1. მუ ინფორმაცია გაცხად იეჰოვაქ ჩქინ ნტერიშ გურშენ ედემიშ ბაღის?

ადამს არჩქვენუდ, ნამდა გვერეფს რაგად ვეშულებნა. ათეშენ, თიქ შილებე ქიმეხვადკო, ნამდა ევას გვერიშ საშვალებათ სულიერ პიროვნებაქ დურაგადუ (დაბ. 3:1—6). მარა თინეფს მუთუნ ვა უჩქუდეს თე ქმნილებაშ გურშენ. თეშ უმკუჯინუო, ადამქ ისხუნუ ოჭიშ ქურთინუაფუდკო ღორონთშა დო ქუდაჸუნკო თიშნერ პიროვნებას, მიდგას ვეჩინენდჷ (1 ტიმ. 2:14). იეჰოვაქ ხეთეშე გაცხად ინფორმაცია თე სულიერ ქმნილებაშ გურშენ, ნამუთიქ ადამ დო ევა მიოჩილითუ დო პირობა დოდვჷ, ნამდა საბოლათ თის ბოლოს მუღენდჷ. მარა მუჭოთ ღორონთიქ თქუნ, თე ანგელოზ გარკვეულ დროშ დინახალე ღორონთიშ ხალხიშ წინააღმდეგ მიდეშ (დაბ. 3:15).

2, 3. მუშენ ვა რდუ მოშინაფილ ბრელ დეტალ სატანაშ გურშენ მესიაშ მულაშახ?

² იეჰოვაქ სიბრძნე გეგმირჩქინ დო ვა გუცხადებ თი ანგელოზიშ სახელ, ნამუთიქ თიშ წინააღმდეგ იდჷ. * თე შემთხვევაშ მოხვალამაშე 2 500 წანაშ უკულ ღორონთიქ გაცხად მუ სახელით მიშინუანდჷ თე ანგელოზის (იობ. 1:6). ფაქტ რე, ნამდა სახელი სატანა, ნამუთ „მოწინააღმდეგეს“ ნიშნენსინ, ებრაულ წერილეფიშ ხვალე სუმ  წიგნის რე მოშინაფილ. თე წიგნეფ რე: 1 მატიანე, იობი დო ზაქარია. მუშენ გინოჭყვიდ იეჰოვაქ, ნამდა მესიაშ მულაშახ სატანაშ გურშენ ბრელ მუთუნ ვა გუცხადებუდკო?

³ იეჰოვას ვაკოდ, ნამდა ებრაულ წერილეფს სატანაშ გურშენ ბრელ დეტალ რდუკო მოშინაფილ. მუშენდა თე წერილეფიშ მიზან რდუ, ხალხის ქუგუგებუდკო მი რდუ მესია დო მიაჸუნკო თის (ლუკ. 24:44; გალ. 3:24). მუჟამსით მესიაქ ქუმორთუნ, იეჰოვაქ თინა დო თიშ მოწაფეეფ გეგმირინუ, ნამდა სატანაშ დო მუშ დემონეფიშ გურშენ გუცხადებუდკო თი ირფელ, მუთ ამდღა მიჩქნა. * თენა ვა რე გასაკვირ, მუშენდა ღორონთ იესოშ დო თიშ ცხებულ ჯიმალეფიშ ხეთ მოსპუნს სატანას დო თიშ მიმაჸუნალეფს (რომ. 16:20; გამოცხ. 17:14; 20:10).

4. მუშენ ოკო ვა მოშკურდან ეშმაკშა ზედმეტო?

