1. Edeni Gannatete Yihowa diininke daafira ma xawisino?

ADDAAMI, hamashshu coyiˈra dandaannokkita afino. Konnira hamashshu widoonni Heewani hasaawisinohu ayyaanu kalaqama ikkinota hedikki digatino. (Kal. 3:1-6) Addaaminna Heewani konni kalaqami daafira afinori dino yaa dandiinanni. Ikkirono, Addaami baxillaanchu iimi Annisira finqile, afinokki kalaqamira haˈle Yihowa fajjo ledo sumuu yaannokkire assino. (1 Xim. 2:14) Yihowa bayichonko Addaaminna Heewani soˈrisiisi diini mayimma xawisino; qoleno yannate gedensaanni kuni bushu diini baˈˈannota kule qaale eino. Ikkollana, Maganu hamashshu widoonni Heewani hasaawisihu kuni kalaqami shiima yanna geeshsha ikkirono, Yihowa baxxannore giwannota kule qorowisiisino.—Kal. 3:15.

2, 3. Ibiraawootu Afiite Qullaawa Borro giddo Sheexaanu daafira garire kulloonnikkihu mayira ikkara dandaanno?

² Yihowa isira finqilino sokkaasinchi suˈma dikulinonke; tini Maganu hayyicha ikkinota leellishshanno. * Maganu kuni diininke loosino loosinni kainohunni uyinoonnisi suˈma nafa isi finqilihunni mitu 2,500  diri gedensaanni kulinonke. (Iyo. 1:6) Isinni “Hettisamaanchoho” yitanno tiro afiˈrinohu Sheexaane yaanno suˈmi, Ibiraawootu Afiite Qullaawa Borro giddo sase maxaaffara yaano, 1 Duduwi, Iyyoobinna Zekkaariyaasi maxaafi giddo calla no. Mesihichu woy Kiristoosi daa geeshsha diininke daafira garire kulloonnikkihu mayiraati?

³ Yihowa Ibiraawootu Afiite Qullaawa Borro giddo Sheexanunna loosisi daafira lowore xawise, kuni bushu diini egennaminoha ikkanno gede assa dihasiˈrino. Yihowa Ibiraawootu Afiita Qullaawa Borro borreessinanni gede assinohu qaru korkaati mannu Mesihicha afannonna iso harunsanno gedeeti. (Luq. 24:44; Gal. 3:24) Mesihichu dayita, Yihowa Yesuusinna rosaanosi widoonni Sheexaanunna agaanintete ayimma daafira lowore xawisino. * Yihowa hatto assasi garankolla; korkaatuno Isi Sheexaanenna isi ledo finqiltinore cancanannohu Yesuusanna buuramaasine horoonsiˈreeti.—Rom. 16:20; Aju. 17:14; 20:10.

4. Sheexaane quwa saˈne waajja hasiissannonkekkihu mayiraati?

⁴ Soqqamaasinchu Pheexiroosi Sheexaanu “ittananno doobbiichi” gede ikkinota coyiˈrino; Yohaannisi qole ‘dhudhuufanna’ ‘hamashsho’ ikkinota xawisino. (1 Phe. 5:8; Aju. 12:9) Ikkirono Daawuloosira noosi wolqa dannu noota ikkitino daafira, iso quwa saˈne waajja dihasiissannonke. (Yaiqoobi 4:7 nabbawi.) Yihowa, Yesuusinna ammanantino sokkaasine kaaˈlitannonke. Insa kaaˈlonni diinanke qeela dandiineemmo. Ikkirono konni woroonni noote sase xaˈmora dawaro afiˈra hasiissannonke: Sheexaaneho mageeshshi wolqa noosi? Isi sorisiisate woˈnaalannohu hiittoonniiti? Sheexaanu asse afannokki coyibba hiikkuriiti? Konninni aanchine kuri xaˈmuwara dawaro afiˈneemmo, hattono tenne dawaronni maa ronseemmoro laˈneemmo.

5, 6. Tenne alame gashshooti mannu oosora baalunkunni roore hasiisannore abba didandaanno yineemmohu mayiraati?

⁵ Batinye sokkaasine Sheexaanu wido ikkite finqiltino. Baote Wayira albaanni, Sheexaanu kuri giddo mite sokkaasine mannu ooso ledo siimu xaadooshshe assitanno gede assino. Qullaawu Maxaafi tenne lawishshunni xawisanni, dhudhuufu iimi beeddahe giddo sayikki anga ikkitannota uulla qole waxaaxisinota kulanno. (Kal. 6:1-4; Yih. 6; Aju. 12:3, 4) Tini sokkaasine Maganu maate giddonni agurte fulte, Sheexaaneho halama doodhitino. Ikkirono kuri finqila sokkaasine, qarra kalaqqannori gede assine calla laˈˈa dihasiissannonke. Maganoho Mangiste noosinte gede, Sheexaanuno umisi gashshoote xintire moote ikkino. Sheexaanu ayyaanaame alamera agaaninte gashshoote asse qineessino; qoleno silxaane uyinonsa, hattono alamete gashshaano assinonsa.—Efe. 6:12.

