhudzwa mafhungo maḓifha.” Ṱhogomelani zwe zwa ambiwa nga Ejvor ane a vha na miṅwaha ya 34 e muvulanḓila, o ri: “Vhathu vhanzhi ṋamusi vho tsikeledzea u fhira naho hu lini. Ndi ṱoḓa u vha thusa. Zwenezwo zwi nṱuṱuwedza uri ndi huwelele.” Ndi ngoho uri u funa vhahura vhashu ndi tshone tshiitisi tsha ndeme tshine tsha ita uri ri bvele phanḓa ri tshi huwelela!

13, 14. (a) Ndi tshifhiwa tshifhio tshe ha ambiwa nga hatsho kha Yohane 15:11? (b) Ri ḓo takala u fana na Yesu nga nḓila-ḓe? (c) U takala zwi kwama vhuḓinḓa hashu nga nḓila-ḓe?

¹³ Vhusikuni hawe ha u fhedzisela musi a sa athu u fa, Yesu o dovha a vhudza vhaapostola vhawe nga ha zwifhiwa zwine zwa ḓo vha thusa u konḓelela musi vha tshi aṋwa mitshelo. Zwenezwi zwifhiwa ndi mini nahone ri vhuyelwa hani ngazwo?

¹⁴ Tshifhiwa tshine tsha vha dakalo. Naa u thetshelesa ndaela ya Yesu ya u huwelela ndi muhwalo? Na khathihi. Musi o no amba nga ha tshifanyiso tsha munḓirivhe, Yesu o amba uri vhahuweleli vha Muvhuso vha ḓo takala. (Vhalani Yohane 15:11.) Vhukuma, o ri khwaṱhisedza uri ri ḓo takala u fana nae. Nga nḓila-ḓe? Samusi zwo bulwa mathomoni, Yesu o ḓifanyisa na munḓirivhe nahone vhafunziwa vhawe a vha fanyisa na matavhi. Tsinde ḽa munḓirivhe ḽi tikedza matavhi. Matavhi a wana maḓi na zwiḽiwa kha munḓirivhe arali fhedzi a songo vunḓea. Nga hu fanaho, arali ra dzula ri na vhuthihi na Kristo nga u tevhela ṋayo dzawe nga vhuronwane, ri ḓo takala u fana na nḓila ine a takala ngayo musi a tshi ita zwi funwaho nga Khotsi awe. (Yoh. 4:34; 17:13; 1 Pet. 2:21) Ṱhogomelani zwe zwa ambiwa nga Hanne ane a vha na miṅwaha i fhiraho 40 e muvulanḓila, o ri, “Dakalo ḽine nda ḽi wana musi ndi tshi bva vhuḓinḓani ḽi ita uri ndi bvele phanḓa tshumeloni ya Yehova.” Ndi ngoho uri dakalo ḽi ri thusa uri ri bvele phanḓa ri tshi huwelela naho ri tshi huwelela kha tsimu dzi konḓaho.—Mat. 5:10-12.

15. (a) Ndi tshifhiwa tshifhio tsho bulwaho kha Yohane 14:27? (b) Ndi ngani mulalo u tshi ri thusa u dzula ri tshi aṋwa mitshelo?

¹⁵ Tshifhiwa tshine tsha vha mulalo. (Vhalani Yohane 14:27.) Vhusikuni hawe ha u fhedzisela musi a sa athu u fa, Yesu o vhudza vhaapostola vhawe a ri: “Ndi ni ṋea mulalo wanga.” Tshenetsho tshifhiwa tshine tsha vha mulalo wawe tshi ri thusa hani u aṋwa mitshelo? Musi ri tshi konḓelela, ri vha na mulalo u sa fheli une wa ḓiswa nga u ḓivha uri ri khou takadza Yehova na Yesu. (Ps. 149:4; Vharoma 5:3, 4; Vhakol. 3:15) Ulf o no fhedzaho miṅwaha ya 45 e tshumeloni ya tshifhinga tsho ḓalaho, o ri, “Mushumo wa u huwelela u ita uri ndi nete, fhedzi u ita uri ndi fushee na u ḓivha uri ndi  khou tshilela mini.” Ri livhuwa vhukuma uri ro fhaṱutshedzwa nga mulalo u sa fheli!

16. (a) Ndi tshifhiwa tshifhio tsho bulwaho kha Yohane 15:15? (b) Vhaapostola vho vha vha tshi nga dzula hani vhe khonani dza Yesu?

