1, 2. (a) Ngbutuko mbata fu Yesu kpi, ginipai ko asakihe na gako abawiriki? (Oni bi gu sura duti tonatonaha.) (b) Tipagine duhe ti ni furani ni nyanyakipa pai ka maa gu ndupai ku berãrani yo ani atungusapai ti ni? (d) Gini apai ani nika sakapai tipaha?

ROGO gu yangara nyemu naadu mbata fu kpi Yesu, ko afura na gako amokedi ni gbangaha ki kido yo na pa gako dudunguro nyemuse tipa yo. Berewe a, ko agumba sanza fuyo nibipa bakakue, a wa ani asakipai tipaha rogo gu kekeapai naadu mbata fu gere. Ni manga Yesu sunge na gu sanza re, ko angarasi gako abawiriki nga i ‘naazuka azuka gbe.’ Rogo pa-Giriki yo, agi afugo re nayugo gupai nga Yesu aangarasa yo i naazuko azuko gbe kindi, naida ka ya i naahipai tingba sunge tungusapa gu pangbanga nga ga Kindo.​—⁠Yo. 15:⁠8.

² Ono tie, Yesu aapenga kina gupai sa fuyo si aaida i mangihe te, ono ko aima pe gu ndupai fuyo a si aaida i mangihe ti ni wo. Ko aima fu gu nduapai fuyo si aaida i naatungusapai ti ni kindi. Tipagine duhe ti ni ni nyanyakipa pai ka maa gu nduapai re ku berãrani yo? Ho ani amaa gu nduapai ni ku berãrani yo si aida ani naatungusapai ti ni kindi, si nafõngbadurani yo ani naahipai rogo gaani manga dezirepai yo fu “arikaaboro dũ.” (Mt. 24:​13, 14) Sidu, tie, ani sakingo pai tipa nduapai biama nga ga Ziazia Kekeapai nga gu  si aida ani naatungusapai ti ni. Kurigure, ani nika wisigopai tipa agamahe biama be Yekova nga gu naundo rani ani naazuko rogo hipai yo.

3. (a) Gini ndupai tipa tungusapai du rogo Yoane 15:8? (b) Ginihe gu rindi bakakue du rogo ga Yesu sanza yo arukubaha, na tipagine rẽ gu ringbisapai re arẽ ti ni?

³ Gu nyanyakipa ndupai kisusi ani amangasunge tungusapai ti ni nga ka fu taarimo fu Yekova na ka ziasi rimoko barabangiri ngbatunga aboro dunduko. (Oni gedi Yoane 15:​1, 8.) Oni ini gupai nga Yesu aringbisi Bako nga Yekova kuti babanda ati, watadu gu basopobino narũ bakakue. Yesu aringbisi tiko kuti bakakue, watadu kuti ngua ha, na ko ki ringbisi apefuoko kuti abehe. (Yo. 15:⁠5) Sidu, si rẽarẽ i ringbisi rindi bakakue kuti gu zuzuhe nga ga Kindo apefuo Kristo azukoho. Yesu agumba gupai fu apefuoko nga: “Ka oni azuka gbe, si ka Buba du ti ni ni taasitaasi ko.” Kina wai gu katakpa bakakue nakusa wene zuzuhe afu ngbarago fu basopobino, kinawo a ani afu irisa watadu taarimo fu Yekova ho ani atungusa gu pangbanga nga ga Kindo ni gbe, wa rengbe omerani na ni.​—⁠Mt. 25:​20-​23.

4. (a) Gini agene ani aziasi rimo Mbori ngbaha? (b) Gu momu du mo na ni ka ziasi rimo Mbori nasa ro mo du wai?

