1. I ng’ei dubo p’Adamu giku Eva, Yehova unyutho lembang’o iwi jakwor mwa?

ADAMU ung’eyo ma ber dit nia thwol copo weco ngo. Pieno, saa ma Eva uyero ire nia giweco ku thwol, ecicopere nia Adamu unyang’ nia eca giracwia moko mi tipo re m’uweco i bang’ Eva. (Tha. 3:1-6) Adamu giku Eva gigam ging’eyo ngo nia giracwiane ubino ng’a. Re asu, Adamu ung’io nilubo tok giracwiane i jai pare m’ejai ko ni Won ma jamer mi polo. (1 Tim. 2:14) Ndhu ndhu i ng’eye, Yehova ucaku ninyutho nia giracwia maeno ubino ng’a, man eng’olo nia ebinyothe cen. Bende, enyutho nia ma fodi ekunyotho ngo giracwia maeno m’uweco nikadhu kud i bang’ thwol, giracwiane bibedo jakwor pa dhanu ceke m’umaru Yehova.​—Tha. 3:15.

2, 3. Ecicopere nia pirang’o Yehova unyutho ngo lembe dupa iwi Sitani i wang’ bino pa Masiya?

² Yehova unyutho ngo nyanok de nia malaika m’ujai ire ca, nyinge mandha tie ng’a. * Oro 2 500 kumeni i ng’ei m’Adamu gijai,  kan ebin enyutho nia malaikane utie ng’a. (Yob 1:6) Eng’eyere ku nying’ ma “Jok” kunoke Sitani, ma thelembene tie “Jajai.” I Lembagora mi Juebrania, nying’ maeno nwang’ere i buku adek kende: i 1 Lemkei, i buku pa Yob, man i buku pa Zekaria. Pirang’o lembe ugam ung’eyere ngo akeca iwi jakwor maeno i wang’ bino pa Masiya?

³ I Lembagora mi Juebrania, Yehova unyutho ngo lembe dupa iwi Sitani man iwi tic pare. I andha, lembakeca mi Lembagora mi Juebrania ubino asagane nikonyo dhanu kara ging’ii Masiya man gilub toke. (Lk. 24:44; Gal. 3:24) Kinde ma Masiya utundo, Yehova utio kude man ku julub pare pi ninyutho lembe dupa ma tin eni wang’eyo iwi Sitani ku jumalaika pare. * Yehova utimo kumeno pilembe nindo m’ubino de, ebitio ku Yesu man Jukristu ma juwiro ku tipo pi ninyotho Sitani ku ju pare ceke.​—Rum. 16:20; Nyu. 17:14; 20:10.

4. Pirang’o ndiri Sitani ucikere ngo ninegowa?

⁴ Jakwenda Petro ukoro nia Sitani Wonabali utie ve “umvor m’ubeywak” niwacu m’uberundo, Yohana ke ulwong’e nia “thwol” man “ng’ec.” (1 Pet. 5:8; Nyu. 12:9) Ento ndiri Sitani ucikere ngo ninegowa, pilembe copo pare utie ku mupaka. (Som Yakobo 4:7.) Bende, wang’eyo nia Yehova, Yesu man jumalaika ma gigwoko bedoleng’ migi gibegwokowa. Ku kony migi, wacopo cerara ni jakwor mwa. Re ubekwayu wakeng’ei dwokowang’ penji adek m’ulubo e ma pigi tek: Sitani utie ku copo ma rukani? Ebewingo dhanu nenedi tin eni? Man lembang’o m’ecopo tundo ngo nitimo? Wabidwoko wang’ penji maeno man wabineno ponji ma wacopo nwang’u kud i igi.

5, 6. Pirang’o bimobim pa dhanu copo ngo nikelo alokaloka mandha?

⁵ Jumalaika dupa gijai ni Mungu, man gilubo tok Sitani. I wang’ pii ma dit m’uumo ng’om, Sitani ubidho wang’ jumoko m’i kindgi gibino i ng’om, man gitimo tarwang’ ku nyir mi dhanu. Biblia ukoro lembuno i ayi mi lapor nia, ng’ec utelo theng cero (jumalaika moko) m’i polo i bang’e, man eloro kugi i ng’om. (Tha. 6:1-4; Yud. 6; Nyu. 12:3, 4) Kinde ma jumalaika maeno giwok kud i kind ju pa Mungu, gimondo gigi i the bimobim pa Sitani. Re, kud wapar nia jumalaika maeno ma gijai, gibetimo tic migi swa kumeni, m’umbe telowic moko. Sitani uporo bang’ Bimobim pa Mungu; pieno, eketho bende bimobim pare, ma i ie junwang’u giracwia mi tipo ma gilubo toke. Ekethere gire ni rwoth, man epangu tic ni jumalaika pare, emio igi copo, man eketho gibim ng’om.​—Ef. 6:12.