⁶ Sheexaanu ayyaanaame alamera noo dirijjitesi widoonni, mannu gashshoote baala illaallisanno. Isi Yesuusira “gobbate gashshoote baala” leellishisi gedensaanni togo yiinosi: “Konne gashshootenna ayirrinye baala atera eemmohe. Kuni baalu anera uyinoonnieha ikkino daafira, ani hasiˈroommohura aa dandeemmo.” (Luq. 4:5, 6) Sheexaanu hatto yaasi alame gashshe noohu iso ikkinota leellishshanno. Sheexaanu batinyu gashshooti bushare assanno gede xixxiiwannoha ikkirono, mitu gashshooti mannaho danchare assate sharramanno. Suwashshu wodani noonsari mite gashshaanono no. Ikkollana mittuno mannu gashshooti woy gashshaanchi mannu oosora baalunkunni roore hasiisannonsare abba didandaanno.—Far. 146:3, 4; Aju. 12:12.

7. Sheexaanu, mannu gashshoote calla ikkikkinni kaphu ammaˈnonna daddalu dirijjitta horoonsiˈrannohu hiittoonniiti? (Hanafote noo misile lai.)

⁷ Sheexaanunna agaaninte “kalqe baala” sorisiisate, poletiku gashshoote calla ikkikkinni,  kaphu ammaˈnonna daddalu dirijjittano horoonsidhanno. (Aju. 12:9) Sheexaanu kaphu ammaˈno horoonsiˈre Yihowa daafira kaphu roso halashshanno. Qoleno Daawuloosi dandaamisi deerrinni batinyu manni Maganu suˈma hawanno gede assate qodhe kaino. (Erm. 23:26, 27) Konninni kainohunni mitu beebbaataamu manni Magano magansiˈranni nooha lawannansa, agaaninte magansiˈranni no. (1 Qor. 10:20; 2 Qor. 11:13-15) Sheexaanu kaphosi halashshate daddalu dirijjittano horoonsiˈranno. Lawishshaho, tini dirijjitta mannaho hagiirraamo ikkate kaaˈlannohu qaru coyi jiro shorratenna lowo woxe gamba assiˈrate yite rosiissanno. (Law. 18:11) Mitu manni konne kapho adda assiˈre Magano agure “woxe” magansiˈranni no. (Mat. 6:24) Gale hose woxeho noonsa baxilli, Maganoho noonsa baxille qalxe amadanno.—Mat. 13:22; 1 Yoh. 2:15, 16.

8, 9. (a) Addaaminna Heewani, hattono finqila sokkaasine daafira kultanno xaggenni ronseemmohu lamu rosi hiikkonneeti? (b) Sheexaanu wolqa mageeshshitero afanke maaho kaaˈlitannonke?

⁸ Addaaminna Heewani, hattono finqiltino sokkaasine xaggenni lame qara roso ronseemmo. Umihunni, Yihowanna Sheexaanu giddo mitto doodha hasiissannonke. Yihowara ammanama hoongummoro Sheexaanu wido ikkanke digattanno. (Mat. 7:13) Layinkihunni, Sheexaanu wido ikkitannori garire diafidhanno. Addaaminna Heewani danchanna busha ikkinore insaneetira uminsa murate tunceenya afidhino; agaaninteno mannu gashshoote illaallisa dandiitino. (Kal. 3:22) Ikkirono Sheexaanu wido ikka ayewoteno gawajjitannote; isiwiinni afiˈnanniti addu horo dino.—Iyo. 21:7-17; Gal. 6:7, 8.

⁹ Sheexaanu wolqa mageeshshitero afanke maaho kaaˈlitannonke? Tenne afanke, uullate gashshaanora gara ikkitino lao heedhannonkenna sabbakate looso loonseemmo gede kakkayissannonke. Yihowa, silxaane noonsare ayirrinsammora hasiˈranno. (1 Phe. 2:17) Qoleno, Maganu seera diingeemmo gede assannonkeha ikka hoogi geeshsha, mannu ooso fushshitino seerira hajajammammora hasiˈranno. (Rom. 13:1-4) Ikkollana, poletiku coyira anga wodha, yaano mitte poletiku paarte woy gashshaancho woluwiinni roorsine laˈˈa hasiissannonkekkita deˈnoonke. (Yoh. 17:15, 16; 18:36) Qoleno Sheexaanu mannu Maganu suˈma afannokkinna suˈmisi mishamanno gede assate sharramannota anfoommo daafira, mannaho Maganu daafira halaale ikkinore rosiinseemmo. Yihowa Farciˈraasine ikkankenninna suˈmasi woshshankenni tashshi yaannonke; korkaatuno Yihowa baxatenni afiˈnanni atooti woxe baxatenni afiˈnannirinni roorinoha ikkinota anfoommo.—Isa. 43:10; 1 Xim. 6:6-10.

