1. San Yehovah fruteri fu a feanti fu wi, baka di Adam nanga Eva sondu?

ADAM ben sabi taki sneki no man taki. Sobun, di a sneki taki nanga Eva, dan a kan taki Adam ben sabi taki na wan engel ben taki drape (Gen. 3:1-6). Adam nanga Eva no ben sabi furu fu na engel disi. Toku Adam bosroiti fu arki na engel di a no ben sabi èn fu trangayesi en lobi-ati Tata (1 Tim. 2:14). Wantewante Yehovah bigin fruteri moro fu na ogri engel di ben kori Adam nanga Eva. A pramisi taki a ben o kisi pori te fu kaba. Ma Yehovah warskow tu taki fu wan pisi ten a feanti disi ben o gens den sma di lobi en.​—Gen. 3:15.

2, 3. San kan de a reide fu san ede Yehovah no fruteri wi furu fu Satan, fosi a Mesias kon?

² Fosi na engel disi opo ensrefi teige Yehovah, a ben abi wan tra nen, ma noiti Yehovah fruteri wi a nen fu en. * Baka di na engel disi opo ensrefi teige Yehovah, Yehovah no fruteri wi wantewante tu sortu nen a kisi. Na baka 2500 yari fosi a du dati (Yob 1:6). A nen fu en na Satan di wani  taki „Gensman”. Na ini den Hebrew Buku fu Bijbel, a nen disi de fu feni soso na ini dri buku. Dati na: 1 Kroniki, Yob nanga Sakaria. Fosi a Mesias kon, Bijbel no ben taki furu fu a feanti disi. Fu san ede?

³ Na ini den Hebrew Buku fu Bijbel Yehovah no taki furu fu Satan nanga den sani di a du. Kande a du disi fu di a no ben wani taki sma poti tumusi furu prakseri na a ogri engel disi. Yehovah meki sma skrifi den Hebrew Buku fu Bijbel fu di a ben wani meki sma kon sabi suma na a Mesias, so taki den ben kan waka na en baka (Luk. 24:44; Gal. 3:24). Di a Mesias doro, Yehovah gebroiki en nanga den disipel fu en fu meki sma kon sabi moro fu Satan nanga den engel di teki en sei. * A fiti taki Yehovah du disi fu di a o gebroiki Yesus nanga den salfuwan di o tiri nanga en fu pori Satan nanga den bakaman fu en.​—Rom. 16:20; Openb. 17:14; 20:10.

4. Fu san ede wi no abi fu frede Didibri?

⁴ Na apostel Petrus e kari Satan Didibri „wan lew di e bari”. Yohanes e kari en wan „sneki” èn wan „bigi kaiman” (1 Petr. 5:8; Openb. 12:9). Ma wi no abi fu frede Didibri. A no abi a makti fu du ala san a wani. (Leisi Yakobus 4:7.) Yehovah, Yesus nanga den bun engel e horibaka gi wi. Den e yepi wi fu kakafutu gi a feanti fu wi. Toku wi musu kisi piki tapu dri prenspari aksi: O furu makti Satan abi? Fa a e pruberi fu kori sma? San a no man du? Meki wi go luku san na a piki tapu den aksi disi èn san wi kan leri fu den.

5, 6. Fu san ede libisma regering no man gi sma ala san den abi fanowdu?

⁵ Bun furu engel teki a sei fu Satan di a opo ensrefi teige Gado. Fosi a Frudu, Satan kori son engel fu abi seks nanga umasma na grontapu. Bijbel e sori taki disi tru, fu di a e agersi Satan nanga wan bigi kaiman di srepi wan di fu dri pisi fu ala den stari puru na ini hemel (Gen. 6:1-4; Yud. 6; Openb. 12:3, 4). Di den stari noso engel disi komoto na ini na osofamiri fu Gado, dan Satan tron den basi. Den engel disi di e du ogri, orga bun. Satan e pruberi fu du neleki Gado. Dati meki a seti en eigi kownukondre tu pe en na kownu. A orga den ogri yeye èn a gi den makti fu tiri a grontapu disi, aladi wi no man si den.​—Ef. 6:12.

⁶ Satan e gebroiki na organisâsi fu en fu tiri ala den libisma regering na grontapu. Wi sabi disi fu di a ben sori Yesus „ala den kownukondre fu heri grontapu”. Baka dati a taigi en: „Mi o gi yu ala a makti nanga a glori fu den kownukondre disi, bika den na fu mi èn mi kan gi den na suma mi wani” (Luk. 4:5, 6). Aladi den tiriman fu grontapu de na ondro a makti fu Satan, toku furu tiriman e pruberi fu du bun gi den sma di den e tiri èn den wani yepi den. Ma nowan libisma regering man gi libisma ala san den abi fanowdu.​—Ps. 146:3, 4; Openb. 12:12.

