1. Jeová fó sai informasaun saida kona-ba ita-nia inimigu husi jardín Eden?

ADÃO hatene samea la bele koʼalia. Tan neʼe bainhira samea ida koʼalia ba Eva, karik Adão hanoin kedas katak espíritu ida mak koʼalia ba Eva. (Gênesis [Kejadian] 3:1-6) Adão no Eva la hatene espíritu neʼe mak sé. Maski nuneʼe, Adão hili atu apoia nia no kontra ninia Aman iha lalehan neʼebé hadomi nia. (1 Timóteo 2:14) Iha tempu neʼe kedas Jeová komesa fó sai informasaun kona-ba inimigu laran-aat neʼebé bosok Adão no Eva no promete katak ikusmai nia sei halakon inimigu neʼe. Maibé Jeová mós fó avizu katak, antes espíritu neʼe halakon tiha, espíritu neʼe sei kontra hasoru kriatura hotu neʼebé hatudu domin ba Maromak.​—Gênesis (Kejadian) 3:15.

2, 3. Karik tanba razaun saida mak Jeová ladún fó sai informasaun barak kona-ba Satanás antes Mesias mosu mai?

² Kona-ba anju neʼebé kontra Jeová, Jeová nunka fó sai ninia naran. * Liutiha tinan 2.500 husi buat neʼebé akontese iha Eden mak Jeová foin fó sai informasaun  kona-ba anju neʼe. (Jó [Ayub] 1:6) Ninia títulu mak “Satanás”, signifika “Kontradór”. Husi Eskritura Lia-Ebraiku nian, Primeiru Crônicas, Jó, no Zacarias deʼit mak temi kona-ba Satanás. Tanbasá mak antes Mesias mosu mai, Bíblia ladún fó sai informasaun barak kona-ba inimigu neʼe?

³ Eskritura Lia-Ebraiku nia objetivu mak atu ajuda ema buka-hatene Mesias hodi tuir nia, tan neʼe eskritura sira-neʼe ladún fó sai informasaun barak kona-ba Satanás no saida mak Satanás halo. (Lucas 24:44; Galásia 3:24) Bainhira Mesias mosu tiha mak Jeová uza Mesias no ninia dixípulu sira hodi fó sai informasaun barak kona-ba Satanás no kona-ba anju sira neʼebé tuir Satanás. * Jeová halo hanesan neʼe tanba nia sei uza Jesus no ema sira neʼebé ukun hamutuk ho Jesus atu harahun Satanás ho sira neʼebé tuir Satanás.​—Roma 16:20; Apokalipse 17:14; 20:10.

4. Tanbasá mak ita la presiza taʼuk ba Diabu?

⁴ Apóstolu Pedro esplika katak Diabu Satanás mak hanesan “leaun ida neʼebé hasai lian makaʼas” no João bolu nia “samea” no “samea boot”. (1 Pedro 5:8; Apokalipse 12:9) Maibé ita la presiza taʼuk ba Diabu. Ninia forsa iha limite. (Lee Tiago 4:7.) Ita hetan protesaun husi Jeová, Jesus, no anju laran-metin sira. Ho sira-nia ajuda, ita bele kontra hasoru ita-nia inimigu. Maski nuneʼe, ita presiza buka-hatene resposta ba pergunta importante tolu: Satanás iha kbiit atu halo saida deʼit? Nia koko atu lasu ema iha dalan saida deʼit? Buat saida deʼit mak nia la iha kbiit atu halo? Mai ita koʼalia kona-ba pergunta sira-neʼe no haree toʼok ita bele aprende lisaun saida deʼit.

5, 6. Tanbasá mak ema nia governu la bele lori mudansa neʼebé loloos ba ema?

⁵ Anju barak apoia Satanás hodi kontra Maromak. Antes Rai-Nabeen akontese iha Noé nia tempu, Satanás lasu anju balu hodi halo relasaun seksuál ho feto sira iha rai. Bíblia uza símbolu hodi esplika buat neʼebé akontese iha tempu neʼebá hodi dehan katak, samea boot monu husi lalehan no dada fitun sorin balu hamutuk ho nia. (Gênesis [Kejadian] 6:1-4; Judas 6; Apokalipse 12:3, 4) Bainhira anju sira-neʼe sai husi Maromak nia umakain, sira husik Satanás kontrola sira. Ohin loron Satanás mak kontrola daudauk anju la laran-metin sira-neʼe. Sira mós organiza an iha dalan neʼebé la runguranga. Satanás inventa tuir Maromak nia Ukun hodi harii governu ida ba ninia an. Nia halo ninia an sai liurai, organiza anju aat sira, fó kbiit ba sira, no foti sira sai naʼi-ulun ba mundu tomak.​—Éfeso 6:12.

