1. Adanwan Evawan juchallikusqankutawan, ¿imatataj Jehová Dios chay sajra angelmanta nisqa?

ADANQA yacharqa kataris mana parlayta atisqankuta. Chayrayku Adanqa, Eva uj katariwan parlasqanta nishajtin, repararqachá Evawan mana kataripunichu parlasqanta, manaqa uj ángel chay katarinejta parlasqanta (Gén. 3:1-6). Adanwan Evawantaj, pichus chay ángel kasqanta mana yacharqankuchu. Chaywanpis Adanqa, chay angelpa nisqanta kasuspa Jehová Diospa contranpi oqharikorqa (1 Tim. 2:14). Chayrayku Jehová Diosqa, nerqa chay sajra angelta chinkachinanta. Nillarqataj chay sajra ángel kamachisninman churanakunanta (Gén. 3:15).

2, 3. ¿Imajtintaj Jehová Dios Ñaupa Testamentopi Satanasmanta pisillata parlasqa?

² Jehová Diosqa mana jaykʼajpis nerqachu imachus chay sajra angelpa sutin kasqanta. * Chaywanpis Adanwan Evawan juchallikusqankumantapacha 2.500 watasninman jina, nerqa pichus chay sajra ángel kasqanta (Job 1:6). Chay sajra angelqa, Satanás nisqa sutiwan  rejsisqa, chaytaj “Churanakoj” niyta munan. Hebreo parlaypi qhelqasqa Ñaupa Testamentopitaj, kay librosllapi Satanasmanta parlan: 1 Cronicaspi, Jobpi, Zacariaspiwan. Kunantaj qhawarinachej imajtinchus Ñaupa Testamentopi Satanasmanta pisillata parlakusqanta.

³ Jehová Diosqa, Ñaupa Testamentopi Satanasmanta pisillata parlarqa. Imajtinchus Jehová Diosqa Ñaupa Testamentota qhelqacherqa pichus Mesías kasqanta runas reparanankupaj, payta kasukunankupaj ima (Luc. 24:44; Gál. 3:24). Jehová Diosqa Satanasmanta, sajra angelesmantawan astawan sutʼincharqa Mesiasnejta, yachachisqasninnejta ima. * Tumpamantawantaj Jehová Diosqa, Jesusnejta, ajllasqa cristianosnejta ima Satanasta sajra angelestawan chinkachenqa (Rom. 16:20; Apo. 17:14; 20:10).

4. ¿Satanasta manchachikunachu kanman?

⁴ Apóstol Pedro nerqa, Kuraj Supay Satanasqa “qhaparirishaj león jina” kasqanta. Apóstol Juantaj nerqa, Satanasqa ‘ñaupa katari, jatun sierpetaj’ kasqanta (1 Ped. 5:8; Apo. 12:9). Satanás ajina kajtinpis, payta ni imarayku manchachikunanchejchu tiyan, imajtinchus payqa mana tukuy imatapunichu ruwayta atin (Santiago 4:7 leey). Chantapis Jehová Dioswan, Jesuswan, Diospa angelesninwanqa Satanasmanta jarkʼashawanchej. Yanapayninkuwantaj Satanaspa contranpi sinchʼita sayayta atinchej. Chaywanpis yachananchej tiyan, Satanás runasta imaspi yuyanankupajchus tanqasqanta, imaynasmantatajchus runasta urmachiyta atisqanta. Yachanallanchejtaj tiyan imastachus Satanás mana ruwayta atisqanta.

5, 6. Kay jallpʼapi gobiernos, ¿imajtintaj mana sajra kajta chinkachiyta atinkuchu?

⁵ Ashkha angelesqa Diospa contranpi sayaykuspa Satanasman ujchaykukorqanku. Niraj Jatun Para kashajtintaj, Satanasqa wakin angelesta tanqarqa warmiswan puñuykunankupaj. Kunantaj chay angelesqa Satanaspa atiyninpi kashanku. Chaymanta parlaspa Biblia nin: “Chupanqa cielopi kaj chʼaskasmanta kinsaman tʼaqasqamanta ujnin kaj tʼaqanta pichaspa, jallpʼaman wijchʼuykorqa”, nispa. Chay chʼaskasqa angeleswan ninakun. Chay versículo nisqanman jinataj ashkha ángeles Satanasta qhaterqanku (Gén. 6:1-4; Jud. 6; Apo. 12:3, 4). Chay angelesqa, Jehová Diosmanta karunchakuspa Satanaspa makinman churakorqanku. Paykunaqa sumaj organizasqa kashanku, imaynachus Diospa Gobiernon sumaj organizasqa kashan, ajina. Chay sajra angelespa gobiernonqa Satanás. Paytaj sajra angelesman atiyta qorqa jallpʼantinta kamachinankupaj (Efe. 6:12).