7. Fa Satan e gebroiki falsi kerki nanga den bisnis fu a grontapu disi? (Luku a prenki na a bigin fu na artikel.)

⁷ Satan nanga den ogri yeye e gebroiki  falsi kerki nanga den bisnis fu grontapu fu kori „sma na heri grontapu” tu (Openb. 12:9). Satan e gebroiki den falsi kerki fu fruteri lei fu Yehovah. A e pruberi tu fu meki sma frigiti a nen fu Gado (Yer. 23:26, 27). A kisi bun furu sma. Den sma disi e denki taki na Gado den e anbegi, ma fu taki en leti na ogri yeye den e anbegi (1 Kor. 10:20; 2 Kor. 11:13-15). Satan e gebroiki den bisnis fu grontapu tu fu kori sma. Fu eksempre, a e kori den taki den kan de koloku soso te den abi furu moni nanga furu gudu (Odo 18:11). Den sma di e bribi a lei disi e dini „Gudu” na presi fu Gado (Mat. 6:24). Baka wan pisi ten, a lobi di den abi gi gudu e meki taki den no abi lobi gi Gado moro.​—Mat. 13:22; 1 Yoh. 2:15, 16.

8, 9. (a) San na tu sani di wi kan leri fu a sani di Adam, Eva nanga den ogri engel du? (b) Fu san ede a bun taki wi sabi o furu makti Satan abi?

⁸ A sani di Adam, Eva nanga den ogri engel du e leri wi tu prenspari sani. A fosi sani na taki tu sei nomo de èn wi musu luku sortuwan fu den wi o teki. Wi kan teki a sei fu Yehovah noso a sei fu Satan (Mat. 7:13). A di fu tu sani na taki den wan di teki a sei fu Satan e kisi wini fu wan pisi ten nomo. Fu eksempre, fu wan pisi ten Adam nanga Eva ben kan bosroiti gi densrefi san bun èn san no bun. Èn den ogri yeye kisi makti fu tiri libisma (Gen. 3:22). Ma aladi sma e kisi wini fu wan pisi ten te den teki Satan sei, toku ala ten den takru bakapisi moro furu.​—Yob 21:7-17; Gal. 6:7, 8.

⁹ Fu san ede a bun fu sabi o furu makti Satan abi? Disi e yepi wi fu si den libisma regering na a yoisti fasi èn a e gi wi a deki-ati fu du a preikiwroko. Wi e frustan taki Yehovah wani taki wi lespeki den tiriman (1 Petr. 2:17). Yehovah wani taki wi gi yesi na den wet fu den, solanga den no e aksi wi fu du wan sani di a no feni bun (Rom. 13:1-4). Ma wi sabi tu taki wi no musu bumui nanga politiek. Noiti wi musu feni taki wan politiek partèi noso wan tiriman bun moro wan trawan (Yoh. 17:15, 16; 18:36). Fu di wi sabi taki Satan wani gi Yehovah porinen, meki wi e du ala san wi man fu meki sma kon sabi fa Yehovah de trutru. Wi breiti fu tyari en nen èn fu gebroiki a nen fu en. Wi sabi taki nowan moni noso gudu man tyari so furu wini kon gi wi leki te wi lobi Yehovah.​—Yes. 43:10; 1 Tim. 6:6-10.

10-12. (a) Sortu beti Satan gebroiki fu kisi sonwan fu den engel? (b) San wi e leri fu a sani di miti den engel?

¹⁰ Satan sabi fa fu kori sma. Neleki fa fisiman sabi sortu beti den musu gebroiki fu fanga fisi, na so Satan sabi sortu beti a musu gebroiki fu kisi sma. Ma tra leisi baka a e dwengi sma fu du san a wani.

¹¹ Luku sortu beti Satan gebroiki fu kisi bun furu engel. Kande a luku den wan heri pisi ten fosi a kisi den fu teki en sei. A kisi wan tu engel fu abi seks nanga umasma. Den pikin di den engel disi kisi ben de bigiskin man di ben e du ogri nanga libisma (Gen. 6:1-4). Kande Satan ben pramisi den engel disi tu taki a ben o gi den makti fu tiri libisma. A kan taki a ben wani du wan sani fu sorgu taki a profeititori di e taki fu a „pikin fu na uma” no kon tru (Gen. 3:15). Ma Yehovah tyari a Frudu kon so taki den sani di Satan nanga den ogri engel ben abi na prakseri no pasa.

¹² San wi kan leri fu a tori disi? Noiti wi musu denki taki Satan no o man kisi wi fu du hurudu noso taki wi no man abi heimemre. Den engel di Satan kisi, ben de makandra nanga Gado na hemel omeni dusundusun yari. Ma toku den meki taki takru lostu gro na ini den ati. Wi musu hori na prakseri tu taki awinsi wi e dini Yehovah omeni yari langa kaba, toku takru lostu kan gro na ini wi ati (1 Kor. 10:12). Dati meki a prenspari taki wi e tan ondrosuku wi ati. Efu wi si taki wi e prakseri sani di no bun noso taki wi kon abi heimemre, dan wi musu tyari kenki kon wantewante.​—Gal. 5:26; leisi Kolosesma 3:5.

