1. Vika vyajombolwele Yehova mu Endeni hali chitothzi chetu?

ANDAMA wathzivukile ngwendi manyoka kuvethi kwendeka. Ngechi, wapandele kunanguka ngwendi kuli munu umo wa ku sipilitu wapangethele linyoka ha kwendeka na Eva. (Kusha. 3:1-6) Va Andama na Eva kuvathzivukile ou munu wa ku sipilitu. Oloni Andama walyangwilile kulikwatathana na munu uje kathzivukile mu kutengulukila Ishe wa mwilu na kulwitha chithzango chendi. (1 Tima. 2:14) Haje vene, Yehova washangumukile kujombolola viñanda vya kukundama kuli uje chitothzi wongumwine va Andama na Eva, cho wakulahethele ngwendi akamunyongetha. Kutundoho, Yehova wendekele lalo ngwendi, munu wa ku sipilitu uje wapangethele linyoka mu kwendeka, ali na ndthzili ya kulwitha vanu vaje vathzema Njambi.—Kusha. 3:15.

2, 3. Vika kuvendekelele manene vya Satana mu Vithoneka vya Chihevelu?

² Ha kupwa Njambi wa mana, Yehova katulekele lithzina lya kulivanga lya uje kangelo wamutengulukilile. * Cho lalo eli lithzina lya Satana Liyavolo, Njambi kalijombolwele, kuvanga hanima ya myaka 2,500 kutunda ha kutengulukila kwendi. (Yombi 1:6) Mu  Vithoneka vya Chihevelu, lithzina lya Satana lije lilumbununa “Muka-kulwitha,” vanalyendeka lika mu mavulu atatu. Mu livulu lya 1 Mithzimbu na Yombi na Zakaliya. Mwafwa vika kuvendekele manene hali chitothzi chetu kuvanga noho hethzilile Mesiya?

³ Yehova wayongwele ngwendi mu Vithoneka vya Chihevelu, vathimutwiyemo manene viñanda vije vikwatha vanu vathzivuke Mesiya na kushwenya kuli ikeye, hamo mukemwo kuvendekelemo manene vya Satana na vilinga vyendi. (Luka 24:44; Ngala. 3:24) Omwo vanu vathzivukile vya Yesu na kwija kwendi, Yehova wapangethele Yesu na vandongethi vendi mangana vajombolole viñanda vyavingi vya Satana na tungelo vendi. * Kulinga ngocho kunapande, mwafwa Yehova akapangetha Yesu na va kuvwavetha mu kunyongetha Satana na vanu vendi.—Loma 16:20; Kujo. 17:14; 20:10.

4. Mwafwa vika kutwapandele kutewa Liyavolo?

⁴ Kapositolo Petulu wendekele ngwendi Satana Liyavolo napu ngwe ‘ndumba uje ali na kwanena,’ cho lalo Yowano wamutumbwile ngwendi wapwa “linyoka” na ‘chazangombe.’ (1 Petu. 5:8; Kujo. 12:9) Kutwapandele kulishoshomwena manene hali Liyavolo mwafwa ndthzili yendi kuli hayalenga. (Tandeni Yakomba 4:7.) Yehova na Yesu na tungelo va kulongwa vali na kutukwatha. Ngechi twatha kuhyana chitothzi chetu. Oloni tunapande kuthzivuka vikumbululo ku vihula vyakama vitatu: Satana nongumuna vati vanu? Cho Vingila muka vyakapangetha Satana mu kungumuna vanu? Vika vimunalilongetha hali chitothzi chetu? Satana wakala na ndthzili ya kupwa hali? Omwo tuthimutwiya ha vihula evi, tushaka tumone vitulilongethaho.

5, 6. Mwafwa vika vifulumende vya vanu kuvyatha kumanetha vukalu vwoshe vwa vanu?

