JESÚS xuʼij qa chë pa rukʼisbʼäl taq qʼij, ri rutzeqelbʼëy xkekitoʼ ye kʼïy winäq rchë xtkitamaj ruwäch chqä xtkitzeqelbʼej (Mateo 9:37; 24:14). Ri xuʼij qa Jesús najin wä ntzʼaqät chpan ri tinamït Transcarpatia (Ucrania). Kan xa xuʼ chkipan oxiʼ tinamït ri kan kejqan kiʼ ye kʼo chriʼ, ye kʼo 50 congregaciones chqä más 5.400 publicadores * (tatzʼetaʼ ri nota). We yeqajlaj ri winäq chkipan ri oxiʼ tinamït riʼ, kʼo jun testigo de Jehová chkë ye kajiʼ winäq.

¿Achkë kinaʼoj ri winäq ye kʼo chriʼ? Jun qachʼalal rubʼiniʼan Vasile nuʼij: «Ri winäq ye kʼo aweʼ kan kʼo ruqʼij le Biblia chkiwäch, nkitäj kiqʼij chë pa ruchojmil nkiʼän che rä ronojel, ütz kikʼwan kiʼ pa kachoch chqä jontir nkitolaʼ kiʼ chkiwäch». Chqä nuʼij: «Kʼo jujun ri nqanmaj ri ma kan ta nqa chkiwäch, ye kʼa taq nqaskʼij jun texto chpan le Biblia, nkiyaʼ kixkïn chqë».

Kantzij na wä chë taq ri qachʼalal nkitzjoj le Biblia pa jun tinamït akuchï ye kʼo ye kʼïy publicadores, kʼo jujun kʼayewal yekïl. Jun tzʼetbʼäl. Jun congregación ri ye kʼo 134 publicadores chpan xa xuʼ 50 jay ru-territorio. ¿Achkë nkiʼän ri qachʼalal chwäch ri kʼayewal riʼ?

Ye kʼïy qachʼalal kitjon kiqʼij rchë yebʼenäq pa jun chik territorio akuchï yeʼajowatäj más publicadores. Jun qachʼalal, ri 90 rujunaʼ, rubʼiniʼan Ionash nuʼij: «Pa qa-congregación yoj kʼïy publicadores, ye kʼa xa jubʼaʼ ok qa-territorio. Komä pa nutinamit ntzjoj wä le Biblia, ye kʼa taq majanä wä tpë más nyabʼil, yibʼä wä chqä pa jun territorio ri kʼo kʼa pa 160 kilómetros che rä nutinamit. Chriʼ ntzjoj wä le Biblia pa chʼaʼäl húngaro». Rchë chë ri publicadores yeʼapon pa taq territorios riʼ, kʼo kʼayewal yekiqʼaxaj. Ionash nuʼij: «Rchë yibʼä äl pa tren, kʼo wä chë yikatäj a las 4 nimaqʼaʼ. Chqä rma ri hora ntzolin pä ri tren, nyaʼ qa rutzjoxik le Biblia kʼa las 6 tqaqʼij. Kaʼiʼ u oxiʼ mul xinbʼän riʼ pa jun semana». ¿Kʼo utzil xukʼän pä pa ruwiʼ ri qachʼalal ri xuʼän riʼ? Ryä nuʼij: «Ronojel ri xinbʼän rchë ntzjoj le Biblia janina kiʼkʼuxlal xuyaʼ chwä. Chqä xikowin xentoʼ jun familia ri ye kʼo näj che rä nutinamit rchë xkitamaj ruwäch Jehová».

Kantzij na wä chë ma jontir ta qachʼalal ri ye kʼo pa taq congregaciones riʼ yekowin yebʼä pa jun chik territorio. Ye kʼa jontir chkë ryeʼ, yajün ri kʼo chik kijunaʼ, nkitäj kiqʼij rchë nkitzjoj le Biblia chkë jontir winäq ri ye kʼo pa ki-territorio. Riʼ xuʼän chë pa junaʼ 2017, pa nikʼaj chkë jontir winäq ri ye kʼo chkipan ri oxiʼ tinamït riʼ xeʼapon chpan ri moloj rchë Runataxik Rukamik Jesús. Kantzij na wä, xa bʼa akuchï yoj kʼo wä, kʼïy na samaj najowatäj chrij rutzjoxik Ruchʼaʼäl Dios (1 Corintios 15:58).