1. Lárigiñe lafigouhan Adán tuma Ewa, ka lariñagubei Heowá luagu wágani?

SUBUDI lumuti meha Adán buidu siñá lan hayanuhan hewe. Ligíati, dan le tayanuhanbei aban hewe tuma Ewa, másiñati samina lan aban lan sífiri ayanuhabei tuma (Agu. 3:1-6). Lóuguati meha hasubudirun bián gürigia ha luagu sífiri le. Íbini ítara, aba líchuguni Adán lanagan luagun Lúguchi hínsiñehabuti le siélubei, ábati lóundarun lumoun sífiri le lidan lebedaagun (1 Tim. 2:14). Lau lóufudagun, aba lagumeserun Heowá íchiga ariñahani luagu ágani le adügübei lun leferidiragun Adán tuma Ewa, ani füramaseti lachülürüba lan dan lun lagumuchun lau. Gama lumoun, ariñagati giñe Heowá lábürühaba lan sífiri le luagu somu dan hawagun ha hínsiñehabubaña lun Heowá (Agu. 3:15).

2, 3. Ka uagu míchugun lubéi Heowá saragu ariñahani luagu Satanási lubaragiñe liabin Mesíasi ubouagun?

² Heowá, Bungiu le chútimabei au, mariñagun lumuti woun kátima lan líribei ánheli le ebedaagubei lun. * Ani agurabati meha lun lásügürün 2,500 irumu lárigiñe ebedaaguni ligía lun lasubudiragüdüni dimurei le ayusurúbei lun layanuhóun luagu sífiri salufuriti le (Hobu 1:6). Lidan iñeñein le ídanbei tabürüdǘwa Bíbülia furumiñe,  yúsuati dimurei “Satanási”, mini lan “Kóntürati”, lun layanuhóun luagu Mafia. Ani tídanrügüñein ǘrüwa líburu lidan Abürüdǘni Ebüréu layusurúa iri le: 1 Krónikasi, Hobu luma Sakaríasi.

³ Genegeti mabusenrun lan meha Heowá lun súdini lan larihíniwa Satanási. Ligíati, lidan Abürüdǘni Ebüréu, mayanuhóuati saragu luagu luma luagu le ladügübei. Létima lébunabei labürüdagüdüni Heowá fánreinti le tidan Bíbülia lun líderaguniña gürigia asubudirei káteitima lan Mesiasibei luma lun hafalaruni (Luk. 24:44; Gal. 3:24). Dan le lóunahanbalin Heowá Mesíasi ubouagun, yusu lumuti hama lani disipulugu lun lasubudiragüdüni woun saragu lídangiñe le wasubudirubei luagu Satanási hama ánheligu ha óundarubaña lumoun. * Súdiniti lun ítara lan ladüga layusurubei Heowá Hesusu hama kristiánugu ha anuadirúaañabaña lun hagumuchun lau Satanási luma hau lánigu (Rom. 16:20; Aruf. 17:14; 20:10).

4. Ka uagu moun lumuti lubéi wanufudedun saragu luéi Mafia?

⁴ Ariñagati Féduru ítara liña lan Satanási kei aban “liñún gáñiti”, ani wati Huan lun “hewe” luma “düragón” (1 Fe. 5:8; Aruf. 12:9). Lau sun lira, moun lumuti wanufudedun saragu luéi Mafia ladüga gébehati lubafu (aliiha huméi Santiagu 4:7). Anihein Heowá, Hesusu hama ánheligu úaraguatiña wama. Lau hídehan gayaraati wagagibudagun luma wágani. Gama lumoun, mosu wóunabun ǘrüwa álügüdahani súdiniti: Hanarimeti san lubafu Mafia? Ida liña lálugun Mafia lun gabafu lan hawagu gürigia? Ani dagá halía lébeda lubafu? Akutiha waméi álügüdahani le ani ariha wamá kaba lan wafurendeira lídangiñe.

5, 6. Ka uagu siñá lubéi hadügüni urúeigu ubouaguna sun asansiruni le hemegeirubei gürigia?

⁵ Óundaraguatiña saragu ánheligu wuribatiña lumoun Satanási lidan lebedaagun. Lubaragiñe Guran, adügati lun hagamaridun hádangiñe ánheligu hagía hama würiña. Adimurehatu Bíbülia luagu katei le dan le tariñagun ítara liña lan kei aban düragón le adürügüdübei aban hádangiñe kada ǘrüwa waruguma ha siélubaña (Agu. 6:1-4; Hud. 6; Aruf. 12:3, 4). Dan le hígirunbalin ánheligu ha Heowá aba híchaagun houngua lábugiñe lagumadihan Satanási. Masaminarun wamá ábanrügü hamá sétanu hau wuribatiña. Adügaali Satanási aban arúeihani libe Larúeihan Bungiu, ñein lubéi ligía lan urúeibei. Abugura lumutiña máfianu lun hagumadihan, rúhali ubafu houn ani adüga laaña lun gumadimatiña hamá ubouagu (Efe. 6:12).

