清楚認識你嘅仇敵
“我哋唔係唔知道［撒但］嘅陰謀”——哥林多後書2:11
1．喺伊甸園，耶和華透露咗邊啲同我哋仇敵有關嘅事？
亞當一定知道蛇係唔識講話嘅。佢可能推測到，通過蛇向夏娃講話嘅其實係一個靈體。（創世記3:1-6）雖然亞當同夏娃對呢個靈體一無所知，但係亞當仲係選擇同呢個陌生靈體一齊背叛仁愛嘅天父。（提摩太前書2:14）耶和華隨即透露更多同呢個邪惡靈體有關嘅信息，預告呢個仇敵最終會被毁滅。耶和華亦都預先發出警告話，呢個通過蛇講話嘅靈體喺一段時期内會攻擊所有愛耶和華嘅人。（創世記3:15）
2,3．點解喺彌賽亞嚟到之前聖經好少提及撒但？
2 耶和華從來都冇話俾人知呢個靈體叫咩名。 *反叛事件發生2500幾年之後，耶和華先至提到呢個仇敵係邊個。（約伯記1:6）呢個仇敵被稱為“撒但”，意思係“敵對者”。喺希伯來語經卷，只有歷代志上、約伯記同撒迦利亞書提到呢個稱謂。點解喺彌賽亞嚟到之前聖經好少談及呢個仇敵？
3 顯然，耶和華唔想人過度關注撒但，所以喺希伯來語經卷冇用太多篇幅討論同撒但有關嘅事。耶和華向人啟示希伯來語經卷嘅主要目的係，幫助佢嘅子民認出並歸向彌賽亞。（路加福音24:44；加拉太書3:24）目的達成之後，耶和華就通過耶穌同佢嘅門徒透露更多關於撒但同邪靈嘅事。 *噉樣做好適當，因為耶和華會運用耶穌同受膏基督徒去毁滅撒但及其跟從者。（羅馬書16:20；啟示錄17:14;20:10）
4．點解我哋唔需要過度害怕撒但？
4 使徒彼得將魔鬼撒但描述為“咆哮嘅獅子”，而約翰就稱佢為“蛇”或者“大龍”。（彼得前書5:8；啟示錄12:9）不過，魔鬼嘅力量其實係有限嘅，我哋唔需要過度害怕。（請讀雅各書4:7）耶和華、耶穌同好多忠心嘅天使會支持我哋。有佢哋嘅幫助，我哋就能够抵抗呢個邪惡嘅仇敵。我哋亦都需要知道三個重要問題嘅答案：撒但嘅影響有幾大？佢試圖點樣影響人？邊啲事係佢做唔到嘅？我哋一邊討論呢啲問題，一邊諗吓從中可以學到乜嘢。
撒但嘅影響有幾大？
5,6．點解世上嘅政府唔能够從根本上解決人類嘅問題？
5 好多天使都加入撒但嘅反叛陣營。大洪水之前，撒但誘使一部分天使同人間女子發生違反自然嘅性行為。聖經象徵性噉描述，大龍被掟落地上嗰陣拖住天上三分之一嘅星辰一齊落去。（創世記6:1-4；猶大書6；啟示錄12:3,4）呢啲天使離開上帝嘅大家庭之後，就成為撒但嘅手下。唔好以為呢啲反叛天使只係一班烏合之衆。撒但模仿上帝嘅王國建立一個政府並自立為王，佢仲喺人睇唔見嘅靈界將邪靈組織起嚟，俾佢哋統治世界嘅權力。（以弗所書6:12）
6 撒但通過佢嘅靈體組織控制所有人間政府。撒但向耶穌展示“天下萬國”嗰陣所講嘅話表明咗呢一點。撒但話：“呢一切權柄同榮耀，我都要俾你，因為呢個係交咗俾我嘅，我想俾邊個就俾邊個。”（路加福音4:5,6）雖然呢個世界深受撒但影響，但好多政府仲係想造益人民，而一啲統治者亦都真心想幫助人。不過，世上冇任何政府或者統治者有能力從根本上解決人類嘅問題。（詩篇146:3,4；啟示錄12:12）
7．除咗世上嘅政府，撒但仲點樣利用錯誤宗教同商業制度誤導人類？（請睇吓課文開頭嘅圖片）
