1. Jehova o yye a wupulla ying ka lenaba la rune ku Edeni?

ADAMO ke mo a di tšiba gabutši gore dinoga a di bolabole. Di ka makega gore o yye a kamaka gore Efa o tshwanele go ba a bolabodiye le morongwa a berekisa noga. (Gen. 3:1-6) Adamo le Efa ke mo ba sa tšibi selo ka morongwa yewa. Mara Adamo a fo timakela tsa go tšiba ke yene, a jikela Papa wa go mo nyaka ka matla wa ku legedimong ke mokane a yema le segeyageya sowa sa gore se phigisana le Modimo. (1 Thim. 2:14) Jehova o yye a napa a thomisa go wupulla ditaba tsa lenaba lone la gore ke mo le makiye gore Adamo le Efa ba fokoge, a hlaya le gore yenene wa pelo ya go befa o nyoko tlusiwa. Fote Jehova o thuletsiye se sengwana, a re noga yewa yi sa nyoko ba hlopa ka matla ba gore ga Modimo baa mo nyaka, ka taba la gore yi na le matšhika.—Gen. 3:15.

2, 3. Ke ntaba go sa hlayiwi tsa go tlala ka Sathane mo Mesiya a soko bane a segela?

² Jehova o šupetsiye gore o hlalefiye ka taba la gore le lebitso la morongwa yene wa go mo jikela wa gore ne go le morwayi wage, aa re botsa. * Fote Modimo o kgetiye gore a sa hlaye lebitso lone la lenaba lage gwa šinya go ro boya go fela 2 500 ya mongwaga. (Jobo  1:6) Gabutšibutši, nka ditharo fela dipuku tsa Mangwalo ya Seheberu, 1 Dikoronika, Jobo le Zakariya, tsa gore di bolabola ka Sathane, ya gore yi ra “Wa go Phigisana.” Ke ntaba go sa bolabodiwi ka matla ka lenaba lowa la rune mo go soko segela Mesiya?

³ Di šupa nkare Jehova ke mo a sa nyake go neya Sathane magetla ka go tihlopa a hlwa a bolabola ka yene mo ga Mangwalo ya Seheberu le tso ne a di maka. Mo Jehova a šala a butšwelela gore go ngwadiwe sekopa sone sa Mangwalo, ke mo a nyaka batho ba Modimo ba kwe ka Mesiya, ba mo tšibe. (Luk 24:44; Magal. 3:24) Mo sosone se šele se makegiye ke mokane Mesiya a segele, Jehova o berekisiye yene le bo ba mo latelelang gore ba wupulle tsa go tlala tsa gore gana byalo re ya di tšiba ka Sathane le barongwa bo ba yyeng ba fokoga naye. * Sosone se ya kwagala ka taba la gore Jeso le bo ba hlawodiwweng ba gore ba nyoko lawola naye, ba kgetiye ke Jehova gore ba psitlanye Sathane le bo ba mo latelelang.—Maroma 16:20; Kut. 17:14; 20:1.

4. Ke ntaba di sa nyake re ro napa re hlagasela le go tshosanya ke Diyabolo?

⁴ Mopostola Petro o hlatolla Sathane Diyabolo go le “tawu ya go bopa,” Johane yene o re ke “noga” fote o re ke “nkwahle.” (1 Pet. 5:8; Kut. 12:9) Mara a di nyake re ro napa re hlagasela le go tshosanya ke Diyabolo—matšhika yage ma kadiwwe. (Bala Jakobo 4:7.) Re tikokotlela ka Jehova, Jeso le barongwa ba go tshepega. Mo re gelepa ke bona, re ka thog’o hlola lenaba la rune. Mara gana byalo re nyaka go tšiba diphetolo tsa diputsiso tsowa tse dikgolo ka ditharo: Sathane o re woka go segela kaye? O leketsa byang gore a woke ye mongwana le ye mongwana wa rune? Matšhika yage ma kgera kaye? Mo re kene re bolabodisana ka diputsiso tso, re nyoko boya re bona so re ka se tšhutang gana hone.