10-12. (a) Sheexaanu mite sokkaasine woshshaadate hiikkuri hayyo horoonsiˈrinoha ikkara dandaanno? (b) Batinye sokkaasine Sheexaanu woshshaadonni qeelamansa maa rosiissannonke?

¹⁰ Sheexaanu soˈrisiisate addi addi hayyo horoonsiˈranno. Lawishshaho, wolootu isi hasiˈrinore  assitanno gede awaawurate woˈnaalanno. Qoleno isi insa woshshaadate waajjishiishannonsa.

¹¹ Hanni Sheexaanu batinye sokkaasine woshshaadate awaawursha horoonsiˈrino gara hedi. Isi kuri sokkaasine woshshaade isira halantanno gede assara albaanni, ma garinni woshshaadannonsaro afate, lowo yanna xiinxallikki digatino. Mite sokkaasine Sheexaanu worino woshshaadonni qeelante mannu ooso seenni ledo siimu xaadooshshe assitino; konni garinni ilantino ooso manna qarrissannore ikkitino. (Kal. 6:1-4) Sheexaanu Yihowara ammanantinokki sokkaasine woshshaadinohu siimu xaadooshshi widoonni calla ikka hoogara dandaanno; isi uullate aana silxaane eemmoˈne yee qaale einonsaha ikkara dandaanno. Sheexaanu tenne assinohu, daanno yinoonnihu ‘manchote sirchi’ daannokki gede assate hede ikkara dandaanno. (Kal. 3:15) Ikkihano ikkiro, Yihowa Baote Waa abbe Sheexaanunna finqila sokkaasine gantino gano shuffitanno gede assino.

¹² Tenne xaggenni maa ronseemmo? Foorrenna naaxxa woshshaado ikkitinota dea dihasiissannonke. Sheexaanu wido ikkitino sokkaasine kiirre tunqannikki diro Yihowara soqqantinoreeti. Insa heedhinohu qullaawa bayicho ikkirono, giddonsa busha yorto rumuxxitara wodhite agurtino. Hatteente gede, Maganu dirijjitete uullaayidi kifile giddo lowo diro soqqammanni keeshshinoommoha ikkara dandaanno. Heeˈnoommohu ayyaanaamittetenni qullaawa bayicho ikkirono, giddonke busha hedo kalaqantara dandiitanno. (1 Qor. 10:12) Konni daafira, wodananke ganyine layiˈra, hattono amanyootu maaeellewiinninna gara ikkitinokki naaxxawiinni xeertiˈra hasiissannonke!—Gal. 5:26; Qolasiyaasi Sokka 3:5 nabbawi.

13. Sheexaanu manna woshshaadate wolere maa horoonsiˈranno? Ninke tenne woshshaado qeela dandiineemmohu hiittoonniiti?

¹³ Sheexaanu horoonsiˈrannoti wole woshshaado, mannu digintete coyi daafira afate quqquxamanno gede assate. Yannankera, isi mannu agaanintete ledo xaadooshshu heeˈrannonsa gede kaphu ammaˈno calla ikkikkinni boohaarshu dirijjittano horoonsiˈranno. Filme, elekitiroonikete godoˈlenna wolu boohaarshi aana digintete coye baxisannohu gede assine shiqinshanni. Tenne woshshaadonni qeelammeemmokki gede qoropha dandiineemmohu hiittoonniiti? Yihowa dirijjite gara ikkinonna gara ikkinokki boohaarsha baala tittirte kultannonke yine agadha dihasiissannonke. Mitti mittinke Maganu biddishshi ledo sumuu yaanno doorsha doodhate tiianke qajeelsiˈra hasiissannonke. (Ibi. 5:14) Qoleno, soqqamaasinchu Phaawuloosi Maganoho noonke baxilli “goowi aliha” woy doganniha ikkannokki gede amaalinonke amaale harunsinummoro hayyote doorsha doodha dandiineemmo. (Rom. 12:9) Ninkeneeto togo  yine xaˈma hasiissannonke: ‘Doodheemmo boohaarshi dogaancho ikkoommota leellishanno? Qullaawa Maxaafa xiinxalliseemmori woy galagale mare hasaawiseemmonsari doodheemmo boohaarsha laˈoommero sabbakeemmore loosunni leellisheemmoha ikkoommota heddanno?’ Wolootaho rosiinseemmore balanxe ninke loosunni leellinsheemmoha ikkiro, Sheexaanu woshshaadonni diqeelammeemmo.—1 Yoh. 3:18.

