1, 2. a) ¿Xidé guniʼné Jesús ca discípulo stiʼ ante gatiʼ? (Biiyaʼ dibuju ni zeeda ra ruzulú tema riʼ). b) ¿Xiñee cadi naquiiñeʼ guiaandaʼ laanu ca razón ni nápanu para guni predicarnu? c) ¿Xi chiguizíʼdinu lu tema riʼ?

GUEELAʼ ante gatiʼ Jesús, xadxí byuíʼnebe ca apóstol stibe diidxaʼ. Gúdxibe laacaʼ guizáʼ nadxiibe laacaʼ. Ne casi bizíʼdinu lu tema gudiʼdiʼ que, bichaagabe laabe ti yaga uva. Guluube gana ca discípulo stibe ora gúdxibe laacaʼ cadi gusaanacaʼ de cueenducaʼ ni galán lu dxiiñaʼ ni cayúnicaʼ o cadi gusaana de guni predicarcaʼ stiidxaʼ Reinu (Juan 15: 8).

² Peru cadi gudxi si Jesús laacabe xi gúnicabe, sínuque laaca bisiene laacabe xiñee naquiiñeʼ gúnicabe ni. Gúdxibe laacaʼ xi razón nuu para cadi gusaana de guni predicarcaʼ. ¿Xiñee cadi naquiiñeʼ guiaandaʼ laanu ca razón ni nápanu para guni predicarnu yaʼ? Purtiʼ zaguu ni gana laanu para cadi gusaana de guni predicarnu ca noticia galán stiʼ Reinu para ganna guiráʼ xixé guidxi ni (Mat. 24:13, 14). Nga runi, zazíʼdinu tapa razón ni rudii Biblia laanu para guni predicarnu. Laaca zazíʼdinu rudii Jiobá laanu tapa cosa ni racané laanu para cadi gusaana de guni predicarnu.

3. a) ¿Xi razón rudii Juan 15:8 laanu para guni predicarnu? b) ¿Xii nga zeeda gaca ca uva ni bizeeteʼ Jesús lu parábola stiʼ ne xiñee biaʼsi ni?

³ Razón jma risaca nápanu para guni predicarnu nga purtiʼ rusisácanu Jiobá ne racanenu guiá o gaca santificar labe (biindaʼ Juan 15:1, 8). Lu parábola riʼ bichaaga Jesús Bixhoze casi ti hombre ni rapa lubáʼ uva. Guniʼbe laabe nga zeeda gácabe lubáʼ uva que ne ca xpínnibe nga zeeda gaca ca rama stiʼ lubáʼ que (Juan 15:5). Nga runi biaʼsi ca uva ca nga zeeda gaca cani ni ribeendú ca xpinni Cristu ora runi predicarcaʼ stiidxaʼ Reinu. Sicaríʼ gudxi Jesús ca apóstol stiʼ: «Zusisaca tu Bixhoze pa iree ndu ni cayuni tu lu xhiiña». Rusisácanu Jiobá ora rúninu stipa pur guni predicarnu stiidxaʼ Reinu jma galán, cásica rusisácacabe ti hombre ni rudxiibaʼ uva ora rudii uva galán lu layú stiʼ (Mat. 25:20-23).

4. a) ¿Ximodo racanenu gaca santificar lá Dios? b) ¿Xi runi sentirluʼ pur privilegiu ni nápaluʼ de gacaneluʼ gaca santificar lá Dios?

⁴ Ora runi predicarnu, laaca racanenu para gaca santificar lá Dios. ¿Ximodo racanenu gaca santificar o guiá labe pa maca nayá ni yaʼ? Guidúʼyanu xi bizeeteʼ profeta Isaías: «Jiobá stiʼ ca ejércitu... laabe nga naquiiñeʼ guni santificartu» (Is. 8:13). Nga runi, ti modo zanda gacanenu para gaca santificar lá Dios nga ora rusisácanu ni purtiʼ gástiruʼ stobi casi laani, ne ora racanenu xcaadxi binni gánnacaʼ nayá lá Jiobá o Santu ni (Mat. 6:9). Ora rininu de ca cualidad sicarú ni napa Jiobá ne de cani cayuni prometerbe para binni guidxilayú la? zacá nga runi defendernu lá Dios de guiráʼ cosa ni cadi dxandíʼ guníʼ Binidxabaʼ de laabe (Gén. 3:1-5). Laaca racanenu gaca santificar labe ora racanenu ca binni ni nuu lu territorio stinu gudiicaʼ cuenta runi merecer Jiobá gudxíʼbanu laa, gusisácanu laa ne guininu nápabe poder (Apoc. 4:11). René *, ti hermanu ni napa dieciséis iza de precursor guníʼ: «Rudieeʼ xquíxepeʼ Jiobá, Dios ni bizáʼ guiráʼ ni nuu guibáʼ ne ni lu Guidxilayú, purtiʼ bidii oportunidad naa gacaʼ ti testigu stiʼ. Ne ndiʼ riguu gana naa para cadi gusaanaʼ de guneʼ predicar».