¹⁶ Tshifhiwa tshine tsha vha vhukonani. Musi Yesu o no vhudza vhaapostola vhawe uri u ṱoḓa uri vha “takale,” o vha ṱalutshedza nḓila ine u funa nga mbilu yoṱhe zwa vha zwa ndeme ngayo. (Yoh. 15:11-13) O dovha a ri: “Ndo ni vhidza dzikhonani.” U vha khonani ya Yesu ndi tshifhiwa tshavhuḓi vhukuma tshine ra tshi wana! Vhaapostola vho vha vha tshi fanela u ita mini uri vha dzule vhe khonani dzawe? Vho vha vha tshi fanela u ‘bvela phanḓa vha tshi aṋwa mitshelo.’ (Vhalani Yohane 15:14-16.) Miṅwahani i ṱoḓaho u vha mivhili, Yesu o vhudza vhaapostola vhawe uri: “Musi ni tshi khou tshimbila, ni huwelele, ni ri: ‘Muvhuso wa ṱaḓulu u tsini.’” (Mat. 10:7) Nga honoho vhusiku hawe ha u fhedza, o vha ṱuṱuwedza uri vha konḓelele kha mushumo we vha u thoma. (Mat. 24:13; Marko 3:14) Yesu o vha a tshi zwi ḓivha uri zwenezwo zwo vha zwi sa ḓo leluwa, fhedzi vho vha vha tshi nga zwi kona nahone vha dzula vhe khonani dzawe. Nga nḓila-ḓe? Vho vha vha tshi ḓo thuswa nga tshiṅwe tshifhiwa.

17, 18. (a) Ndi tshifhiwa tshifhio tsho bulwaho kha Yohane 15:16? (b) Tshenetsho tshifhiwa tsho thusa hani vhafunziwa vha Yesu? (c) Ndi zwifhiwa zwifhio zwine zwa ri thusa ṋamusi?

¹⁷ Tshifhiwa tshine tsha vha u fhindulwa ha thabelo. Yesu o ri: ‘Khotsi u ḓo ni ṋea tshiṅwe na tshiṅwe tshine na humbela dzinani ḽanga.’ (Yoh. 15:16) Ḽeneḽi fulufhedziso ḽi fanela u vha ḽo khwaṱhisa vhukuma vhaapostola! * Naho vha songo pfesesa zwavhuḓi ḽeneḽo fulufhedziso, fhedzi vho vha vha tshi ḓo wana thikhedzo musi Murangaphanḓa wavho a tshi ṱuwa kha ḽifhasi. Yehova o vha o ḓiimisela u fhindula thabelo dzavho kha zwoṱhe zwine vha zwi ṱoḓa u itela u bvela phanḓa vha tshi huwelela mulaedza wa Muvhuso. Nga murahu musi Yesu o no fa, vhaapostola vho humbela Yehova uri a vha ṋee tshivhindi nahone o fhindula thabelo dzavho.—Mish. 4:29, 31.

¹⁸ Zwo tou ralo na ṋamusi. Musi ri tshi aṋwa mitshelo nga u konḓelela, ri ḓifhelwa nga u vha khonani dza Yesu. Zwiṅwe hafhu, ri nga vha na vhungoho ha uri Yehova o ḓiimisela u fhindula thabelo dzashu u itela u ri thusa u kunda zwithithisi zwine ra nga sedzana nazwo musi ri tshi huwelela mafhungo maḓifha a Muvhuso. (Vhafil. 4:13) Ri livhuwa vhukuma uri ro fhaṱutshedzwa nga u vha khonani dza Yesu na u fhindulwa ha thabelo dzashu! Zwenezwi zwifhiwa zwi bvaho ha Yehova zwi ri thusa uri ri bvele phanḓa ri tshi aṋwa mitshelo.—Yak. 1:17.

19. (a) Ndi ngani ri tshi dzula ri tshi shela mulenzhe kha mushumo wa u huwelela? (b) Ndi mini zwine zwa ri thusa u khunyeledza mushumo wa Mudzimu?

¹⁹ Samusi ro zwi ṱolisisa kha ino thero, ri dzula ri tshi shela mulenzhe kha mushumo wa u huwelela u itela u rendisa Yehova na u ita uri dzina ḽawe ḽi itwe ḽikhethwa, u funa Yehova na Yesu, u tsivhudza vhathu na u funa vhahura vhashu. Zwiṅwe hafhu, zwifhiwa zwine zwa vha dakalo, mulalo, vhukonani na u fhindulwa ha thabelo dzashu, zwi ri thusa uri ri khunyeledze mushumo wa Mudzimu. Yehova u ḓo takala vhukuma musi a tshi vhona vhuḓidini hoṱhe vhune ra vhu ita ha u “dzula [ri] tshi aṋwa mitshelo minzhi”!