⁶ Satanasqa sajra angelesninnejta gobiernosta munasqanman jina apaykachan. Chaytataj sutʼita reparasunman imatachus Satanás, Jesusman nisqanpi jallpʼantinmanta llajtasta rikuchishajtin. Satanasqa Jesusman nerqa: “Tukuy kay llajtasta qhapaj kapuynintawan qopusqayki. Kay llajtasqa noqajta, pimanchus munani, chayman qoyta atini”, nispa (Luc. 4:5, 6). Ashkha gobiernosqa suyunkupaj allin kajta ruwanankupaj kallpachakunku, runastapis yanapayta munanku. Chaywanpis kay jallpʼapeqa, ni mayqen gobiernopis sajra kajta chinkachiyta atinchu Satanaspa makinpi kasqankurayku (Sal. 146:3, 4; Apo. 12:12).

7. 1) ¿Imatataj Satanás llulla religionesnejta ruwashan? 2) ¿Imatataj Satanás munan runas yuyanankuta? (22 paginapi fotota qhawariy).

⁷ Satanaswan sajra angeleswanqa, llulla religionesnejta “jallpʼapi kaj tukuy runasta pantachishan” (Apo. 12:9). Arí, Satanasqa llulla religionesnejta Jehová Diosmanta llullasta yachachin. Diospa sutintapis “qonqachiyta” munan (Jer. 23:26, 27). Chayrayku ashkha runasqa tukuy sonqo Diosta yupaychashasqankuta  yuyaspapis, sajra angelesllata yupaychashanku (1 Cor. 10:20; 2 Cor. 11:13-15). Chantapis Satanasqa, runasta yuyachiyta munan qhapaj kaspa kusisqa kausakuyta atisqankuta (Pro. 18:11). Chayrayku ashkha runasqa, qolqellata maskʼanku Diosta maskʼanankumantaqa (Mat. 6:24). Wakintaj Diosmanta yachakuspañapis “qhapajyayta” munapayasqankurayku Diosmanta karunchakunku (Mat. 13:22; 1 Juan 2:15, 16).

8. ¿Imatataj Adanmanta, Evamanta, sajra angelesmantawan yachakusunman?

⁸ Adanmanta, Evamanta, sajra angelesmantawan yachakunchej imastachus mana ruwananchej kasqanta. Yachakunchej ajllananchej kasqanta Jehová Diospa ladonmanta kaytachus chayri Satanaspa ladonmanta kaytachus (Mat. 7:13). Chantapis yachakullanchejtaj Satanaspa ladonman churakuspaqa, llakiyllata tarinanchejta, imaynatachus Adanwan Evawan llakiyllata tarerqanku, ajinata. Paykunaqa Satanaspa ladonman churakuspa allin kajta, mana allin kajtapis yachayta aterqanku (Gén. 3:22). Sajra angelespis Satanaspa ladonman churakuspa, gobiernosta munayninkuman jina apaykachayta atinku. Chaywanpis chinkachisqa kanqanku. Reparanchej jina, Satanaspa ladonman churakuspaqa, llakiyllapi rikukusunchej (Job 21:7-17; Gál. 6:7, 8).

9. ¿Imatataj reparachiwanchej runas Kuraj Supaypa makinpi kasqankuta yachay?

⁹ Runas Kuraj Supaypa makinpi kasqankuta yachayqa, reparachiwanchej gobiernosta mana apoyanachu kasqanta. Chaywanpis Jehová Diosqa kamachiwanchej gobiernosta respetananchejta (1 Ped. 2:17). Jehová Diosqa munallantaj autoridadesta kasukunanchejta, chay autoridadespa leyesninku mana Diospa kamachiykunasninwan churanakojtin (Rom. 13:1-4). Autoridadesta kasukuna kajtinpis, mana politicaman satʼikunanchejchu tiyan gobiernosta apoyanapaj (Juan 17:15, 16; 18:36). Kay tiempopi Satanasqa, tukuy atisqanta ruwashan runas Diospa sutinta qonqanankupaj, pisipajtaj qhawanankupaj. Chayrayku tukuy atisqanchejta kallpachakunallanchejpuni tiyan Jehová Diospa sutinta runasman rejsichimunanchejpaj. Chantapis noqanchejqa Diospa sutinmanta parlaspa, Jehovaj testigosnin jina rejsichikuspataj mana pʼenqakunanchejchu tiyan. Aswan allinpuni Jehová Diosta munakuy qolqeta munakunamantaqa (Isa. 43:10; 1 Tim. 6:6-10).