5. a) ¿Xi razón rudii Juan 15:9, 10 laanu para guni predicarnu? b) ¿Ximodo gucané Jesús ca discípulo stiʼ guiénecaʼ caquiiñeʼ guni huantarcaʼ?

⁵ (Biindaʼ Juan 15:9, 10). Sti razón risaca nápanu para guni predicarnu nga purtiʼ guizáʼ nadxiinu Jiobá ne Jesús (Mar. 12:30; Juan 14:15). Gudxi Jesús ca discípulo stiʼ cadi gusaanacaʼ de gannaxhiicaʼ laa, ne laa qué zusaana de gannaxhii laacabe. ¿Xiñee guníʼ Jesús ca diidxaʼ riʼ yaʼ? Purtiʼ para ganda guibani ca discípulo stibe casi naquiiñeʼ guibani ti xpinni Cristu la? caquiiñeʼ guni huantarcaʼ. Jesús bisiene ca discípulo stiʼ pabiáʼ risaca nga guni huantarcaʼ ora guníʼ ca diidxaʼ cadi gusaanatu, ni zeeda lu relatu stiʼ Juan 15:9, 10.

6. ¿Ximodo rusihuínninu qué racaláʼdxinu gusaana Cristu de gannaxhii laanu?

⁶ ¿Ximodo rusihuínninu qué racaláʼdxinu gusaana Cristu de gannaxhii laanu ne chuuláʼdxibe ni rúninu yaʼ? Ra gúninu ni ná ca mandamientu stibe. Ni ná ca diidxaʼ riʼ nga rinabaʼ Jesús laanu guzúʼbanu stiidxaʼ. Ne Jesús qué rinabaʼ laanu gúninu jma de ni qué zanda gúninu. Laabe guniʼbe: «Pa uzuuba tu stiidxaʼ, qué zusaana de ganaxhiee laatu, casi qué huasaana Bixhoze de ganaxhii naa purti ruzuuba stiidxaʼ» (Juan 15:10). Rihuinni dxíchica bisaanabe ti ejemplu galán para laanu (Juan 13:15).

7. ¿Xiñee rusihuínninu guendarannaxhii ora ruzúʼbanu diidxaʼ?

⁷ Jesús bisiene ora ruzuubaʼ tuuxa diidxaʼ  rusihuinni guendarannaxhii. Sicaríʼ gúdxibe ca apóstol stibe: «Ni ma napa stiidxaʼ ne guni ni na ni la? ngue nga ni nadxii naa» (Juan 14:21). Ne ora rúninu ni ná mandatu ni bidii Jesús de chiguni predicarnu, rusihuínninu nadxiinu Dios. ¿Xiñee yaʼ? Purtiʼ ni rinabaʼ Cristu laanu gúninu la? ngaca nga ni rinabaʼ Jiobá laanu gúninu (Mat. 17:5; Juan 8:28). Nga runi, pa gannaxhiinu Jiobá ne Jesús la? laaca qué zusaana de gannaxhiicabe laanu.

8, 9. a) ¿Xi sti razón nápanu para cadi gusaana de guni predicarnu? b) ¿Xiñee riguu Ezequiel 3:18, 19 ne 18:23 gana laanu para cadi gusaana de guni predicarnu?

