YEZU tun kɔnna k’a fɔ ko a ka kalandenw bena suman caaman tigɛ laban wagati la (Mat. 9:37; 24:14). A filɛ o kumaw dafara cogo kabakoman min na Transcarpathia mara la, Ikɛrɛni jamana na. O mara ka dugu saba dɔrɔn kɔnɔ, kafo 50 ani weleweledala 5 400 ni kɔ lo be yen. * O dugu saba be ɲɔgɔn gɛrɛfɛ ani u bɛɛ lajɛnnin kɔnɔ, mɔgɔ 4 kan, mɔgɔ 1 ye Jehova Seere ye!

O maramɔgɔw be koow jati cogo di? Balimacɛ Vasile b’o yɔrɔ la ani a ko: “Mɔgɔw be bonya la Bibulu kan ani tilenninya ka di u ye. Denbayamɔgɔw koo ka gwɛlɛ ɲɔgɔn ma ani mɔgɔw b’a ɲini ka ɲɔgɔn dɛmɛ sɔbɛ la.” A y’a fɔ fana ko: “U tɛ sɔn an ka lannakow la tuma bɛɛ. Nka n’i ye fɛɛn dɔ yira u la Bibulu kɔnɔ, u b’i lamɛn koɲuman.”

Yɔrɔ minw na balimaw ka ca kosɔbɛ dugumɔgɔw cɛma, weleweledalaw be gwɛlɛyaw fana sɔrɔ yen. Ɲɛyirali fɛ, kafo dɔ kɔnɔ, weleweledala 134 lo be yen, nka luu 50 dɔrɔn lo b’u ka kiin kɔnɔ! O koo ɲɔgɔn na, weleweledalaw be waajuli kɛ cogo di?

Balima caaman be jijalibaw kɛ walisa ka taga waajuli kɛ yɔrɔ minw na waajulikɛlaw man ca. Balimacɛ Ionash be ni saan 90 ye ani a ko: “An ka kafo ka kiinw kɔnɔ, weleweledala kelen kelen bɛɛ ka ɲi ka waajuli kɛ luu fila lo kɔnɔ. N’ be deli ka waajuli kɛ an ka dugu kɔnɔ. Nka a ma mɛɛn, sanni n’ ka kɛnɛyako ka nagasi, n’ tun be to ka kilomɛtɛrɛ 160 kɛ ka taga waajuli kɛ fana hɔngirikan na kiin dɔw kɔnɔ minw kalifanin tɛ kafo si ma.” Weleweledalaw ka ɲi ka jijaliba lo kɛ walisa ka taga dɛmɛ don kiin wɛrɛw kɔnɔ. Balimacɛ Ionash ko: “Walisa ka tɛrɛn sɔrɔ, n’ tun be wuli sɔgɔma 4h wagati la ani n’ tun be waajuli kɛ fɔɔ wulafɛ 6h, wagati min na tɛrɛn be kɔsegi an ka dugu la. N’ tun b’o kɛ siɲɛ fila wala saba lɔgɔkun kɔnɔ.” Yala kuun tun b’o jijaliw la wa? Balimacɛ Ionash ko: “N’ ye ninsɔndiyaba sɔrɔ o waajuli sen fɛ. Denbaya dɔ tun siginin be yɔrɔ min na kafo si tɛ yen. N’ ye ninsɔndiya sɔrɔ k’olu dɛmɛ ka tiɲɛn lɔn.”

Tiɲɛn lo k’o mara ka kafodenw bɛɛ tɛ se ka taga waajuli kɛ yɔrɔjan. Nka, u bɛɛ b’u jija ka waajuli kɛ bɛrɛbɛrɛ u ka kiinw kɔnɔ, hali mɔgɔkɔrɔbaw yɛrɛ. Mun lo sɔrɔla o la do? Saan 2017 la, mɔgɔ minw nana Hakilijigi lajɛn na o dugu saba lajɛnnin kɔnɔ, bɛrɛ m’u hakɛ jɛn weleweledalaw hakɛ sigiyɔrɔma fila la. O kɔrɔ, o dugumɔgɔw bɛɛ tilancɛ. Siga t’a la, an mana kɛ yɔrɔ o yɔrɔ, an be se ka caaman kɛ “Matigi ka baara la.”—1 Kor. 15:58.