14. Sheexaanu waajjishiishankera woˈnaalannohu hiittoonniiti? Ninke tenne qeela dandiineemmohu hiittoonniiti?

¹⁴ Sheexaanu ninke woshshaadate horoonsiˈrannoti wole hayyo, Yihowara ammanammeemmokki gede assate waajjishiishate. Lawishshaho, gashshaano sabbakate loosonke hooltanno gede xixxiiwansara dandaanno. Woy qole Qullaawu Maxaafi seera harunsineemmo daafira ledonke rossannori woy loossannori haariintannonke gede assara dandaanno. (1 Phe. 4:4) Hattono ninkera heddannoti maatenke miilla gambooshshe haˈneemmota hooltannonke gede assara dandaanno. (Mat. 10:36) Ikkina konne fonqolo qeela dandiineemmohu hiittoonniiti? Umihunni, Sheexaanu ninke aana ola kayisino daafira, togoori iillannonketa afa hasiissannonke. (Aju. 2:10; 12:17) Qoleno isi kuni fonqoli iillannonke gede assannohu mayiraatiro heda hasiissannonke: Sheexaanu ‘Mannu ooso Yihowara soqqantannohu injiinsaro callaati’ yee heewisamino. Isi ‘Qarru batiˈriˈnero Magano kaaddinanni’ yiino. (Iyo. 1:9-11; 2:4, 5) Jeefote, Yihowa fonqolo qeelleemmo gede wolqa aankera huucciˈra hasiissannonke. Qoleno Yihowa horo ditugannonke.—Ibi. 13:5.

15. Sheexaanu assa hasiˈneemmokkire assineemmo gede giddeessa dandaanno? Xawisi.

¹⁵ Sheexaanu mannu hasiˈrinokkire assanno gede giddeessa didandaanno. (Yai. 1:14) Batinyu manni afikkinni Sheexaanu wido ikkino. Ikkollana mittu mittunku manchi halaale rosi gedensaanni ayera soqqamannoro doodha hasiissannosi. (Soq. 3:17; 17:30) Maganu fajjo assate murciˈnummo geeshsha, Sheexaanu Yihowara ammanammeemmokki gede assa horo didandaanno.—Iyo. 2:3; 27:5.

16, 17. (a) Sheexaanunna agaaninte assa dandiitannokki coyibba hiikkuriiti? (b) Huuronke naggi assine Yihowa huucciˈra waajja hasiissannonkekkihu mayiraati?

¹⁶ Sheexaanunna agaaninte assa dandiitannokkihu wolu coyino no. Lawishshaho, Qullaawu Maxaafi mitto bayichono insa wolu wodanira noore afa dandiitannota dikulanno. Wolu wodanira noore afa dandiitannori Yihowanna Yesuusa callaati. (1 Sam. 16:7; Maq. 2:8) Ikkina, mannu ledo hasaambanna, woy huuronke gotti assine huucciˈnanna Daawuloosinna agaaninte macciishshite gawajjitannonke yine waajja hasiissannonke? Dihasiissannonke. Mayira? Daawuloosi laˈˈannonke yine Yihowara soqqama diagurreemmo. Hatteente gede, Daawuloosi macciishshannonke yine huuronke naggi assine huucciˈra waajja dihasiissannonke. Isinni Qullaawu Maxaafi huuronsa naggi assite huuccidhinota batinye Maganu soqqamaano kulanno; qoleno kuni manni huuccattonke Daawuloosi macciishshanno yee waajjinota leellishannori dino. (1 Mot. 8:22, 23; Yoh. 11:41, 42; Soq. 4:23, 24) Maganu fajjo ledo sumuu yaannore coyiˈratenna assate wodaninni sharrammummo geeshsha, Yihowa Daawuloosi gawajjankera fajjannokkita addaxxa dandiineemmo.—Faarso 34:7 nabbawi.

¹⁷ Diinanke egenna hasiissannonke; ikkirono iso waajjine sheke diyineemmo. Guuntete xeˈne noonsari mannu ooso nafa Yihowa kaaˈlonni Sheexaane qeela dandiitanno. (1 Yoh. 2:14) Ninke iso gimbummoro, isi ninkewiinni fafanno. (Yai. 4:7; 1 Phe. 5:9) Sheexaanu roorenka wedella woshshaada hasiˈranno. Insa Sheexaane qeelate maa assa dandiitanno? Aane noo birxichira tenne xaˈmora dawaro afiˈneemmo.