⁸ Guionna razón nápanu para cadi gusaana de guni predicarnu nga purtiʼ racaláʼdxinu quíxhenanu binni. Biblia ná gudxi Noé ca binni de dxiqué ñúnicaʼ ni jneza ne nusaanacaʼ guiráʼ guendaruchee sticaʼ (biindaʼ 2 Pedro 2:5). Nánnanu ora biʼniʼ predicarbe ca binni que gúdxibe laacaʼ zanitilú guiráʼ binni qué iquiiñeʼ. ¿Xiñee nánnanu biʼniʼ predicarbe yaʼ? Guidúʼyanu xi bizeeteʼ Jesús de laani: «Purti ante gaca fisiu [o guiaba nisaguié naroʼbaʼ] que la? cayó ca binni que ne cayéʼ caʼ, cachaganá caʼ ne cucheela caʼ, dede dxi biuu Noé ndaani arca que. Ne caʼru guiene ca xi chi gaca dede ora beeda nisa que, ziné irá caʼ. Zacaca nga zaca ni dxi gueeda Hombre Biseenda Dios» (Mat. 24:38, 39). Qué nusaana Noé de niguixhená ca binni que, ne neca qué ninacaʼ nucaadiágacaʼ laabe la? bíʼnibe dxiiñaʼ ni gucuaabe que.

⁹ Tiempu riʼ, runi predicarnu stiidxaʼ Reinu para gacanenu binni ganna xi chiguni Dios para binni guidxilayú. Cásica Jiobá, laanu laaca racaláʼdxinu guilá binni ni gucaadiaga mensaje stiʼ Reinu (Ezeq. 18:23). Ne ora runi predicarnu de yoo pur yoo ne ca lugar ra ridiʼdiʼ stale binni la? racané ni para quíxhenanu jma binni ne gábinu laacaʼ zunitilú Reinu stiʼ Dios binni qué iquiiñeʼ (Ezeq. 3:18, 19; Dan. 2:44; Apoc. 14:6, 7).

10. a) ¿Xi razón rudii Mateo 22:39 laanu para guni predicarnu? b) Bizeeteʼ ximodo gucané Pablo ne Silas ti hombre ni rapa ra cárcel ndaaniʼ guidxi Filipos.

¹⁰ Sti razón risaca nápanu para cadi gusaana de guni predicarnu nga purtiʼ nadxiinu binni (Mat. 22:39). Nánnanu zanda guchaa binni modo laa ora ruchaa circunstancia stiʼ. Cumu nadxiinu binni la? rucaa ni laanu cadi gusaana de guni predicarnu. Guiníʼ íquenu ni bizaaca Pablo ne Silas dxi nuucaʼ guidxi Filipos. Biseguyoo caadxi binni ni qué niná nucaadiaga stiidxaʼ Dios laacabe. Peru biaʼ galaa gueelaʼ, ni málasi guca ti xu ne biniibi dxacha ni cárcel que dede bixeleʼ guiráʼ ca puertaʼ stini. Bidxibi hombre ni rapa ra cárcel que ne zácaxa mápeca biree guiráʼ cani nuu presu que, ngue runi gucalaʼdxiʼ ñuuti laca laa. Peru bicaa Pablo ti ridxi laabe ne ná rabi laabe cadi gúnibe ni. Dede cayacaditi hombre que cadxibi ná rabi laacabe: «Xi gune para ilaʼyaʼ». Óraque bicábicabe laa: «Bini cre Señor Jesucristu ne zalá luʼ» (Hech. 16:25-34).

11, 12. a) ¿Xi rizíʼdinu de ni bizaaca hombre ni rapa ra cárcel que? b) ¿Xiñee qué rusaananu de guni predicarnu?

¹¹ ¿Xi rizíʼdinu de ni bizaaca hombre ni rapa ra cárcel que yaʼ? Lu relatu que riete  despué de guca xu que bichaa hombre ni rapa ra cárcel que ne gunabaʼ gacanécabe laa. Zaqueca nga rizaaca yanna, stale binni ni qué niná nucaadiaga stiidxaʼ Dios dxiqué, zándaca guchaacaʼ ora guizaaca xiixa ni guchaa xquendanabánicaʼ ne guinábacaʼ gacané tuuxa laacaʼ. Guzéʼtenu ti ejemplu, stale binni riuu triste ora guniti dxiiñaʼ stiʼ, ora guilaa xquendaxheelaʼ, ora gábicabe laa napa ti guendahuará malu o gatiʼ ti binni ni nadxii. Ora rizaaca binni ca cosa ni bizéʼtenu riʼ, nuu tu rinabadiidxaʼ xi pur nabani. Zándaca dede guinabadiidxacaʼ cásica gunabadiidxaʼ hombre ni rapa ra cárcel que: «Xi gune para ilaʼyaʼ». Ora rinínenu clase binni riʼ lu predicación, zándaca chuuláʼdxicaʼ gucaadiágacaʼ ca diidxaʼ de esperanza ni zinenu ra nuucaʼ.