⁶ Sitani ubetio ku dilo pare, pi nitelo wi bimobim ceke mi ng’om maeni. Wabeyero kumeno, pilembe enyutho “ker ceke mi ng’om” ni Yesu, man eyero kumae: “Abimio ng’ol maeni ceke iri, ku dwong’ne de: kum jumie ira; man ke amie ni ng’atu ma tek ayenyo.” (Lk. 4:5, 6) Re tin eni bimobim utie dupa ma gibetimo lembe ma beco ni lwak migi, man jubim moko gitie andha ku pidoic mi konyo dhanu. Ento jabim acel de mbe ma dhanu, ma copo kelo alokaloka mandha ma watie ku yenyne.​—Zab. 146:3, 4; Nyu. 12:12.

7. M’uweko bimobim mi ng’om, Sitani ubetio bende nenedi ku dini mi ndra man lembe mi kuloka? (Nen cal mir acaki.)

⁷ Sitani ku pajogi pare gitio bende ku dini mi ndra man ku lembe mi kuloka, pi niwondo “ng’om ngung’,” niwacu dhanu ceke. (Nyu. 12:9) Sitani ubetio ku dini mi ndra pi nimewo vupo iwi Yehova, man etimo  kero kara dhanu kud ging’ei nying’ Mungu. (Yer. 23:26, 27) Lembuno uketho dhanu moko giparu nia gibeworo Mungu, ma ke i andha gibeworo pajogi. (1 Kor. 10:20; 2 Kor. 11:13-15) Sitani ubetio bende ku lembe mi kuloka pi nimewo vupo. Ku lapor, ebewondo dhanu nia kara gibed kud anyong’a i kwo migi, ukwayu gibed ku sente man piny mange dupa. (Rie. 18:11) Dhanu ma gibeyio vupo maeno gitimo ni “lonyo” i kwo migi zoo, kakare nitimo ni Mungu. (Mat. 6:24) Kadok nwang’u gilar gimaru Mungu de, re mer mi giki mi kum doko tek, man mer ma gimaru ko Mungu gam thum.​—Mat. 13:22; 1 Yoh. 2:15, 16.

8, 9. (a) Ponji ario ma kani ma wacopo nwang’u niai kud i lembe m’Adamu giku Eva, man jumalaika m’ujai gitimo? (b) Pirang’o wacikara ning’eyo nia Sitani re m’ubebimo wi ng’om maeni?

⁸ Wacopo nwang’u ponji ario ma pigi tek niai kud i lembe m’Adamu giku Eva, man jumalaika m’ujai gitimo. Mi kwong’o, dilo utie ario kende: pa Yehova ku pa Sitani. Dong’ wacikara ning’io nia wabibedo i thenge ma pa ng’a, nyo pa Yehova kunoke pa Sitani. (Mat. 7:13) Mir ario, ju ma gibelubo tok Sitani ginwang’u bero moko, re ma nyanok magwei. Ku lapor, Adamu giku Eva ginwang’u kaka mi ng’io gin gigi gin ma ber ku gin ma rac. Pajogi ke ginwang’u copo moko iwi bimobim mi dhanu. (Tha. 3:22) Ento i andha, ka ng’atini ung’io nibedo i thenge pa Sitani, enwang’u kwa matoke ma rac. Bero mandha m’eromo nwang’u umbe acel de!​—Yob 21:7-17; Gal. 6:7, 8.

⁹ Pirang’o wacikara ning’eyo nia Sitani re m’ubebimo wi ng’om maeni? Ka wang’eyo lembuno, wabibedo ku nen m’atira iwi bimobim pa dhanu, man wabirweyo lembanyong’a kud amora. Wang’eyo nia Yehova ubekwayu nia wawor jubim mi ng’om. (1 Pet. 2:17) Ebemito wawor cik migi ka fodi cikne uturo ngo ma pare. (Rum. 13:1-4) Re wang’eyo bende nia wacikara ngo nimondo i lembgamba, man wacikara ngo nidiko cingwa nyanok de kud ungu moko ci mi lembgamba kunoke ku jabim moko ci mi ng’om. (Yoh. 17:15, 16; 18:36) Ento ukwayu wamiara zoo pi niponjo dhanu ku lemandha iwi Mungu, pilembe wang’eyo nia Sitani ubetimo kero pare ceke pi nicido nying’ Yehova. Watie kud anyong’a nilwong’ara ku nying’ Yehova man nitio ku nyinge. Mer ma wamaru ko Mungu, pire tek lee iwa nisagu maru sente kunoke piny mange.​—Isa. 43:10; 1 Tim. 6:6-10.