13. Sortu tra beti Satan e gebroiki èn fa wi kan sorgu taki a no kisi wi?

¹³ Satan sabi taki sma gridi fu kon sabi sani fu ogri yeye. Dati meki a e gebroiki a sani disi leki wan beti fu kisi sma. Nanga yepi fu falsi kerki, felem, poku nanga tra sani a e pruberi fu meki sma kon lobi sani di abi fu du nanga ogri yeye. Fa wi kan sorgu taki a no kisi wi nanga den sani disi? Wi no musu denki taki Yehovah organisâsi o gi wi wan lijst nanga den nen fu felem nanga poku di no bun. Ibriwan fu wi musu oefen wi konsensi fu man sabi san Gado feni bun (Hebr. 5:14). Efu wi lobi Gado „sondro fu hoigri”, dan wi o man teki koni bosroiti (Rom. 12:9). Wan sma di e hoigri e leri sma taki son sani no bun, ma ensrefi e du den sani dati. Sobun,  te wi o luku wan felem noso te wi o arki wan poku, wi musu aksi wisrefi: ’Mi e du san mi e leri trawan? San den Bijbelstudie noso tra sma ben o denki te den ben o si den sani di mi e luku noso e arki?’ Te wisrefi e du san wi e leri trawan, dan Satan no o man kisi wi makriki.​—1 Yoh. 3:18.

14. Fa Satan e pruberi fu dwengi wi fu du san a wani, ma fa wi kan kakafutu gi en?

¹⁴ Boiti taki Satan e gebroiki beti fu kisi wi, a wani dwengi wi tu fu trangayesi Yehovah. Fu eksempre, son leisi a e meki lanti tapu a preikiwroko. Noso a e meki sma na wroko noso na skoro spotu wi fu di wi e du san Bijbel e taki (1 Petr. 4:4). Satan kan meki tu taki famiri fu wi di lobi wi e tapu wi fu go na den konmakandra (Mat. 10:36). San o yepi wi fu kakafutu gi Satan? Wi no musu skreki taki den sani disi e miti wi. Wi de na ini wan feti nanga Satan (Openb. 2:10; 12:17). Wi musu hori na prakseri tu fu san ede Satan e du den sani disi: A feni taki wi e dini Yehovah soso te sani e go bun èn taki wi o drai baka gi en te wi kisi hebi tesi (Yob 1:9-11; 2:4, 5). Boiti dati, wi musu aksi Yehovah fu gi wi krakti. Noiti Yehovah o gowe libi wi.​—Hebr. 13:5.

15. Satan man dwengi wi fu du wan sani di wi no wani? Fruklari dati.

¹⁵ Satan no man dwengi sma fu du wan sani di den no wani du (Yak. 1:14). Furu sma na ini a grontapu disi no sabi taki den e du san Satan wani. Ma te den kon sabi den tru leri fu Bijbel, dan den musu bosroiti efu den o teki a sei fu Yehovah noso a sei fu Satan (Tori 3:17; 17:30). Efu wi bosroiti fu du a wani fu Gado, Satan no o man du noti fu meki wi trangayesi Gado.​—Yob 2:3; 27:5.

16, 17. (a) Sortu tra sani Satan nanga den ogri yeye no man du? (b) Fu san ede wi no musu frede fu begi Yehovah nanga wan tranga sten?

¹⁶ Tra sani de tu di Satan nanga den ogri yeye no man du. Fu eksempre, na nowan presi na ini Bijbel wi e leisi taki den sabi san wi e prakseri èn san de na ini wi ati. Na Yehovah nanga Yesus wawan sabi dati (1 Sam. 16:7; Mark. 2:8). Ma wi musu frede taki te wi e taki noso te wi e begi nanga wan tranga sten, dan Satan nanga den ogri yeye o yere wi èn taki den o du wan sani fu gens wi? Nôno! Fu san ede? Prakseri a sani disi: Wi no e frede fu wroko gi Yehovah fu di Didibri man si wi. Na so a de tu taki wi no abi fu frede fu begi tranga soso fu di Didibri kan yere wi. Bijbel abi furu eksempre fu futuboi fu Gado di ben begi nanga wan tranga sten. Nowan presi wi e leisi taki den ben frede taki Didibri ben o yere den (1 Kow. 8:22, 23; Yoh. 11:41, 42; Tori 4:23, 24). Efu wi e sorgu taki den sani di wi e taki èn den sani di wi e du e kruderi nanga a wani fu Gado, dan wi kan de seiker taki noiti Yehovah o gi pasi taki Didibri du wan sani di kan tapu wi fu kisi têgo libi.​—Leisi Psalm 34:7.

¹⁷ A bun taki wi sabi suma na wi feanti, ma wi no abi fu frede en. Awinsi wi na sondusma, toku nanga a krakti fu Yehovah wi kan wini Satan (1 Yoh. 2:14). Efu wi kakafutu gi en, a o lowe gowe fu wi (Yak. 4:7; 1 Petr. 5:9). Ma na ini a ten disi Satan e pruberi fu kisi spesrutu den yonguwan. San den kan du fu kakafutu gi Didibri? Na ini a tra artikel wi o luku na aksi disi.