⁴ მოციქულ პეტრე სატანას ეთმოჭარუნს მუჭოთ „მაღირთალ ლომს“ დო მოციქულ იოანე თის „გვერო“ დო „დრაკონო“ მიშინუანს (1 პეტ. 5:8; გამოცხ. 12:9). მარა ზედმეტო ოკო ვა მოშკურდან ეშმაკშა, მუშენდა თიშ ძალას საზღვარ უღჷ (წეკითხით იაკობი 4:7). * ჩქი ხუც მიკინენა იეჰოვა, იესო დო ართგურ ანგელოზეფ. თინეფიშ მოხვარათ შემლებნა გივორჯგინათ ჩქინ ნტერს. მარა საჭირო რე მიბღათ პასუხ სუმ კითხვაშე: მუშმადიდა ძალაუფლება უღჷ სატანას? მუჭო ოცად თინა თითოულ კოჩიშ შეცდომაშა მიშაჸონაფას? დო მუშ კეთება ვეშულებ ეშმაკის? თე კითხვეფწკუმა ართო თის ხოლო ქიგებგენთ მუშ გურაფა შემლებნა თე ირფელშე.

5, 6. მუშენ ვეშიალებე ნამთინ მთავრობას თიცალ ცვლილებეფიშ კეთება, ნამუთ კაცობრიობას არძაშ უმოსო ოსაჭირ?

⁵ სატანაშ მხარე ბრელ ანგელოზიქ დეკინ, მუჟამსით თიქ იეჰოვაშ წინააღმდეგ მიდართ. წარღვნაშახ, სატანაქ მუსხირენ ანგელოზ მიოჩილითუ დო თინეფქ ოსურკოჩეფწკუმა სქესობრივ კავშირ ქიდეკინეს. ბიბლიას თე მოვლენა სიმბოლურო რე ეჭარილ. თექ ჩიება მეურს, ნამდა დრაკონქ, ნამუთიქ ცაშე გითანთხუნ, მურიცხეფიშ ნასმორ ხოლო გექთარღვჷ (დაბ. 6:1—4; იუდ. 6; გამოცხ. 12:3, 4). მუჟამსით თე ანგელოზეფქ ღორონთიშ ოჯახ ქიდიტესინ, თინეფ უკვე სატანაშ კონტროლიშ თუდო რდეს. იეჰოვაშ თე მოწინააღმდეგეეფ ორგანიზებულო მოქმედენა. სატანაქ მუშ მართველობა ღორონთიშ სამეფოს ქიმუგურუ დო დუდ დემონეფიშ მეფეთ გეგმაცხად. ეშმაკიქ თინეფს ძალაუფლება ქიმეჩ დო ქვეყნიერებაშ სამეფოეფიშ მართველო ქიგიორინუ (ეფეს. 6:12).

⁶ სატანა მუშ ორგანიზაციაშ საშვალებათ აკონტროლენს ამდღარ მთავრობეფს. თექ არგამათ გეგმორჩქინდ, მუჟამსით თიქ იესოს ქაძირუ მსოფლიოშ არძა სამეფო დო უწუ: „მთელ ძალაუფლებას დო თინეფიშ დიდებას სი მერჩანქ, მუშენდა ჩქიმდა რე მოჩამილ დო მიდგას მოკონ თის ვარზენქ“ (ლუკ. 4:5, 6). სატანაშ გლახა გავლენაშ უმკუჯინუო მთავრობეფ იშენით მუდგარენ ჯგირს ორთნა ხალხშო. ნამთინე მართველს შილებე, დასურო ოკოდას ხალხშო ჯგირობუა, მარა ვართ თინეფს დო ვართ ნამთინ მთავრობას ვეშიალებე თიცალ ცვლილებეფიშ კეთება, ნამუთ კაცობრიობას არძაშ უმოსო ოსაჭირ (ფსალმ. 146:3, 4; გამოცხ. 12:12).

7. მუჭო გიმირინუანს ეშმაკი ტყურა რელიგიას დო კომერციულ სისტემას? (ქოძირით სურათ 22-ა გვერდის).

