1. ¿Mbaʼépa omombeʼu Jehová ñane enemígogui Adán ha Eva opeka rire?

ADÁN oikuaa kuri umi mbói noñeʼẽiha. Upévare, oñentera rire peteĩ mbói oñeʼẽ hague Évape, opilláne raʼe ndahaʼeiha peteĩ animál la oñeʼẽva, síno peteĩ espíritu (Gén. 3:1-6). Adán ha Eva ndoikuaái kuri mávapa upe espíritu. Upéicharõ jepe Adán odesidi oapoja upe extráñope ha opuʼã Itúa ohayhuetévare chupe (1 Tim. 2:14). Ensegída Jehová omeʼẽ informasión upe enemígo iñañaitévagui, ha opromete ohunditaha chupe. Péro oavisa porã avei pe espíritu oñeʼẽ vaʼekue pe mbói rupive, oñemoĩ mbaretetaha entéro ohayhúvare Ñandejárape (Gén. 3:15).

2, 3. ¿Mbaʼérepa oime vaʼerã Jehová noñeʼẽguasúi Satanás rehe pe Mesías ou mboyve?

² Jehová núnka nomombeʼúi mbaʼéichapa héra pe ánhel opuʼã vaʼekue hese. * Ohasa rire 2.500 áño, omombeʼu mávapa upe rrevélde (Job 1:6). Oñehenói chupe “Satanás”, heʼiséva “oñemoĩva ótrore”. Oĩ mbohapy lívronte Escrituras Hebréaspe  omensionáva Satanáspe, umíva hína 1 Crónicas, Job ha Zacarías. ¿Mbaʼérepa saʼiete oñeñeʼẽ hese pe Mesías ou mboyve?

³ Escrituras Hebréaspe Jehová noñeʼẽguasúi Satanásre ni umi mbaʼe ojapóvare. ¿Mbaʼérepa? Pórke ko párte de la Biblia ojejapo ikatu hag̃uáicha oipytyvõ umi héntepe oikuaa hag̃ua mávapa pe Mesías ha omoirũ hag̃ua chupe (Luc. 24:44; Gál. 3:24). Pe Mesías oúrõ guare, Jehová ojevale hese ha idisipulokuérare omombeʼu hag̃ua heta mbaʼe Satanás ha umi ánhel oapoja vaʼekuégui chupe. * ¿Mbaʼérepa ojapo upéva? Jehová oipurúta rupi Jesús ha umi unhídope ohundi hag̃ua Satanás ha isegidorkuérape (Rom. 16:20; Apoc. 17:14; 20:10).

4. ¿Mbaʼérepa ndajakyhyjéi vaʼerã Satanásgui?

⁴ Apóstol Pedro heʼi Satanás ojoguaha peteĩ león pochýpe, ha Juan katu ohenói chupe “mbói” ha “dragón” (1 Ped. 5:8; Apoc. 12:9). Péro ndajakyhyjéi vaʼerã pe Diáblogui, pórke ipodér oreko límite (elee Santiago 4:7). Jehová, Jesús ha umi ánhel iñeʼẽrendúva oñangareko ñanderehe. Upéva ñanepytyvõ jagueropuʼaka hag̃ua ñane enemígope. Péro iñimportánte ñambohovái koʼã mbohapy porandu: ¿Mbaʼeichaite pevépa ipoderóso Satanás? ¿Mbaʼépa ojapo oporodomina hag̃ua? ¿Ha mbaʼépa ndaikatúi ojapo? Ñarrespondemína koʼã pregúnta ha jahecha mbaʼépa ikatu ñaaprende.

5, 6. ¿Mbaʼérepa umi goviérno umáno ndaikatúi ogueru umi kámbio ñaikotevẽtéva?

⁵ Hetaiterei ánhel opuʼã avei Ñandejárare ha oñeuni Satanás ndive. Pe dilúvio mboyve, Satanás okonvense por lo méno unos kuánto ánhelpe oreko hag̃ua rrelasión sexuál kuñanguérandi. La Biblia oñeʼẽ upévare heʼi jave pe dragón hoʼa hague yvágagui ha ogueru hague hapykuéri pe tercera párte umi estrélla (Gén. 6:1-4; Jud. 6; Apoc. 12:3, 4). Umi ánhel ohejárõ guare Ñandejára famíliape, oñemoĩ Satanás poguýpe. Péro ani ñaimoʼã koʼã ánhel irrevéldeva oĩha sarambikuépe. Satanás oñehaʼã oreko peteĩ goviérno orekoháicha avei Jehová, péro haʼe oñemoĩ ijupe voi rréiramo ha oorganisa umi demóniope. Omeʼẽ chupekuéra autorida ha omoĩ chupekuéra ogoverna hag̃ua ko múndo (Efes. 6:12).