10, 11. ¿Imatataj Satanás ruwasqa ashkha angelesta juchapi urmachinanpaj?

¹⁰ Satanasqa runasta tukuy imaswan pantachishan, imaynatachus angelesta pantacherqa, ajinata. Satanasqa runasta muñeconta jina apaykachananpaj, wakin imasta munapayanankupaj tanqan, wakin kutitaj manchachin.

 ¹¹ Satanasqa angelesta khuchichakuy juchawan, anzuelowan jina japʼispa pantacherqa. Chaypajqa unayta angelesta wateqarqa, imaspichus urmanankupaj jina kasqankuta yachananpaj. Chayta yachaytawantaj, ashkha angelesta juchapi urmachinanpaj, warmiswan puñuykuyta munapayacherqa. Jinamantataj ashkha angelesqa warmiswan puñuykuspa juchapi urmarqanku. Chay angelesqa wawasniyoj karqanku, wawasninkutaj jatunkaray runas karqanku. Chantapis paykunaqa manchay kallpasapas, sajrastaj karqanku (Gén. 6:1-4). Satanasqa angelesta warmiswan puñuykunankupaj tanqashaspa, ichapis chay angelesman nerqa tukuy runas makinpi kanankuta. Satanasqa ichapis chayta ruwarqa warmej miraynin mana chayamunanta munaspa (Gén. 3:15). Chaywanpis Jehová Diosqa, mana saqerqachu Satanaspa, jinallataj sajra angelespa munaynin ruwakunanta. Chayrayku Jatun musphay Parata parachimorqa.

12. ¿Imatataj sajra angelesmanta yachakusunman?

¹² Reparanchej jina, Satanasqa angelesta khuchichakuy juchapi urmacherqa, atiyniyoj kanankutataj creeykucherqa. Satanaspa ladonman churakoj angelesqa, unayta Diospa ladonpi karqanku. Chaywanpis chay angelesqa sajra munayninkuwan atipachikorqanku. Kaymanta yachakusunman, unaytaña Jehová Diosta sirvispapis, sonqonchejta allinta qhawarikunanchej kasqanta, ama sajra munayninchejwan atipachikunapaj (1 Cor. 10:12). Chayrayku sapa kuti sonqonchejta qhawarikunanchej tiyan ama millay yuyaykuna sonqonchejpi saphichakunanpaj, nitaj may kasqanchejta yuyakunanchejpaj (Gál. 5:26; Colosenses 3:5 leey).

13. 1) ¿Imasmantaj Satanás runasta tanqaj kasqa? 2) ¿Imatataj ruwananchej kasqa Satanaspa anzuelonpi mana urmanapaj?

¹³ Satanasqa runasta tanqan demoniosmanta, layqeriosmanta, magiamanta astawan yachayta munanankupaj. Ajinamanta anzuelowan jina runasta japʼispa pantachishan. Chaytataj ruwan llulla religionnejta, peliculasnejta, videojuegosnejta, waj imasnejtataj. Chay imaspi mana urmanapajqa, yuyayninchejta yachachinanchej tiyan imachus allin, imatajchus mana allin kasqanta reparanapaj (Heb. 5:14). Chayrayku mana suyananchejchu tiyan Diospa llajtan uj listata qonawanchejta, ima videoschus allin kasqanta ninawanchejpaj. Jehová Diosta tukuy sonqo munakusunchej chayqa, sumajta ajllayta atisunchej ima videostachus qhawananchejta (Rom. 12:9). Amataj puraj uya runas jina kanachu. Puraj uya runasqa mana nisqankuman jinachu kausakunku. Chayrayku niraj ima videotapis qhawarishaspaqa, allin kanman piensarinanchej chay videota qhawajtinchej imatachus estudiosninchej noqanchejmanta yuyanankupi.  Piensarillasunmajtaj predicasqanchejman jinachus chayri manachus kausakushasqanchejpi. Imastachus runasman yachachisqanchejman jina kausakusunchej chayqa, mana Satanaspa anzuelonpi urmasunchu layqeriosmanta astawan yachayta munaspa (1 Juan 3:18).