5, 6. Ke ntaba mmušo wa motho o ka sa di kgone go makela batho tso ba di nyakang ka matla?

⁵ Barongwa ba go tlala ba kgetiye go fokoga le Sathane. Mo go soko bane go tla Mogogola, Sathane o yye a tshokanya ba bangwana ba bona, ba kwa ba šele ba nabela barwediya ba batho. Baebele mo yi re thuletsela taba yone yi tshwanisa ka nkwahle ye kgolo—nkwahle yone gabutšibutši ke noga ye kgolo ya go goga dinanedi tse dingwana mo ba kene ba yi bošela fase. (Gen. 6:1-4; Juda 6; Kut. 12:3, 4) Mo barongwa bone ba jikela mutši wa Modimo, ba yye ba yema le Sathane ba nyaka go lawola ke yene. Bobowa ba go fokoga phela a yi fo ba mogoba wa go maka tsa go befa. Sathane le yene o tikhandele tsage, a timaka kgoši a kopisela ga Mmušo wa Modimo. Sathane ga Mmušo wage wa go sa bonale, o kgobaketsele mekgahlokgahlo ya madimona, a neya bona gore ba tshware tsa go lawola lefase.—Maef. 6:12.

⁶ Sathane ka mokgahlo wage wa barongwa, o lawola memmušo ka mokana ga yona ya batho. Taba yone yi napiye yi yela gabutši nakwela Sathane a šupetsa Jeso “memmušo ka mokana ga yona ya lefase,” ke mokane a re: “Ke nyoko go neya gore go lawole wene dilo tso ka mokana ga tsona le go gadimela ga tsona, ka taba la gore ba nneyye tsona fote ke di neya ye mongwana le ye mongwana mo ke kwa di mpotsa gore ke mo neya tsona.” (Luka 4:5, 6) Le mo batho ba kene ba sinyega ka taba la gore Sathane a ba tšhela moya, memmušo ye mengwana yona ya leketsa go makela batho tse dibutši. Bo ba bušang bona ba ka foba ba nabelela batho tsa gabutši. Mara a wo šiyo mmušo kela kgoši yo yi ka di kgonang go makela batho tso ba di nyakang.—Pis. 146:3, 4; Kut. 12:12.

7. Sathane o berekisa memmušo, dikereke le tsa dibhizinisi ka mokg’o mang? (Lebelela sethombhe sa ku mathomisong.)

⁷ Sathane le madimona yage a ba berekisi  memmušo fela, ba tshokanya “lefase ka mokana ga lona la batho” ba berekisa dikereke tsa matsaka le dibhizinisi. (Kut. 12:9) Sathane o berekisa dikereke gore di bolabolele Jehova matsaka. Fote Diyabolo aa šepisi ga taba ya go karakarela gore batho ba go tlala ka matla ba lebale ka lebitso la Modimo. (Jer. 23:26, 27) Ke dilo tsa mošaga wonone tso di šinyang di maka gore batho ba go tlala ba tipotse gore ba rapela Modimo, anthe bona ba rapela madimona. (1 Makor. 10:20; 2 Makor. 11:13-15) Sathane fote o berekisa dibhizinisi gore di tshoke batho. Mo re fo beyisa, lefase la lekgono ga go tlala le tšhutisa batho gore mo motho a nyaka go jabola, di nyaka a lelekisane le tšheleta fote a be nghamula. (Diy. 18:11) Batho ba gore ba tshepa matsaka yanane ba ya tlase le kgakala ba leketsa go kraya “Makgumo,” ba tšwa ba phakgele Modimo ku kgole. (Mat. 6:24) Mo goya-goya, ba segela le mo ba mamarelang dilo tsone, ba kwa ga Modimo ba sa sa mo nyaka.—Mat. 13:22; 1 Joh. 2:15, 16.

