JESUKWE niebare, kä krüte nete ni nänkä niara jiebiti käkwe nura ngwä ötai krubäte (Mat. 9:37; 24:14, TNM). Jesukwe kukwe niebare ye tä nemen bare metre kä Transcarpatia (Ucrania) yekänti. Kä ketamä yekänti konkrekasion tä 50 aune nitre kukwe driekä tä 5,400 biti bäri. * Ñodre, kä ketamä yekänti nitre tä nüne nuäi ye nikwe täindre ngwane, nitre nibokä jene jene ye ngätäite iti testiko Jehovakwe.

¿Nitre kä yekänti töita ño? Ja mräkä Vasile tä niere: “Nitre nete ye tä Biblia mike tuin ütiäte jai, kukwe metre ye tätre mike tuin ütiäte jai, niaratre ja mräkäre tätre keteitibe aune tätre ja di ngwen ja di mikabätä kwärikwäri”. Tä niere arato: “Kukwe mikata täte nunkwe ye ruäre ngwane niaratre ñaka tä mike era jai, akwa nunta ñäke Bibliabätä ietre ngwane tätre nun kukwe nuin kwin”.

Akwa, nitre kukwe driekä kwati krubäte tätre kukwe driere kä yekänti yebätä ja mräkätre tä ja tuin kukwe ruäre ben. Ñodre, konkrekasion keteiti yete nitre kukwe driekä tä 134 aune kä yekänti ju 50 aibe tä kukwe driekäre. ¿Niaratre tä dre nuainne kukwe driekäre?

Ja mräkätre kwati krubäte tätre ja di ngwen niken kukwe driekäre nitre kukwe driekä ribeta bäri yekänti. Ja mräkä Ionash abokänbiti kä niena 90 tä niere: “Konkrekasion nunkwe yete, nunta kukwe driere yekänti ju kubu jene jene yete ni kukwe driekä iti tä. Nengwane tita kukwe driere jutate, akwa bitinkä ti jämi nemen bäri bren ye känenkri, kä keteiti nemenkä 160 kilómetro yete kukwe drie ñaka yekänti ti nämä niken kukwe driere nitre húngaro yei arato”. Nitre kukwe driekä tätre ja di ngwen krubäte nänkäre kukwe driere kä yekänti. Ja mräkä Ionash tä mike gare: “Ti rikadre trente yekäre, ti nämä nüke 4 dekä ngwäte. Aune ye bitikäre, ti nämä kukwe driere nememe 6 dere, tren nämä nüketa ye ngwane. Ti nämä ye erere nuainne bobu o bämä jire bämän kratire kratire”. ¿Ja mräkä yekwe ñaka ja di ngwani ngwarbe ruin ie? Niara arabe tä mike gare: “Ti nämä kukwe driere kä yekänti ye nämä kä mike juto tibätä. Aune nitre ja mräkäre nämä nüne mente krubäte yei tikwe kukwe metre drieba”.

Ja mräkätre ruäre konkrekasion yete ye ñaka raba niken kä mente krubäte yekänti kukwe driekäre, akwa niaratre jökrä tätre ja di ngwen kukwe driekäre nitre itire itire tä nüne niaratre käite yei. Ye köböire, kä 2017 yete nitre kä ketamä yekänti janamane Jesús Ja Nire Biani Ngwaninta Törö Jai yebätä aune nitre namani bäri kwati krubäte nitre kukwe driekä ye kräke, ye abokän nitre jökrä bäsi kä yekänti janamane. Erametre, kä meden erere känti nikwe kukwe driei, akwa “sribi ni Dänkienkwe” täbe nuaindre krubäte nie (1 Cor. 15:58).