⁴ Rogo gini gene yo gaani sunge tungusapai aziasi rimo Mbori? Ani arengbanga ka ziasi rimo Mbori berewe kisusi te. Si ni kina ziaziaha rogo apai yo dunduko. Ono oni bingo gupai gu nebi nangia Yesaya agumbaha, ko aya: ‘Oni kpára Yekova ni ziazia ko nga ga arimbasa ko.’ (Yes. 8:​13) Gene sa dagba agu akuraha yo ani aziasi rimo Mbori ngbaha nga, ni bi ani he nga si kia dagba kura arimo yo dunduko na ni undo ani kura aboro tipa i naabihe ni ziaziaha. (Mt. 6:​9) Ni kpiapai, ho ani atungusapa gu rengo ni du tipa ga Yekova wene asino gbiati gako nyenye ringbisapai tipa ngbatunga aboro dunduko, gure nga ani naundo kura aboro i bi gupai nga gu gbegberẽ apai dunduko Satana agumbaha tipa ka gbarasarimo Mbori nga ziree. (Bam. P. 3:​1-5) Berewe a, ho ani amanga nyanyaki asadatise ni ka undo aboro rogo gaani dagbarago i bi gupai nga Yekova rẽarẽ “na dia taarimo na irisa na tandu,” gure nga ani naziasi rimo Mbori. (Yugo. 4:​11) Rune, nga guko naima mangasunge abazakigene awere tipa agarã 16 aya: “Pa ino mi gupai nga i fu gu momu fere nga ga du ni dezire Bakusiahe nga ga zegino nasa re mi du na tambuahe. Si nasa re mi du na nyemu kaa tungusapai atungusa kindi.”

5. (a) Gini ndupai tipa tungusapai i nape paha rogo Yoane 15:​9, 10? (b) Wai du Yesu anyakasipa gupai si aida boro du ti ni na hipai?

⁵ Oni gedi Yoane 15:​9, 10. Gaani nyemuse tipa Yekova gbiati Yesu nga nyanyakipa ndupai ani atungusa gu pangbanga nga ga Kindo ti ni. (Mk. 12:30; Yo. 14:15) Yesu aapenga kina gupai sa fu gako abawiriki nga i du rogo gako nyemuse yo te, ono ko aya fuyo a wẽ i ‘nye rogo gako nyemuse’ yo. Tipagine? Bambiko raka ni ga Kristo ndikidi bawiriki wa agarã nikaa susa naida gupai nga boro duadu na hipai. Yesu anyakasi gupai si aida boro du ti ni na hipai ni mangako sunge na angbatunga gu fugo nga “nye” bara dunguhe rogo gu guru kekeapai yo du rogo Yoane 15:​4-​10.

6. Wai du ani ayugo gupai nga ani naida ka nye rogo ga Kristo nyemuse yo?

⁶ Wai du ani ayugo gupai nga ani naida ka nye rogo ga Kristo nyemuse yo na ko ki idi na ani? Ani nayugoho ni ka ani kuti ga Yesu arugute. Ka pepai ngba taata gene, Yesu naya furani wẽ ‘Oni gi sangbare.’ Ono tie, Yesu naya furani ani mangi kina gupai ko aima mangaha, sidu, ko ape gupai berewe nga: “Wa ka mi kuti ga Buba rugute, ki nye rogo gako nyemuse.” Yesu namaa kpiapai furani.​—⁠Yo. 13:⁠15.

7. Gini ngbanya du dagba giasangba na nyemuse?

⁷ Nibipa gu ngbanya du dagba giasangba na nyemuse, Yesu agumba gupai kusayo fu gako amokedi nga: “Gu ni du gi rugute be ni ni ki ka kuti ni, kina ni nakpi nyemu re.” (Yo.  14:21) Kurigure, ho ani airisa gu ga Yesu rugute ni du tipa nduge ka tungusapai, ani nayugo gupai a nga ani ima kpinyemu Mbori bambiko ga Yesu arugute nayugokpia ga Bako berãpai. (Mt. 17:5; Yo. 8:​28) Na ho ani ayugo gupai ni wa gure nga ani ima kpinyemu aYekova na Yesu, si nasayo i banda rani rogo gayo nyemuse yo.

8, 9. (a) Gini kura ndupai duho berewe ani atungusapai ti ni? (b) Tipagine gu ga Yekova afugo du rogo Yezekere 3:​18, 19 na 18:23 afõngbaduraniyo ti ni ani naatungusapai kindi?

