1. Adanampi Evampejj juchachasipkäna uka qhepatjja, ¿kunsa Jehová Diosajj enemigosat qhanañchäna?

ADÁN chachajja, asirunakan jan parlirïtap sum yatïna. Ukhamajj mä asirojj Eva warmimpi parlkäna ukhajja, mä jan wali angelampi parlatap amuypachänwa (Gén. 3:1-6). Adanampi Evampejj janiw uka angelan utjatap yatipkänti. Ukhamäkchïnsa, Adanajj uka jan uñtʼatampi mayachtʼasisaw munasiri Awkip contra saytʼäna (1 Tim. 2:14). Jehová Diosajj ukspachaw uka angelat qhanañchañ qalltäna, jan mayampitakiw qhepat jiwayatäni sasaw sarakïna. Ukampis tiempompejja, Diosar taqe chuyma servirinak contraw uka angelajj saytʼañapäna, uksa Jehová Diosajj qhanañcharakïnwa (Gén. 3:15).

2, 3. Hebreo Arut Qellqatanakanjja, ¿kunatsa Supayat jan sinti parlaski?

² Jehová Diosajj wali yatiñaniwa, ukatwa Jupa contra saytʼir angelan sutip jan yatiykänti. * Edén Jardinan Dios contra saytʼasitapat 2.500 maranak pasjjäna uka qhepatwa yatiyaskäna, uka  angelarojj Supaya sutimpiw uñtʼasïna, uka sutejj “Kutkatasiri” sañwa muni (Job 1:6). Supaya sutejj 1 Crónicas, Job, Zacarías uka Hebreo Arut Qellqatanakanwa uñsti. Ukampis Mesiasajj janïr purinkäna uka nayrajj janiw Supayat sinti qhanañchaskänti, ¿kunatsa?

³ Amuyatajja, Jehová Diosajj janiw Supayar jachʼañchasiñap munkänti, ukatwa Hebreo Arut Qellqatanakanjj jupatsa luratanakapatsa jan sint parlaskiti. Jaqenakajj Mesiasaru uñtʼapjjaspa ukwa Diosajj munäna, ukatwa uka Hebreo Arut Qellqatanak qellqayäna (Luc. 24:44; Gál. 3:24). Jaqenakajj Mesiasar uñtʼjjapjjäna, Mesiasas purinjjarakïna ukhajja, Jehová Diosajj Jesús toqe ukhamarak discipulonakap toqew Supayatsa jan wali angelanakatsa jukʼamp qhanañchäna. * ¿Kunatsa Diosajj ukham lurpachäna? Jehová Diosajj uka angelanakarusa Supayarusa, Jesusampi ukhamarak Jesusamp chika apnaqapkani ukanakampiw qʼal tʼunjayani (Rom. 16:20; Apoc. 17:14; 20:10).

4. ¿Kunatsa Supayar jan ajjsarañasäki?

⁴ Apóstol Pedrojj akham sasaw Supayat qellqäna: “Mä leonar uñtataw warartʼasis muyuski” sasa. Apóstol Juanasti, mä ‘jachʼa dragonawa’ jan ukajj ‘asiruwa’ sasaw sarakïna (1 Ped. 5:8; Apoc. 12:9). Ukhamäkchisa, Supayarojj janiw ajjsarañasäkiti, jupajj janiw taqe chʼamani angeläkiti (Santiago 4:7 liytʼañataki). Jehová Diosaw jarkʼaqestani, Jesusasa Diosat jan jitheqtir angelanakas uka enemigosar saykatañatakejj yanaptʼarakistaniwa. Ukham yanaptʼanïkstansa, aka kimsa jisktʼanakat yatiñajj wali wakiskiriwa: ¿Supayajj qhawqha chʼamanisa? ¿Kunjamsa jaqenakarojj jan walinak lurañar chʼamañchi? ¿Kunanakaksa luraspa? Uka jisktʼanakar qhanañchkasajj kunanaksa yateqsna ukwa amuytʼañäni.

5, 6. ¿Kunatsa gobiernonakajj taqe jan waltʼäwinak jan askichirjamäpki?

⁵ Walja angelanakaw Supayamp mayachasisajj Dios contra saytʼapjjäna. Uka angelanakat yaqheparojja, Uma Juicio nayraw Supayajj warminakampi ikintasipjjañapatak chʼamañchasin engañjäna. Bibliajj uka toqet parlkasajj akham siwa: “Dragonajj [...] niya chikat warawaranakwa alajjpachat qatattäna” sasa (Gén. 6:1-4; Jud. 6; Apoc. 12:3, 4). Diosan familiapat jitheqtasinjja, uka angelanakajj Supayan munañaparjamaw sarnaqjjapjjäna. Ukampis jupanakajj janiw aleq jan wali angelakïpkiti, jan ukasti wali suma organizatäpjjewa. Supayaw Diosan Reinopar niya uñtasit organizawayi. Juparakiw akapach apnaqapjjañapatakejj gobiernonakjam uttʼayawayi (Efes. 6:12).