⁶ Satanás oipuru iñorganisasión odomina hag̃ua entéro umi goviérno umánope. ¿Mbaʼéichapa jaikuaa upéva? Haʼe ohechaukárõ guare Jesúspe “umi goviérno oĩva ko yvy ape ári”, heʼi kuri: “Amoĩta nde poguýpe opa koʼã goviérno ha umi mbaʼe porãita orekóva. Koʼãva ningo oñemeʼẽmbaite chéve ha ameʼẽsévape ameʼẽta” (Luc. 4:5, 6). Upéicharõ jepe, heta goviérno ojapo jepi la iporãva umi persóna oikóvape g̃uarã ipoguýpe, ha oĩ avei añetehápe oipytyvõséva umi héntepe. Péro ni peteĩ governánte umáno ndaikatúi ogueru umi kámbio ñaikotevẽtéva (Sal. 146:3, 4; Apoc. 12:12).

7. ¿Mbaʼéichapa Satanás ojevale umi rrelihión japúre ha umi negósio ha komérsiore? (Ehecha pe taʼanga oĩva iñepyrũme).

⁷ Satanás ha umi demónio oipuru avei umi rrelihión japu ha umi komérsio ha negósio oĩva ko múndope. Péicha ombotavy hikuái “ko múndo kompletoitépe” (Apoc. 12:9). Satanás ojevale umi rrelihión japúre omoherakuã vai hag̃ua Jehovápe, ha hiʼarive ojapo ikatúva guive pono ojekuaa Ñandejára réra  (Jer. 23:26, 27). Upéicha rupi, oĩ persóna ipyʼaporãva oimoʼãva oadoraha Ñandejárape péro añetehápe oadora hína umi demóniope (1 Cor. 10:20; 2 Cor. 11:13-15). Satanás oipuru avei umi komérsio ha negósio oĩva ko múndope ñanembotavy hag̃ua. Oipota ñapensa pe pláta ha umi mbaʼerepy haʼeha la ñanembovyʼáva (Prov. 18:11). Umi oroviáva koʼã japu, oiko pe “pláta rapykuéri” oservi rangue Ñandejárape (Mat. 6:24). Oĩ voi umi persóna ohayhu vaʼekue Ñandejárape, péro upéi ou ohayhuve umi mbaʼerepy ha omboyke chupe (Mat. 13:22; 1 Juan 2:15, 16).

8, 9. a) ¿Mbaʼépa ikatu ñaaprende Adán, Eva ha umi ánhel rrevélde ojapo vaʼekuégui? b) ¿Mbaʼérepa iporã jaikuaa Satanás odominaha ko múndo?

⁸ Ñande ikatu ñaaprende mokõi mbaʼe iñimportánteva Adán, Eva ha umi ánhel rrevélde ojapo vaʼekuégui. Primero, ñaaprende oĩha mokõi grúponte, ha jaiporavo vaʼerãha peteĩva. Ikatu ñañemoĩ Jehová favórpe térã Satanás favórpe (Mat. 7:13). Segundo, ñaaprende umi oñemoĩ vaʼekue Satanás ládope ohupytyha unos kuánto venefísionte. Por ehémplo, Adán ha Eva okonsegi kuri odesidi ijehegui mbaʼépa iporã ha mbaʼépa ivai. Umi demóniope katu oñemeʼẽ mimi autorida ogoverna hag̃ua yvyporakuérape (Gén. 3:22). Péro entéro oapojáva Satanáspe katuete opa vaíta, ha umi mbaʼe ohupytýva hikuái amo ipahápe ndaideprovechomoʼãi chupekuéra (Job 21:7-17; Gál. 6:7, 8).

⁹ ¿Mbaʼérepa iporã jaikuaa Satanás odominaha ko múndo? Pórke upéva ñanepytyvõ jahecha hag̃ua hekoitépe umi goviérno, ha ñanemokyreʼỹ japredika hag̃ua pe marandu porã. Péro Jehová oipota jarrespeta umi autoridápe (1 Ped. 2:17). Haʼe ohaʼarõ ñakumpli umi léi noĩrima guive Iléi kóntrape (Rom. 13:1-4). Upévare ndajaapojái vaʼerã umi partído polítiko ni umi líder umánope (Juan 17:15, 16; 18:36). Satanás oñehaʼã oñomi Jehová réra ndoipotáigui ojekuaa, ha avei ojapo ikatúva guive omongyʼa hag̃ua upe téra. Upévare ñande ñañehaʼãmbaite ñamboʼe umi héntepe mbaʼeichagua persónapa Ñandejára. Javyʼaiterei ñañehenói haguére hérarupi ha jaipuru rupi upéva. Añetehápe iporãiteve jahayhu Ñandejárape, jahayhu rangue pe pláta térã umi mbaʼerepy (Is. 43:10; 1 Tim. 6:6-10).