7 撒但同邪靈唔單止利用世上嘅政府，亦都利用錯誤宗教同商業制度嚟誤導“普天下嘅人”。（啟示錄12:9）撒但通過錯誤宗教詆毁耶和華，並想方設法使人唔知道上帝嘅名。（耶利米書23:26,27）結果，好多心地正直嘅人都上當受騙，佢哋以為自己崇拜上帝，但其實崇拜嘅係邪靈。（哥林多前書10:20；哥林多後書11:13-15）撒但亦通過商業制度散播謊言。例如，呢個世界經常鼓吹，只有追求金錢同擁有大量財富先可以得到快樂。（箴言18:11）相信呢個謊言嘅人會為“財富”賣命，而唔會事奉上帝。（馬太福音6:24）最終，佢哋對財富嘅愛會扼殺對上帝嘅愛。（馬太福音13:22；約翰一書2:15,16）
8,9．（甲）我哋可以從亞當、夏娃同埋反叛上帝嘅天使嘅事例學到乜嘢？（乙）知道撒但嘅影響力對我哋有乜嘢幫助？
8 我哋從亞當、夏娃以及反叛上帝嘅天使嘅事例至少學到兩個要點。第一，我哋只有兩個選擇，唔係忠於耶和華，就係跟從撒但。（馬太福音7:13）第二，加入撒但陣營嘅人得到嘅益處非常有限。亞當同夏娃可以自行制定善惡標準，而邪靈可以控制人類政府。（創世記3:22）不過，支持撒但要付出嘅代價永遠超過所得到嘅好處。（約伯記21:7-17；加拉太書6:7,8）
9 知道撒但嘅影響力對我哋有乜嘢幫助？噉樣可以使我哋對世上嘅政府有平衡嘅睇法，亦都激勵我哋向人傳講好信息。我哋知道，耶和華要我哋尊重世上嘅政府。（彼得前書2:17）只要冇違反上帝嘅標準，耶和華都希望我哋服從人間政府嘅法律。（羅馬書13:1-4）我哋亦都要保持中立，唔應該偏向任何政黨或者領導人。（約翰福音17:15,16;18:36）我哋睇見撒但試圖隱藏上帝嘅名，破壞耶和華嘅名聲，就覺得更有必要幫助人認識上帝嘅真理。我哋有幸成為耶和華名下嘅子民，而且可以使用呢個名嚟稱呼佢，真係感到非常自豪。愛耶和華比追求金錢或者其他事物更有價值。（以賽亞書43:10；提摩太前書6:6-10）
撒但點樣試圖影響人？
10-12．（甲）撒但用乜嘢引誘天使？（乙）我哋從天使反叛呢件事學到乜嘢？
10 撒但成功影響咗好多人。佢引誘人使人按照佢嘅方式行事，亦都通過威迫使人屈服。
11 撒但誘惑咗好多天使。為咗引誘其他天使加入反叛嘅行列，撒但一定用咗好長時間嚟觀察同研究佢哋。結果，一部分天使上鈎，同地上嘅女人發生不道德嘅性行為，而佢哋所生嘅後代都係殘忍嘅巨人，使地上充滿暴力。（創世記6:1-4）除咗不道德嘅性行為，撒但亦都可能向不忠嘅天使承諾，佢哋可以管轄人類。撒但嘅目的就係想阻止耶和華應許嘅“女人嘅後代”出現。（創世記3:15）無論點都好，耶和華通過大洪水終止咗撒但同邪靈嘅陰謀。
撒但試圖利用性不道德、高傲自大嘅態度同靈異事物引誘我哋上鈎（請睇第12、13段）
12 我哋從呢件事可以學到乜嘢？千祈唔好低估性不道德同高傲態度嘅危險性。嗰啲加入撒但陣營嘅天使，多年來一直喺耶和華面前供職。雖然身處喺咁好嘅環境，好多天使依然容許自己嘅私慾不斷滋長。同樣，我哋可能已經喺上帝地上嘅組織服務多年，喺呢個潔淨嘅屬靈環境中，不潔嘅慾望都可能會生根發芽。（哥林多前書10:12）我哋要不斷審察自己嘅内心，鏟除任何不道德嘅念頭同高傲嘅態度，噉樣做非常重要！（加拉太書5:26；請讀歌羅西書3:5）
13．撒但誘惑人嘅另一個方法係乜嘢？我哋可以點樣避免落入撒但嘅圈套？