⁷ სატანა დო დემონეფ მთავრობეფწკუმა ართო, ტყურა რელიგიას დო კომერციულ სისტემას გიმირნუანა, ნამდა მთელ მსოფლიო შეცდომაშა გემშეჸონან (გამოცხ. 12:9). ტყურა რელიგიაშ საშვალებათ, სატანა იეჰოვაშ გურშენ არასწორ ინფორმაციას ავრცელენს. თეს გეძინელ, ეშმაკიშ მიზან რე მუთ შილებე მეტ ხალხის გაჭყოლიდუას ღორონთიშ სახელ  (იერ. 23:26, 27). შედეგო, თინეფ, მიდგას ღორონთიშ მსახურება შურ დო გურით ოკონ, შეცდომაშა რენა მიშაჸონაფილ დო დემონეფს ომსახურნა (1 კორ. 10:20; 2 კორ. 11:13—15). ტყურა გავრცელასინ, სატანა კომერციულ სისტემას ხოლო გიმირინუანს. მაგალთო, თე სისტემაშ საშვალებათ, თინა ხალხის ოგურუანს, ნამდა ბედნერებაშო ფარა დო ბრელ ქონება რე საჭირო (იგავ. 18:11). თინეფ, მიდგას თე ტყურაშ ჯერან, მთელ ცხოვრებას ღორონთიშ მანგიორო ქონებას ომსახურნა (მათ. 6:24). შილებე თე კათას ართ დროს ღორონთ უჸორდესკო, მარა ფარაშ ჸოროფაქ გეგნოფორ ღორონთიშ ჸოროფა (მათ. 13:22; 1 იოან. 2:15, 16).

8, 9. ა) მუ ჟირ გაკვეთილიშ გურაფა შემლებნა ადამიშ, ევაშ დო დემონეფიშ მაგალითშე? ბ) მუ ჯგირობუას მომღანა თიშ გაგება, მუშმადიდა ძალაუფლება უღჷ სატანას?

⁸ ადამიშ, ევაშ დო დემონეფიშ მაგალითშე ჟირ მნიშვნელოვან გაკვეთილიშ გურაფა შემლებნა. პირველ, ხვალე ჟირ შარა არსებენს დო თინეფ შკას არჩევან ოკო ვაკეთათ: ვარდა იეჰოვაშ მხარე ოკო გიშაბგორათ, ვარდა სატანაშ (მათ. 7:13). მაჟია, სატანაშ მხარეს დეკინენსინ თინეფ, ხვალე დროებით მიღენა ჯგირობუას. ადამ დო ევას ქიმიაჩეს საშვალებაქ, ნამდა მუნეფიშით დუდგინეფდესკო ჯგირ დო ფურ. დემონეფს ძალაუფლებაქ ქიმიაჩეს, ნამდა აკონტროლან ამდღარ მთავრობეფ (დაბ. 3:22). მარა სატანაშ მხარეშ გერინას, ირიათო გლახა შედეგეფ მოჸუნს დო ვართ ხოლო ნამდვილ ჯგირობუა (იობ. 21:7—17; გალ. 6:7, 8).

⁹ მუ ჯგირობუას მომღანა თიშ გაგება, მუშმადიდა ძალაუფლება უღჷ სატანას? თეშ რჩქინა მიმეხვარებნა, სწორაშე ვუჯინათ ქვეყნიურ მთავრობეფს დო მონაწილება მიბღათ სახიოლო ამბეშ გავრცელებას. ჩქი მიჩქუნა, ნამდა იეჰოვას ოკო მთავრობეფს პატი ფცათ (1 პეტ. 2:17). თინა მელჷ ჩქინდე, ნამდა დეფცვენთ თინეფიშ კანონეფს, მუჟამსით თე კანონეფ ვაწინააღმდეგ ღორონთიშ პრინციპეფს (რომ. 13:1—4). ჩქი თინა ხოლო მარჩქილენა, ნამდა ნეიტრალურეფ ოკო ვორდათ დო დღას ვედეპკინათ ნამთინ პოლიტიკურ პარტიაშ ვარდა ლიდერიშ მხარე (იოან. 17:15, 16; 18:36). ჩქი ვორწყეთ, ნამდა სატანა ოცად დუფულას ხალხის იეჰოვაშ სახელ დო გილულუას თის რეპუტაცია, ათეშენ უმოსო მიღნა თიშ სურვილ, ქუგვოგებაფუათ შხვეფს ჭეშმარიტება ღორონთიშ გურშენ. ჩქი მოამაყნა, ნამდა იეჰოვაშ სახელ გებძნა დო გიმიბრინუანთ თის. ღორონთიშ ჸოროფა ბრელით ძვირფას რე ვინემ ფარაშ ვარდა შხვა მუთუნიშ ჸოროფა (ეს. 43:10; 1 ტიმ. 6:6—10).

