JEEZAS mi prafesai dat ih falowaz wuda injai wahn frootful haavis joorin dis taim a di en. (Mach. 9:37; 24:14) Mek wi si how dehndeh werdz mi kohn chroo eena wahn speshal way eena wahn ayrya a Transcarpathia, Ukraine. Eena jos chree tong eena da ayrya, dehn ga 50 kangrigayshan ahn moa dan 5,400 poblishaz. * Soh, 1 owta evri 4 peepl a di hoal papyulayshan a dehndeh chree tong da wan a Jehoava Witnisiz!

How di peepl rispan tu di gud nyooz eena dis paat a di werl? Wahn brada fahn da ayrya, weh naym Vasile, seh: “Di peepl yasoh ga rispek fi di Baibl, dehn lov jostis, rispek famili, ahn dehn reeli chrai fi help owt wan anada. Dehn noh aalwayz agree wid wi bileef dehn. Bot wen wi shoa dehn sohnting fahn di Baibl, dehn lisn tu wi.”

Af koars, bradaz ahn sistaz weh liv weh lata Witnisiz deh fays sohn difrent chalenj eena di preechin werk. Fi egzampl, wan kangrigayshan ga 134 poblishaz bot dehn onli ga 50 hoam eena dehn teritori fi vizit! Weh di poblishaz du eena dis sichuwayshan?

Wahn lata di bradaz ahn sistaz goh preech eena ayryaz weh need help. Wahn brada, weh 90 yaaz oal, weh naym Ionash, seh: “Wen wi goh preech, evri poblisha wuda jos ga too hoam fi vizit kaaz soh moch Witnisiz liv eena di ayrya. Ai preech rait ya eena di vilij bikaaz laytli, Ah di deel wid sohn helt prablemz. Ah yoostu chravl bowt 100 mail tu wahn teritori weh neva asain tu wahn kangrigayshan. Di peepl weh liv deh taak di Hungarian langwij.” Wahn lata di bradaz ahn sistaz haftu mek sakrifais fi help owt eena ada teritiori. Brada Ionash seh: “Ah yoostu get op 4:00 da maanin fi kech wahn chrayn fi goh preech. Ah wuda stay eena di teritori til 6:00 da eevnin wen di chrayn di goh bak hoam. Ah mi du dis too er chree taim fi di week.” Yu tink wi brada mi feel dat ih mi wert it? Ih seh: “Da kaina minischri mi gi mi wahn lata jai. Ah mi eevn ga di privilij fi help wahn famili fahn da saym ayrya fi laan di chroot.”

Af koars, noh evribadi eena di kangrigayshan dehn fahn dis ayrya ku chravl faar. Bot evribadi, inkloodin di oalda poblisha dehn, chrai fi kova dehn hoam teritori chroo ahn chroo. Bikaaz a dat, eena 2017, di amonk a peepl weh mi gaahn da di Memoaryal fahn dehnya chree tong da-mi nayli too taimz di amonk a poblisha. Dis da bowt haaf a di hoal papyulayshan a di ayrya. Soh, noh kay wehpaat wi serv, wi ‘kip aan di du di Laad werk wid evriting weh wi gat.ʼ—1 Kor. 15:58.