8, 9. (a) Re tšhuta dilo difeng ka dipedi ga taba yowa ya Adamo, Efa le barongwa bala ba go fokoga? (b) Mo re tšiba gore Sathane o re woka go segela kaye di re gelepa ka ying?

⁸ Tso di makiyeng ke Adamo, Efa le barongwa bala ba go fokoga, di re tšhutisa dilo tse dingwana ka dipedi. Sa mathomo ke gore go na le mahlaya ka mabedi mo ga taba yowa, rune re tshwanele re kgete ka lloši. Re ka kgeta Jehova kela ra kgeta Sathane. (Mat. 7:13) Sa bobedi ke gore bo ba kgetang Sathane, maphomela ya gona a ma yenetse go segela kaye. Adamo le Efa ba yye ba bona go thulegiye lešuba la gore ba tipotse bona beng gore sa gabutši ke sefeng le sa go befa ke sefeng, madimona le wona ma kwa nkare gwa natefela ka gore ma na le matšhika ya go lawola memmušo ya batho. (Gen. 3:22) Mara mo Sathane a neya batho dilo, ka moka matšatši tsa go sasamela di tlele go feta tsa go natefela.—Job 21:7-17; Magal. 6:7, 8.

⁹ Go tšiba gore Sathane o re woka go segela kaye di re gelepa ka ying? So se re gelepa gore re tšibe so re kgerang ka sona mo re kene re theetsele ba go bereka mmušo fote go re tšhofa gore re ye mahlong re tšhomayela. Re di tšiba gabutši gore Jehova o nyaka re hlompa bo ba go lawola. (1 Pet. 2:17) Fote o nyaka re hlompa melawo ya mmušo, solanka melawo yone yi sa phigisane le ya Modimo. (Maroma 13:1-4) Mara a re nape re kenelela ka matla, o kraya re šele re yema le mekgahlo ya gona kela re kwa nkare moyetamahlong-mokete o phala mokete. (Joh. 17:15, 16; 18:36) Ka taba la gore re di bona gabutši gore Sathane o nyaka go sinya Jehova lebitso le go le tupetsanya ka marole, re kwa re nyaka ka matla go tšhutisa batho dinnete ka Modimo. Re titeya sekguba ka lebitso lage fote re ya le berekisa, re tšiba gabutši gore mo re nyaka yene, re nyoko rufiwa ka tsa go tlala go feta mo re nyaka tšheleta kela dilo tse dingwana.—Jes. 43:10; 1 Thim. 6:6-10.

10-12. (a) Sathane a ka fo ba a berekisiye selobo ka mokg’o mang gore a woke barongwa bala ba bangwana? (b) Tsa gore go wele barongwa ba go tlala di re tšhutisa ying?

¹⁰ Sathane o berekisa dilo tsa go tlala tsa gore wa di tšiba gore di nyoko phomelela mo a woka batho. Mo re beyisa, o berekisa selobo gore ba make tso yene a di nyakang. Fote wa ba tshosetsa, ba šinya ba kena mone dilong tsage.

¹¹ Nakwela a berekisa selobo o di kgonne go thekola bobhuti bage ba go tlala bo ne go le barongwa. Di ka makega gore o yye a thomisa a ba pombhola mo a soko kraya lešuba la go ba thekola. Mo ba bangwana ga barongwa bowa ba lobega ke mokane ba maka tsa go tšebisa tsa go yetsela le basadi, ba yye ba belega digoboro tse dingwana tsa gore di yye tsa yilametsa batho. (Gen. 6:1-4) Nakwenngwana Sathane o nabetsiye barongwa bone ka tsotsone tsa go yetsela le basadi le tsa gore ba nyoko di kgona go lawola batho. Kela ke mo a nyaka go sinyetsela gore ‘pewu ya mosadi’ yela yi tshepisiwweng yi sa segele. (Gen. 3:15) Le mo re sa tšibi gabutši gore ke ntaba, tsotsone ka mokana ga tsona di yye tsa šaša mo Jehova a leya Mogogola—Sathane le barongwa bala ba go fokoga ba šala ba tšebiye.