10—12. ა) მუჭო მიოჩილითუ სატანაქ ანგელოზეფ? ბ) მუს ბგურაფლენთ თი ანგელოზეფიშ მაგალითშე, მიდგაქ სატანაშ მხარე დეკინ?

¹⁰ სატანა შხვეფიშ შეცდომაშა მიშაჸონაფალო ეფექტურ მეთოდეფს გიმირინუანს. მაგალთო,  მინშა თინა შხვადოშხვა მახეთ ოცად ჩქინ შეცდომაშა მიშაჸონაფას დო მიშნა ხოლო შკურნაფაშ მეთოდის გიმირიუანს.

¹¹ დეფიფქრათ, მუჭო მიოჩილითუ სატანაქ ბრელ ანგელოზი ართ-ართ მახეშ გიმორნაფათ. თინა ალბეთ დიდხანს ოკვირუდ სულიერ ქმნილებეფს, ნამდა ქიგეგუკო, მუჭო შილებედ თინეფიშ შეცთომაშა მიშაჸონაფა. მუსხირენ ანგელოზიქ ქუმკაბუნ სატანაშ ანკესის დო სქესობრივ კავშირ დამყარეს ოსურკათაწკუმა. თინეფიშ სქუალეფ სასტიკო ოქცუდეს შხვეფს, მუშენდა უზომოთ ძალიერეფ რდეს (დაბ. 6:1—4). შილებე სატანაქ თე ორგულ ანგელოზეფს თინა ხოლო დეპირკო, ნამდა ძალაუფლება აღვენდეს მთელ კაცობრიობაწკუმა. თეგვარო, სატანა შილებე ოცადუდკო, ქეცილკო ღორონთიშ განზრახვაშ შესრულებას, ნამუთ დაპირებულ „განმნარყიშ“ მოულას ოხუდ (დაბ. 3:15). მუჭოდგა ვაჸოფედკო, იეჰოვაქ თიმ დროს ბოლო მოუღ სატანა დო დემონეფიშ ირნერ გეგმეფს, მუჟამსით დიდწყარალათ განადგურ კაცობრიობა.

¹² მუშ გურაფა შემლებნა თე შემთხვევაშე? უზნეობა დო სიამაყე სატანაშ ართ-ართ ეფექტურ მახე რე. თი ანგელოზეფ, მიდგაქ სატანაშ მხარე დეკინესინ, ართ დროს ღორონც ომსახურდეს. თეშ უმკუჯინუო, თინეფქ საშვალება ქიმეჩეს გლახა სურვილეფს, გევითარკო მუნეფიშ გურს. თეგვარო, ჩქი ხოლო შილებე წანეფ ვმსახურენდათ ღორონთიშ ორგანიზაციას, სოდეთ ჯგირ სულიერ გარემო რე, მარა იშენით გომრჩქინდან გლახა სურვილეფქ (1 კორ. 10:12). ათეშენ, მნიშვნელოვან რე, ირიათო შევამოწმათ ჩქინ გური დო დუდ ავარიდათ უზნეო ფიქრეფს დო სიამაყეს (გალ. 5:26; წეკითხით კოლოსელები 3:5). *

13. ხოლო მუ ეფექტურ საშვალებას გიმირინუანს სატანა დო მუჭო შემლებნა დუდ ავარიდათ თის?