10-12. a) ¿Mbaʼéichapa oiméne Satanás omoñuhã raʼe heta ánhelpe? b) ¿Mbaʼépa ñaaprende umi ánhel ojapo vaʼekuégui?

¹⁰ Satanás oikuaa mbaʼépa orresultavéta chupe odomina hag̃ua ótrope. Oipuru  jepi umi tentasión oporomoñuhã hag̃ua, ha sapyʼánte katu oporomongyhyje voi. Péicha Satanás okonsegi ojejapo la haʼe oipotáva.

¹¹ Satanás oikuaa vaʼekue mbaʼeichagua karnádapa oipurúta omoñuhã hag̃ua hetaiterei ánhelpe. Haʼe oiméne heta tiémpore ostudiaʼi oikóvo chupekuéra oikuaa hag̃ua mbaʼéichapa oitýta iñuhãme. Por lo méno unos kuánto hoʼa la itrámpape ha oñeno umi kuñándi. Upéi umi kuña ou ifamília chuguikuéra, ha umívagui oiko yvypóra tuichaicháva ha iviolentoitereíva (Gén. 6:1-4). Péro ndahaʼéi pe deséo sexuál año la Satanás oipurúva omoñuhã hag̃ua umi ánhelpe. Haʼe oprometéne avei chupekuéra odominataha yvyporakuérape. Oiméne péicha Satanás oñehaʼã raʼe ojoko Jehová propósito, ani hag̃ua oñekumpli pe profesía oñeʼẽva pe kuña familiare rehe (Gén. 3:15). Péro Ñandejára ndohejái Satanás osẽ la ijidéape. Upévare ogueru pe dilúvio, ha péicha ombyaipaite la Satanás ha umi demónio oplanea vaʼekue.

¹² ¿Mbaʼépa ñaaprende koʼã mbaʼe oiko vaʼekuégui? Ñanemboʼe pe tekovai ha pe orgúllo ndahasyieteha ñanemoñuhã hag̃ua. Ñapensamíntena, umi ánhel omoirũva Satanáspe oiko vaʼekue hetaiterei tiémpore Jehová ndive yvágape. Upéicharõ jepe opermiti hikuái umi deséo vai osegi okakuaa ha imbareteve ohóvo. Aníkena ñanderesarái, umi deséo vai ikatu hína oñembohapo ñande pyʼapýpe, tahaʼe jepe raʼe heta tiémpoma jaservi hague Jehovápe (1 Cor. 10:12). Upévare iñimportanteterei pyʼỹi jahecha mbaʼépa oĩ ñane korasõme. Péicha ikatúta ñamboykete umi deséo vai ha ñañehaʼãta ani hag̃ua ñandeorgullóso ha ñapensa ñandejehénte (Gál. 5:26; elee Colosenses 3:5).

13. ¿Mbaʼeichagua ñuhãpa oipuru avei Satanás, ha mbaʼéichapa ikatu ñamboyke upéva?

¹³ Satanás oipuru avei pe espiritísmo omoñuhã hag̃ua hetápe. Koʼág̃arupi haʼe oipota umi hénte oñeinteresa umi demónio ojapóvare, ha upearã oipuru umi rrelihión japu ha pe entretenimiénto. Por ehémplo, umi pelíkula, videohuégo térã ambueichagua entretenimiénto omoakãraku hetápe pe espiritísmore. ¿Mbaʼépa jajapo vaʼerã ani hag̃ua jaʼa ko ñuhãme? Ani ñapensa Jehová organisasión heʼitaha ñandéve mbaʼeichagua entretenimiéntopa iporã ha mbaʼeichaguápa ivai. Ñahekomboʼe vaʼerã ñane konsiénsia jadesidi hag̃ua Jehovápe ogustaháicha (Heb. 5:14). Jahayhúramo Ñandejárape “tovamokõiʼỹre”, jadesidi porãta (Rom. 12:9). Pe persóna hovamokõiva heʼi jepi peteĩ mbaʼe ha ojapo ótra kósa. Upévare jaiporavo jave pe entretenimiénto iporã ñañeporandu:  “Che estudiánte de la Biblia térã che rrevisíta oikuaáramo pe entretenimiénto aiporavóva, ¿heʼítapa hikuái ajapoha la amboʼéva, térãpa heʼíta cherovamokõiha?”. Jajapóramo umi mbaʼe jaʼéva ótrope ojapo hag̃ua, ifasilvéta ñamboyke hag̃ua Satanás ñuhã (1 Juan 3:18).

