YESU gba kaa ngɛ nyagbe ligbi nɛ ɔmɛ a mi ɔ, e se nyɛɛli ɔmɛ ma kpa ní babauu. (Mat. 9:37; 24:14) Mo susu bɔ nɛ gbami nɛ ɔ ba mi ha ngɛ blɔ nɛ sa kadimi nɔ ngɛ Transcarpathia kpokpa a nɔ ngɛ Ukraine ɔ he nɛ o hyɛ. Asafohi 50 kɛ fiɛɛli nɛ a he hiɛ pe 5,400 ngɛ ma etɛ komɛ a mi ngɛ kpokpa nɛ ɔ nɔ. * Ma nɛ ɔmɛ kɛ a sibi a he kɛ we. Ke a bla nihi nɛ a ngɛ ma etɛ nɛ ɔmɛ tsuo a mi ɔ a yibɔ, nɛ a hla nihi eywiɛ ɔ, a kpɛti nɔ kake ji Yehowa Odasefo no!

Kɛ ma a mi bi ɔmɛ peeɔ a ní ngɛ sɛ gbi ɔ he ha kɛɛ? Nyɛminyumu ko nɛ e je lejɛ ɔ nɛ a tsɛɛ lɛ ke Vasile ɔ de ke: “Nihi nɛ a ngɛ hiɛ ɔ ngɛ bumi kɛ ha Baiblo ɔ, a suɔ dami sane, kake peemi ngɛ a weku ɔmɛ a mi, nɛ a bɔɔ mɔde kaa a maa ye bua a sibi.” E de hu ke: “Tsa pi be fɛɛ be nɛ a kɛ wɔ kpaa gbi ngɛ wa tsɔɔmi ɔmɛ a he. Se ke o tsɔɔ mɛ nɔ́ ko ngɛ Baiblo ɔ mi ɔ, a buɔ tue saminya.”

Ngɛ zugba kpɔhi kaa kikɛ mi ɔ, nihi bɔɔ pɛ nɛ Odasefo no kake fiɛɛɔ ha. Enɛ ɔ ha nɛ a kɛ nyagba komɛ nɛ a ngɛ slɔɔto kpeɔ. Kaa nɔ hyɛmi nɔ́ ɔ, asafo ko ngɛ fiɛɛli 134, se wehi 50 pɛ lɛ ngɛ zugba kpɔ ɔ mi! Kɛ fiɛɛli ɔmɛ peeɔ kɛɛ ngɛ si fɔfɔɛ nɛ ɔ mi?

Nyɛmimɛ ɔmɛ a kpɛti nihi fuu ya fiɛɛɔ ngɛ hehi nɛ fiɛɛli fuu a he hia ngɛ. Nyɛminyumu Ionash, nɛ e ye jeha 90 ɔ de ke: “Ngɛ zugba kpɔ nɛ wa asafo ɔ fiɛɛɔ ngɛ mi ɔ mi ɔ, wehi enyɔ pɛ nɛ fiɛɛlɔ kake ma nyɛ maa fiɛɛ ngɛ mi. Amlɔ nɛ ɔ, i fiɛɛɔ ngɛ kɔpe ɔ mi ngɛ hiɛ ɔ. Se benɛ i ngɛ nɔmlɔ tso mi he wami ɔ, i hiaa blɔ maa pee si tomi 100 kɛ yaa zugba kpɔ ko nɛ a kɛ wui asafo ko dɛ ɔ mi, nɛ i ya fiɛɛɔ ngɛ Hungary gbi mi.” E he hia nɛ fiɛɛli ɔmɛ nɛ a ngɔ a he kɛ sã afɔle nɛ a ya ye bua ngɛ he kpahi. Nyɛminyumu Ionash de ke: “I teɔ si mɔtu ngmlɛ eywiɛ konɛ tlee ɔ ko je ye he, nɛ i fiɛɛɔ kɛ ya suɔ gbɔkuɛ ngmlɛ ekpa benɛ tlee ɔ ngɛ e se kpalee ɔ. I peeɔ jã si enyɔ aloo si etɛ daa otsi.” Anɛ e mɔde bɔmi ɔ wo yiblii lo? E de ke: “I ná bua jɔmi wawɛɛ kaa i ya fiɛɛ ngɛ he nɛ fiɛɛli fuu a he hia ngɛ. I ná he blɔ kɛ ye bua weku ko nɛ a tsɔ a he banee, nɛ a ba le anɔkuale ɔ.”

E ngɛ mi kaa pi fiɛɛli ɔmɛ tsuo nɛ a nyɛɔ hiaa blɔ kɛ ya tsitsaa nɛ a ya fiɛɛɔ mohu lɛɛ, se a ti nɔ fɛɛ nɔ nɛ nihi nɛ a wa ngɛ jeha mi po piɛɛ he ɔ bɔɔ mɔde kaa a ma tsu a zugba kpɔ ɔ mi ní saminya. Mɛni je a mɔde bɔmi ɔ mi kɛ ba? Benɛ a bla nihi nɛ a ya jeha 2017 Kaimi ɔ ngɛ ma etɛ nɛ ɔmɛ a mi ɔ a yibɔ ɔ, e piɛ bɔɔ nɛ mɛ tsuo a yibɔ ko su fiɛɛli ɔmɛ a yibɔ totoe enyɔ aloo nihi tsuo nɛ a ngɛ ma nɛ ɔmɛ a mi ɔ fã. Enɛ ɔ maa nɔ mi kaa, he fɛɛ he nɛ wa ngɛ sɔmɔe ngɛ ɔ, ní tsumi “babauu ngɛ” nɛ wa ma nyɛ ma tsu ngɛ “Nyɔmtsɛ ɔ ní tsumi ɔ mi.”​—1 Kor. 15:58.