GINTAGNA ni Jesus nga madamo ang pagaanihon sang iya mga sumulunod sa tion sang katapusan. (Mat. 9:37; 24:14) Binagbinaga kon paano ini natabo sing tumalagsahon sa isa ka lugar sa Transcarpathia, Ukraine. Sa tatlo lang ka banwa sa sini nga lugar, may 50 ka kongregasyon kag sobra 5,400 ka manugbantala. * Kon tingbon ang pumuluyo sang tatlo ka banwa, may isa ka Saksi ni Jehova sa kada apat ka pumuluyo!

Ano ang kinaiya sang mga tawo sa sini nga lugar? Ang utod nga si Vasile nagsiling: “Ginatahod sang mga tawo ang Biblia, ginapabaloran nila ang hustisya, suod ang mga pamilya, kag nagabuligay gid sila.” Nagsiling pa sia: “Kon kaisa, indi man sila komporme sa aton mga ginapatihan. Pero kon ipakita mo sa ila ang ginasiling sang Biblia, mamati gid sila.”

Tumalagsahon ang kahimtangan sang aton mga kauturan sa sini nga lugar nga madamo gid sing manugbantala. Halimbawa, ang isa ka kongregasyon may 134 ka manugbantala pero 50 lang ka balay ang ila ginabantalaan! Ano ang ginahimo sang mga manugbantala sa sini nga kahimtangan?

Madamo nga kauturan ang nagabantala sa mga lugar nga kinahanglan ang dugang nga manugbantala. “May isa ka manugbantala sa kada duha ka balay sa teritoryo sang amon kongregasyon,” siling sang 90 anyos nga utod nga si Ionash. “Nagabantala ako sa amon baryo, pero sang masarangan pa sang akon lawas, nagabiyahe man ako sing mga 160 ka kilometro sa wala pa maasayn nga teritoryo kag nagabantala ako sa mga tawo nga Hungarian ang lenguahe.” Nagasakripisyo gid ang mga manugbantala para magbulig sa iban nga teritoryo. “Nagabugtaw anay ako sa alas 4:00 sang aga para makasakay sa tren, kag nagabantala ako asta alas 6:00 sang gab-i kon mabalik na ang tren sa amon lugar. Ginahimo ko ini duha ukon tatlo ka beses kada semana,” siling ni Ionash. Ano ang masiling niya sa iya pagpanikasog? “Nalipay gid ako nga magbantala sa sini nga paagi,” siling niya. “Nabuligan ko ang isa ka pamilya nga nagaistar sa lugar nga wala sing kongregasyon nga matun-an ang kamatuoran.”

Matuod, indi masarangan sang iban nga manugbantala sa sini nga mga kongregasyon ang pagkadto sa malayo nga mga lugar. Pero ang tanan, lakip ang mga tigulang, nagatinguha nga magbantala sa bilog nga teritoryo sang ila kongregasyon. Gani sang 2017, halos doble sa kadamuon sang manugbantala ang nagtambong sa Memoryal, ukon katunga sang kabilugan nga pumuluyo sining tatlo ka banwa. Sigurado gid nga ‘madamo pa kita sing mahimo sa hilikuton sang Ginuo’ bisan diin man kita nagaalagad.—1 Cor. 15:58.