1. Satepan ke Adán uan Eva tajtakojkej, ¿toni kijtoj Jiova ke panoskia iuan akin techixnamiki?

ADÁN kuali kimatia ke kouamej amo tajtouaj. Yejua ika, keman se kouat tajtoj iuan Eva, xa kinemilij ke akin yekmelauj tajtojtoya katka se ángel (Gén. 3:1-6). Adán uan Eva amo kimatiaj akoni katka. Maski ijkon, Adán kiixpejpenak kinekepilis iTajtsin uan kiixnamikis iuan nejon akin amo kiixmatiaj (1 Tim. 2:14). Jiova niman peuak tapaleuia maj moixmati nejin taixnamikkej akin kikajkayauak Adán uan Eva, uan motenkauak ke kiixpoloskia. Sayoj ke no tanejmachtij ke nejin ángel kinixnamikiskia miak xiujmej akin kitasojtaj Dios (Gén. 3:15).

2, 3. ¿Keyej Jiova amo semi ika tajtoj Satanás achto ke ejkoskia Mesías?

² Jiova amo keman techiluiani keniuj monotsa nejin ángel akin taixnamikik. * Hasta dos mil quinientos xiujmej satepan kiteixmatiltij keniuj moixmatiskia: Satanás, tein kijtosneki “Taixnamikkej” (Job 1:6). Nejin tajtol sayoj ixnesi itech eyi amatajkuilolmej itech Escrituras Hebreas: 1 Crónicas, Job uan Zacarías. ¿Keyej Jiova  amo semi ika tajtoj nejin taixnamikkej achto ke ejkoskia Mesías?

³ Jiova amo kinekik maj itech Escrituras Hebreas tel ika motajto Satanás nion tein kichiua. Yejuatsin kiixtalij maj moijkuilo nejin amatajkuilolmej porin kinekia kinpaleuis taltikpakneminij maj kimatinij akoni katka Mesías uan maj kitojtokanij (Luc. 24:44; Gál. 3:24). Keman Mesías ejkok, Jiova kichiuak maj yejua uan imomachtijkauan ika tajtouanij miak taman tein tikmatij ke kichiuaj Satanás uan ángeles akin kitojtokakej. * Uan ijkon kinamiki, porin Jiova kichiuas maj Jesús uan taixpejpenalmej kinixpolokan Satanás uan nochin akin kitojtokaj (Rom. 16:20; Apoc. 17:14; 20:10).

4. ¿Keyej moneki amo tiktelmouiliskej Satanás?

⁴ Tatitanil Pedro kijtoj ke Satanás “tsajtsitinemi [...] keme yeskia se kuoutajtekuani”, uan Juan kitokaytij “kouat” uan “ueyi amokuali tekuani” (1 Ped. 5:8; Apoc. 12:9). ¿Kijtosneki nejon ke moneki tiktelmouiliskej? Amo, porin ixyetok hasta kani ajsi ichikaualis (xikonixtajtolti Santiago 4:7). Tikpiaj inepaleuil Jiova, Jesús uan ángeles tatakamatinij. Ika ininnepaleuil, uelis tikixnamikiskej. Sayoj ke moneki tiknankiliskejok eyi netajtanilmej tein motelnekij: ¿Hasta kani ajsi ichikaualis Satanás? ¿Keniuj kitemoua maj taltikpakneminij kichiuakan tein yejua kineki? Uan ¿toni amo ueli kichiua? Maj tikitakan nejin netajtanilmej uan toni techmachtia.

5, 6. ¿Keyej taltikpaktekiuajyomej amo ueli kiualkuij tein yekmelauj kinpoloua taltikpakneminij?

⁵ Miakej ángeles kiixnamikkej Dios iuan Satanás. Achto ke mochiuaskia Tetsaujkakiouit, kichiuak maj sekin auilneminij iniuan siuamej. Biblia kineskayotia nejin keman kijtoua ke se “ueyi amokuali tekuani [...] kinmajmagak se ueyi pantime de sitalinme ne ejekaixko uan kintepeuak” (Apoc. 12:3, 4; Gén. 6:1-4; Jud. 6). Keman nejon ángeles kinkaujkej ichankauan Jiova, peuak mokauaj maj Satanás kinixyekana. Sayoj ke maj amo tiknemilikan ke sayoj takuejmolchiuaj uan amo ixyetok keniuj tekitij. Satanás kiixtalij itekiuajyo ijkon kemej Dios kipia iTekiuajyo, uan yejua moixtalij kemej tekiuaj. Kiixtalij keniuj tekitiskej amokuali ejekamej, kinmakak tanauatil uan kintalij kemej taixyekananij itech taltikpak (Efes. 6:12).