¹³ სატანაშ ხოლო ართ ეფექტურ მახე ოკულტიზმ რე. თინა ოცად ხალხ დემონურ ძალათ დაინტერესას დო თეშო ხვალე ცრუ რელიგიას ვარინ, გართობაშ შხვადოშხვა საშვალებას ხოლო. კინოეფს, ელექტრონულ ლაჸაფეფს დო მედია საშვალებეფს სპირიტიზმი ჯგირო რე გიშაჸონაფილ. მუჭო შემლებნა დუდ ეუჩილითუათ სატანაშ თე მახეს. მუშო ოკო რაგად, ჩქი ოკო ვეველდათ, ნამდა ღორონთიშ ორგანიზაცია ქომჩანა თი გართობეფიშ სიას, ნამუთ მისაღებ რე ქრისტიანშო. არძაქ მუშ სინდისით ოკო იხემძღვანელას, ნამუთ ღორონთიშ პრინციპეფით რე გაწაფულ (ებრ. 5:14). ჩქი შემალებენა გონივრულ გადაწყვეტილებეფიშ მეღება, მუჟამსით ქიმვაჸუნუთ მოციქულ პავლეშ რჩევას დო გეგმიფრჩქინათ ღორონთიშ ნამდვილ ჸოროფას (რომ. 12:9). გართობაშ გიშაგორუაშ დროს ჩქინ დუც ოკო პკითხათ: ქიძირენო ჩქიმ არჩევანშე, ნამდა თი პრინციპეფს გიმიბრინუანქ, მუდგას შხვეფს ვოგურუანქ? ხომ ვეფიქრენა  თინეფ, მიდგას ბიბლიას ვოგურუანქ ვარდა მაჟიაშა მივაკითხანქ, ნამდა ართის იბჩიებუქ დო მაჟიას ვორთუქ? სატანაშ მახეეფს ადვილო მივერიებუთ, მუჟამსით გეგმიბრინუანთ თი პრინციპეფს, მუდგას შხვეფს ვოგურუანთ (1 იოან. 3:18).

14. მუჭო ოცად სატანა ჩქინ შკურნაფას დო მუჭო შემლებნა მივერუათ თეს?

¹⁴ სატანა ოცად დუმოშკურინუან, ნამდა დაფთმათ ღორონთიშ ართგურობა. მაგალთო, თინა მთავრობეფს გიმირინუანს, ნამდა ვამჩან ქადაქებაშ საშვალება. თიქ შილებე თანამშრომლეფ ვარდა კლასელეფ ხოლო გეგმირინუას, ნამდა ქიგმაძიცუან ბიბლიურ პრინციპეფს მეპჸუნთინ თიშენ (1 პეტ. 4:4). შილებე სატანაქ ჩქინ ოჯახიშ წევრეფწკუმა ხოლო ქიმოქმედას, ნამდა თინეფქ გურ გემიჸოთან კრებაშ შეხვალამეფშა გილულაშე (მათ. 10:36). მუჭო შემლებნა გივორჯგინათ თეცალ პრობლემეფს? პირველ რიგის, ვაგამკვირდან ოკო სატანაშ თეცალ მეთოდეფქ, მუშენდა თინა მობრძოლნა (გამოცხ. 2:10; 12:17). თეს გეძინელ, ვაგმოჭყორდან, ნამდა თე ირფელიშ უკახალე უმოს მნიშვნელოვან საკითხ გერე. სატანა აცხადენს, ნამდა ჩქი იეჰოვას ხვალე თიმწკუმა ვომსახურუთ, მუჟამსით ჯგირო მიღნა საქმე დო პრობლემეფიშ დროს მივოტალენთ თის (იობ. 1:9—11; 2:4, 5). დო ბოლოს, ჩქი იეჰოვას ოკო მივენდათ დო ბჯერდან, თინა ქომჩანა ძალას, მივერუათ თე პრობლემას. ირიათო ფშუდან, ნამდა თინა დღას ვემმოტენა (ებრ. 13:5).

