NIPROFESIYA ni Jesus nga magayayya i disipulosna ta kuruga aru nga magatab taw nga tiempo na panuppalan. (Mat. 9:37; 24:14) Innan nu kunnasi nesimmu yaw nga profesiya ta Transcarpathia, Ukraine. I tallu nga nabbiriko nga ili tatun ay egga i 50 nga kongregasionna anna maturu tu 5,400 nga publisher. * Wan, tadday ta kada appa nga tolay ta interu nga populasion naw nga tallu nga ili ay Saksi ni Jehova!

Kamusta gapa i reaksion na totolay taw nga teritoria? “Irespeto na totolay taw i Biblia, tagibaloradda i hustisia, maladda i relasion na familia, anna talaga ikagumadda uffunan i kataggi-tadday,” kunna lokal nga brother nga mangngagan tu Vasile. Kunna paga: “Ariadda kanayun nga umanugu ta pangurug tam. Ngem nu egga i ipabibbig mu nira ta Biblia, magginna ira tu mapia.”

Siempre, nerumu-ruma i problema nga arubangan na wawwaragi nu mallayyagayya tatun nga lugar nga atannang i ratio na publisher ta populasion. Angngariganna, 134 i publisher na tadday nga kongregasion ngem 50 laman i babalay nga mangayan ta teritoriada! Kunnasi makibagay i publisher ira taw nga situasion?

Aru nga wawwaragi i kuadda i adde na mawayyada tapenu makapallayyagayya ta lugar ira nu sitaw mas dakal i pakawagan. “I ratio na publisher ta babalay ta kongregasiommi ay 1 ta kada 2 nga balay,” kunna brother nga si Ionash, nga 90 ngana dagunna. “Mallayyagayya ngà ngana laman ta lugarmi, ngem dati, nige nga nakkafi i gawa-gawayyakku, mabbiahe ngà tu ma-160 kilometro ta lugar nga awan tu makatteritoria, nu sitaw mallayyagayya ngà ta lengguahe nga Hungarian.” Mawag massakrifisio na publisher ira tapenu makoffun ta tanakuan nga teritoria. “Dati tapenu makatakay ngà ta tren, nakagannua ngà ngana ta alas-kuatro ta ummumma tapus mallayyagayya ngà adde ta alas-sais na gabi sonu manaw ngana i tren palabbe. Kuakku yatun mamiddua onu mamittallu kada ligguan,” kunni Ionash. Natagenona kari nga sulit i appursigina? “Talaga magayayya ngà ta kunnatun nga klase na ministerio,” kunna. “Egga i pribilehiò nga uffunan i tadday nga nesisina nga familia nga ammuan i kinakurug.”

Siempre, ari tu posible ta ngamin nga wawwaragi ta kongregasion ira taw nga lugar i mabbiahe ta apaddu ira nga distansia. Ngem ngamin, nelagum ngana i mannakam nga publisher, ay mappursigi nga balinan i interu nga teritoria na mismu nga kongregasiodda. Megafu tatun, ta 2017, suma-total maggi doble ta bilang na publisher i karu na nagatende ta Memorial tatun nga tallu nga ili​—onu gaddua na interu nga populasion. Siguradu nga maski sitaw ittam masserbi, awayya tam lagapa ‘mallallappo kanayun ta trabahu tam nga masserbi ta Yafu.’​—1 Cor. 15:58.