⁶ Ika nejin, Satanás kichiua maj taltikpaktekiuajyomej kichiuakan itanejnekilis. Nejin senkis monextij keman kinextilij Jesús “nochi in pueblojme kampa tayekanaj in ueyi chiuanime de nikan taltikpak” uan kiluij: “Nimitsmaktilis nochi in chikaualisme de nojon pueblojme iuan ninueyipanchiukayot [...]. Porin nochi nojon chikaualis nomako yetok. Uan uelis nikmakas ne chikaualis aken yeski” (Luc. 4:5, 6). Maski taltikpaktekiuajyomej moajsij imako Amokuali, miakej tekiuanij kinpaleuiaj taltikpakneminij. Uan moajsij tekiuanij akin yekmelauj kinekij tapaleuiskej. Sayoj ke amo moajsi nion se tekiuajyot nion tekiuaj akin uelis kiualkuis tein yekmelauj kinpoloua taltikpakneminij (Sal. 146:3, 4; Apoc. 12:12).

7. ¿Keniuj Satanás no kinkajkayaua taltikpakneminij ika taneltokalis tein amo melauak uan tanamakalis? (Xikonita taixkopin ipeujyan tamachtilis.)

⁷ Kemej kinekij kinkajkayauaskej “nochi in taltikpakuani”, Satanás uan amokuali ejekamej no kitekitiltiaj taneltokalis tein amo melauak uan tanamakalis (Apoc. 12:9). Ika taneltokalis tein amo melauak, Satanás kitakajkayauilia Jiova. Uan nesi ke senkis kiixtalijtok maj okachi taltikpakneminij kielkauakan itokay Dios (Jer. 23:26, 27). Yejua ika, miakej akin kipiaj kuali ininyolo kinemiliaj  ke kiueyichiuaj Dios, sayoj ke tein melauj kinueyichiuaj amokuali ejekamej (1 Cor. 10:20; 2 Cor. 11:13-15). Ika miak taman tein tanamakanij kiteixmatiltiaj, Satanás kiteixmatiltia okseki takajkayaualis. Kemej neskayot, kichiua maj taltikpakneminij kinemilikan ke sayoj uelis yolpakiskej komo kipiaj miak tomin uan miak taman (Prov. 18:11). Akin kineltokaj nejin takajkayaualis sayoj kitayekanaltiaj motomintiskej uan amo kitekitiliskej Jiova (Mat. 6:24). Maski xa kitasojtayaj Dios, peua okachi kitasojtaj tomin uan netasojtalis tein kipialiayaj poliui (Mat. 13:22; 1 Juan 2:15, 16).

8, 9. 1) ¿Toni ome taman techmachtia tein kichiujkej Adán, Eva uan amokuali ejekamej? 2) ¿Keniuj techpaleuia tikixmatiskej chikaualis tein kipia Satanás?

⁸ Tein kichiujkej Adán, Eva uan amokuali ejekamej techmachtia ome taman tein motelneki. Yekinika, ke sayoj uelis tikixpejpenaskej se taman: tikpaleuiskej Jiova oso Satanás (Mat. 7:13). Uan ojpatika, ke komo se kipaleuia Satanás amo teualkuilia yekmelauj nepaleuil. Adán uan Eva uelik ininselti kiixtalijkej tein kuali yetok uan tein amo kuali yetok, uan amokuali ejekamej kiselijkej tanauatil itech taltikpaktekiuajyomej, maski amo senkis (Gén. 3:22). Sayoj ke se kiixpejpenas se kipaleuis Satanás nochipa kiualkui tein amo kuali. Adán uan Eva uan amokuali ejekamej kinemilijkej ke tel kuali tein kiixpejpenkej, sayoj ke nion tepitsin kiselijkej tein kichiayaj (Job 21:7-17; Gál. 6:7, 8).

