ARIÑAGATI Hesusu lidan aban profesía gíbebei lan halubahan lani disipulugu lidan lagumuhóun dan le (Mat. 9:37; 24:14). Lagunfuliruña dimurei burí le lidan aban igaburi espechaliti lidan aban fulasu gíriti Transcarpatia (Ukrania). Lídanrügü ǘrüwa aüdü le yarafabei lun fulasu le anihein 50 damuriguaü luma hóugiñe 5,400 apurichihatiña. * Anhein wariha átiriñanu lan lílana aüdü burí le súngubei lidan aban anihein 1 gefenti luagu kada 4 lílana aüdü.

Ida liña hagaburi gürigia ha awinwandubaña lidan fulasu le? Ariñagati aban íbiri gíriti Vasile: “Inebetu Bíbülia houn gürigia ya, hínsiñeti irichaü houn, áfaaguatiña lun híderagun hámagua ani hínsiñeguatiña iduheñu houngua”. Ariñagati giñe: “Mama súnwandan hánharun lun wafiñen. Gama lumoun, dan barufudun aban bérusu tídangiñeti Bíbülia houn rútiña arigei lun le bariñagubei”.

Lau sun lidan lan aban fulasu le ñein habéi saragu apurichihatiña hapurichiha íbirigu ha, gagibuguatiña luma lénrengunga le marihínti saragu. Kei hénpulu, añahein 134 apurichihatiña lidan aban damuriguaü, gama lumoun, dimí-sanrügüñoun muna lidan fulasu le ñein lubéi hapurichiha. Kati hadügübei íbirigu ha lidan kesi le?

Besafu íbirigu áfaaguatiña saragu lun houdin apurichiha lidan fulasu le ñein lubéi mégeiwa hamá apurichihatiña. Ariñagati Ionash, aban íbiri le barühalibei 90 irumu: “Lidan damuriguaü le ñein nubéi, anuhein 2 muna lun kada apurichihati lidan fulasu ñein lubéi wapurichiha. Lidan aüdü ñein lubéi neredera napurichiha, gama lumoun, lubaragiñe laribaduntima nátuadi mameme binarü, apurichihatina meha lidan hañeñe úngaru lidan aban fulasu le mapurichihóunti. Mosu meha nawéiyasunha 160 kilómeturu (100 maili)”. Mosu hadügün apurichihatiña saragu sákürifisiu lun houdin ídeha lidan burí fulasu ligía. Ariñagamémeti Ionash: “Lun nárügüdünu íngiini, mosu meha násaarun ladáün gádürü lubá larugan. Ani apurichihatina meha darí ladáün sisi rábounweyu, ligía meha lóurate táfuridun íngiini. Biama o ǘrüwa meha wéiyaasu luagu dimaasu nadügüni lira”. Ida liña san lasandiragun íbiri le lungua luagu sun áfaaguni le ladügübei? Ariñagati: “Gúndaatina meha lau nídehan lidan ligaburi apurichihani le. Ibiha numuti chansi lun narufudahani inarüni houn aban iduheñu ha awinwandubaña lidan aban fulasu díseti”.

Gunfurandawati siñá lan hawéiyasunha fiu hádangiñe íbirigu ha lídangiñetiña damuriguaü burí le dise. Lau sun lira, áfaaguatiña súngubei, íbini ha derebuguhaña, lun hapurichihan houn sun gürigia ha awinwandubaña lidan fulasu le ñein lubéi hapurichiha. Lidan Aritaguagülei le adügǘbei lidan irumu 2017, lidan burí aüdü le, chülütiña hamidan ha awinwandubaña ñein. Chóuruti meberesenga halía lan weseriwida, gibemémegili lunti wadügüni “lidan luadigimari Wabureme” (1 Ko. 15:58).