¹² Re ka tšhuta ying mara mo ga taba yowa? A di nyake o tseye nkare taba yowa ya go šitega go titshwara ga tsa ka ku mapaying le ya go ba le magetla yi ka sa go tlele. Barongwa bowa ba gore ba latelele Sathane, ke mo ba berekela Modimo ka mengwagangwaga go se na sa go hlopa. Mara le gana hone masethesetheng, ba go tlala ba bona ba yye ba fo lesetsa le mo ba bona nkare tso ba di nabelang di kekemme. Le rune go ka fo ba go le botala re le ka ho mokgahlong wa Modimo wa lefaseng. Le mo re le ka gana ho mokgahlong wa go yela wa Modimo, re ka tšhoga re nabele dilo tsa gore a di ya yela. (1 Makor. 10:12) Di nyaka re sa lesetse go tinyakolla ka ho dipelong, gore mo nkare monagano wo thomisa go kekema, re yakgoswe re wo wolola, le magetla mo nkare ma thomisa go kokomoga, re yakgoswe re rothotha!—Magal. 5:26; bala Makolosi 3:5.

13. Sathane o berekisa selobo sefeng se sengwana, fote re ka maka byang gore a sa re lobe?

¹³ Se sengwana sa gore Sathane mo a re loba ka sona ga go tlala wa phomelela ke dilo tsowa tsa go yelana le boloyi. Lekgono aa sa berekisa bodumedi bya matsaka fela mo a tshokanya batho, o di tšhela le ga tso batho ba tijabodisang ka tsona. Dimuvi, mekgano ya thekinoloji le tse dingwana di maka nkare boloyi bya jabodisa. Byalo re ko kena kakaye gore di sa re tlolele? Re sa yemele gore mokgahlo wa Modimo o nyoko re neya letheto la dilo tsa go tijabodisa tsa gore a di nyake re di lebelela le tsa gore ke tsona. Ye mongwana le ye mongwana di fo nyaka gore a tšhutise lekwalo lage gore le sa mo makise tso Modimo a sa di nyakeng. (Maheb. 5:14) Mara re nyoko ba re maka tsona mo  re ka fo latelela mantsu ya mopostola Pawulo ya ma butšwelediwweng ke Modimo ya gore ‘re sa timakisi mo re re re nyaka Modimo.’ (Maroma 12:9) Re ka fo tiputsisa gore: ‘Ayitsano tsa go tijabodisa tso nna ke kwanang natso di šupetsa gore ke ya resa mo ke re ga Modimo ke ya mo nyaka? Mo di ka fo makega gore bo ke tšhutang nabo Baebele ba tle mutšing gaka ba kraye ke lebelele tsotsone, nje ba ka tseya gore tso ke ba tšhutisang le nna ke ya di maka?’ Sathane a ka sa re lobe mo re ka fo lwa ka matla gore tso re di botsang batho ba bangwana di yelane le tso re di makang.—1 Joh. 3:18.