⁶ Supayajj uka organizacionap taypiw akapachankir taqe gobiernonakar apnaqe. ¿Kunatsa ukham sistanjja? “Oraqpachan utjir taqe markanak” Jesusar uñachtʼayäna ukhajja, Supayajj akham sänwa: “Taqe aka markanakjjar munañanïñwa churäma, kunja qamirïpkitejj ukas jumankarakiniwa. Taqe ukanakasti nayar katuyatawa, khitirutï nayajj churañ munkta ukaruw churarakta” sasa (Luc. 4:5, 6). Gobiernonakajj Supayan apnaqatäpkchisa, waljanejj markachirinakapar yanaptʼañatak chʼamachasipjjewa. Yanaptʼañ munapkchi ukasa, janiw maynis akapachan taqe jan waltʼäwinakap askichirjamäpkiti (Sal. 146:3, 4; Apoc. 12:12).

7. ¿Kunjamsa Supayajj falso religionanak toqesa, walja qollqe ganañ amtampi negocio toqesa, gobiernonak toqes jaqenakar engañji? (Página 22 ukankir dibujo uñjjattʼäta).

⁷ Supayasa demonionakapas janiw gobiernonakaruk apnaqapkiti, jan ukasti falso religionanakarus apnaqapjjarakiwa, qollqe ganañ  amtampi negocio lurañanakarus jupaw chʼamañcharaki, ukhamatwa aka oraqpachankir jaqenakar engañjapjje (Apoc. 12:9). Supayajja, falso religionanak toqejj kʼarinakwa Jehová Diosat yatichi, Diosan sutipat armasipjjañapatakis jaqenakarojj wal chʼamañcharaki (Jer. 23:26, 27). Ukhamatwa Diosaruw adorasipkta sasin amuyir suma chuyman jaqenakajj engañjatäpjje, demonionakarus jan amuyasis adorapjjaraki (1 Cor. 10:20; 2 Cor. 11:13-15). Walja qollqe ganañ amtampi negocio lurañanak toqesti, walja qollqenïsakisa walja cosasanakanïsakis kusisit jakasiñajj utjkaspa ukham amuyayasaw jaqenakar engañji (Prov. 18:11). Ukar creyirinakajja, Diosar serviñat sipansa ‘qollqe’ jikjjatañatakiw jakäwinakapan wal chʼamachasipjje (Mat. 6:24). Diosar inas jupanakajj mä jukʼa creyisipkchi, ukampis qollqe munañaw chuymanakap chʼamaktʼayi (Mat. 13:22; 1 Juan 2:15, 16).

8, 9. 1) Kuntï Adanasa, Evasa, Dios contra saytʼir angelanakas lurapkäna ukatjja, ¿kunanaksa yateqsna? 2) Supayajj qhawqha chʼamanisa uk yatiñajj ¿kunansa yanaptʼistu?

⁸ Kuntï Adanasa, Evasa, Dios contra saytʼir angelanakas lurapkäna ukat akanakwa yateqsna: maya, jakäwisan pä thakikiw utji, Jehová Diosarut taqe chuyma serviñäni jan ukajj Supay toqetcha saytʼasiñäni ukwa ajlliñasa (Mat. 7:13). Paya, Supay toqet saytʼasirinakajj jupat mä jukʼa yanaptʼa katoqapjjaspawa. Adanampi Evampejj kunatï walïki jan walïkaraki uk jupanak pacha amtañwa ajllipjjäna. Demonionakasti, gobiernonakjjaru apnaqañataki mä jukʼa chʼamwa katoqapjjarakïna (Gén. 3:22). Ukampis Supay toqet saytʼasiñäni ukhajja, jan walinakan uñjasikipuniñäniwa. Janiw kuna sumsa jupat katoqksnati (Job 21:7-17; Gál. 6:7, 8).