13 撒但誘惑人嘅另一個方法係，利用人對靈異事物嘅好奇心。今日，佢通過錯誤宗教同埋娛樂行業使人對靈界産生興趣。電影、電子遊戲同各種媒體令人覺得通靈術好刺激。我哋點樣可以避免落入呢個圈套？我哋唔應該期望上帝嘅組織提供一份清單，列出邊啲娛樂可以接受，邊啲唔可以。我哋每個人都需要鍛鍊自己嘅良心，使良心同上帝嘅標準一致。（希伯來書5:14）不過，正如使徒保羅所講，如果我哋對上帝嘅愛毫無虛偽，就可以作出明智嘅選擇。（羅馬書12:9）我哋可以問吓自己：“我選擇嘅娛樂會唔會令人覺得我講一套做一套？如果我嘅聖經學生或者續訪對象睇到我選擇嘅娛樂，佢哋會唔會認為我真係實踐自己所教嘅？”我哋言行一致，就唔會咁容易落入撒但嘅圈套。（約翰一書3:18）
撒但試圖通過政府禁制、同輩壓力同家人反對令我哋屈服（請睇第14段）
14．撒但可能會點樣威迫我哋？我哋可以點樣應付？
14 另一方面，撒但試圖通過威迫使我哋唔再忠於耶和華。例如，喺撒但嘅影響下，政府禁制我哋嘅傳道工作，同學或者同事嘲笑我哋按照聖經道德標準嚟生活。（彼得前書4:4）撒但亦都可能會通過出於善意嘅家人勸阻我哋參加聚會。（馬太福音10:36）我哋可以點樣應付？首先，我哋要做好心理準備，知道撒但會直接攻擊我哋，因為我哋同撒但之間有一場戰爭。（啟示錄2:10;12:17）另外，我哋需要明白呢啲攻擊背後牽涉到一個重大嘅爭議——撒但聲稱，我哋只會喺順境嗰陣先至會事奉耶和華，一旦受到壓力就會背叛耶和華。（約伯記1:9-11;2:4,5）最後，我哋一定要倚靠耶和華，求佢賜力量俾我哋應付呢啲情況。要記住，佢永遠唔會離棄我哋。（希伯來書13:5）
邊啲事撒但做唔到？
15．撒但能唔能够强迫人做一啲佢哋唔想做嘅事？請解釋。
15 撒但唔能够强迫人做一啲佢哋唔想做嘅事。（雅各書1:14）世上好多人都唔知道自己所做嘅事其實正係迎合咗撒但嘅意思。一個人學習聖經真理之後，就要決定自己事奉耶和華抑或跟從撒但。（使徒行傳3:17;17:30）如果我哋決心遵行上帝嘅旨意，撒但就根本冇辦法破壞我哋嘅忠義。（約伯記2:3;27:5）
16,17．（甲）仲有邊啲事係撒但同邪靈做唔到嘅？（乙）點解我哋唔應該擔心開聲向耶和華禱告？
16 仲有一啲事係撒但同邪靈做唔到嘅。例如，聖經只係話耶和華同耶穌能够洞悉人内心嘅諗法，但係就冇提過撒但都有呢種能力。（撒母耳記上16:7；馬可福音2:8）不過，如果我哋開聲禱告或者講話又點呢？我哋應唔應該擔心魔鬼或者邪靈聽見我哋禱告嘅内容，並借此攻擊我哋？當然唔應該。我哋唔會因為怕魔鬼睇到我哋所做嘅，就唔敢為耶和華多做善工。同樣，我哋唔會因為擔心魔鬼聽到我哋所講嘅，就唔敢開聲禱告。聖經記載咗好多上帝忠僕大聲禱告嘅例子，但係冇提到佢哋擔心魔鬼聽到佢哋禱告嘅内容。（列王紀上8:22,23；約翰福音11:41,42；使徒行傳4:23,24）如果我哋盡最大努力喺言行方面按照耶和華嘅吩咐去做，我哋就可以確信，耶和華唔會容許魔鬼對我哋造成任何永久嘅傷害。（請讀詩篇34:7）
17 我哋要清楚認識我哋嘅仇敵，唔好俾佢吓倒。有耶和華嘅支持，即使唔完美嘅人都能够戰勝撒但。（約翰一書2:14）我哋反抗魔鬼，佢就會離開我哋逃跑。（雅各書4:7；彼得前書5:9）年輕人特别容易受到撒但攻擊。為咗能够喺信仰上站穩，抵抗魔鬼，佢哋可以具體做啲乜嘢？下一篇課文會討論呢個問題。
^ 2段 聖經提及到一啲天使嘅名。（士師記13:18；但以理書8:16；路加福音1:19；啟示錄12:7）既然上帝為每粒星都起咗名（詩篇147:4），噉佢所有靈體兒子，包括後來成為撒但嘅靈體，應該都有自己嘅名。
^ 3段 希伯來語經卷只有18次提到“撒但”呢個稱謂，而希臘語經卷就超過30次。