⁶ Yusu lumuti Satanási óundaruni le lun lagumadiruni sun arúeihani le ubouagubei. Arihúati ítara liña lan dan le larufudubalin sun arúeihani le ubouagubei lun Hesusu, ariñaga ligía lun: “Níchugubei sun ubafu luma sun uéiriguni le bun, ladüga ibiha naali sun le, ani gayaraati níchuguni lun le unti nabusenra” (Luk. 4:5, 6). Íbini gabafu lan Satanási hawagu urúeigu, saragu hádangiñe adügatiña katei buiti hawagu lílana hageira. Añahein urúeigu buiti haritagun. Gama lumoun, úati ni aban arúeihani ubouagu ni urúei le gayaraabei ladügüni sun asansiruni le hemegeirubei gürigia (Sal. 146:3, 4; Aruf. 12:12).

7. Amu luéi arúeihani ubouaguna, ka amu katei layusurubei Satanási lun leyeeduniña gürigia, ani ida liña ladügüni? (Ariha huméi dibuhu le lídanbei lagumeseha arütíkulu).

⁷ Mámarügüñein arúeihani ubouaguna layusura Satanási lun leyeedaguniña sun lílana ubóu, yusu lumuti giñe relihión mama inarüniti luma bísinisi ubouaguna (Aruf. 12:9). Yusu lumuti relihión mama inarüniti lun larufudahóun iyeeni luagu Heowá. Ani genegeti  busén lan Mafia lun habulieiduni sun gürigia liri Bungiu (Her. 23:26, 27). Ítara, saminatiña saragu gürigia haruma tanigi háhuduraguña lan lun Bungiu, gama lumoun, houn máfianu háhuduragua (1 Ko. 10:20; 2 Ko. 11:13-15). Yusu lumuti giñe Satanási bísinisi ubouaguna lun leyeeduniña gürigia. Kei hénpulu, adügati bísinisi burí le lun hasaminarun gürigia lunti lan harisidun luma lun gibe lan hamegegun lun gunda hamá (Ari. 18:11). Ha afiñerubalin iyeeni le áfaaguatiña lidan sun habagari lun hibihin seinsu lubaragiñe hamuga heseriwidun lun Heowá (Mat. 6:24). Adügati hínsiñehabu lun seinsu lun masandihaña lan ínsiñeni luagu Bungiu (Mat. 13:22; 1 Huan 2:15, 16).

8, 9. a) Ka bián katei wafurendeirubei lídangiñe le ladügübei Adán tuma Ewa luma lídangiñe hebedaagun ánheligu? b) Ka idan lahuuda woun wasubudiruni gabafu lan Satanási?

⁸ Furendeitiwa bián katei súdiniti lídangiñe le ladügübei Adán tuma Ewa luma lídangiñe hebedaagun ánheligu. Furumiñe, furendeitiwa lunti lan wanúadirun anhein wóudiba lubéi luéigiñe lóubadina Heowá o wóundaraguba lan lumoun Satanási (Mat. 7:13). Ani le libiaman, ánhawa óundara lumoun Satanási lunti wasubudiruni gébeha lan le lunti weresibiruni lúmagiñe. Adán tuma Ewa hagía guánarügü íchugubalin halurudun luagu le buídubei luma le wuribabei, ani ibihatiña máfianu lun gabafuraü hamá luagu harúeihan gürigia (Agu. 3:22). Gama lumoun, hanarimetimati le lunbei lafayeiruni gürigia dan le lidin luéigiñe lóubadina Satanási sügǘ luéi nege buiti le libihubei (Hob. 21:7-17; Gal. 6:7, 8).

⁹ Ida liña lahuudun woun wasubudiruni hanarime lan lubafu Mafia? Íderagua lumutiwa lun gunfuranda wamani busén lan Heowá lun inebe hamá gumadimatiña hama urúeigu woun (1 Fe. 2:17). Agurabati lun gaganbadi wamá lun lúrudu le híchugubei madüraagun wamaali ligía lugumadin Bungiu (Rom. 13:1-4). Lunti giñe wasubudiruni moun lumuti lan woudin luéigiñe lóubadina ni aban arúeihani o urúeigu, ni lun wíchuguni wídehan lun ni aban luwuyeri polítika (Huan 17:15, 16; 18:36). Kei ariha wamuti lan le labusenrubei Satanási ladügün lau liri Heowá, ínchaha lumutiwa lira lun warufudahani inarüni luagu Bungiu houn gürigia. Yusu wamuti liri ani barǘ wamuti lau pantaü. Subudi wamuti barǘ lan wínsiñehabu lun Bungiu saragu katei buiti woun sügǘ luéi línsiñedun seinsu luma umegeguni woun (Isa. 43:10; 1 Tim. 6:6-10).