14. ¿Mbaʼéichapa Satanás ñanemongyhyjese, ha mbaʼépa ikatu jajapo ani hag̃ua jaguevi?

¹⁴ Satanás oñehaʼã ñanemongyhyje ani hag̃ua ñaneñeʼẽrendu Jehovápe. Por ehémplo, haʼe ikatu ojevale umi goviérno umánore ojoko hag̃ua ñane predikasión. Ikatu omomýi ñane kompañéro de traváho térã de koléhiope oñembohory hag̃ua ñanderehe jajapo haguére la Biblia heʼíva (1 Ped. 4:4). Satanás ikatu avei oipuru ñane hentekuéra ndahaʼéivape Testígo. Heta vése ningo haʼekuéra ojapo porãségui oñehaʼã ñandejoko pono jaha rreunionhápe (Mat. 10:36). ¿Mbaʼépa ikatu jajapo ani hag̃ua jaguevi Satanás ñandejopy jave? Ani ñañesorprende Satanás ñandeataka jave, haʼe ningo ogerrea hína ñane kóntrape (Apoc. 2:10; 12:17). Ani ñanderesarái Satanás heʼívagui: ñande jaserviha Jehovápe iporã javénte la situasión, péro ijetuʼu jave ñanderesaraimaha chugui (Job 1:9-11; 2:4, 5). Siémpre jajerure vaʼerã Jehovápe tañanemombarete. Haʼe núnka nañanderejamoʼãi ñaneaño (Heb. 13:5).

15. ¿Ikatúpa Satanás ñandeovliga jajapo hag̃ua peteĩ mbaʼe ndajajaposéiva? Emyesakã.

¹⁵ Satanás ndaikatúi oovliga avavépe ojapo hag̃ua peteĩ mbaʼe ndojaposéiva (Sant. 1:14). Heta persóna ndohechakuaái oĩha Satanás ládope. Péro umi hénte oaprende rire pe añetegua, ikatúma odesidi oñemoĩtapa Jehová favórpe térãpa Satanás favórpe (Hech. 3:17; 17:30). Ñande jajedesidíramo ñaneñeʼẽrendu Ñandejárape, Satanás ndaikatumoʼãi ñandejoko ñandefiél hag̃ua Jehovápe (Job 2:3; 27:5).

16, 17. a) ¿Mbaʼépa Satanás ha umi demónio ndaikatúi avei ojapo? b) ¿Mbaʼérepa ndajakyhyjéi vaʼerã ñañemboʼe hag̃ua en vos álta?

¹⁶ Oĩ avei ótra kósa Satanás ha umi demónio ndaikatúiva ojapo. Por ehémplo, la Biblia ndeʼíri haʼekuéra ikatuha oikuaa umi mbaʼe ñapensáva. Jehová ha Jesús añoite ikatu ojapo upéva (1 Sam. 16:7; Mar. 2:8). Upéicharõ, ¿jakyhyje vaʼerãpa ñañeʼẽ térã ñañemboʼe hag̃ua en vos álta, Satanás ha umi demónio ikatúgui ohendu ha oipuru pe informasión ñane kóntrape? ¡Nahániri! ¿Mbaʼérepa? Ñapensamína ko ehémplore. Ñande ningo ndajakyhyjéi jajapo hag̃ua la iporãva Jehová servísiope Satanás ñanderecháta haguérente. Péicha avei, ndajakyhyjéi vaʼerã ñañemboʼe hag̃ua en vos álta sólo pórke Satanás ikatu ñanerendu. Heta vése jalee la Bíbliape Ñandejára siervokuéra oñemboʼe hague en vos álta, péro núnka ndeʼíri okyhyje hague hikuái Satanás ohendúrõ g̃uarã chupekuéra (1 Rey. 8:22, 23; Juan 11:41, 42; Hech. 4:23, 24). Ñañehaʼãmbaitérõ jaʼe ha jajapo umi mbaʼe Ñandejára oguerohorýva, Jehová ni mbaʼevéicharõ nopermitimoʼãi Satanás ñandeperhudika are (elee Salmo 34:7).

¹⁷ Jahechaháicha, tekotevẽ jaikuaa ñane enemígope, péro ndajakyhyjéi vaʼerã chugui. Jehová ñanepytyvõramo ikatúta ñandepuʼaka Satanásre, ñaneimperféktoramo jepe (1 Juan 2:14). Ñañemoĩ mbaretéramo hese, haʼe odiparáta ñandehegui (Sant. 4:7; 1 Ped. 5:9). Koʼág̃arupi haʼete Satanás oatakáva espesiálmente umi mitãrusu ha mitãkuñanguérape. ¿Mbaʼéichapa ikatu oaguanta hikuái? Pe artíkulo oúvape jahecháta upéva.