1. Адам ӕма Евӕ тӕрегъӕд ку искодтонцӕ, уӕд Йеговӕ не знаги туххӕй ци раргом кодта?

АДАМ ӕй зудта, хелагӕ дзоргӕ ке нӕ фӕккӕнуй, уой. Мадта хелагӕ Еви хӕццӕ ке исдзурдта, уой ку фегъуста, уӕд ӕй, ӕвӕдзи, балӕдӕрдтӕй изӕдтӕй еске ке адтайдӕ (Райд. 3:1–6). Еци изӕд ка адтӕй, уой Адам ӕма Евӕ нӕ зудтонцӕ. Фал Адам уӕддӕр ӕ уарзӕгой уӕларвон Фиди нихмӕ рацудӕй ӕма зонгӕ дӕр ке нӕ кодта, уой хӕццӕ байеу ӕй (1 Тим. 2:14). Уой хуӕдфӕсте Йеговӕ райдӕдта, еци знаг ка ӕй, уой ӕргом кӕнун ӕма зӕрдӕ байвардта, фӕстагмӕ исӕфт ке ӕрцӕудзӕй. Фал цалинмӕ еци рӕстӕг нӕма ӕрцудӕй, уӕдмӕ ба, хелаги цъухӕй ка дзурдта, еци знаг, Хуцауи ка уарзуй, еци адӕни нихмӕ цӕудзӕй (Райд. 3:15).

2, 3. Мессийи ӕрцуди размӕ Йеговӕ Сайтани туххӕй уотӕ минкъий цӕмӕн раргом кодта?

² Йеговӕ некӕд ӕргом кодта, ӕ нихмӕ ка рацудӕй, еци изӕди ном *. Мах ӕй ци номӕй зонӕн, еци ном дӕр,  Сайтан, зӕгъгӕ, гъома «Нихмӕлӕууӕг», фиццаг хатт раргом кодта, Едеми хабӕрттӕбӕл еу 2 500 анзи ку рацудӕй, уой фӕсте (Иов 1:6). Дзиуиттаг Финстити дзурд Сайтан ӕрмӕстдӕр ӕртӕ киунугеми ӕмбӕлуй – 1 Анзфистити, Иови ӕма Захарий киунугути. Цума Мессийи ӕрцуди размӕ Йеговӕ еци знаги туххӕй уотӕ минкъий цӕмӕн раргом кодта?

³ Йегови, ӕвӕдзи, нӕ бафӕндадтӕй, цӕмӕй Сайтани ӕма ӕ гъуддӕгти кой Дзиуиттаг Финстити арӕхдӕр цудайдӕ. Йеговӕ фиццагидӕр Дзиуиттаг Финститӕ уой туххӕй ниффинсун кодта, цӕмӕй адӕнӕн банхус кодтайдӕ Мессийи базонун ӕма ӕ фӕдбӕл цӕун (Лук. 24:44; Гал. 3:24). Ӕма еци гъуддаг конд ку ӕрцудӕй, уӕд Йеговӕ Киристей, удта ӕ фӕдбӕлдзӕугути фӕрци фулдӕр раргом кодта, Сайтани ӕма имӕ ка ӕрбайеу ӕй, еци изӕдти туххӕй *. Ӕма е дессаг дӕр нӕй, уомӕн ӕма Йеговӕ Йесойӕн ӕма исӕрст киристӕнттӕн баихӕс кодта, Сайтани ӕма ӕ фӕдбӕл ка рацудӕй, уони фесафун (Ром. 16:20; Рарг. 17:14; 20:10).

4. Сайтанӕй тӕрсун цӕмӕннӕ гъӕуй?

⁴ Апостол Петур Сайтани исхудта «богътӕгӕнагӕ домбай», Иоанн ба – «хелагӕ» ӕма «залиаг хелагӕ» (1 Пет. 5:8; Рарг. 12:9). Фал нӕ Сайтанӕй тӕрсун нӕ гъӕуй, уомӕн ӕма ӕ хъаурӕ ӕнӕкӕрон нӕй. (Бакӕсӕ Иакови 4:7.) Мах Йеговӕ, Йесо ӕма еузӕрдон изӕдтӕ гъӕуай кӕнунцӕ. Уой фӕрци нӕ бон ӕй не знаги нихмӕ фӕллӕуун. Фал нӕ уӕддӕр гъӕуй базонун дзуапп ӕртӕ фарстайебӕл: Сайтанмӕ цӕхуӕн хъаурӕ ес, уой туххӕй ци ес зӕгъӕн? Цӕхуӕн мадзӕлттӕй пайда кӕнуй? Ӕ бон ци нӕй кӕнун? Мадта аци фарстатӕ рартасӕн ӕма ӕркӕсӕн, нӕ бон си зундӕн райсун ци ӕй, уомӕ.