14. 1) ¿Imaynasmantataj Satanás manchachiyta munawanchej? 2) ¿Imatataj ruwasunman Satanaspa contranpi sinchʼita sayanallapajpuni?

¹⁴ Satanasqa manchachiyta munawanchej Jehová Diosta wasanchananchejpaj. Satanasqa ichapis gobiernosta tanqanman manaña Diosmanta willananchejpaj. Chantapis Satanasqa trabajomanta chayri escuelamanta compañerosninchejta tanqanman noqanchejmanta burlakunawanchejpaj, Bibliaj nisqanman jina kausakusqanchejrayku (1 Ped. 4:4). Satanasqa familiaresninchejta tanqallanmantaj churanakunawanchejpaj. Ichapis familiaresninchejqa, allinninchejta maskʼashasqankuta yuyaspa, tantakuykunaman rejta mana saqewasunmanchu (Mat. 10:36). Chay imaspi rikukuspaqa, Satanaspa contranpi sinchʼita sayanallapuni, amataj manchachikunachu Satanás ima pruebamanpis churanawanchejta (Apo. 2:10; 12:17). Chantapis mana qonqananchejchu tiyan imatachus Satanás runasmanta nisqanta. Satanás nerqa, tukuy imapis allillan kajtenqa Jehová Diosta sirviyta atillasqanchejta, mana allin kajtintaj Diosmanta karunchakunanchejta (Job 1:9-11; 2:4, 5). Chayrayku mana saykʼuspa Jehová Diospa yanapayninta mañakunallanchejpuni tiyan. Jehová Diostaj “mana jaykʼajpis” saqerpariwasunchu (Heb. 13:5).

15. ¿Satanás pitapis obliganmanchu munayninta ruwachinanpaj?

¹⁵ Satanasqa mana pitapis obliganmanchu munayninta ruwachinanpaj (Sant. 1:14). Chaywanpis ashkha runasqa, mana reparakunkuchu Satanaspa ladonmanta kashasqankuta. Chayrayku uj runa Bibliamanta yachakushaspaqa, ajllanan tiyan Satanaspa ladonmanta kaytachus chayri Diospa ladonmanta kaytachus (Hech. 3:17; 17:30). Sichus Jehová Diosta kasukuspa ladollanpipuni kasun chayqa, Satanasqa mana paymanta karunchawasunchu (Job 2:3; 27:5).

16, 17. 1) Satanaswan sajra angeleswan ima, ¿imatataj mana yachayta atinkuchu? 2) ¿Manchachikunachu kanman jatunmanta parlaspa orakuyta?

¹⁶ Biblia nisqanman jina, Satanaswan sajra angeleswanqa manallataj yachayta atinkuchu imatachus yuyasqanchejta, imachus sonqonchejpi kasqantapis. Imajtinchus Jehová Dioswan, Jesusllawan imachus sonqonchejpi kasqanta yachayta atinku (1 Sam. 16:7; Mar. 2:8). Chayrayku Satanaswan, sajra angeleswan orakusqanchejta uyarinankumanta mana manchachikunanchejchu tiyan, imaynatachus allin kajta ruwajta rikunawanchejmanta mana manchachikunchejchu, ajinata. Bibliapis niwanchej ashkha kutispi Diospa kamachisnin jatunmanta parlaspa orakusqankuta. Paykunaqa Satanasta mana manchachikusqankuchu chay orakusqankuta uyarinanmanta (1 Rey. 8:22, 23; Juan 11:41, 42; Hech. 4:23, 24). Jehová Diospa munayninman jina kausakunapaj kallpachakusunchej chayqa, payqa Satanasmanta jarkʼawasunchej (Salmo 34:7 leey).

¹⁷ Satanastaqa allinta rejsinanchej tiyan, chaywanpis mana manchachikunanchejchu tiyan. Juchasapas kaspapis Jehová Diospa yanapayninwan Satanasta atipasunman (1 Juan 2:14). Satanaspa contranpi sayaykojtinchejqa, pay noqanchejmanta ayqenqa (Sant. 4:7; 1 Ped. 5:9). Kay tiempopitaj Satanasqa, manchayta wawasta, jovenestawan juchapi urmanankupaj tanqashan. Chayrayku qhepan semanaqa, parlarisunchej imaynatachus jóvenes Satanasman sinchʼita sayaykuyta atisqankumanta.