⁶ Satanás uza ninia organizasaun neʼe hodi kontrola ema hotu nia governu sira. Ita hatene kona-ba neʼe tanba Satanás hatudu “mundu nia ukun hotu” ba Jesus, no dehan: “Haʼu sei fó ba ó kbiit husi ukun sira-neʼe hotu no sira-nia glória, tanba buat sira-neʼe fó tiha ona mai haʼu, no haʼu bele fó ba ida neʼebé haʼu hakarak.” (Lucas 4:5, 6) Maski nuneʼe, governu barak koko atu halo buat neʼebé diʼak ba sira-nia sidadaun, no naʼi-ulun balu iha hakarak neʼebé diʼak atu ajuda povu sira. Maibé la iha naʼi-ulun ida mak bele lori mudansa neʼebé loloos ba ema.​—Salmo (Mazmur) 146:3, 4; Apokalipse 12:12.

7. Satanás uza relijiaun falsu no sistema ekonomia iha mundu neʼe atu halo saida deʼit? (Haree dezeñu iha leten)

⁷ Satanás ho anju aat sira mós uza relijiaun falsu no sistema ekonomia iha  mundu neʼe hodi lohi “mundu tomak”, ka ema hotu. (Apokalipse 12:9) Satanás uza relijiaun falsu hodi habelar lia-bosok kona-ba Jeová, no nia mós koko atu subar Maromak nia naran. (Jeremias [Yeremia] 23:26, 27) Rezultadu mak ema barak hanoin katak sira adora Maromak, maibé tuir loloos sira adora hela anju aat sira. (1 Korinto 10:20; 2 Korinto 11:13-15) Satanás mós uza sistema ekonomia iha mundu neʼe hodi habelar ninia bosok, hanesan lia-bosok katak osan ka rikusoin bele halo ema moris kontente. (Provérbios [Amsal] 18:11) Ema neʼebé fiar lia-bosok neʼe uza sira-nia moris tomak hodi adora “Rikusoin” duké adora Maromak. (Mateus 6:24) Maski ema sira-neʼe uluk hadomi Maromak, maibé domin ba rikusoin sai makaʼas tebes toʼo lakon sira-nia domin ba Maromak.​—Mateus 13:22; 1 João 2:15, 16.

8, 9. (a) Ita bele aprende lisaun rua saida husi buat neʼebé Adão, Eva, no anju la laran-metin sira halo? (b) Tanbasá diʼak ba ita atu hatene katak Satanás mak kontrola daudauk mundu neʼe?

⁸ Ita bele aprende lisaun importante rua husi buat neʼebé Adão, Eva, no anju la laran-metin sira halo. Primeiru, ita iha opsaun rua deʼit no ita tenkesér hili ida. Ita hili atu apoia Jeová ka apoia Satanás. (Mateus 7:13) Segundu, ema neʼebé tuir Satanás bele hetan benefísiu uitoan deʼit. Adão no Eva hetan duni oportunidade atu deside ba sira-nia an kona-ba saida mak loos no sala. Anju sira mós hetan kbiit atu kontrola ema nia governu sira. (Gênesis [Kejadian] 3:22) Maibé hili hodi apoia Satanás sempre lori rezultadu neʼebé aat.​—Jó (Ayub) 21:7-17; Galásia 6:7, 8.

⁹ Tanbasá diʼak ba ita atu hatene katak Satanás mak kontrola daudauk mundu neʼe? Neʼe ajuda ita atu bele iha hanoin neʼebé loos kona-ba governu sira no book ita atu haklaken liafuan diʼak. Ita hatene katak Jeová hakarak ita hatudu respeitu ba governu sira. (1 Pedro 2:17) Nia hakarak ita halo tuir governu nia lei sira, naran katak lei sira-neʼe la kontra Maromak nia matadalan. (Roma 13:1-4) Maibé ita mós hatene katak ita tenkesér neutrál no la bele apoia partidu polítiku ka naʼi-ulun ruma. (João 17:15, 16; 18:36) Satanás koko makaʼas atu subar Jeová nia naran no hafoʼer naran neʼe, tan neʼe ita hakarak hakaʼas an atu hanorin lia-loos kona-ba Maromak ba ema seluk. Ita sente orgullu tebes hodi lori Jeová nia naran no uza naran neʼe. Sin, domin ba Maromak iha folin-boot liu fali domin ba osan ka sasán.​—Isaías (Yesaya) 43:10; 1 Timóteo 6:6-10.

