1. Jehova wakaambaanzi atala asinkondoma mumuunda waEdeni?

ADAMU wakalizi kuti nzoka tayaambuuli pe. Zilakonzeka kuti wakayeeyela kuti kuli chimwi chilenge chamuuya chakaambuula aEva kachibelesya nzoka. (Matl. 3:1-6) Adamu aEva taakwe nzibakazi atala achilenge eechi. Nikuba boobo, Adamu wakasala kutaswiilila Wisi wakujulu akutobela chilenge eechi nchaakatazi kuti atachiti kuyanda kwaLeza. (1 Tim. 2:14) Mpawo, Jehova wakaambilizya atala asinkondonyina wakeena Adamu aEva akuti chilenge eechi chibi, chakali kuyoonyonyoonwa. Alubo Jehova wakachenjezya kuti chilenge eechi chakaambuula kachibelesya nzoka chakali kuzoopenzya bantu bayanda Leza.​—Matl. 3:15.

2, 3. Nkamboonzi nikwakaambwa makani mache atala aSaatani, Mesiya katanaboneka?

² Jehova taakalyaamba pe zina lyamungelo wakamupapila. * Alubo Leza taakwe naakalipandulula zina lyasinkondonyina, kusikila nikwakiinda  minyaka iili 2 500 kuzwa naakapapila. (Job. 1:6) Mabbuku aachiHebbrayo aatatu aswaanizya 1 Makani, Jobu, aZekariya ngawo aamba zina lyakuti Saatani lyaamba “Sikukazya.” Nkamboonzi nikwakaambwa makani mache aali atala asinkondoma Mesiya katanaboneka?

³ Jehova taakwe naakapandulula zyiingi atala aSaatani muMagwalo aachiHebbrayo nkaambo taakali kuyanda kuti Saatani abe ampuwo. Makanze aaMagwalo aachiHebbrayo akali aakuti Jehova aambilizye atala aMesiya akuti bantu bamuzibe. (Lk. 24:44; Gal. 3:24) Zintu eezi nizyakazuzikizigwa aMesiya naakaboneka, Jehova wakabelesya Mesiya abasikwiiya bakwe kuyubununa Saatani abangelo bakamutobela. * Eezi zileelela nkaambo Jehova uyoobelesya Jesu amaKristu bananikidwe mbayooyendelezyaabo kuti banyonyoone Saatani abamutobela.​—Rom. 16:20; Ciy. 17:14; 20:10.

4. Nkamboonzi nituteelede kumuyoowa zyiindilide Dyabbulosi?

⁴ Mwaapostolo Petro wakaamba kuti Saatani Dyabbulosi uli mbuuli “syuumbwa wabutambo” mpawo Johane wakamupandulula kuti ‘nguSimwaaba’ akuti “muzoka.” (1 Pet. 5:8; Ciy. 12:9) Pesi tatweelede kumuyoowa zyiindilide Dyabbulosi nkaambo manguzu aakwe kuli mpaagolela. (Bala Jakobo 4:7.) Tugwasigwa aJehova, Jesu abangelo basyomeka. Tulakonzya kumuzunda Saatani kwiinda mukugwasigwa ambabo. Nikuba boobo, tweelede kuziba nsandulo zyamibuzyo iitatu iitobela: Nziizili nzila Saatani nzyabelesya kweena bantu? Saatani waabelesya biyeni manguzu aakwe kuti ayene bantu? Alubo nziizili zintu Saatani nzyatakonzyi kuchita? Twanoosandula mibuzyo eeyi, tuyoobona zyiiyo nzitujana.

5, 6. Nkamboonzi mfulumende zyabantu nizitakonzyi kugwasya bantu munzila iimaninide?

⁵ Imwi nkamu yabangelo yakatobela Saatani mukupapila Leza. Kalitanaba Zambangulwe, Saatani wakeena bamwi bangelo kuti bachite bwaamu abana basimbi. Bbayibbele lilakatondeezya kasimpe aaka nilikozyanisya simwaaba kali kukwelelezya chipanzi chatatu chanyenyeezi zyakujulu. (Matl. 6:1-4; Jud. 6; Ciy. 12:3, 4) Bangelo aaba nibakaleka kuliswaanizya ampuli yaLeza, bakasala kweendelezegwa aSaatani. Basikupapila aaba, teenkamu yakuchita zibi luzutu. Saatani wakapanga bwaami buli mbuuli Bwaami bwaLeza alubo mwaami wabwaami oobo. Mubusena butaboneki, Saatani wakapa kuti madimoni abe amfulumende akuti ayendelezye munyika.​—Ef. 6:12.