10-12. a) Másiñati yusu lan Satanási aban emei lun héiguadun saragu ánheligu tidoun lisadaran, ida liña ladügüni? b) Ka gayaraabei wafurendeiruni lídangiñe le asuseredubei houn ánheligu hagía?

¹⁰ Lun libihin Satanási lun hadügüni gürigia le labusenrun, yúsuti katei le adügübei lun héiguadun gürigia tidoun lisadaran. Kei hénpulu, anihein dan yúsuti emei ani anihein  burí giñe dan adügati lun hadügüdarun amu wawagu lun wadüraaguni lilurudun Bungiu.

¹¹ Furumiñe, akutiha waméi ligaburi layusurun Satanási aban emei lun ladügün lun héiguadun saragu ánheligu tidoun lisadaran. Chóuruti sügǘ lan saragu dan aríaguaña buidu buidu lun lasubudiruni ida luba lan lachawahaniña lun hóundarun lumoun. Dan le héiguadunbei fiu hádangiñe tidoun lisadaran ani aba hagamaridun würiña, aba garahüñü hamá hígandei ha furundebaña ani hanarime hagía (Agu. 6:1-4). Gayaraati mámarügüñein lan magíaguni layusura Satanási kei emei, füramaseti giñe houn ánheligu múaraguntiña ha ladügüba lan lun harúeihani ubóu. Másiñati busén lan yebe lun miabin lan ‘tadügawagun würi’, le meha füramase laalibei Bungiu (Agu. 3:15). Aba lóunahani Heowá Guran ani ítara liña ladügün lun masuseredun lan le labuserunbei Satanási hama lumafianu hadügün.

¹² Ka gayaraabei wafurendeirun? Moun lumuti meberesen wamá lau dencha lan magíaguni luma lasaminarun gürigia luouguoun súnwandan. Seriwitiña meha ánheligu ha óundarubaña lumoun Satanási liñuarügü Heowá luagu saragu dan. Íbini lurugabu lan meha Bungiu heredera, ígiratiña saragu hádangiñe lun labouchun luriban ayumahani tidan hanigi luma lun gálagüle lan. Ítarameme, másiñati seriwihadiwa lan luagu saragu irumu lidan fánreinti tani lóundarun Bungiu le yaabei ubouagu. Gama lumoun, íbini tidan lóundarun Heowá, gayaraati wagumeserun ayumaha katei wuribati tidan wanigi (1 Ko. 10:12). Wéiriti lisudinin lun wakutihani le tídanbei wanigi luma lun mígiraguagüdün wamá woungua lun luriban saminaü luma pantaü (Gal. 5:26; aliiha huméi Kolosana 3:5).

13. a) Ka amu emei layusurubei Satanási ani buiti lidin lun lau? b) Ka gayaraabei wadügüni lun méiguadun wamá tidoun sádara to?

¹³ Ábanya lídangiñe emei le layusurubei Mafia ani buiti lidin lun lau, lau layusuruni habusenrun gürigia hasubudirun luagu katei le aramudaguati. Adügati lun busén hamá gürigia hasubudirun hawagu máfianu mámarügü lau layusuruni relihión mama inarüniti, yusu lumuti giñe bísinisi ubouaguna le luáguti isebáhari. Yúsuti pelikula, huraraü lidan gágamuru, tidan bigibigitu, konputadora o katei líbeina lira lun hagundaarun gürigia lau katei hawaguti máfianu. Ka lunbei wadügüni lun méiguadun wamá tidoun sádara to? Moun lumuti wagurabun lun tariñaguni lóundarun Bungiu woun ka lan burí isebáhari buídubei luma le wuribabei. Kada aban wádangiñe lunti úara lan wasaminan luma lilurudun Bungiu luáguti lasubudirún le buídubei lumoun le wuribabei (Heb. 5:14). Wanúadahaba buidu ánhawa afalarei ladundehan apostolu Pábulu lun hínsiñe lan Bungiu woun “lau ínsiñeni le inarüniti” (Rom. 12:9). Álügüdagua wamá woungua: “Anhein lariha aban aturiahati o aban gürigia le nabisidahabei  ka lan isebáhari nanúadirubei, lasaminaruña hamuga san nawinwanduñein lan le napurichihabei o biangua lan nigibu?”. Ánhawa awinwandei le wapurichihabei, hénrengutimabei woun lun wéiguadun tidoun lisadaran Satanási (1 Huan 3:18).