10-12. (a) Karik iha dalan saida mak Satanás uza ninia iska hodi tenta anju sira? (b) Ita aprende saida husi buat neʼebé akontese ba anju sira-neʼe?

¹⁰ Satanás uza dalan oioin hodi lasu ema. Porezemplu, nia uza iska hodi lasu ema atu  halo buat neʼebé tuir ninia hakarak. Nia mós koko atu halo taʼuk ema hodi sira halo tuir ninia hakarak.

¹¹ Uluk Satanás uza iska hodi tenta anju barak. Karik nia estuda didiʼak sira ida-idak nia hahalok ba tempu kleur hodi hatene saida mak bele tenta sira. Anju balu han iska neʼe hodi halo relasaun seksuál ho feto sira iha rai. Sira-nia oan mak hanesan jigante neʼebé halo violénsia hodi kontrola ema seluk. (Gênesis [Kejadian] 6:1-4) Satanás la uza deʼit hahalok seksuál hodi tenta anju sira-neʼe, karik nia mós halo promete ba sira katak, sira bele domina ema hotu. Karik liuhusi dalan neʼe mak Satanás koko atu hanetik Jeová nia planu atu sai loos kona-ba lori ‘feto nia bei-oan’. (Gênesis [Kejadian] 3:15) Maibé Jeová la husik nia atu hetan susesu. Nia hamosu Rai-Nabeen hodi estraga Satanás no anju aat sira-nia planu hotu.

¹² Ita aprende saida husi istória neʼe? Hahalok la morál no foti-an mak iska neʼebé perigu tebes. Anju sira neʼebé tuir Satanás, uluk hamutuk ho Maromak iha lalehan ba tinan barak tebes! Maski nuneʼe, sira barak husik hakarak neʼebé sala sai makaʼas no buras iha sira-nia laran. Ita tenke hanoin-hetan beibeik katak, maski ita serbí Jeová ba tempu kleur, hakarak neʼebé aat bele nafatin sai buras iha ita-nia laran. (1 Korinto 10:12) Tan neʼe mak ita tenke analiza beibeik ita-nia laran hodi hasai tiha hanoin neʼebé la morál no hamate hahalok foti-an!​—Galásia 5:26; lee Koloso 3:5.

13. Iska ida tan neʼebé Satanás uza mak saida, no oinsá mak ita bele hasees an husi lasu neʼe?

¹³ Iska ida tan neʼebé Satanás uza mak buka-hatene kona-ba espiritizmu. Ohin loron, Satanás koko book ema atu hatudu interese ba buat neʼebé iha ligasaun ho anju aat sira liuhusi relijiaun falsu no mós atividade halimar nian. Filme, games, programa média oioin halo espiritizmu sai hanesan buat neʼebé jeitu. Oinsá mak ita bele hasees an husi espiritizmu? Tuir loloos, ita hatene katak Maromak nia organizasaun la halo lista kona-ba atividade halimar nian neʼebé diʼak no aat. Ita tenke treinu ita-nia konxiénsia hodi ita bele halo desizaun diʼak neʼebé tuir Jeová nia prinsípiu sira. (Ebreu 5:14) Se ita hatudu domin la ho laran-makerek ba Maromak, ita sei halo desizaun neʼebé matenek. (Roma 12:9) Ema neʼebé laran-makerek koʼalia buat ida maibé halo fali buat seluk. Tan neʼe, bainhira atu hili atividade halimar nian, husu ba ita-nia an: ‘Atividade neʼebé haʼu hili hatudu katak haʼu laran-makerek ka lae? Se haʼu-nia estudante Bíblia ka vizita fali haree kona-ba atividade halimar nian neʼebé haʼu hili, sira sei hanoin katak haʼu hanorin buat ida maibé halo fali buat seluk ka lae?’ Se ita mak halo tuir prinsípiu sira neʼebé ita haklaken ba ema seluk, neʼe sei ajuda ita  atu hasees an husi Satanás nia lasu sira.​—1 João 3:18.