5, 6. Еунӕг хецауадӕн дӕр ӕ бон цӕмӕннӕ ’й, адӕни, ӕцӕгӕйдӕр сӕ ка тухсун кӕнуй, еци гъуддӕгтӕй исуӕгъдӕ кӕнун?

⁵ Сайтан ӕ фӕдбӕл берӕ изӕдтӕ расайдта. Дони хъиамӕти размӕ си кедӕрти баразӕнгард кодта, цӕмӕй зӕнхон силгоймӕгтӕмӕ ӕрхицӕ кодтайуонцӕ ӕма ихӕлд гъуддӕгти бафтудайуонцӕ. Библий уой туххӕй фӕсномуг дзурдтӕй финст ес, зӕгъгӕ, «залиаг хелагӕ» ӕ фӕдбӕл «раласта уӕларвон стъалутӕн се ’ртиккаг хай» (Райд. 6:1–4; Иуд. 6; Рарг. 12:3, 4). Еци изӕдтӕ Хуцауи бийнонтӕй ку фӕххецӕн ӕнцӕ, уӕд сӕхе Сайтани дӕлбарӕ бакодтонцӕ. Фал уотӕ зӕгъӕн нӕййес, ӕма си ке куд фӕндуй, уотӕ архайуй. Хуцау ӕ Паддзахадӕ куд исфедар кодта, уотӕ Сайтан дӕр ӕхе хецауадӕ искодта. Паддзах си ӕхуӕдӕг ӕй, ӕ фӕдбӕл ка рацудӕй, еци изӕдтӕн ба бартӕ равардта ӕма си «дуйней хецӕуттӕ» искодта (Еф. 6:12).

⁶ Сайтанӕн ӕ хецауади фӕрци еугур зӕнхон хецауӕдтӕ дӕр ӕ къохти ’нцӕ. Е бӕрӕг ӕй, Киристейӕн «зӕнхӕбӕл цидӕриддӕр паддзахӕдтӕ ес», уони ку бавдиста, уӕд ин ци загъта, уомӕй: «Аци паддзахӕдтӕ дин еугурейдӕр сӕ кади хӕццӕ ратдзӕн, уомӕн ӕма мӕнӕн лӕвӕрд ӕнцӕ, ӕма мӕ кӕмӕн фӕндуй, уомӕн сӕ дӕттун»  (Лук. 4:5, 6). Кӕд дуйне Сайтани къохи ӕй, уӕддӕр хецӕуттӕй беретӕ сӕ адӕни хуарздзийнадӕбӕл фӕййархайунцӕ ӕма си кедӕрти ӕцӕгӕйдӕр фӕффӕндуй адӕнӕн банхус кӕнун. Фал еунӕг хецауӕн дӕр ӕ бон нӕй, адӕни ӕцӕгӕйдӕр ка тухсун кӕнуй, еци гъуддӕгтӕй исуӕгъдӕ кӕнун (Пс. 146:3, 4; Рарг. 12:12).

7. Хецауӕдтӕй уӕлдай ма Сайтан мӕнгӕ динӕй ӕма коммерцийӕй куд пайда кӕнуй? (Кӕсӕ хузӕмӕ статьяй райдайӕни.)

