E JESU tae ye otọ wẹẹ, erhuanegbe irẹn gha rhọ emwi okọ ne wọrhọ wọrhọ vbe ẹdẹ okiekie. (Mat 9:37; 24:14) Gia guan kaẹn vbene ẹmwẹ akhasẹ na ya mwẹ amusẹ hẹ vbe odin Transcarpathia, vbe otọ ẹvbo Ukraine. Etẹn ni gberra 5,400 vbe iko 50 ẹre ọ rre ẹvbo eha, ni rre odin Transcarpathia. * A gha ghae emwa ni rre ẹvbo eha na ye ihe enẹ, obọ ọkpa vbọ keghi re Osẹe Jehova.

De aro emwa ni rre ẹvbo eha na? Ọtẹn nokpia Vasile keghi kha wẹẹ: “Emwa ni rre ako ne ima na kporhu keghi ya aro nọ maan ghee Baibol, iran i gbe ewanmwẹ ghee obọ ọkpa, iran mwẹ akugbe vbuwe ẹgbẹe, iran vbe mwẹ ekhọe ne a ya ru iyobọ ne egbe. Iran ma yayi wẹẹ ima ẹre ọ mwẹ imamwaemwi ọghe ẹmwata sokpan iran gha bẹghe ẹre wẹẹ, ẹmwẹ ne ima taa rre Baibol, iran ghi gbe ehọ kotọ danmwehọ ima.”

Vbọrhirhighayehẹ, isievẹn ne etẹn na werriẹ aro daa ọre wẹẹ, ako ne iran na kporhu kherhe gbe. Vbe igiemwi, etẹn ni ya iyẹn wewe vbe iko ọkpa nọ rre odin Transcarpathia, keghi re 134 sokpan, owa ne emwa ye vbe ako ne iran na kporhu keghi re owa 50 kẹkan! De emwi ne etẹn na ghi ru?

Etẹn nibun vbe odin na keghi hia ne iran ya kporhu vbe ako ne a na gualọ iyobọ etẹn. Ọtẹn nokpia Ionash nọ rre ukpo 90 keghi kha wẹẹ: “A gha ghae owa hia ni rre ako ne ima na kporhu ne etẹn ni ya iyẹn wewe vbe iko ima, owa eveva ẹre ọ khian sẹ dọmwadẹ iran obọ. Igue ne I ye ẹre I na ghi mobọ kporhu nia, rhunmwuda egbe khian ọmaẹn nẹ. Ọ mwẹ ẹghẹ ne I ya gha kporhu vbe ehe ne etẹn rhọkpa i ye. Urhuẹvbo e Hungary ẹre a zẹ vbe evba kevbe wẹẹ, ọ sẹ ibiriki 100 ne ima la a ke sẹ evba. Ẹgogo enẹ vbe owiẹ ẹre I ya rhiọrre ne I mieke na miẹn okọ erhẹn laọ. I ghi kporhu ya sẹ ẹgogo ehan vbe ota I ke gha die owa. Ọ sẹ igbava ra igbaha ne I yo vbe uzọla.” Erriọ etẹn nibun ya gha sẹ emwi nibun rae ne iran mieke na sẹtin ya kporhu vbe ihe ọvbehe. Te ọtẹn nokpia Ionash ghi gbe ima rẹn ye iwinna esi na hia nọ ru ra? Hiehie! Ọ keghi kha wẹẹ: “Ọyẹnmwẹ nọ sẹ mwẹ nia i gia gie rhunmwuda ne I na sẹtin ru iyobọ ne ẹgbẹe ọkpa ya do rẹn odẹ ọghe ẹmwata vbe ehe ne iko rhọkpa i ye.”

Ọghe ne ẹmwata, ẹi re etẹn hia ni rre odin Transcarpathia ẹre ọ sẹtin ya gha kporhu vbe ehe nọ rree vbe. Sokpan, iwinna ikporhu ọghe iran hia, ya sẹ egbe eniwanrẹn ni rrọọ keghi da otọ ẹsẹse vbe ako ne iran na kporhu. Vbọ ghi kẹrikian? Vbe ukpo 2017, emwa ni rrie Ugie Ayere Ọghe Uwu E Kristi ọghe ẹvbo eha ni rre odin Transcarpathia keghi ye igbava bun sẹ etẹn ni ya iyẹn wewe. Ọni ọre wẹẹ, a gha ghae emwa hia ni rre odin Transcarpathia ye ihe eva, obọ ọkpa vbọ ẹre ọ rrie Ugie Ayere Ọghe Uwu E Kristi. Vbene ẹmwata, ehe ke ehe ne ima rhirhi gha ye, ma gha sẹtin rhiegba ye iwinna ikporhu iyẹn nọ maan.—1 Kọr 15:58.