⁵ Tungelo vavangi valikwatathanene na Satana mu kutengulukila Njambi. Thimbu kanda livathzi lije, Satana wongumwine tungelo vamo kwija hano hathi na kulilala na vanakathzi. Mbimbiliya yamwetha vuthunga vweyi ñanda ha kwetheketha Satana ku chazangombe uje wakokele mutambela wa mu chitatu wa vingongonothi na kuvyumbila hano hathi. (Kusha. 6:1-4; Yunda 6; Kujo. 12:3, 4) Vaje tungelo muvatundile mu nanga ya Njambi, valyangwilile kulikwatathana na Satana. Ava tungelo vali na kupangela hamo na Satana. Cho lalo Satana natembwinina Njambi ha kumunga fulumende na kulipwitha ikeye vavenya kupwa mwene. Ha kupwa munu wa ku sipilitu, Satana ali na kupangetha vandemone mu kutwamenena fulumende yendi, cho navana moko ya kuyula kaye.—Efeso 6:12.

⁶ Satana akapangetha fulumende yendi mu kutwamenena vifulumende vya vanu. Twendeka ngocho mwafwa Satana wamwethele Yesu “vumwene vwoshe vwa hano ha kaye,” cho wamulekele ngwendi: “Njikakwana ndthzili yoshe eyi na vufuko vwoshe ovu, omwo vananjanavyo, cho njikavyana kuli woshe uje injishaka.” (Luka 4:5, 6) Vifulumende vyavingi vikalingila vanu vavyo vyuma vyavivwa nameme vili mu kaye ka Satana. Vaka-kuyula vanatha kukala na viyongola vyavivwa. Oloni kuvatha kumanetha vukalu vwoshe vwa vanu.—Myatho 146:3, 4; Kujo. 12:12.

7. Satana akapangetha vati vifulumende na vulombelo vwa makuli na mingotho ya muno mu kaye? (Kengeni chikupulo ha liputa 22)

⁷ Satana na vandemone vendi vakapangetha vulombelo vwa makuli na mingotho ya muno mu kaye mu ‘kukwitha kaye koshe.’ (Kujo. 12:9) Satana akendeka vyuma vya makuli  hali Yehova mu kupangetha vulombelo vwa makuli. Kutundoho, Liyavolo nalingitha vanu vavangi vevale lithzina lya Njambi. (Njele. 23:26, 27) Kulinga ngocho kunalingitha vanu vavangi vathinganyeke ngwavo vali na kulemetha Njambi, okuni vali na kulemetha vandemone. (1 Koli. 10:20; 2 Koli. 11:13-15) Satana ali na kushongangeya vanu vathzeme manene vyuma vya mu kaye. Chakumwenako, vanu vali na kuvalongetha ngwavo kukala na vimbongo na vufuko vwavwingi kukekwo kulingitha munu apwe wa kuvwahelela. (Vithi. 18:11) Vaje vakakala na vithinganyeka vya chifwa echi vakaka manene mbunge ku “vimbongo” kutuvakana kupangela Njambi. (Mateo 6:24) Cho kulinga ngocho kukavonowetha kuthzema Njambi.—Mateo 13:22; 1 Yowa. 2:15, 16.

8, 9. (a) Vilongetha muka vivali vitulilongetha kuli Andama na Eva na tungelo vaje vatengulukilile Njambi? (b) Vuvwa muka vuli ha kuthzivuka hayalenga ndthzili ya Satana?

⁸ Mwanja wa Andama na Eva na tungelo vaka-kutengulukila utulongetha vithimpi vivali vyakama. Thimpi ya kulivanga, tunapande kulyangwila munu umo lika itunapande kwononoka. Tunatha kwononoka kuli Yehova nambe kuli Satana. (Mateo 7:13) Ya mu chivali, vaje valikwatathana na Satana kuvawana vivethzikitho. Va Andama na Eva valyangwilile kujeneka kwononoka Njambi. Oku kwalingithile vandemone vakale na ndthzili ha vifulumende vya vanu. (Kusha. 3:22) Kulikwatathana na Satana kukanene vukalu thimbu yoshe, kethi vuvwa embwe.—Yombi 21:7-17; Ngala. 6:7, 8.

⁹ Kuthzivuka mwakongumwina vanu Satana kutukwatha vati? Kutukwatha kukala na vithinganyeka vyavivwa hali vaka-kuyula na kutushongangeya tupange na ndthzili mu chipangi chetu cha kwambulula. Tuthzivuka ngwetu Yehova washaka ngwendi tuthingimike vaka-fulumende. (1 Petu. 2:17) Njambi washaka ngwendi twononoke mashiko a vaka-fulumende aje endelela na vinangulo vyendi. (Loma 13:1-4) Kutwapandele kulikoveletha mu viñanda vya kaye nambe kwimanena munu umo ngwetu ikeye napande kupwa ntwama. (Yowa. 17:15, 16; 18:36) Satana ali na kuviyitha lithzina lya Yehova, ngechi tunapande kulongetha vanu mangana vathzivuke vuthunga hali Njambi. Kututhanetha na kupangetha lithzina lya Njambi, kunapu kuvethzika kwakama kutuvakana kuthzema vimbongo nambe vufuko.—Isaya 43:10; 1 Tima. 6:6-10.