⁷ Сайтан ӕма ӕ фӕдбӕл ка рацудӕй, еци изӕдтӕ ма пайда кӕнунцӕ мӕнгӕ динтӕ ӕма коммерцийӕй дӕр, цӕмӕй «зӕнхӕбӕл ӕгас адӕни дӕр» сайонцӕ (Рарг. 12:9). Мӕнгӕ динтӕ Йегови туххӕй мӕнгӕттӕ парахат кӕнунцӕ, удта ма адӕнӕй Хуцауи ном римӕхсунцӕ (Йер. 23:26, 27). Уой туххӕй берӕ кӕдзосзӕрдӕ адӕн сӕ зӕрдтӕй Хуацауӕн фӕкковунцӕ, фал ӕцӕгӕй ба – сайтӕнттӕн (1 Кор. 10:20; 2 Кор. 11:13–15). Сайтан ма пайда кӕнуй коммерцийӕй дӕр, цӕмӕй адӕн уотӕ сагъӕс кӕнонцӕ, цума сӕ амонд ӕхца ӕма мулкӕй кӕнгӕ ӕй (Ӕмб. 18:11). Уотӕ ка сагъӕс кӕнуй, етӕ исунцӕ «Гъӕздугдзийнади» цагъартӕ, Хуцауи цагъартӕ нӕ, фал (Матф. 6:24). Ӕма си кӕд кадӕртӕ раздӕр Хуцауи уарзтонцӕ, уӕддӕр мулкбӕл уотӕ иссӕнцӕ, ӕма сӕмӕ еци уарзондзийнадӕн ӕ кой дӕр нӕбал байзадӕй (Матф. 13:22; 1 Иоан. 2:15, 16)

8, 9. а) Адам ӕма Еви, удта лӕгъуз изӕдти хабарӕй цӕхуӕн дууӕ гъуддаги базудтан? б) Сайтанмӕ цӕхуӕн хъаурӕ ес, уой зонун цӕмӕн гъӕуй?

⁸ Адам ӕма Еви, удта Сайтани фарс ка ислӕудтӕй, еци изӕдти хабарӕй дууӕ гъуддаги базудтан. Фиццаг: адӕймаги бон ӕй ӕрмӕстдӕр кенӕ Йегови фарс ислӕуун, кенӕ Сайтани. Ӕма ке фарс ислӕудзиан, уой гъӕуама ниллух кӕнӕн (Матф. 7:13). Дуккаг: Сайтани фарс ка ислӕууй, уонӕн е кӕд ести пайда ӕрхӕссуй, уӕддӕр рӕстӕгмӕ. Зӕгъӕн, Адам ӕма Евӕн фадуат фӕззиндтӕй, цӕмӕй сӕхуӕдтӕ ӕвзурстайуонцӕ, хуарз ӕма лӕгъуз ци ӕй, уой. Лӕгъуз изӕдтӕн дӕр зӕнхон хецауӕдтӕбӕл кӕмидӕр сӕ барӕ цӕуй (Райд. 3:22). Фал Сайтани фарс ка ислӕууй, уони е хуарзӕй некӕд нецӕмӕ ӕркӕнуй! (Иов 21:7–17; Гал. 6:7, 8).

⁹ Сайтанмӕ цӕхуӕн хъаурӕ ес, уой зонун нӕ цӕмӕн гъӕуй? Уомӕн ӕма уой фӕрци нӕ бон уодзӕй зӕнхон хецауӕдтӕмӕ раст цӕстӕй кӕсун, удта нӕ е хуарз хабар игъосун кӕнунмӕ дӕр разӕнгард кӕндзӕй. Мах ӕй зонӕн, Йегови уотӕ ке фӕндуй, цӕмӕй зӕнхон хецӕутти нимайӕн (1 Пет. 2:17). Удта ’й фӕндуй, цӕмӕй хецауади закъӕнттӕ дӕр ӕнхӕст кӕнӕн, ӕ уагӕвӕрдти нихмӕ ку нӕ уонцӕ, уӕд (Ром. 13:1–4). Фал мах аци дуйней гъуддӕгти ке нӕ архайӕн, уой дӕр гъӕуама лӕдӕрӕн ӕма, цӕхуӕн парти кенӕ хецау хуӕздӕр ӕй, уой не ’взарӕн (Иоан. 17:15, 16; 18:36). Сайтан Хуцауи ном ке ӕгадӕ кӕнуй ӕма ’й баримӕхсунбӕл ке архайуй, уой зонгӕй мах фӕндуй, нӕ бон цидӕриддӕр ӕй, уой кӕнун, цӕмӕй адӕнӕн нӕ Хуцауи туххӕй рӕстдзийнадӕ дзорӕн. Мах нӕхецӕн устур кадӕбӕл нимайӕн, Хуцауи ном ке хӕссӕн ӕма ’й иннетӕн ке дзорӕн, уой. Хуцауи ка уарзуй, етӕ берӕ арфӕдзийнӕдтӕй хайгин ӕнцӕ, ӕхца ӕма мулк ка уарзуй,  уонӕй ба уотӕ зӕгъӕн нӕййес (Ис. 43:10; 1 Тим. 6:6–10).

