PALIˈAYAWAY ci Yis, somowal itini toni salikoray a lintad, o sikawdan ningra o kakadofah ko mipanayan i noˈadingoan. (Matay 9:37; 24:14) Nengnengen ita misamaanay malaˈosi kora sowal ni Yis itini i Okeran no Cakapacekaya a pala. Itini i pala no Cakapacekaya, toloay ko mangangataay a niyaroˈ. Oniya tolo a niyaroˈ 50 ko kasakopang, 5400 ko kaˈaloman no mitosilay. * Sasepat no niyaroˈ a tamdaw cecayay ko Misawacayay Tamdaw ni Yihofa!

Malitemohay ko masamaanay tamdaw pitosilan hani? Ci Wasili o faˈinayan salikaka itira, sanay ko sowal: “O itiniay tamdaw mikangodoay to Fangcalay Cudad, moecelay ko falocoˈ, misakaretengay to paro no lomaˈ, hina padamaay to tamdaw. Soˈlin cowa ka pihayi to pihakelongan no mita, kawra ano sowalen to lihaf no Fangcalay Cudad i, misongilaˈay a mitengil cangra.”

Itini i ˈalomanay ko Misawacayay Tamdaw, mitosil i kilac maedeng iraay ko pasangar. Tinakoen, o cecay a kasakopang, 134 ko mitosilay a salikaka, ˈarawhan i kilac nangra 50 aca ko lalomaˈan. Sasamaan ko salikaka mitosil hani?

O ˈalomanay salikaka makalimay tayra i ra:ayay kilac a mitosil. Ci Lonas 90 ko mihecaan a matoˈasay faˈinayan salikaka, sowal ningra: “Itini i kilac no kasakopang niyam, tosa ko lalomaˈan cecayay ko mitosilay. Itiniay kako i niyaroˈ niyam a mitosil, nohatini tayraay kako i 160 kongli ko raay a awaay ko mitosilay a kilac, mitosil to sano Siyungyaliay ko sowal a tamdaw. To dafak 4 ko toki lomowadayto kako, tangasa to dadaya 6 ko toki ngaˈ, mikalic to kasoling a minokay. Soˈlin tatiihay ko tireng ako, kawra cecay lipay kina tosaay anca kina toloay kako a tayra.” Tayra i raayay kilac mitosil tada misaaliay to pikinafalah, mihaen to demak iraay ko epoc han? Saan ko sowal ningra: “Tayra mitosil, tada mahemekay kako, tada lipahakay kako pacekiw to cecay paro no lomaˈ minanam to Fangcalay Cudad.”

Soˈlin cowa ka mapolong ko salikaka, tayra i raayay kilac a mitosil, kawra o kahacecay a salikaka, mahaopay ko matoˈasay, misaˈicelay a misaheci a misawacay to kilac. Isaka 2017 miheca, oni tolo a naniyaroˈan, makalitosaay ko tamdaw, mirienangay to Piharatengan to Kapatay ni Yis a Saˈopo, ora mirienangay tosaay tingroh ko kaˈaloman to mitosilay salikaka. Ano icowato kilac kita a matayal, adihayayho ko ‘tayal no Tapang’ to dadademaken ita.​—1 Korinto 15:58.