⁶ Saatani weendelezya mfulumende zyoonse zili munyika kabelesya mbunga yakwe yamadimoni. Kaambo aaka kakaba antanganana Saatani naakatondeezya Jesu “zisi zyoonse zyaansi” akwaamba kuti: ‘Ndakupa bwami obu boonse abulemu bwazyo, nkaambo ndabupegwa, eno kufumbwa ngweyanda inga ndamupa mbubo.’ (Lk. 4:5, 6) Mfulumende zyiingi zileezya kugwasya bantu nikuba kuti zyeendelezegwa aSaatani. Alubo bamwi beendelezi, baleezya kugwasya bantu. Nikuba kuti beendelezi aaba beezya biyeni, tabakonzyi pe kugwasya bantu munzila iimaninide.​—Int. 146:3, 4; Ciy. 12:12.

7. Saatani ubeena biyeni bantu kabelesya mfulumende, bukombi bwakubeja azyabbizinesi? (Langa chifanikisyo chili kumatalikilo achiiyo.)

⁷ Saatani amadimoni aakwe tababelesyi mfulumende luzutu, pesi babelesya  bukombi bwakubeja azyabbizinesi kuti ‘beene bantu boonse baansi.’ (Ciy. 12:9) Saatani waamba makani aakubeja atala aJehova kabelesya bukombi bwakubeja. Alubo Dyabbulosi ulikubeleka changuzu kuti ayene bantu kuchitila kuti balube zina lyaLeza. (Jer. 23:26, 27) Eezi zipa kuti bantu bayeeya kuti babonaanga bakomba Leza, bataboni kuti balikukomba madimoni. (1 Kor. 10:20; 2 Kor. 11:13-15) Alubo, Saatani waamba makani aakubeja kabelesya zyabbizinesi. Muchikozyano, bazyabbizinesi baamba kuti, kuba amali nyingi abunoti nzizyo zipa kuti bantu babotelwe. (Tus. 18:11) Bantu basyoma makani aaya, bakomba ‘lubono’ kutali Leza. (Mt. 6:24) Mukuya kwachiindi kuyandisya bunoti kulakonzya kupa kuti bakachilwe kukomba Leza munzila iilikabotu.​—Mt. 13:22; 1 Joh. 2:15, 16.

8, 9. (a) Nziizili zyiiyo zibili nzitwiiya kuzwa kukupapila kwakachitwa aAdamu, Eva abangelo babi? (b) Kutugwasya biyeni kuziba nzila Saatani nzyabelesya kweena bantu?

⁸ Tulakonzya kwiiya zyiiyo zibili kuzwa kukupapila kwakachitwa aAdamu, Eva abangelo babi. Chakusaanguna, kuli mabazu aabili luzutu nkinkaako, tweelede kusala kuba kulubazu nkutuyanda. Tulakonzya kusala kukkala katusyomekede kuli Jehova naakuti kusala kweendelezegwa aSaatani. (Mt. 7:13) Chabili, kubotelwa kwabantu basala kweendelezegwa aSaatani nkwachiindi chifwiifwi. Adamu aEva bakapegwa mweenya wakulisalila kuchita zintu zibotu naakuti zibi alubo madimoni akajana manguzu akweendelezya mfulumende zyabantu. (Matl. 3:22) Pesi, kusala kweendelezegwa aSaatani takweeti kubotelwa kwachoonzyo pe. Pesi kupa kuti bantu kabali mumapenzi.​—Job. 21:7-17; Gal. 6:7, 8.

⁹ Kutugwasya biyeni kuziba nzila Saatani nzyabelesya kweena bantu? Kutugwasya kuti tube amaboneno aalikabotu atala abalupati-pati bamfulumende akuti tusungwaale mumulimu wakukambawuka. Alubo twiiya kuti Jehova uyanda kuti tulemeke balupati–pati bamfulumende. (1 Pet. 2:17) Jehova uyanda kuti tuswiilile milawu iibikkidwe amfulumende kuti kiitakazyanyi amalayilile aakwe. (Rom. 13:1-4) Pesi tatweelede kutola lubazu mutwaambo twanyika nikuba kuba kulubazu lwakamwi kabunga kayanda kweendelezya naakuti kumuntu uuyanda kweendelezya. (Joh. 17:15, 16; 18:36) Kuziba Saatani mbalikusampawula zina lyaJehova, kupa kuti tuzumanane kuyiisya bantu kasimpe atala Leza. Tulabotelwa kwiitwa azina lyaJehova akulibelesya nkaambo tulizi kuti zilongezyo nzitujana nzyiingi kwiinda kuba amali naakuti bunoti.​—Is. 43:10; 1 Tim. 6:6-10.