10–12. а) Сайтан еуӕй-еу изӕдти куд басайдта? б) Лӕгъуз изӕдтӕбӕл ци хабар ӕрцудӕй, уомӕй цӕбӕл ахур кӕнӕн?

¹⁰ Сайтан аллихузи мадзӕлттӕй пайда кӕнуй, цӕмӕй адӕймаги ӕрахӕсса. Зӕгъӕн, ӕ бон ӕй уотӕ бакӕнун, цӕмӕй цӕмӕдӕр хицӕ кӕнун райдайа кенӕ ба ’й ӕ бон ӕй фӕттӕрсун кӕнун.

¹¹ Сайтан хъӕбӕр берӕ изӕдти басайдта. Ӕвӕдзи сӕ берӕ рӕстӕг гъӕуай кодта, цӕмӕй ӕй базудтайдӕ, цӕмӕй сӕ басайун ӕнгъезуй, уой. Кӕцидӕр изӕдтӕ е скъӕппӕги бахаудтӕнцӕ ӕма зӕнхон силгоймӕгти хӕццӕ бацардӕнцӕ. Ци сувӕллӕнттӕ син игурдӕй, етӕ ба хъӕбӕр хъаурӕгин, удта ӕнахур устур адтӕнцӕ ӕма сӕ алливарс адӕнӕн фудмиутӕ кодтонцӕ (Райд. 6:1–4). Уомӕй уӕлдай ма, ӕвӕдзи, Сайтан еци изӕдтӕн зӕрдитӕ ӕвардта, еугур адӕн дӕр сӕ дӕлбарӕ ке уодзӕнцӕ. Ӕ нисан, ӕвӕдзи, е адтӕй, цӕмӕй, Йеговӕ «силгоймаги... байзӕддаги» туххӕй ци дзурдтӕ загъта, етӕ ма исӕнхӕст адтайуонцӕ (Райд. 3:15). Фал ин си неци рауадӕй. Йеговӕ зӕнхӕбӕл Дони хъиамӕт рауагъта, ӕма Сайтани, удта ӕ фӕдбӕл ка рацудӕй, еци изӕдти фӕндтӕй неци рауадӕй.

¹² Аци хабарӕй цӕбӕл ахур кӕнӕн? Гъӕуама ма иронх кӕнӕн, ӕнӕгъдаудзийнади ӕма сӕрбӕрзонддзийнади скъӕппӕги хъӕбӕр ӕнцон бахауӕн ке ӕй. Сайтани фарс ка ислӕудтӕй, еци изӕдтӕ Хуцауӕн уӕлӕрвти берӕ ӕнзти дӕргъи фӕллӕггадӕ кодтонцӕ. Фал уӕддӕр сӕ зӕрдити лӕгъуз фӕндтӕ фӕззиндтӕй. Мах дӕр, ка ’й зонуй, Хуцауӕн берӕ ӕнзти дӕргъи лӕггадӕ кӕнӕн, фал е уобӕл дзорӕг нӕй, ӕма нин тӕссаг нӕбал ӕй, лӕгъуз фӕндтӕ нӕ зӕрди едӕгтӕ ке рауадздзӕнцӕ, уомӕй (1 Кор. 10:12). Мадта гъӕуама арӕхдӕр нӕ зӕрдитӕмӕ кӕсӕн, цӕмӕй си ести ӕнӕгъдау  кенӕ сӕрбӕрзонд сагъӕстӕ ку фӕззинна, уӕд сӕ нӕ бон уа еци фӕдбӕл ракӕдзос кӕнун (Гал. 5:26; бакӕсӕ Колоссӕгтӕмӕ 3:5).

13. Сайтан ма цӕхуӕн мадзалӕй пайда кӕнуй ӕма нӕ бон ци ӕй кӕнун, цӕмӕй еци скъӕппӕги ма бахауӕн?