10-12. (a) Ecicopere nia Sitani utio kud awic ma kani pi nibidho wang’ jumalaika moko? (b) Lembe ma jumalaika maeno gitimo ubemio iwa ponji ma kani?

¹⁰ Sitani ubetio ku bodho ma tung’ tung’ pi niwingo dhanu, man bodhone berombo  ire. Kara dhanu gitim yeny pare, saa moko eciko awic pi nibidho wang’gi, saa mange ke etio ku ragedo.

¹¹ Con, Sitani ugam utio kud awic pi niwingo jumalaika dupa dit. Ecicopere nia esomogi kilili mandha pi nindo dupa pi nineno nia ang’o ma copo bidho wang’gi yot yot. Jumalaika moko gimoko i awic m’eciko igi, e gibino i ng’om man gitimo tarwang’ ku nyir. Pieno ginyolo awiya ma jurukara man ma jurop, ma gibed gitimo dhanu mange rac. (Tha. 6:1-4) M’umedo abidhe mi tarwang’, ecicopere nia Sitani ung’olo bende igi nia gibibedo ku dito iwi dhanu ceke. I ayi maeno, Sitani ubino yenyo ecer lembila pa Yehova iwi ‘kodhi pa dhaku’ kara kud upong’. (Tha. 3:15) Ento Yehova uweko ngo ire yo nyanok de. Pieno eketho pii ma dit uumo ng’om, man uranyu lembe ma nwang’u Sitani ku pajogi pare gipangu.

¹² Lembe maeno ubemio iwa ponji ma kani? Ponji utie nia, lemb sasa mi tarwang’ man pidoic mi sayu dito gitie kit awic ma dongo ma Sitani ubemaku ko dhanu yot yot. Jumalaika ma i ng’eye gilubo tok Sitani, gilar gitimo oro dupa dit i polo karacelo ku Mungu en ku kume! Re asu, giweko awanya ma rac umondo i igi, man uteng’ini. Lembuno ubeponjowa nia kadok wadaru timo ni Yehova pi oro ma dupa de, wacikara ning’eyo cuu nia awanya ma rac copo caku guro ulage i adundewa. (1 Kor. 10:12) Pieno, saa ceke wacikara niyaru i adundewa cuu pi nineno, man niwodho cen pidoic ceke mi lemb sasa mi tarwang’ kunoke pidoic mi sayu dito!​—Gal. 5:26; som Jukolosai 3:5.

13. Kit awic mange ma kani ma Sitani tio ko, man wacopo niuro awicne nenedi?

¹³ Kit awic mange ma Sitani betio ko ni e: etelo nen mi dhanu i kum tipo m’ucido. Tin eni, ebetio ku dini mi ndra, man galuwang’ ma tung’ tung’ pi nicwalu dhanu kara gimar lembe mi pajogi. De andha, filme, tuko mi video, man kit galuwang’ mange, copo ketho lembe mi tipo m’ucido foyo i dhanu lee dit. Dong’ waromo timo ang’o pi niuro awic maeno? Kud wagen nia dilo pa Mungu bikwanu iwa kit galuwang’ ceke ma reco ku ma beco. Ento wacikara nitendo pidocwiny mwa kara saa ceke watim ng’iong’ic m’ujengere iwi cik mir ukungu pa Yehova. (Ebr. 5:14) Bende, ka wamaru Mungu ku mer ‘m’umbe umbili,’ wabing’io galuwang’ mwa ku rieko. (Rum. 12:9) Ng’atu ma won umbili yero lembe mange, etimo de mange. Pieno, kinde ma wabeng’io galuwang’ mwa wacikara nipenjara kumae: ‘Nyo an de abed atimo lembe m’abeponjo ni dhanu mange? Ju m’abeponjo kugi Biblia man ju m’abed aliewo gicopo paru ang’o ka nwang’u gineno kit galuwang’ para?’ Tek wan de wabetimo lembe ma wabeponjo ni  jumange, wabitundo niuro awic pa Sitani.​—1 Yoh. 3:18.

