YESU gba akɛ, yɛ naagbee gbii nɛɛ amli lɛ, esɛɛnyiɛlɔi lɛ baakpa nii babaoo, ni tsɔɔ akɛ, amɛbaaye amɛbua mɛi babaoo koni amɛbale anɔkwale lɛ. (Mat. 9:37; 24:14) Egbalɛ lɛ eba mli yɛ gbɛ ni sa kadimɔ waa nɔ yɛ Ukraine maŋ lɛ kpokpaa ko ni atsɛɔ lɛ Transcarpathia lɛ nɔ. Ayɛ asafoi 50 kɛ shiɛlɔi ni fa fe 5,400 yɛ maji etɛ komɛi ni bɛŋkɛ amɛhe waa ni yɔɔ kpokpaa nɛɛ nɔ lɛ amli. * Anɔkwa, kɛ́ abua mɛi fɛɛ ni yɔɔ maji etɛ nɛɛ amli lɛ anaa ni ahala amɛteŋ mɛi ejwɛ lɛ, amɛteŋ mɔ kome ji Yehowa Odasefonyo!

Te shikpɔŋkuku nɛɛ mli nitsumɔ yɔɔ tɛŋŋ? Nyɛmi nuu ko ni jɛ kpokpaa nɛɛ nɔ, ni atsɛɔ lɛ Vasile lɛ wie akɛ: “Mɛi ni yɔɔ biɛ lɛ buɔ Biblia lɛ waa, amɛsumɔɔ ni aye jalɛ sane, amɛsumɔɔ amɛwekui waa, ni amɛsumɔɔ ni amɛye amɛbua mɛi krokomɛi.” Ekɛfata he akɛ: “Eyɛ mli akɛ jeee be fɛɛ be amɛkɛ wɔ kpãa gbee yɛ nibii ni wɔheɔ wɔyeɔ lɛ ahe moŋ, shi kɛ́ otsɔɔ amɛ nɔ ko kɛjɛ Biblia lɛ mli lɛ, amɛboɔ toi jogbaŋŋ.”

Akɛni nyɛmimɛi lɛ ayi fa waa shi shikpɔŋkuku lɛ edaaa hewɔ lɛ, amɛkɛ naagbai komɛi ni efɔɔɔ kaa yɛ hei krokomɛi lɛ kpeɔ. Akɛ nɔkwɛmɔnɔ lɛ, yɛ asafoi lɛ ekome mli lɛ, ayɛ shiɛlɔi 134, shi shĩai 50 pɛ ni yɔɔ amɛshikpɔŋkuku lɛ mli! Mɛni nyɛmimɛi lɛ efee koni amɛnyɛ amɛya nɔ amɛshiɛ?

Nyɛmimɛi lɛ ateŋ mɛi pii kɛ nibii shãa afɔle koni amɛnyɛ amɛya hei ni hiamɔ lɛ da yɛ ni amɛyashiɛ yɛ jɛmɛ. Nyɛmi nuu ko ni eye afii 90, ni atsɛɔ lɛ Ionash lɛ wie akɛ: “Shiɛlɔ fɛɛ shiɛlɔ ni yɔɔ wɔsafo lɛ mli lɛ yɛ shĩai enyɔ pɛ ni ebaashiɛ yɛ mli. Mishiɛɔ yɛ mikrowa lɛ mli, shi no mli lɛ, mifãa gbɛ aaafee kilomitai 160 (mailii 100) kɛyaa shikpɔŋkuku ko ni akɛwoko asafo ko dɛŋ lɛ mli ni miyashiɛɔ yɛ jɛmɛ hu. Mɛi ni yɔɔ shikpɔŋkuku nɛɛ mli lɛ wieɔ Hungarian. Nyɛsɛɛ nɛɛ, mináaa hewalɛ, ni no hewɔ lɛ, mikpa jɛmɛ yaa.” Ionash tsɔɔ mli akɛ, be ni eyashiɛɔ yɛ shikpɔŋkuku nɛɛ mli lɛ, eteɔ shi maŋkɛ̃ ŋmɛji ejwɛ koni oketeke lɛ akashi lɛ, ni eshiɛɔ aahu kɛyashi gbɛkɛ ŋmɛji ekpaa be ni oketeke lɛ baaku sɛɛ kɛya ekrowa lɛ. Ewie akɛ: “No mli lɛ, miyaa jɛmɛ shii enyɔ loo shii etɛ yɛ otsi mli.” Ani enitsumɔ lɛ fee efolo? Ionash wie akɛ: “Miná miishɛɛ waa be ni miyashiɛɔ yɛ nakai shikpɔŋkuku lɛ mli lɛ, ni miná hegbɛ miye mibua weku ko ni yɔɔ he ko ni asafo bɛ jɛmɛ lɛ ni amɛba anɔkwale lɛ mli.”

Jeee nyɛmimɛi lɛ fɛɛ nyɛɔ amɛfãa gbɛ kakadaŋŋ kɛyashiɛɔ yɛ hei krokomɛi. Shi amɛ fɛɛ, onukpai jio, gbekɛbii jio, bɔɔ mɔdɛŋ akɛ amɛbaashiɛ amɛhã mɔ fɛɛ mɔ ni yɔɔ amɛshikpɔŋkuku lɛ mli. Enɛ hewɔ lɛ, yɛ afi 2017 lɛ, mɛi aaafee 11,000 tee Kaimɔ lɛ shishi yɛ maji etɛ nɛɛ amli, ni tsɔɔ akɛ, kɛ́ ahala mɛi enyɔ yɛ maji nɛɛ amli lɛ, amɛteŋ mɔ kome tee Kaimɔ lɛ shishi. Eyɛ faŋŋ akɛ, ekɔɔɔ he eko he ni wɔsɔmɔɔ yɛ lɛ, wɔbaanyɛ wɔya nɔ ‘wɔtsu babaoo yɛ Nuŋtsɔ lɛ nitsumɔ lɛ mli.’​—1 Kor. 15:58.