10-12. (a) Satana wongumwine vati vakwavo tungelo? (b) Vika vitulilongetha ku vyuma vivalingile tungelo vaje vongumukile?

¹⁰ Satana akapangetha vingila vyavingi mu kungumuna vanu. Chakumwenako, akapangetha myeto ya kulithethzathethza mangana  vanu valinge chithzango chendi. Kutundoho, akavajujwitha mangana vononoke kuli ikeye.

¹¹ Achithinganyekeni ha vingila vyapangethele Satana mu kungumuna tungelo vavangi. Cha kulivanga walilongethele tai vithinganyeka vyavo, mangana awane ngila ya kuvongumuna na kulikwatathana nendi. Ava vandemone muvatavele makuli a Satana valilalele na vanakathzi, cho vakitile makithikithi vaje vayandethele manene vanu. (Kusha. 6:1-4) Satana hamo wakulahethele lalo vaje tungelo ngwendi vakakala na moko ya kuyula vanu. Kwija kwa ‘mbuto ya munakathzi’ ije ivakulahethele kwatanganethele viyongola vya Satana. (Kusha. 3:15) Yehova wonowethele evi viyongola vya Satana na vandemone vendi omwo wanenele Livathzi.

¹² Eyi ñanda itulongetha vika? Tunapande kuvyana vupangala nambe kulimona kupwa va theho manene. Thimbu kanda valikwatathanene na Satana, vaje tungelo vapangelele Njambi ha myaka yaingi. Nameme vakele na kupangela Njambi, oloni vechelelele mashungu avo kuvongumuna. Mu ngila imo lika, netu hamo tunalikwatathana na munga ya Njambi ya hano hathi ha myaka yaingi. Oloni tunatha kushangumuka kukala na mashungu amavi. (1 Koli. 10:12) Ngechi, kunapu kwa theho manene kwilula mbunge yetu na kujenjuka ku vithinganyeka vyavivi na kupwa va kulikehetha—Ngala. 5:26; Tandeni Kolose 3:5.

13. Mweto muka ukwavo wakapangetha Satana, cho twatha kulihengawo vati?

¹³ Ngila ikwavo yakongumwinamo vanu Satana inapu kuvalingitha vathzeme vyuma vya mathseno. Ano matangwa, Satana na koveletha mathseno mu vulombelo vwa makuli na mu vyuma vya kulithzima navyo vuli. Mafilimu na vweho vwa ha makina na vyuma vyeka, vikalingitha vanu vamone vyuma vya mathseno kupwa vyavivwa manene. Vika vitunapande kulinga mangana kethi tuthse omu mu mweto? Kutwapandele kuthinganyeka ngwetu munga ya Njambi itwana mukana wa mashiko aje amwetha vyuma vitunapande kulithzima navyo vuli na vije kuvyapandele. Umo na umo wetu napande kulongetha chitakutaku chendi mangana chimukwathe kulinga vyuma vije vyendelela na mashiko a Njambi. (Heve. 5:14) Oloni twangula mwamuvwa vya kulinga, nga tupangetha chinangulo cha kapositolo Paulu uje wendekele ngwendi tunapande kuthzema Njambi mu “kutungukwa” nambe ngwetu mu vuthunga. (Loma 12:9) Tunatha kulihula ngwetu: ‘Vyuma vinjinangula kulithzima navyo vuli vimwetha ngwavo njathzema Njambi ndi? Nga vanu vanjikalilongetha navo Mbimbiliya vamona vyuma vinjinangula kulithzima navyo vuli vatha  kutava ngwavo njikapangetha vyuma vinjikalongetha ndi? Nga endekethi yetu na vilinga vyetu vilitombola na vyuma vyatonda Njambi, cho vitunyungilila ku myeto ya Satana.—1 Yowa. 3:18