14. Sathane a ka leketsa byang gore a re hlahlayise, mara re ka tiyisela byang?

¹⁴ Sathane aa berekisi selobo fela, o leketsa go re tšoka mo a kene a re gogeyisa go baba gore re šinye re jikela Jehova. Ka nako tse dingwana o fo berekisa memmušo gore yi re rakele go tšhomayela. Kela a ka maka gore bo re kenang nabo sekolo le bo re berekang nabo ba poyile taba ya rune ya go titshwara ka mokg’o Baebele yi bolabolang. (1 Pet. 4:4) Fote aa tshwate go fo maka gore mašaga ya rune ma re rakele go ya mogahlanong. (Mat. 10:36) Re ka maka ying mara mo re gahlana le tsotsone? Sa mathomothomo di nyaka re di tšibe gore go hlopegisiwa ke ga rune—Sathane a ka sa re lese gana byalo, o ntweng ye kgolo. (Kut. 2:10; 12:17) Byalo di nyaka gore rune re tigopotse gore gale ke ntaba go makega dilo tsowa—akere Sathane o re rune ga Jehova re mo nyaka fela mo go tematema. O re mo re ka fo manyega ka go nyananyana, re nyoko mo lahla ga Modimo. (Job 1:9-11; 2:4, 5) Sa mafelelo ke go fore re tikokotlele ka Jehova gore a re neye matšhika ya go lwa le taba yo. O sa lebale gore a ka sa tsoge a re lahliye.—Maheb. 13:5.

15. Nje Sathane a ka di kgona go re gapeletsa go maka dilo le mo re sa nyake? Hlatolla.

¹⁵ Sathane a ka sa di kgone go gapeletsa batho gore ba make tso ba sa di nyakeng. (Jak. 1:14) Ba bangwana ba berekisana naye Sathane ba sa tšibi. Mara mo ba šele ba tšhutiye dinnete, ye mongwana le ye mongwana wa tikgetela gore yene o nyaka go berekela mang. (Meber. 3:17; 17:30) Mo re ka fo tipotsa gore re nyoko maka tso tsa Modimo, Sathane a ka sa make selo le mo a ka fo leketsa go re ntsha seporong.—Jobo 2:3; 27:5.

16, 17. (a) King se sengwana sa gore Sathane le madimona a ba kgone go se maka? (b) Ke ntaba di sa nyake re tšhaba go ntsha lentsu mo re rapela Jehova?

¹⁶ Sathane le madimona yage ba na le ho ba sologang gona. Mo re nyaka ka ho Baebeleng, a go šiyo mo re krayang gore ba kgona go tšiba so rune batho re se naganang kela go bona tso di leng ka pelong ya motho. Go fo ba Jehova le Jeso ba ntoši bo ba kgonang go maka sosoneng. (1 Sam. 16:7; Mar. 2:8) Byalo mo re bolabola kela re rapela re rasa, ayitsano le gana mone a ba re kwe? Nje re ka napa re tšhoga gore Diyabolo kela madimona ba ka re kwa mo re rapela ke mokane ba maka gore di šaše? Awwa. Ke ntaba re reyane? A re tšhabe go makela Jehova dilo tsa go bafala re re Diyabolo o nyoko re bona. Byalo, le go rapela re rasa a di nyake re šinya re tšhaba gore Diyabolo o ko re kweng kela byang. Gabutšibutši Baebele yi bolabola ka malata ya go tlala ya Modimo ya ma yyeng ma rapela ma rasa, fote a go šiyo mo di šupang nkare ba yye ba tšhoga gore ba nyoko kwa ke Diyabolo. (1 Mag. 8:22, 23; Joh. 11:41, 42; Meber. 4:23, 24) Mo re ka fo dula re phela ka mokg’o Modimo a nyakang, tla re tshepeneng gore Jehova o nyoko thiba Diyabolo gore a sa re kwaletse ka matla.—Bala Pisalema 34:7.

¹⁷ Di ya nyakega tsona gore re tšibe lenaba la rune, mara le sa nape le re tshosa wa kraya re hlagasela. Mo Jehova a le ho thina, le batho ba gore a ba yenela gabutši mmeleng ba ka di kgona go hlola lenaba lone ba reng ke Sathane. (1 Joh. 2:14) Mo re ka fo mo tula, o nyoko re tšhaba. (Jak. 4:7; 1 Pet. 5:9) Bo ba gore ba sa gola ke bona bo Sathane a ba nyakang ka matla. Ba ka maka byang se segolo gore ba lwe naye ga Diyabolo? Hlogotaba ya go latela yi nyoko tla yi hlaya.