¹³ Сайтан ма адӕни сайуй хинттӕй, мӕлӕт ӕма сайтӕнтти хӕццӕ баст хабӕрттӕй ӕма ӕндӕр уӕхӕн гъуддӕгтӕй. Цӕмӕй еци гъуддӕгтӕ адӕймагмӕ дессаг кӕсонцӕ, уой туххӕй айдагъ мӕнгӕ динтӕй нӕ пайда кӕнуй, фал ма ерхӕфсӕнтӕй дӕр. Киноти, видеогъӕстити ӕма ӕндӕр ерхӕфсӕнти уӕхӕн гъуддӕгтӕ уотӕ ӕвдесунцӕ, ӕма сӕмӕ адӕймаг кӕсгӕ байзайуй. Нӕ бон куд ӕй аци скъӕппӕгӕй нӕхе багъӕуай кӕнун? Кӕци ерхӕфсӕн ӕй хуарз кӕци ба лӕгъуз, уой нин нӕ организаци гӕгъӕдибӕл нӕ ниффинсдзӕй. Гъӕуама ни алкедӕр е ’фсарӕ уотӕ исахур кӕна, цӕмӕй нӕ бон уа Хуцауи уагӕвӕрдтӕмӕ гӕсгӕ архайун. (Дзиуит. 5:14). Цӕмӕй нӕ бон уа раст унаффитӕ хӕссун, уой туххӕй гъӕуама Хуцауи «ӕнӕхийнӕ» уарзтӕй уарзӕн (Ром. 12:9). Ерхӕфсӕнтӕ ӕвзаргӕй нӕ бон ӕй нӕхе бафӕрсун: «Иннетӕн ке фӕййамонун, еци уагӕвӕрдтӕмӕ гӕсгӕ мӕхуӕдӕг дӕр цӕрун? Библи ке хӕццӕ ахур кӕнун кенӕ Хуцауи туххӕй ке хӕццӕ фӕдздзорун, етӕ ’й ку фӕууинонцӕ, цӕхуӕн ерхӕфсӕн равзурстон, уой, уӕд мӕбӕл ци рагъуди кӕндзӕнцӕ?» Адӕнӕн ке фӕййамонӕн, еци уагӕвӕрдтӕмӕ гӕсгӕ нӕхуӕдтӕ дӕр ку архайӕн, уӕд нин ӕнцондӕр уодзӕй нӕхе Сайтани скъӕппӕгутӕй багъӕуай кӕнун (1 Иоан. 3:18).

14. Сайтан ма куд архайуй ӕма нӕ бон ци ӕй кӕнун?

¹⁴ Цӕмӕй Хуцаубӕл еузӕрдон мабал уӕн, уой туххӕй нӕ Сайтан еуӕй-еухатт тӕрсун дӕр фӕккӕнуй. Зӕгъӕн, ӕ бон ӕй уотӕ бакӕнун, цӕмӕй нин хецауадӕ игъосун кӕнуни барӕ мабал дӕтта кенӕ нӕбӕл не ’мкосгутӕ кенӕ не ’мкъласонтӕ,  Хуцауи уагӕвӕрдтӕмӕ гӕсгӕ ке цӕрӕн, уой туххӕй ходун райдайонцӕ (1 Пет. 4:4). Ӕ бон ма ӕй, нӕ бийнонтӕ нӕбӕл тухсгӕ ке фӕккӕнунцӕ, уомӕй дӕр испайда кӕнун ӕма сӕ нӕ нихмӕ исаразун, цӕмӕй нин ӕмбурдтӕмӕ цӕунмӕ къулумпий хуасӕ исуонцӕ (Матф. 10:36). Еци уавӕрти нӕ бон ци ӕй кӕнун? Уӕхӕн зиндзийнӕдтӕ ке ӕвзарӕн, е нӕмӕ дессаг ма кӕсӕд, уомӕн ӕма Сайтан нӕ нихмӕ тохуй (Рарг. 2:10; 12:17). Уомӕй уӕлдай ма гъӕуама дзурддаг фарста дӕр ма иронх кӕнӕн. Сайтан куд загъта, уомӕ гӕсгӕ мах Йеговӕн лӕггадӕ кӕнӕн, цалинмӕ нӕ неци тухсун кӕнуй, уӕдмӕ, фал ести зиндзийнӕдти ку бахауӕн, уӕдта си нӕхе рахатдзиан (Иов 1:9–11; 2:4, 5). Удта гъӕуама алкӕддӕр Йеговӕй хъауритӕ корӕн ӕма нӕ ке некӕд ниууадздзӕй, уой ма иронх кӕнӕн (Дзиуит. 13:5).