14. Satana natha kutujujwitha vati, cho twatha kumuhyana vati?

¹⁴ Ngila ikwavo yakapangetha Satana inapu kujujwitha vanu mangana vonowe kupwa va kulongwa kuli Yehova. Chakumwenako, natha kupangetha vifulumende mangana vashoke chipangi chetu cha kwambulula. Cho natha lalo kupangetha vanu vatukapanga navo nambe vatukakovela navo sikola mangana vatushendumune mwafwa ya kukavangeya mashiko a mu Mbimbiliya. (1 Petu. 4:4) Natha lalo kupangetha vaka-nanga yetu kututhzeyetha mangana tulikele kukunguluka. (Mateo 10:36) Twatha kuhyana vati ovu vukalu? Chakulivanga, tunapande kuthzivuka ngwetu Satana natha kutulwitha thimbu yoshe yoshe. (Kujo. 2:10; 12:17) Satana akatulwitha mangana amone indi twatha kupwa va kulongwa mu vyetheko, mwafwa wamona ngwendi tukapangela Yehova nga tuli mwamuvwa. Akendeka ngwendi nga tuli mu vyetheko, cho tutengulukila Njambi. (Yombi 1:9-11; 2:4, 5) Ngechi tunapande kukulahela manene Yehova mangana atwane ndthzili ya kuhyana vyetheko. Anukeni ngweni Njambi kakatuthethze.—Heve. 13:5.

15. Kuma Satana atha kututhindiya kulinga vyuma vije kutwashakele ndi? Lumbununeni.

¹⁵ Satana katha kuthindiya vanu kulinga vyuma vije kuvatha kulinga. (Yako. 1:14) Vamo vakalingi chithzango cha Satana mu kujeneka kuthzivuka. Oloni omwo valilongetha vuthunga, munu na munu napande kulyangwila yanapande kupangela. (Vili. 3:17; 17:30) Nga twalyangwila kulinga chithzango cha Njambi, Satana katha kutwonowetha kupwa va kulongwa.—Yombi 2:3; 27:5.

16, 17. (a) Ndthzili muka ije kakele nayo Satana na vandemone vendi? (b) Mwafwa vika kutwapandele kutewa kulomba kuli Yehova mu kutambakana?

¹⁶ Kuli vyuma vikwavo vije katha kulinga Satana na vandemone vendi. Chakumwenako Vithoneka kuvimwetha ngwavyo Satana na vandemone vendi vatha kuthzivuka vili mu mbunge ya munu. Yehova na Yesu vakevo lika vavanendeka ngwavo vatha kuthzivuka vili mu mbunge ya munu. (1 Samwe. 16:7; Mako 2:8) Kuma tunapande kwendeka nambe kulombela mu kutambeka ndi? Kuma tunapande kutewa ngwetu Liyavolo na vandemone vatha kututhziva na kutanganetha malombelo etu ndi? Embwe. Mwafwa vika? Kutwatha kwonwa kulinga vyuma vyavivwa mwafwa ya kutewa ngwetu Liyavolo atumona. Mu ngila imo lika, kutwapandele kutewa kulombela mu kutambeka mwafwa ya kutewa ngwetu Liyavolo atuthziva. Kuli vanu vavanendeka mu Mbimbiliya vaje valombelele kuli Njambi mu kutambakana, cho Mbimbiliya kuyendekele ngwayo vatewele ngwavo Liyavolo avathziva. (1 Vimye. 8:22, 23; Yowa. 11:41, 42; Vili. 4:23, 24) Nga twendeka na kulinga vyuma mwaya chithzango cha Njambi, cho tukulahela ngwetu Yehova atunyungilila kuli Liyavolo uje ashaka kutuvulumuna.—Tandeni Myatho 34:7.

¹⁷ Tunapande kuthzivuka chitothzi chetu, oloni kutwapandele kumutewa. Yehova akakwatha vanu va kujeneka kulumbunuka vahyane Satana. (1 Yowa. 2:14) Nga tumuvyanena, cho atewa kuli yetu. (Yako. 4:7; 1 Petu. 5:9) Satana washaka manene kungumuna vanike. Vika vivatha kulinga vanike mangana vavyanene Liyavolo? Chilongetha chinatako chikumbulula echi chihula.