⁸ Kura ndupai kinaho berewe berani ani atungusapai ti ni kindi. Ani natungusapai tipa ka za aboro. I fura tipa Noa rogo Ziazia Kekeapai yo nga ko angia, “batungusi rurupai.” (Oni gedi 2 Petero 2:⁠5.) Si ima du ziazia nga, ko aima fu zahe nga ga gu gbarasahe naaye kumbatayo fu aboro rogo gu gako sunge tungusapai yo ko amangihe mbata fu Ime Akangbii. Tipagine rengbe ani ti ni kada kuti gu digisopai re? Oni bingo gupai Yesu agumbaha, ko aya: ‘Bambiko, wa si adu ni gu rago naadu mbata fu ngirimo akangbi re, i aniri he nimbiri he, nirogo ade nifuku ade sa roga yo, ki da ti gu uru Noa arimi ni ku kurungba yo, ka i aina nga ha ya daho ngirimo akangbi aye ni ki nirogo yo dunduko ku sa yo; wo ye Wiri boro nikadu.’ (Mt. 24:​38, 39) Wa aboro avura ka zanga gia gupai Noa aatungusaha, ko aambunga tungusa gu pangbanga zahe i aya fuko ko tungusihe re te.

⁹ Areme, ani natungusa gu pangbanga nga ga Kindo tipa ka fu momu fu aboro i wirikipai tipa gupai Mbori akpinyemuhe tipa ngbatunga aboro dunduko. Wakina Yekova, ani na nyemu gupai nga aboro degetuyo kuti gu pangbanga re ki ‘nye ni ungayo.’ (Yeze. 18:23) Ti kina gu bangisa regbo re, ho ani atungusapai ni kporo na kporo na rogo agu aba du badungu aboro rogoho, ani naza badungu aboro nga ga Mbori Kindo nika ye na ki gberesi gi zegino nga ga azanga sino Mbori re.​—⁠Yeze. 3:​18, 19; Dan. 2:​44; Yugo. 14:​6, 7.

10. (a) Gini ndupai tipa tungusapai gumbayo paha rogo Matayo 22:39? (b) Oni pekenga wai aPauro na Sira aundo babanda bambukiso Firipoi yo.

¹⁰ Gu kura nyanyakipa ndupai gere berewe ani amangasunge tungusapai ti ni kindi: Ani natungusapai bambiko gupai nga ani ima kpinyemu akuarani. (Mt. 22:39) Gu nyemuse re nafõngbaduraniyo ani naahipai tingba gi sunge re, kini ini gupai nga aboro ima rengba ka saberãyo ho apai aˈariatihe ni tipa yo. Oni bingo gupai naamangi Pauro na gako badiasunge nangia Sira. Asogoyo abayo ku bambukiso yo rogo gu gbata nangia Firipoi. Fuo gure, bazigizo amangi bebere yuru ki zaki angbadimo bambukiso. Babanda bambukiso agunde nga zizi aboro ima zubo, na ko kini idi ka imo tiko. Ono Pauro apoi kuari ki ya: “Ka mo ími nga tiro ya!” Gu babanda bambukiso naadu ni fudifudiko berã yo re asanahe ki ya: “Gine mi ka manga nga ka bata?” I aya fuko wẽ: “Mo ídi pa Gbia Yesu, mo ki bati.”​—⁠Amo. 16:​25-​34.

11, 12. (a) Gini ngbaya du dagba gu pangbanga du tipa babanda bambukiso na gaani sunge tungusapai? (b) Ka ani aamanga gaani sunge tungusapai amanga kindi, ani nika duadu ho ka manga ginipai?

¹¹ Ginipai gu pangbanga du tipa babanda bambukiso ayugoho furani tipa gaani sunge tungusapai? Oni bingo gipai re: Babanda bambukiso asa berãko na ko ki sanahe tipa undo kina tingbafuo manga bazigizo.  Wakina gure a, agu aboro du areme ata dianga gu pangbanga nga ga Ziazia Kekeapai kugume ya ima rengba ka sa berãyo na ki gbata undo ho ka kerepai mangi ni rogo gayo raka yo. Ni kpiapai, si ima rengba kadu nga kura aboro rogo gaani dagbarago zanga gayo sunge nga gu i naima dia gbanga regbo kuti ngbaha na i kidu rogo bakere gberãrago. Agu akurayo ima rengba kadu rogo bakere gberãrago mbiko gupai nga gayo rogatise gberẽ. Berewe a, agu akurayo ima rengba kadu rogo bakere gberãrago mbiko i bi kere kaza tiyo watadu gayo boro kpi. Ho ngbatunga apai wa gure amanga ni, agu aboro du rogo gberãrago mbiko agu apai re ima rengba ka sana asanahe nibipa raka nga gu i anaasananga ha mbata ya. I ima rengba kaa bakabangiriyo nga, ‘Ginipai rengbe mi ka mangaha ka gbia bata?’ Ho ani agbiayo ni, i ima rengba ka ida ka degatuyo kuti gaani pangbanga nga ga maabangirise ni bambata regbo rogo gayo raka yo.