⁹ ¿Keniuj techpaleuia tikixmatiskej chikaualis tein kipia Satanás? Se taman, techpaleuia maj tikajsikamatikan ke Jiova kineki maj tikinpoujkaitakan tekiuanij (1 Ped. 2:17). Kichia maj tiktakamatikan inintanauatiluan komo amo kiixnamikij itanauatiluan yejuatsin (Rom. 13:1-4). Sayoj ke no tikmatij ke moneki amo tikpaleuiskej nion se taltikpaktekiuajyot nion se tekiuaj (Juan 17:15, 16; 18:36). Uan no, tikixmatiskej chikaualis tein kipia Satanás techolinia maj titanojnotsakan. Kemej tikitaj ke kitemoua maj amo moixmati itokay Jiova uan maj amo kuali ika motajto, okachi tiknekij tikinmachtiskej taltikpakneminij keniuj yekmelauj tamati Dios. Tiyolpakij maj techixmatikan ika itokay uan tikuij keman tikteixmatiltiaj. Tikmatij ke tiktasojtaskej Dios techualkuilia okachi nepaleuil ke tiktasojtaskej tomin uan tiktemoskej tikpiaskej miak taman (Is. 43:10; 1 Tim. 6:6-10).

10-12. 1) ¿Keniuj Satanás xa kikuik se tamekauilis tein ika kinkajkayauak miakej ángeles? 2) ¿Toni techmachtia tein kinpanok nejon ángeles?

¹⁰ Kemej Satanás kineki maj taltikpakneminij kichiuakan tein yejua kineki, kitekitiltia  miak taman. Kemej neskayot, kemansa kitekitiltia tamekauilismej uan kemansa senkis techtajyouiltia uan techmojmoujtia.

¹¹ Satanás kitekitiltij se tamekauilis uan ika kinkajkayauak miakej ángeles. Xa uejkauak kinitstoya uan ijkon kimatik keniuj kintanejnektis. Sekin kintanejnektij uan auilnenkej iniuan siuamej. Ininkoneuan mochiujkej uejueyi takamej akin tel ininka mauiltiayaj oksekin (Gén. 6:1-4). Satanás xa amo sayoj kintanejnektij ika auilnemilis, ta xa no motenkauak ke yejuan sentaixyekanaskiaj itech taltikpak. Xa kiixtalijtoya maj amo keman yolini ikonetsin “siuat” akin Dios kijtojka ke ualaskia (Gén. 3:15). Sayoj ke Jiova kiualkuik Tetsaujkakiouit uan ijkon kintauejuelouilij Satanás uan amokuali ejekamej.

¹² ¿Toni techmachtia nejin? Ke auilnemilis uan ueyinekilis akin yeski uelis kijtakos. Ángeles akin kitojtokakej Satanás tekitikaj iixpan Jiova tel miak xiujmej. Maski ijkon, miakej kikaujkej maj moskalti amo kuali tanejnekilis uan maj mochikaua. No ijkon, maski xa miak xiujmejya tiktekitilianij Jiova, amo kuali tanejnekilis uelis moskaltis toyolijtik (1 Cor. 10:12). Yejua ika motelneki nochipa tikitaskej tein tikmachiliaj uan maj tikixtopeuakan ueyinekilis uan maj timoijkuanilikan amokuali tanemililmej (Gál. 5:26; xikonixtajtolti Colosenses 3:5).

13. 1) ¿Toni okse tamekauilis kitekitiltia Satanás? 2) ¿Keniuj uelis tikixtopeuaskej nejin tamekauilis?

¹³ Okse tamekauilis tein Satanás kitekitiltia yejua maj okachi se kineki se kiixmatis naualot, se tajtos iniuan mikemej uan okseki taman tein kichiuaj amokuali ejekamej. Kichiua maj taltikpakneminij kinyolnotsa nejon amo sayoj ika taneltokalis tein amo melauak, ta no ika neixpetanilis. Películas, neauiltilis itech tepos uan okseki taman neixpetanilis uelis kinextiskej ke semi kualtsin tein kichiuaj amokuali ejekamej. ¿Toni techpaleuis maj amo techuetsilti nejin tamekauilis? Moneki amo tikchiaskej maj itech inechikol Dios techtekpanilikan toni uelis ika timoixpetaniskej uan toni amo. Tisejsemej moneki tikmachtiskej totanemilil tein techpaleuis maj tikchiuakan ijkon kemej Jiova tayolmajxitia (Heb. 5:14). Kuali titaixpejpenaskej komo tiktasojtaj Dios “amo ika ne taixkajkayaualis” (Rom. 12:9). Maj timotajtanikan: “Komo se akin nikmachtia Biblia oso nikalpanoua kiita toni ika nimoixpetania, ¿kinemilis ke nikchiua tein nitamachtia, oso ke sayoj nitaixkajkayaua?”. Komo tikchiuaj tein titamachtiaj okachi ouij yeski maj tiuetsikan itech itamekauilis Satanás (1 Juan 3:18).

14. 1) ¿Keniuj uelis techtajyouiltis uan techmojmoujtis Satanás? 2) ¿Keniuj uelis tikixnamikiskej nejon?