¹² Nga runi, pa qué gusaana de guni predicarnu la? zanda quixhedxinu ladxidóʼ ca binni ni racalaʼdxiʼ gucaadiaga stiidxaʼ Dios (Is. 61:1). Carla, ti hermana ni napa treinta y ocho iza lu serviciu de tiempu completu guníʼ: «Tiempu riʼ, stale binni caquiiñeʼ gucaadiaga stiidxaʼ Dios purtiʼ qué guidxélacaʼ xi gúnicaʼ». Ne ti hermana láʼ Eva, ni napa treinta y cuatro iza de serviciu, guníʼ: «Tiempu riʼ, jma stale binni nuu triste pur ca guendanagana stiʼ. Deseu stinneʼ nga gacaniáʼ laacabe ne nga rucaa naa cadi gusaanaʼ de guneʼ predicar». Nga runi qué rusaana de guni predicarnu purtiʼ nadxiinu binni.

13, 14. a) ¿Xii nga regalu ni riete lu Juan 15:11? b) ¿Ximodo zanda chuʼnu nayecheʼ cásica Jesús? c) ¿Ximodo racané guendanayecheʼ ca laanu para cadi gusaana de guni predicarnu?

¹³ Últimu gueelaʼ guyuu Jesús lu Guidxilayú riʼ, laaca bizeetebe lú ca apóstol stibe zudii Jiobá laacaʼ caadxi regalu ni zacané laacaʼ para cadi gusaana de guni predicarcaʼ. ¿Xii nga ca regalu ca yaʼ? Ne, ¿ximodo racané cani laanu?

¹⁴ Ziuʼnu nayecheʼ. ¿Ñee nagana gúninu ni ná mandatu ni bidii Jesús de guni predicarnu la? Coʼ. Guníʼ si Jesús parábola stiʼ lubáʼ uva que, laaca guniʼbe ziuʼnu nayecheʼ cásica guyuube pa qué gusaana de guni predicarnu stiidxaʼ Reinu (biindaʼ Juan 15:11). ¿Xiñee yaʼ? Casi bizéʼtenu que, bichaagabe laabe ti lubáʼ uva ne guniʼbe ca rama stini nga zeeda gaca ca discípulo stibe. Nga runi, pa qué guilá diʼ ca rama ca cueʼ yaga ca la? né laacani zacaa cani nisa ne ca nutriente stiʼ yaga ca. Zacaca nga laanu, zanda chuʼnu nayecheʼ cásica Jesús pa qué guixélenu de laa ne chinándanu ejemplu stiʼ (Juan 4:34; 17:13; 1 Ped. 2:21). Hanne, ti hermana ni napa cuarenta iza de naca precursora, guníʼ sicaríʼ: «Guiráʼ biaje guibiguetaʼ de chiguneʼ predicar runeʼ sentir nayecheʼ ne nga rucaa naa cadi gusaana de guneʼ ni ná Jiobá». Guendanayecheʼ riʼ, rudii ni stipa laanu para cadi gusaana de guni predicarnu, dede lu ca territorio ra qué riná binni gucaadiaga (Mat. 5:10-12).

15. a) ¿Xii nga regalu ni riete lu Juan 14:27? b) ¿Ximodo racané guendariuudxi ni rudii Jesús laanu para cadi gusaana de guni predicarnu?

¹⁵ Zatadxí ladxidoʼno (biindaʼ Juan 14:27). Gueelaʼ ante gatiʼ Jesús gúdxibe ca apóstol stibe ca diidxaʼ riʼ: «Zaguixhe dxie ladxidóʼ to casi nexhe dxí ladxiduáʼ». Nánnanu riuulaʼdxiʼ Jiobá ne Jesús ora runi huantarnu lu predicación ne nga riguixhedxí ladxidoʼno (Sal. 149:4; Rom. 5:3, 4; Col. 3:15). Ti hermanu láʼ Alfredo, ni napa cuarenta y cinco iza de precursor, guníʼ sicaríʼ: «Neca maʼ bidxagaʼ ora ribiguetaʼ de predicación la? guizáʼ racané ni naa gatadxí ladxiduáʼ ne runeʼ sentir napa xquendanabaneʼ sentidu». Riéchenu stale pur runi sentirnu guendariuudxi riʼ.

16. a) ¿Xii nga regalu ni riete lu Juan 15:15? b) ¿Xi caquiiñeʼ guni ca apóstol que para cadi gusaana de gaca xhamígucaʼ Jesús?