15. Сайтан адӕймагӕн тухӕй ести бакӕнун кӕндзӕй? Ба ’й лӕдӕрун кӕнӕ.

¹⁵ Адӕймаги ӕхе ку нӕ фӕндӕуа, уӕд ин Сайтан тухӕй неци бакӕнун кӕндзӕй (Иак. 1:14). Аци дуйней ӕй беретӕ лӕдӕргӕ дӕр нӕ кӕнунцӕ, Сайтани фарс ке лӕуунцӕ, уой. Фал адӕймаг рӕстдзийнадӕ ку базонуй, уӕд ӕй фӕгъгъӕуй равзарун, ке фарс лӕудзӕй, уой: Йегови ӕви Сайтани (Гъуд. 3:17; 17:30). Хуцауи фӕндон ӕнхӕст кӕнун нӕ федар фӕндӕ ку уа, уӕд нӕ Сайтан Хуцауӕй нӕ райеуварс кӕндзӕй (Иов 2:3; 27:5).

16, 17. а) Сайтани ӕма ӕ хӕццӕ ка ӕй, уони бон ма ци нӕй кӕнун? б) Йеговӕмӕ гъӕрӕй ковун цӕмӕн гъӕуама ма тӕрсӕн?

¹⁶ Сайтани ӕма ӕ фӕдбӕл ка рацудӕй, еци изӕдти бон кӕнун ке нӕй, еу уӕхӕн гъуддаг дӕр ма ес. Зӕгъӕн, Библий некӕми финст ес, цӕбӕл сагъӕс кӕнӕн кенӕ нӕ зӕрди ци ес, уой фӕууинун сӕ бон ке ӕй, уой туххӕй. Уой ӕрмӕстдӕр Йегови ӕма Йесой бон ӕй уинун (1 Сам. 16:7; Мар. 2:8). Мадта нӕ цума гъӕуй тӕрсун, гъӕрӕй ку ковӕн, уӕд нӕ Сайтан ӕма ӕ хӕццӕ ка ӕй, етӕ ке фегъосдзӕнцӕ ӕма ци фегъустонцӕ, уомӕй нӕ нихмӕ ке испайда кӕндзӕнцӕ, уомӕй? Нӕъ! Цӕмӕннӕ? Расагъӕс кӕнӕ: Йеговӕн лӕггадӕ кӕнгӕй берӕ хуарз гъуддӕгтӕ фӕккӕнӕн ӕма нӕ Сайтан ке фӕууиндзӕй, уомӕй нӕ фӕттӕрсӕн. Мадта гъӕрӕй ковунмӕ дӕр гъӕуама ма тӕрсӕн. Уомӕй уӕлдай ма Библий дӕр берӕ рауӕнти финст ес, Хуцауи еузӕрдон лӕггадгӕнгутӕ гъӕрӕй куд кувтонцӕ, уой туххӕй ӕма Сайтанӕй ке тарстӕнцӕ, уобӕл си дзурд некӕми цӕуй (1 Пад. 8:22, 23; Иоан. 11:41, 42; Гъуд. 4:23, 24). Хуцауи фӕндонмӕ гӕсгӕ ку ковӕн ӕма архайгӕ дӕр уотӕ ку кӕнӕн, уӕд Йеговӕ некӕд бауадздзӕй, цӕмӕй нин Сайтан ести уӕхӕн фудмиуӕ бакӕна, ӕма ин исраст кӕнӕн мабал уа. (Бакӕсӕ Псалом 34:7.)

¹⁷ Не знаг ка ӕй, уой гъӕуама зонӕн, фал си тӕрсун ба нӕ гъӕуй. Кӕд ӕнӕнхӕст ан, уӕддӕр Йегови фӕрци Сайтанбӕл фӕууӕлахез уодзиан (1 Иоан. 2:14). Библи куд зӕгъуй, уомӕ гӕсгӕ ӕ нихмӕ ку фӕллӕууӕн, уӕд ни «раледздзӕй» (Иак. 4:7; 1 Пет. 5:9). Абони Сайтанӕн ӕ цӕф хъӕбӕрдӕр ӕригӕнттӕбӕл ӕй. Цума сӕ бон куд ӕй ӕ нихмӕ фӕллӕуун? Уобӕл ба дзурд цӕудзӕй иннӕ статьяй.