⁹ Supayajj qhawqha chʼamanisa uk yatiñajj ¿kunjamsa yanaptʼistu? Diosajj kunjamtï gobiernonakar uñjki ukham uñjañatakiw yanaptʼistu, Diosan arunakap taqe chuyma yatiyañatakis yanaptʼarakistuwa. Jehová Diosajj gobiernonakar respetompi uñjañaswa muni (1 Ped. 2:17). Uka gobiernonakan leyinakapatï Diosan leyinakap jan conträkchi ukhajj istʼañasawa, ukwa Jupajj munaraki (Rom. 13:1-4). Maysa toqetjja, janipuniw politiconak toqetsa ni gobiernonak toqetsa saytʼasiñasäkiti ukwa amuyaraktanjja (Juan 17:15, 16; 18:36). Supayajj Diosan sutip jan walitwa uñjayañ muni, jiskʼachañwa munaraki. Uk amuyañajj Diosat kunatï cheqäki uk jaqenakar jukʼampi yatichañatakiw chʼamañchistu. Cheqas Diosan sutip apañasa aytasiñasa, jiwasatakejj wali kusiskañawa. Ukaw qollqeru, cosasanakaru munañat sipansa jiwasatakejj jukʼamp wakiskirejja (Is. 43:10; 1 Tim. 6:6-10).

10-12. 1) ¿Kunjamsa Supayajj angelanakar engañjpachäna? 2) Kunatï walja angelanakamp paskäna ukatjja, ¿kunsa yateqsna?

¹⁰ Supayajj kunayman toqetwa jaqenakarojj jan walinak lurayañ muni. Sañäni, munañaparjam sarnaqayañatakejja, kunanaktï jaqenakajj munapki ukanakampiw engañji, awisasti ajjsarayasaw jaqenakarojj jan walinak lurayarakispa.

¹¹ Angelanakarojj kunjamsa engañjäna uka toqet amuytʼañäni. Janïr engañjkasajja, jupanakat wali sumwa yatjjatpachäna. Mä qhawqha angelanakajj Supayan sipitapar jalantasin jaqenakan phuchanakapampi wawanïñataki mayachasjjapjjäna ukhajja, wawanakapajj wali qhoru, jan sinttʼasiri jachʼa jaqenakäpjjänwa (Gén. 6:1-4). Supayajj janiw ukampikejj angelanakar engañkpachänti, jan ukasti jaqenakjjar munañanïpjjañapatakiw chʼamañcharakpachäna. Jupan amtapajj ‘warmin wawap’ puriniñap jarkʼañäpachänwa (Gén. 3:15). Ukhamäkchïnsa, Jehová Diosajj Uma Juicio apanisaw Supayampina Dios contra saytʼir angelanakampin jan wali amtanakap chhaqtayäna.

¹² ¿Kunanaksa jiwasajj ukat yateqsna? Qʼañu juchanak lurañatsa munañasak thaqañatsa walpun amuyasiñasa. Uka angelanakajj walja maranakaw Diosarojj nayraqatapan servipjjäna. Ukhamäkchïnsa, jupanakat waljanejj janiw jan wali amuyunak apanukupkänti, jan ukasti jukʼampiw uka toqet lupʼipjjpachäna. Jiwasampejj ukhamarakiw pasaspa, inas Diosarojj walja maranak serviskstan, ukampis jan walinak lurañ munañajj chuymasan jiltarakispawa (1 Cor. 10:12). Ukatwa chuymasajj kunjamäskisa uk sapa kuti amuytʼañajj wali wakiskiri. Qʼañu juchanak lurañ munañasa jan ukajj jachʼa jachʼa tukuñ munañanakas utjani ukhajja, jankʼakiw aparpayañasa (Gál. 5:26; Colosenses 3:5 liytʼañataki).

13. 1) ¿Kunjamsa Supayajj jaqenakar engañjaraki? 2) ¿Kunjamsa Supayan sipitanakapat jarkʼaqassna?

¹³ ¿Kunjamsa Supayajj jaqenakar engañjaraki? Demonionakat jukʼamp yatiñ munañanakampiw engañjaraki. Ukjja, janiw falso religionanak toqekejj chʼamañchkiti, jan ukasti peliculanaka, anatañ videonaka, jan ukajj yaqha ukhamanak toqew chʼamañcharaki. Ukanakanjja, layqasiñanakajj walikïkaspas ukhamaw uñachtʼayasi. ¿Kunjamsa Supayan uka sipitanakapat jarkʼaqassna? Kunanakamp kusistʼañas walikïski, kunanakas jan walïkaraki uk Diosan markapaw sañapa sasin janiw suyañasäkiti, jan ukasti sapa mayniw Biblian yatichäwinakaparjam amuytʼañ yateqañasa (Heb. 5:14). Jiwasatï apóstol Pablon ewjjtʼaparjamajj Diosar ‘taqe chuyma munasiñäni’ ukhajja, amuytʼasisaw kusistʼañanak ajlliñäni  (Rom. 12:9). Akham sasaw jisktʼasiñasa: “¿Kunanakampitï kusistʼkä ukanakajj Diosar taqe chuyma munasitajti uñachtʼayani? Bibliat yateqerinakajasa, jan ukajj Bibliat yateqañ munapki ukanakasa, ¿ukanakampi kusistʼatajat kamsapjjetaspasa?” sasa. Jiwasatï kuntï yatichktan ukarjam sarnaqañäni ukhajja, janiw Supayan sipitanakaparojj facilak jalantkañäniti (1 Juan 3:18).