10-12. (a) Saatani wakabubelesya biyeni bulisyo kuti ayene bamwi bangelo? (b) Kutuyiisyaanzi kweenwa kwabangelo biingi?

¹⁰ Saatani ubelesya nzila zyabuchenjezu kuti ayene bantu. Muchikozyano, ubelesya bulisyo koongelezya bantu kuti bachite nzyayanda. Alubo Saatani ulabayoosezya bantu kuti bazumine kweendelezegwa anguwe.

¹¹ Atulange-lange Saatani mbaakazwidilila kabelesya bulisyo mbwaakabelesya nakeena nkamu yabangelo. Kulakonzeka kuti wakalipa chiindi chakubona zintu nzibakali kuyandisya mpawo eezi zyakapa kuti zimuubile kubeena. Bamwi bangelo nibakachegwa mukakole kakwe, bakachita bwaamu abana basimbi alubo eezi zyakapa kuti bazyale bana bakali amanguzu. (Matl. 6:1-4) Kuyungizya mukweena bangelo aabo kuti bachite bwaamu abantu, amwi Saatani wakabasyomezya kuti wakali kuyoobapa manguzu aakweendelezya bantu. Zilakonzeka kuti makanze aakwe akali aakunyongania kusika ‘kwalunyungu lwamwanakazi’ lwakasyomezedwe. (Matl. 3:15) Pesi Jehova wakapa kuti makanze aaSaatani amadimoni aakwe atazwidilili kwiinda mukweeta Zambangulwe.

¹² Twiiyaanzi kuzintu eezi zyakachitika? Tutayeeyi kuti tatukonzyi kuzundwa akakole kakuchita bwaamu naakuti kuliyanda. Bangelo bakaba kulubazu lwaSaatani bakali kubeleka kuchuuno chaLeza kwaminyaka myiingi. Nikuba kuti bakali kubusena busumpukide, biingi bakaba amizeezo mibi akwiilekela kuti ikomene. Zilakonzeka kuti bamwi Bakamboni baba aminyaka myiingi kabali mumbunga. Nikuba kuti tuyiisigwa zintu zisalala pesi tulakonzya kuba amizeezo iitali kabotu. (1 Kor. 10:12) Nkinkaako tweelede kulilanga-langa mumoyo, tutantamuke mizeezo iitali kabotu akuti tutalisumpuli!​—Gal. 5:26; bala BaKolose 3:5.

13. Mbuubuli bumwi bulisyo Saatani mbwabelesya kweena bantu alubo kujana twabutantamuka biyeni?

¹³ Bumwi bulisyo Saatani mbwabelesya kuti ayene bantu, nkuyanda kuziba zyamasalamusi. Mazubaano, ubelesya zyakulikondelezya zilaamichito yachidimoni kutali bukombi bwakubeja luzutu. Mamuuvi amagemu aamumafooni amumakkompiyuta atondeezya kuti zintu zyamasalamusi zilikabotu. Kujana twakatantamuka biyeni kakole aaka? Tatweelede kulangilila kuti mbunga yaLeza itubuzye zyakulikondelezya zyoonse zilikabotu azitali kabotu. Umwi awumwi wesu weelede kuyiisya manjezeezya aakwe kuti ayendelane azyeelelo zyaLeza. (Heb. 5:14) Kubelesya malayilile akaambwa amwaapostolo Pawulu  aakuti luyando lwesu kuli Leza “lutabi lwakuupaupa ameso,” kuyootugwasya kuti tusale chabusongo. (Rom. 12:9) Tulakonzya kulibuzya kuti: ‘Zyakulikondelezya nzindisala zipa kuti bantu babonaanga ndiwupa-wupa ameso na? Kuti bantu mbindiiyaabo Bbayibbele babona zyakulikondelezya nzindiyandisya, balabona na kuti ndipona kweendelana azintu nzindibayiisya?’ Kuti zintu nzituchita anzitwaambuula kazyeendelana akuyanda kwaLeza, tatukachegwi mutukole twaSaatani.​—1 Joh. 3:18.