¹² Sidu, ka ani aamanga gaani sunge tungusapai kindi, ani nika duadu ho ka fu wasa fu aboro ti gu regbo rengbe yo kadu regerege ka diaha kugume. (Yes. 61:⁠1) Charlotte nga guri naima du tingba mangasunge Kindo ti aregbo dũ tipa agarã awere 38 aya: “Aboro ainongo gupai ka i mangihe te. Si naida i gbia momu tipa ka gia wene pangbanga.” Ejvor, nga guri naima mangasunge abazakigene awere tipa agarã 34 aya: “Badungu aboro na rungo kpotoyo yo areme kisusi gu nidu mbata. Mi naida aida nzunzu ka undo yo. Gupai re nafõngbadureyo mi naatungusapai.” Nyemu akuarani nga gu bawene ndupai si aida ani naamangasunge tungusapai ti ni kindi!

13, 14. (a) Gini gamahe i nagumbapaha rogo Yoane 15:11? (b) Wai du ga Yesu ngbarago nika da ni gaani ngbarago? (d) Wai du ngbarago aundo rani rogo gaani sunge tungusapai yo?

¹³ Rogo gu yangara nyemu naadu mbata fu kpi Yesu, ko apeke pa dungu agamahe fu gako amokedi nga gu si adu nga si nika undoyo i naazuko rogo hipai yo. Agu agamahe re nga gine, na wai du ani agbia undo ti ni?

¹⁴ Gu gamahe nga ngbarago. Ya mo irisa ga Yesu rugute ka tungusapai ni gupai naima susa omerani? Oó. Tingbafuo Yesu pe gako sanza nibipa bakakue, ko ape gupai nga, ni du ani ni atungusipa Kindo, ani nika duadu rogo ngbarago. (Oni gedi Yoane 15:11.) Ko akido rani na gupai zaatu nga gako ngbarago nika da ni gaani ngbarago. Wai du duhe wo? A wa i nigumbaha mbata, Yesu aringbisi tiko kuti bakakue, na ki ringbisi gako abawiriki kuti abehe. Ngua bakakue nasongoda abehe. Ka abehe nye kina kutini, agu abehe re nikaa gbia ime gbiati riahe rogo gu ngua bakakue re yo. Wakina gure a, ka ani nye ni kodikodi rani na Kristo ni peka ani fuo gako kpiapai, ani nika du na kina gu bangisa ngbarago du ko na ni wa ko amanga gupai Bako akpinyemuhe. (Yo. 4:​34; 17:13; 1 Pet. 2:​21) Hanne, nga guri naima mangasunge abazakigene tipa agarã naima susa 40 ape gupai nga, “Gu ngbarago mi naagbiaha ti aregbo dũ ho mi ayego ni gene tungusapai yo nangarasa re mi naamanga ga Yekova sunge kindi.” Nirengo, ngbarago nafu ome furani tipa ani naatungusapai kindi zavura rogo kpakarakpakara dagbarago.​​—⁠Mt. 5:​10-​12.

15. (a) Gini gamahe i nagumbapaha rogo Yoane 14:27? (b) Wai du zereda aundo rani ani naazuko azuko kindi?

¹⁵ Gu gamahe nga zereda. (Oni gedi Yoane 14:27.) Rogo gu nyemu naadu mbata fu kpi Yesu, ko aya fu gako amokedi wẽ: ‘Gi zereda mi afu fu roni.’ Wai du ga Yesu zereda aundo rani ani naazu rogo hipai yo? Wa ani nikaa hipai, ani nika du na gu nyenye zereda kpotorani yo naye ti ino gupai nga aYekova na Yesu ima ida na ani. (Tam. 149:4; Rom. 5:​3, 4; Koro. 3:​15) Ulf nga guko naima dia agarã awere 45 kutingba mangasunge Kindo ti aregbo dũ aya, “Sunge tungusapai ninaaye aye na mbugo kutire, ono si naye na ndikidi ngbarago ku rogo gimi raka yo na si nasa gi raka a si du na ndikidi rogo yo ti ni.” Nairiwo  gu tambuahe du ani na ni tipa gupai nga ani ima gbia nyenye zereda!