14. ¿Kunjamsa Supayajj ajjsarayañ munistu, ukat kunjamsa ukanakar saykatsna?

¹⁴ Supayajj janiw jan walinakaruk puriyañ munkistuti, jan ukasti Jehová Diosat jitheqtañasatakiw ajjsarayañ munarakistu. Inas jupajj gobiernonak toqejj Diosan arunakap yatiyañ jarkʼchispa, jan ukajj Bibliarjam sarnaqañ munatasatwa trabajir masinakasampi yateqer masinakasampi jiskʼachayistaspa (1 Ped. 4:4). Tantachäwinakar jan sarañasatakis familiaranakasampiw jarkʼayistaspa (Mat. 10:36). ¿Kunjamsa ukanakar saykatsna? Maya, niyakejjay Supayajj jiwasanak contra nuwasiskchejja, uka jan waltʼäwinakajj utjakipuniniwa, janiw sustjasiñasäkiti (Apoc. 2:10; 12:17). Paya, uka jan walinakat sipan kunas jukʼamp wakiskiri ukwa amuyañasa. Jehová Diosarojj kun katoqañ laykukis sirvsna ukhamwa Supayajj amuyi. Jan walinakan uñjasisajj Diosar ‘maldecipjjaniwa’ sasaw amuyaraki (Job 1:9-11; 2:4, 5). Kimsa, taqe kunat sipansa Jehová Diosaruw confiyañasa, jupaw jan walinakar saykatañatakejj chʼam churistani. “Nayajj janipuniw jaytanukkämati” sasaw Jupajj sistu (Heb. 13:5).

15. ¿Supayajj munkir jan munkir jan walinak lurayistaspati? Uk qhanañchtʼma.

¹⁵ Supayajj janiw munkir jan munkir jan walinak luraykistaspati (Sant. 1:14). Walja jaqenakajja, Supayan munañaparjamaw jan amuytʼasisa sarnaqasipki. Ukampis Diosan arunakap yateqjjasajj khitirus servini uk sapa mayniw amtjjañapa (Hech. 3:17; 17:30). Jiwasatï Diosan munañap taqe chuyma lurañ amtstanjja, Supayajj janipuniw Diosat jitheqtaykistaniti (Job 2:3; 27:5, NM).

16, 17. 1) ¿Kunsa Supayasa demonionakas jan lurapkaspa? 2) ¿Kunatsa Diosar jachʼat mayisiñ jan ajjsarañasäki?

¹⁶ ¿Kunsa Supayasa demonionakas jan lurapkarakispa? Jupanakajj janiw kuntï amuyktan, jan ukajj kunatï chuymasan utjki ukanak yatipkaspati. Bibliajj janiw kawkjansa yatipjjewa sasajj siskiti. Jehová Diosampi Jesusampikiw yatipjjaspa (1 Sam. 16:7; Mar. 2:8). Ukampis jachʼat parltan, jan ukajj jachʼat orastan ukhajja, ¿Supayasa demonionakas istʼapjjpachati? ¿Diosar jachʼat mayisiñ ajjsarañasati? Janiwa. ¿Kunatsa ukham sistanjja? Supayaw uñjitaspa sasakejj janiw Diosar serviñ ajjsarayasktanti, ukhamarakiw Diosar jachʼat mayisiñ jan ajjsarañasäkiti. Biblianjja, Diosan walja servirinakapajj oración jachʼat mayisipjjäna sasaw qhanañchi, jupanakajj Supayaw istʼitani sasajj janiw ajjsarayasipkänti (1 Rey. 8:22, 23; Juan 11:41, 42; Hech. 4:23, 24). Jiwasatï Diosan munañaparjam sarnaqañatak chʼamachasiñäni ukhajja, Supayajj janiw wiñayatakejj jan walinak lurkistaniti, Jehová Diosaw jarkʼaqestani (Salmo 34:7 liytʼañataki).

¹⁷ Enemigosar uñtʼañasajj wakisiwa, ukampis janiw jupar ajjsarañasäkiti. Jehová Diosan yanaptʼapampejja, pantjasir jaqëkasas Supayar atipjsnawa (1 Juan 2:14). Jiwasatï jupa contra saytʼasiñäni ukhajja, jupajj jiwasat jaltjjaniwa (Sant. 4:7; 1 Ped. 5:9). Amuyatajja, wayn tawaqonakaruw Supayajj jan waltʼayañ jukʼamp muni. ¿Kunsa jupanakajj Supayar saykatañatak lurapjjaspa? Akjjar jutki uka yatichäwinwa ukajj qhanañchasiskani.