14. a) Ida liña gayara lan ladügüdarun Satanási wawagu? b) Ida luba wagagibudagun luma óuchawaguni burí le?

¹⁴ Ariha waméi ida liña lan ladügüdarun Satanási wawagu lun múaragun wamá lun Heowá. Gayaraati línchahaniña urúeigu lun hamahadun lun wapurichihan. Gayaraati giñe ladügün lun hadügün wapanaagu leskuelarugu o lidan wadagimanu bula wau ladüga gaganbadi wamá lun lilurudun Bungiu luáguti laruman ibagari (1 Fe. 4:4). Anihein dan, adügati giñe lun hadügün waduheñu lun midin wamá adamuridagua, lau sun yebe buidu lan haritagun (Mat. 10:36). Ida luba wagagibudagun luma óuchawaguni burí le? Furumiñe, lunti wagurabun lasusereduba lan katei burí le ladüga lageindaguña Satanási wama (Aruf. 2:10; 12:17). Libiaman, mígira wamá lun ladügün turobuli le lun wabulieiduni le lasigenehabei Mafia: seriwi wamá lun Bungiu dánrügü le buidu lan lidin woun ani wíchugubei lan wanagan luagu anhein adügüdarúa wawagu (Hob. 1:9-11; 2:4, 5). Ani le lǘrüwan, amuriaha wamá erei luma Heowá lun wawandun. Haritagua waméi mígirun lubadiwa lan (Ebü. 13:5).

15. Gayaraati san lafosuruniwa Satanási lun wadügün aban katei le mabusenrun wabéi wadügün? Afuranguagüda huméi.

¹⁵ Siñati lafosuruniwa Satanási lun wadügün aban katei le mabusenrun wabéi wadügün (Sant. 1:14). Míchuguntiña saragu gürigia fe luéigiñeñanu lan lóubadina Mafia. Gama lumoun, dan le hafurendeiruni inarüni lunti hasaminarun kaba lan un heseriwida (Adü. 3:17; 17:30). Anhein aranseediwa lubéi lun wadügüni lugundan Bungiu siñabei ladügün Satanási ni kata lun múaragun wamá lun Bungiu (Hob. 2:3; 27:5).

16, 17. a) Ka amu burí katei siñá lubéi Mafia ni lumafianu adüga? b) Ka uagu moun lumuti lubéi wanufudedun luéi wiñuruni wamalali dan le wafurieidun?

¹⁶ Anihein amu burí katei le siñá lubéi Mafia ni lumafianu adüga. Kei hénpulu, mariñaguntu Bíbülia ni aban wéiyaasu gayara lan haliihani hasaminan o hanigi gürigia. Heowárügüñein luma Hesusu gayara hadügüni lira (1 Sam. 16:7; Mar. 2:8). Ánheinti dan le wiñuruni wamalali lun wayanuhan o lun wafurieidun, lunti san wanufudedun luéi laganbuniwa Mafia hama lumafianu luma lun hayusuruni le wariñagubei lun hadügün wuribani woun? Uá. Ítara kei manufude wamá lun weseriwidun lun Heowá ladügarügü gayara lan larihiniwa Mafia, siñati giñe wanufudedun lun wiñuruni wamalali dan le wafurieidun luéi laganbuniwa. Le linarün katei, gíbetiña lubúeingu Bungiu ha uágubaña tayanuha Bíbülia ha iñurubalin hamalali lun hafurieidun, ani mariñawagúnti hanufude hamá meha luéi laganbuniña Satanási (1 Uru. 8:22, 23; Huan 11:41, 42; Adü. 4:23, 24). Ánhawa áfaagua lau sun wayaraati lun úara lan le wariñagubei luma le wadügübei luma lugundan Bungiu, gayaraati wachoururuni mígirunbei lan Heowá lun ladügün Mafia wuribani woun le siñá lubéi aransera (aliiha huméi Sálumu 34:7).

¹⁷ Mosu wasubudiruni katei lan wáganibei, gama lumoun, moun lumuti wanufudedun luéi saragu. Lau sun gafigoun wamá, gayaraati wagañeiruni lau lídehan Heowá (1 Huan 2:14). Ladüga ánhawa mígiraguagüdün woungua lun Mafia lanurahaba wawéi (Sant. 4:7; 1 Fe. 5:9). Genegeti hawagutima lan nibureintiña lábürüha Mafia. Ka gayaraabei hadügüni lun deregüdagu hamá lidan hafiñen luéi leyeedaguniña Mafia? Wóunabubei álügüdahani le lidan leweñegua arütíkulu.