16. (a) Gini gamahe i nape paha rogo Yoane 15:15? (b) Wai du ka amokedi arengbe ka nye ni abakurea Yesu?

¹⁶ Gu gamahe nga pabakure. Tingbafuo Yesu pe gupai nga ko na nyemu gupai nga gu ngbarago nga ga gako amokedi “moi pai,” ko asakipai fuyo tipa wai nyakipa yugo gu nyemuse adunga na gbangbati ti ni ya. (Yo. 15:​11-​13) Fuo gure, ko ape gupai nga: “Mi yambu roni ni abadiangba.” Nairiwo gu nyanyakipa gamahe nga ni kadu ni abakurea Yesu! Ginipai si aaida amokedi mangihe tipa ka nye ni abakureako? Si aaida i ‘ndu kaa zuka’ kindi. (Oni gedi Yoane 15:​14-​16.) Agarã wa ue kusayo, Yesu arugu gako amokedi ki ya: “Wa oni ka ndu, oni ta tungusa pai, niya, ‘Gu ngbi nga ga ngbangbaturũ si mbedi.’ ” (Mt. 10:⁠7) Sidu, rogo gu yangara nyemu naadu mbata fu kpiko, ko angarasiyo i du na hipai tingba gu sunge i atona mangaha. (Mt. 24:13; Mk. 3:​14) Irisa gu ga Yesu rugute re aadunga taata te, ono i aima rengba ka mangapai kutini, na ki nye ni abakureako. Wai du si arengbe kadu wo? Si arengbe kadu wo mbiko gu undo nga ga kura gamahe berewe.

17, 18. (a) Gini gamahe i nagumbapaha rogo Yoane 15:16? (b) Wai du gu gamahe re arengbe ka undo ga Yesu abawiriki? (d) Gini agamahe nanyakasa rani areme?

¹⁷ Gu gamahe nga karagapai kuti gaani akparakpee. Yesu aya: “Gu he ka oni kpari fu Buba tipa ha ni rimore, ko fu he afu fu roni.” (Yo. 15:16) Nairiwo wai gi kidohe re arengbe ka nyakasa amokedi! * I aainongo gupai nga gayo Bangbembatayo aima mbeda ka kpi te, ono pa kpiko arengbanga ka sa gupai nga i nye zanga undo te. Yekova aima du regerege ka karagapai kuti gayo akparakpee tipa ai gu undo i aaidaha tipa ka tungusa gu pangbanga nga ga Kindo. Na nirengo, fuo gure ngbutuko, Yekova aima karagapai kuti agu akparakpee i amangihe tipa undo.​—⁠Amo. 4:​29, 31.

¹⁸ Kina gu bangisapai re du areme a. Wa ani aazuko rogo hipai yo, ani nagbia ngbarago ti du ni abakurea Yesu. Kurigure, ani ima rengba kadu na gu kido nga Yekova nga regerege ka karagapai kuti gaani akparakpee tipa undo tipa ani dibe agu akpakarapai rengbe ani kaa gbiatirani na ni wa ani atungusa gu wene pangbanga nga ga Kindo. (Frp. 4:​13) Nairiwo wai du ani na tambuahe tipa gupai nga ani nagbia karagapai kuti gaani akparakpee na Yesu nga bakurearani! Agi agamahe Yekova nagamuhe furani re nanyakasa rani tipa ani naazuko azuko kindi.​​—⁠Yak. 1:​17.

19. (a) Tipagine ani amangasunge tungusapai amanga ti ni kindi? (b) Gini apai naundo rani ani digisi ga Mbori sunge?

¹⁹ A wa ani nabihe rogo gi kekeapai re, ani namangasunge tungusapai kindi tipa ka fu taarimo fu Yekova na ka ziasi rimoko, ka yugo gaani nyemuse tipa Yekova gbiati Yesu, ka fu zahe fu aboro, na ka yugo nyemuse fu akuarani. kurigure, agu agamahe nga ngbarago, zereda, pabakure, gbiati gbia karagapai kuti gaani akparakpee nanyakasa rani tipa ani digisi ga Mbori sunge. Nairiwo wai Yekova nika du na ngbarago wa ko nikaa birani ani mangi ome na kpotorani yo dũ kaa ‘zuko azuko gbe’ kindi!