14. Sitani copo nyayu ragedo i kumwa nenedi, man wacopo timo ang’o kara wacung ma tek i wang’ ragedone?

¹⁴ Bende, Sitani benyayu ragedo i kumwa man epiko lworo i iwa, pi niwingo wiwa kara wawek nigwoko bedoleng’ mwa ni Yehova. Ku lapor, ecopo tio ku gavmenti pi nikwero tic mwa mi lembanyong’a. Ecopo tio bende ku jurutic wadwa kunoke awiya wadwa mi darasa pi nicayuwa pilembe wabeworo cik mi Biblia. (1 Pet. 4:4) M’umedo maeno, Sitani copo tio kadok ku wedi mwa ma gitie ngo Jumulembe, ma saa moko nyo gitie ku paru ma ber; eromo tio kugi pi nicerowa kud wacidh i coko. (Mat. 10:36) Wacopo timo lembang’o kara wacung ma tek i wang’ ragedo ma Sitani ubenyayu i kumwa? Wacikara ning’eyo nia ragedo copo wok saa moko ci, pilembe Sitani ubekiedo i dhogwa. (Nyu. 2:10; 12:17) Bende, wacikara ning’eyo thelembe m’anzilo m’uketho ebenyayu ragedo i kumwa: Sitani uloko nia waromo timo ni Yehova kende kende ka lembe ubewotho cuu iwa, ento nia ka peko wok, wabikwero Mungu. (Yob 1:9-11; 2:4, 5) Tokcen ne, wacikara nikwayu tego i bang’ Yehova saa ceke. Ka watimo kumeno, wang’ei nia Yehova biwekowa ngo nyanok de.​—Ebr. 13:5.

15. Nyo Sitani copo tundo nidiyowa watim gin ma wabemito ngo? Kekor.

¹⁵ Sitani copo tundo ngo nidiyo ng’atini utim gin moko ma ng’atune ubemito ngo nitimo. (Yak. 1:14) Tin eni, dhanu dupa gibenyang’ ungo nia gini thenge pa Sitani. Ento ka ng’atini ubeponjo lemandha mi Biblia, ecikere nitimo ng’iong’ic: nyo ebibedo i thenge pa Yehova, kunoke ebibedo i thenge pa Sitani. (Tic. 3:17; 17:30) Re ka wadaru nyono tiendwa nia wabiworo mwa Mungu, Sitani bitundo ngo ninyotho gwoko bedoleng’ mwa.​—Yob 2:3; 27:5.

16, 17. (a) Lembang’o mange ma Sitani ku pajogi pare gicopo tundo ngo nitimo? (b) Pirang’o lworo ucikere ngo ninegowa nirwo ku dwandwa i bang’ Yehova?

¹⁶ Lembe mange de nuti ma Sitani ku pajogi pare gicopo tundo ngo nitimo. Ku lapor, Biblia uyero ngo nyanok de nia giromo ng’eyo lembe ma ni i adundewa kunoke ma ni i paru mwa. Yehova giku Yesu kendgi re ma gitie ku copo maeno. (1 Sam. 16:7; Mk. 2:8) Dong’, nyo wacikara nilworo nia ka wabeweco kunoke ka waberwo ku dwandwa, Wonabali ku pajogi pare gibiwinjo lembe ma wabeyero, man gibitimowa rac? Ungo! Pirang’o lworo ucikere ngo ninegowa? Kenen lapor ma e: Wabed walworo ngo nia Sitani copo nenowa ka wabetimo lembe ma beco i tic pa Yehova. Kumeno bende, wacikara ngo nilworo nia ka waberwo ku dwandwa ma tek, Wonabali copo winjowa. Bende, Biblia unyutho wang’ dupa nia jurutic ma con pa Mungu gibed girwo ku dwandgi ma tek, man kaka moko mbe ma jukiewo i ie nia gibed gilworo nirwo ma tek pilembe ya Wonabali biwinjogi. (1 Ub. 8:22, 23; Yoh. 11:41, 42; Tic. 4:23, 24) Ka wabetimo kero mwa ceke kara wec mwa ku timo mwa ceke uromb ku yeny pa Yehova, m’umbe jiji, ebiweko ngo nia Wonabali utim lembe moko i kumwa ma copo cerowa ku kwo ma rondo ku rondo.​—Som Zaburi 34:7.

¹⁷ Wacikara ning’eyo jakwor mwa, re wacikara ngo niweko ndirine unegwa. Kadok waleng’ ungo de, re ku kony pa Yehova, wacopo voyo Sitani! (1 Yoh. 2:14) Ka wajai ire, ebiringowa. (Yak. 4:7; 1 Pet. 5:9) Tin eni, ubenen nia Sitani uloko wang’e asagane i kum aradu. Dong’ gicopo ceriri i kum Wonabali nenedi? Wabidwoko wang’ penji maeno i thiwiwec m’ulubo.