 ¹⁴ Satanás no kitemoua maj amo tiktakamatikanok Jiova keman techtajyouiltia uan techmojmoujtia. Kemej neskayot, uelis kichiuas maj tekiuanij kiixtalikan maj amo titanojnotsakanok. Uan no, uelis kichiuas maj akin iniuan titekitij oso timomachtiaj techpijpinaujtikan porin tiktakamatij itanauatiluan Dios (1 Ped. 4:4). No uelis kichiuas maj tochankauan akin amo itaixpantijkauan Jiova techiluikan maj amo tiyakanok nechikolmej, maski yekmelauj kitemouaj techpaleuiskej (Mat. 10:36). ¿Keniuj uelis tikixnamikiskej nejin? Yekinika, maj amo tikmoujkaitakan maj techpano nejon, porin tikmatij ke Satanás techixnamiktok (Apoc. 2:10; 12:17). Ojpatika, maj amo tikelkauakan tein okachi moneki: ke Satanás kiyekijtoua ke sayoj tiktekitiliaj Dios keman amo ouij techkisa uan ke tikixtopeuaskej komo tikpiaj ouijkayomej (Job 1:9-11; 2:4, 5). Uan expatika, maj tiktajtanikan Jiova maj techmaka chikaualis tein techpaleuis maj titaxikokan. Maj tikelnamikikan ke yejuatsin amo keman techsenkauas (Heb. 13:5).

15. ¿Uelis techchiualtis Satanás teisa tein amo tiknekij? Xikonmelaua.

¹⁵ Satanás amo ueli techchiualtia nion teyi tein amo tiknekiskej (Sant. 1:14). Miakej amo kiajsikamatij ke kichiuaj tein yejua kineki. Sayoj ke keman momachtiaj tein melauak, moneki kiixpejpenaskej akoni kinekij kitekitiliskej (Hech. 3:17; 17:30). Komo tikixtalijtokej tiktakamatiskej Dios, Satanás amo uelis kichiuas maj tikixnamikikan yejuatsin (Job 2:3; 27:5).

16, 17. 1) ¿Toni okseki taman amo ueli kichiuaj Satanás uan amokuali ejekamej? 2) ¿Keyej moneki amo timouiskej tikchiuaskej netataujtil kemej timotenkakiskej?

¹⁶ Moajsi okseki taman tein Satanás uan amokuali ejekamej amo ueli kichiuaj. Kemej neskayot, Biblia amo keman kijtoua ke ueli kimatij tein tiknemiliaj oso tikmachiliaj. Sayoj Jiova uan Jesús ueli kichiuaj nejon (1 Sam. 16:7; Mar. 2:8). Sayoj ke ¿toni panoua keman titajtouaj oso tikchiuaj netataujtil kemej timotenkakiskej? ¿Moneki timouiskej maj Amokuali uan amokuali ejekamej kikakikan tein tikijtouaj uan maj ika kitemokan techuetsiltiskej? Amo. Ijkon kemej amo timouij tiktekitiliskej Jiova sayoj porin Amokuali uelis techitas, no moneki amo timouiskej tikchiuaskej netataujtil kemej timotenkakiskej sayoj porin yejua no uelis techkakis. Tein melauj, Biblia ininka tajtoua miakej itekitikauan Dios akin kichiujkej netataujtil kemej motenkakiskiaj, uan amo teyi kinextia ke moujkej porin Satanás ueliskia kinkakis (1 Rey. 8:22, 23; Juan 11:41, 42; Hech. 4:23, 24). Komo timochikauaj titajtoskej uan timonejnemiltiskej kemej Dios kineki, uelis titakuaujtamatiskej ke yejuatsin amo kikauas maj Amokuali techchiuili teisa tein techtsakuilis maj amo tikselikan nemilis nochipaya (xikonixtajtolti Salmo 34:7).

¹⁷ Moneki tikixmatiskej akin techixnamiki, sayoj ke moneki amo tiktelmouiliskej. Maski titajtakouanij, uelis tikixnamikiskej ika inepaleuil Jiova (1 Juan 2:14). Komo tikixnamikij Amokuali, yejua techtalkauis (Sant. 4:7; 1 Ped. 5:9). Axkan, nesi ke kitelneki kichiuas maj telpochmej uan ichpochmej kiixnamikikan Dios. ¿Toni uelis kichiuaskej tein kinpaleuis maj kiixnamikikan? Tiknankiliskej nejin netajtanil itech okse tamachtilis.