 ¹⁶ Zaca xhamígunu Jesús. Gudxi si Jesús ca apóstol stiʼ chuʼcaʼ nayecheʼ la? bisiénebe laacaʼ pabiáʼ risaca gusihuínnicaʼ guendarannaxhii ne cadi cuézacaʼ guicaacaʼ xiixa (Juan 15:11-13). Despué gúdxibe laacaʼ: «Xhamigua laatu». Ti regalu guizáʼ galán ni gupa ca apóstol que nga gaca xhamígucaʼ Jesús. ¿Xi caquiiñeʼ gúnicabe para cadi gusaana de gaca xhamígucabe laabe yaʼ? Cadi naquiiñeʼ gusaanacabe de guni predicarcabe (biindaʼ Juan 15:14-16). Chupa iza ante, gudxi Jesús laacabe guiníʼcabe: «Ma zeda dxiña dxi guni mandar Dios» (Mat. 10:7). Ngue runi, últimu gueelaʼ guyuu Jesús lu Guidxilayú riʼ, guluube gana ca apóstol stibe guni huantarcaʼ ne cadi gusaana de gúnicaʼ dxiiñaʼ ni bisaananebe laacaʼ (Mat. 24:13; Mar. 3:14). Dxandíʼ, nanna Jesús nagana para gúnicabe ni ná mandatu que, peru zanda gúnicabe ni, ne zaqué qué zusaana de gaca xhamígucabe laa. Ne bidii Jiobá laacabe sti regalu ni zacané laacabe.

17, 18. a) ¿Xii nga regalu ni riete lu Juan 15:16? b) ¿Ximodo gucané regalu que ca discípulo stiʼ Jesús? c) ¿Xi regalu rudii Jiobá laanu ne xiñee rudii ni stipa laanu?

¹⁷ Ricabi Jiobá ca oración stinu. Jesús gudxi ca apóstol stiʼ cada biaje guinábacaʼ xiixa Jiobá ne guinabaʼ cani lu labe la? zudii Jiobá laacabe ni guinábacabe laa (Juan 15:16). Promesa riʼ nabé guluu ni gana ca apóstol que. * Dxi guníʼ Jesús ca diidxaʼ riʼ, caʼruʼ guiene ca discípulo stibe pa mayaca gátibe. Peru cadi stúbicabe chiguiaanacabe, purtiʼ ora guinábacabe Jiobá gacané laacabe para guni predicárcabe stiidxaʼ Reinu la? laa zacabi laacabe. Gudiʼdiʼ si ti tiempu despué biiyacabe ximodo bicabi Jiobá oración stícabe (Hech. 4:29, 31).

¹⁸ Ngaca nga rizaaca tiempu riʼ. Pa qué gusaana de guni predicarnu qué zusaana de gaca xhamígunu Jesús. Ne zanda chuʼnu seguru zacabi Jiobá laanu ora guinábanu laa gacané laanu para gudxíʼlunu intiica guendanagana guidxaagalunu ora maʼ canayuni predicarnu (Filip. 4:13). Riéchenu stale purtiʼ ricabi Jiobá guiráʼ ca oración stinu ne purtiʼ xhamígunu Jesús. Cani bizéʼtenu riʼ, rudii cani stipa laanu para cadi gusaana de guni predicarnu (Sant. 1:17).

19. a) ¿Xiñee qué rusaananu de guni predicarnu? b) ¿Xi zacané laanu para cadi gusaana de gúninu dxiiñaʼ ni maʼ bidii Dios laanu?

¹⁹ Casi maʼ bizíʼdinu lu tema riʼ, qué rusaana de guni predicarnu purtiʼ racaláʼdxinu gusisácanu Jiobá ne guni santificarnu labe, laaca rúninu ni purtiʼ racaláʼdxinu gusihuínninu nadxiinu Jiobá ne Jesús ne quíxhenanu guiráʼ binni de ni chiguizaaca purtiʼ nadxiinu laacaʼ. Ne ca regalu ni rudii Jiobá laanu nga: ziuʼnu nayecheʼ, zatadxí ladxidoʼno, zaca xhamígunu Jesús ne ricabi Jiobá ca oración stinu. Rudii cani stipa laanu para ganda gúninu dxiiñaʼ ni maʼ bisaanané Jesús laanu. Riecheʼ Jiobá ora ruuyaʼ de guidubi ladxidoʼno cayúninu stipa pur cadi gusaana de guni predicarnu.