15. ქეშულებნო სატანას გუმოკეთებაფუან თინა, მუდგაშ კეთება ვამოკონა?

¹⁵ სატანას ვეშულებ, გუმოკეთებაფუან თინა, მუდგაშ კეთება ვამოკონა (იაკ. 1:14). ამდღა ბრელს აზრო ვამალე, ნამდა სატანაშ მხარეს გერე. მარა ჭეშმარიტებაშ გაგებაშ უკულ, არძას შეულებ გინოჭყვიდას, მის ემსახურას (საქ. 3:17; 17:30). ღორონთიშ მსახურება გინოჭყვიდილ ქუმაფნან-და, სატანას ვეშიალებე მეცილან თეშ კეთებას (იობ. 2:3; 27:5).

16, 17. ა) მუშ კეთება ვეშულებნა სატანაშ დო თიშ დემონეფს? ბ) მუშენ ოკო ვამოშკურდან ხონარმაღალო ლოცვაშა?

¹⁶ ხოლო რე თიცალ მუდგარენეფ, მუდგაშ კეთება ვეშულებნა სატანა დო თიშ დემონეფს. მაგალთო, ბიბლიას სოთინ ვა ჭარ, ნამდა თინეფს შეულებნა წეკითხან ჩქინ აზრეფ; თენა ხვალე იეჰოვას დო იესოს შეულებ (1 სამ. 16:7; მარ. 2:8). მარა მუშ რაგად შილებე ხონარმაღალო რაგად ვარდა ლოცვაშე? მოშკურდანიო ოკო, ნამდა სატანა დო დემონეფ ქიგეგენა ჩქინ ლოცვეფს დო ქიმეცილებნა? მუშო ოკო რაგად, ვარ. მორთ, დეფიფქრათ, ჩქი ვა მოშკურნა, ვაკეთათ ჯგირ საქმეეფი დო ვემსახურათ ღორონც, თიშ უმკუჯინუო, ნამდა შილებე სატანა მორწყედან. თეგვარო, ვართ თიშა ოკო მოშკურდან, იბლოცათ ხონარმაღალო, თიშ უმკუჯინუო, ნამდა შილებე სატანა მირჩქილედან. ბიბლიას ბრელ მაგალით რე მოჩამილ, მუჟამსით ღორონთიშ მსახურეფ ხონარმაღალო ლოცულენდეს. თინეფშე სოთინ ვა ჭარ, ნამდა ოშკურდეს, მუნეფიშ ლოცვას სატანა ქიმირჩქილუანდჷ (1 მეფ. 8:22, 23; იოან. 11:41, 42; საქ. 4:23, 24). მუჟამსით სიტყვათ დო საქმეთ ღორონთიშ ნებას ვასრულენთინ, შემლებნა დარწმუნებულ ვორდათ, ნამდა იეჰოვა ვადუშვენს, სატანაქ თიცალ პრობლემას ქეშმოხვამლუან, ნამუთ ხანგძლივ ზიანს მომღანდეს (წეკითხით ფსალმუნი 34:7). *

¹⁷ ჩქი ჯგირო ოკო იფჩინენდათ ჩქინ ნტერს, მარა ვამღუნა თიშ მიზეზ, მანგარო მოშკურდან თიშა. იეჰოვაშ მოხვარათ, არასრულყოფილ კათას ხოლო შეულებ გიორჯგინას სატანას (1 იოან. 2:14). მუჟამსით ვადვაჸუნუთინ, თინა დუც დუმანებენა (იაკ. 4:7; 1 პეტ. 5:9). სატანა განსაკუთრებულო ახალგაზრდეფს გეუხე. მუშ კეთება შეულებნა თინეფს, ნამდა ქეწინააღმდეგან თის? თე კითხვაშ პასუხის თეშ უკულიან სტატიას გუვარჩიენთ.