JESÚS oprofetisa vaʼekue isegidorkuéra tuichaiterei okosechataha koʼã ára pahápe (Mat. 9:37; 24:14). Upéva oñekumpli porãiterei hína Ucrániape, peteĩ sóna héravape Transcarpatia. Por ehémplo, mbohapy puévlope oĩva ojoykére, oĩ 50 kongregasión ha mas de 5.400 puvlikadór. * Jarekóramo enkuénta mboy persónapa oiko koʼã mbohapy puévlope, jaʼekuaa 1 de káda 4 persóna haʼeha testígo de Jehová.

¿Mbaʼéichapa umi hénte pe territoriogua? Peteĩ ermáno hérava Vasile heʼi: “Koʼápe umi hénte omombaʼe la Biblia, hekojoja, ifamiliakuéra iñunído ha oñehaʼã oñopytyvõ hikuái”. Avei heʼi: “Umi hénte sapyʼánte noĩri de akuérdo ñanendive, péro releéramo chupekuéra peteĩ téxto ojapysaka porã nderehe”.

Jahechaháicha, ko sónape oĩ hetaiterei puvlikadór, ha ndahetaguasúi umi óga ñane ermanokuéra ikatuhápe opredika. Por ehémplo, peteĩ kongregasiónpe oĩ 134 puvlikadór ha oreko hikuái 50 ógante opredika hag̃ua. ¿Mbaʼépa ojapo koʼã ermáno?

Ijapytepekuéra oĩ heta ojesakrifikáva oho hag̃ua opredika umi lugár oĩvehápe nesesida. Peteĩ ermáno orekóva 90 áño hérava Ionash heʼi: “Ore kongregasiónpe, kómo promédio káda puvlikadórpe otoka mokõi óga opredika hag̃ua. Koʼág̃a che apredika pe puévlope, péro cherasykatu mboyve aha vaʼekue apredika idióma húngarope, peteĩ território opytáva mombyry 160 kilometrohápe”. Umi puvlikadór ningo heta ojesakrifika vaʼerã oho hag̃ua opredika umichahárupi. Ionash heʼi: “Apuʼã vaʼerã kuri las 4 de la mañána aha hag̃ua trénpe, ha apredika las 6 de la tárde peve, pe tren ouha órape. Che ajapómi vaʼekue upéva 2 térã 3 vése por semána”. ¿Ombyasýpa ko ermáno umi sakrifísio ojapo vaʼekue? Haʼe heʼi: “Peichagua predikasión chembovyʼaiterei. Hiʼarive areko kuri pe priviléhio amboʼévo la Biblia peteĩ família oikóvape peteĩ lugár aisládope”.

Naentéroi umi ermáno oikóva upérupi ikatu oviaha mombyry. Péro enterovéva, umi ijedáva jepe oñehaʼãmbaite opredika hag̃ua káda persóna oikóvape iterritóriope. Upéicha ojejapo haguére koʼã mbohapy puévlope, pe Konmemorasión 2017-pe oñeime kuri hetaiterei. Pe kantida haimete ohupyty el dóvle de puvlikadór oĩva koʼã mbohapy puévlope, upéva hína alamita umi hénte oikóvagui upérupi. Jaikuaaháicha, oĩ gueteri heta mbaʼe jajapo hag̃ua “ñande Ruvicha servísiope”, tahaʼe haʼéva pe lugár jaservihápe (1 Cor. 15:58).