14. Saatani utuyoosezya biyeni alubo kujana twachita biyeni kuti tuzunde?

¹⁴ Kuyungizya mukubelesya bulisyo, Saatani ulatuyoosezya kuti tutasyomeki kuli Jehova. Muchikozyano, ulakonzya kupa kuti mfulumende zikasye mulimu wesu wakukambawuka. Ulakonzya kupa kuti bantu mbitubelekaabo naakuti mbitwiiyaabo batuseke nkaambo tupona kweendelana azyeelelo zyakulilemeka zizwa muBbayibbele. (1 Pet. 4:4) Alubo, ulakonzya kubelesya bamumpuli kuti batukasye kunjila miswaangano yachiKristu. (Mt. 10:36) Muzyiimo zili boobu, kujana twachita biyeni? Chakusaanguna, tweelede kuzilangilila zintu eezi nkaambo Saatani ulikutulwana. (Ciy. 2:10; 12:17) Alubo tweelede kuziba kaambo kayandikana, kakuti Saatani waamba kuti tukomba Jehova chiindi zintu nizilikutweendela kabotu. Waamba kuti tulakonzya kuleka kukomba Leza kuti twanjila mumasunko. (Job. 1:9-11; 2:4, 5) Chamamanino, tweelede kusyoma Jehova kuti tulisimye. Takatulekelezyi pe.​—Heb. 13:5.

15. Saatani ulakonzya na tusungilizya kuchita zintu nzitutayandi? Pandulula.

¹⁵ Saatani takonzyi kusungilizya bantu kuti bachite zintu nzibatayandi. (Jak. 1:14) Bamwi bantu bachita zintu nzyayanda Saatani, akaambo kakutaziba. Pesi chiindi bantu nibayiya kasimpe, balalisalila ngubayanda kukomba. (Inc. 3:17; 17:30) Kuti twasala kukomba Leza, Saatani takonzyi kupa kuti tutasyomeki kuli Leza.​—Job. 2:3; 27:5.

16, 17. (a) Nziizili zimwi zintu Saatani amadimoni nzibatakonzyi kuchita? (b) Nkamboonzi nituteelede kuyoowa kubbusya majwi chiindi nitukomba?

¹⁶ Kuli zimwi zintu Saatani amadimoni nzibatakonzyi kuchita. Muchikozyano, muBbayibbele taakwe alembedwe kuti balakonzya kuziba zintu muntu nzyayeeya azili mumoyo wakwe. Jehova aJesu mbabo abalikke bakonzya kuziziba. (1 Sam. 16:7; Mk. 2:8) Tweelede kuyoowa na kubbusya majwi chiindi nitukomba? Tweelede kuyoowa na kuti Dyabbulosi amadimoni aakwe balakonzya kusinkila nkombyo zyesu? Peepe. Nkamboonzi nituteelede kuyoowa? Tatuleki kuchita zintu zibotezya Jehova katuyoowa kuti Dyabbulosi ulakonzya kutubona. Nkinkaako, tatweelede kuyoowa kukombela ajulu katuyeeya kuti Dyabbulosi ulatumvwa. MuBbayibbele, kuli zikozyano zyabakombi baLeza bakali kukombela ajulu pesi taakwe alembedwe kuti bakali kuyoowa, kabayeeya kuti Dyabbulosi ulabamvwa. (1 Bam. 8:22, 23; Joh. 11:41, 42; Inc. 4:23, 24) Kuti nzitwaambuula anzituchita kazyeendelana akuyanda kwaLeza, zilapa kuti tube achoonzyo chakuti Jehova takazumizyi Dyabbulosi kuti atunyonganie.​—Bala Intembauzyo 34:7.

¹⁷ Tweelede kumuziba sinkondoma pesi tatweelede kumuyoowa pe. Kwiinda mukugwasigwa aJehova tulakonzya kumuzunda Saatani nikuba kuti tatumaninide. (1 Joh. 2:14) Saatani uyootuchija kuti twamukazya. (Jak. 4:7; 1 Pet. 5:9) Saatani uyandisya bachikula kuti abache. Niinzi chikonzya kubagwasya kuti bamuzunde? Muchiiyo chitobela tuyoolanga-langa mubuzyo ooyu.