14. Karik Satanás koko halo taʼuk ita iha dalan saida deʼit, no oinsá mak ita bele tahan?

¹⁴ Satanás mós koko halo taʼuk ita hodi ita la laran-metin tan ba Jeová. Porezemplu, karik nia bele fó influénsia ba governu hodi bandu ita-nia serbisu haklaken. Nia bele book ita-nia kolega serbisu ka eskola atu goza ita tanba ita halo tuir Bíblia nia morál sira. (1 Pedro 4:4) Satanás mós bele book ita-nia família neʼebé la adora Jeová hodi uza razaun ho hakarak neʼebé diʼak atu hanetik ita hodi la tuir reuniaun sira. (Mateus 10:36) Oinsá mak ita bele tahan? Primeiru, ita la presiza hakfodak kona-ba dalan neʼebé Satanás ataka ita, tanba ita hatene katak nia halo daudauk funu hasoru ita. (Apokalipse 2:10; 12:17) Segundu, ita mós presiza hanoin-hetan liafuan neʼebé Satanás hasaʼe. Nia dehan katak ita serbí Jeová durante tempu neʼebé fasil deʼit, maibé ita sei husik Jeová se ita hasoru situasaun susar. (Jó [Ayub] 1:9-11; 2:4, 5) Terseiru, ita tenke husu beibeik Jeová atu fó forsa ba ita atu tahan. Keta haluha katak Jeová sei nunka husik hela ita.​—Ebreu 13:5.

15. Satanás bele obriga ita atu halo buat neʼebé ita lakohi halo ka lae? Esplika toʼok.

¹⁵ Satanás la bele obriga ema atu halo buat neʼebé sira lakohi atu halo. (Tiago 1:14) Ema barak iha mundu neʼe la hatene katak sira apoia Satanás. Maibé, kuandu ema ida aprende kona-ba lia-loos, nia tenke deside rasik atu apoia Jeová ka apoia Satanás. (Apóstolu 3:17; 17:30) Se ita hakaʼas an nafatin atu halo tuir Maromak, Satanás la bele sobu ita-nia laran-metin.​—Jó (Ayub) 2:3; 27:5.

16, 17. (a) Saida tan mak Satanás no anju aat sira la iha kbiit atu halo? (b) Tanbasá mak ita la presiza taʼuk atu halo orasaun ho lian ba Jeová?

¹⁶ Iha tan buat balu ne’ebé Satanás ho anju aat sira la bele halo. Porezemplu, Bíblia nunka hatete katak sira bele haree ita-nia laran ka hatene saida mak ita hanoin. Só Jeová no Jesus deʼit mak iha kbiit atu halo hanesan neʼe. (1 Samuel 16:7; Marcos 2:8) Maibé, se ita halo orasaun ho lian ba Jeová, ita presiza taʼuk tanba Diabu no ninia anju aat sira bele rona ita ka lae? Resposta mak lae. Tanbasá? Tanba maski Diabu bele haree ita, maibé ita la taʼuk atu halo buat neʼebé diʼak iha Jeová nia serbisu. Tan neʼe, ita mós la presiza taʼuk atu halo orasaun ho lian ba Jeová tan deʼit Diabu bele rona ita. No Bíblia mós temi dala barak kona-ba Maromak nia atan sira neʼebé halo orasaun ho lian, no eskritura nunka hatete katak ema sira-neʼe taʼuk tanba Diabu bele rona sira. (1 Reis [Raja-Raja] 8:22, 23; João 11:41, 42; Apóstolu 4:23, 24) Se ita mak hakaʼas an hodi koʼalia no halo tuir Maromak nia hakarak, ita bele fiar katak Jeová sei nunka husik Diabu atu lori perigu permanente ba ita.​—Lee Salmo (Mazmur) 34:7. *

¹⁷ Ita presiza hatene kona-ba ita-nia inimigu, maibé ita la presiza taʼuk ba nia. Maski ita ema la perfeitu, maibé ho Jeová nia apoiu ita bele manán hasoru Satanás! (1 João 2:14) Se ita mak kontra hasoru nia, nia sei halai husi ita. (Tiago 4:7; 1 Pedro 5:9) Ohin loron, ita bele haree katak Satanás hakaʼas an duni atu ataka joven sira. Se nuneʼe, oinsá mak sira bele hamriik metin hodi hasoru Diabu nia ataka sira? Ita sei koʼalia kona-ba neʼe iha lisaun tuirmai.