JESU ọ ta kẹ ilele riẹ nọ evaọ oke urere nana, a te reawere ivuẹvu buobu. (Mat. 9:37; 24:14) Muẹrohọ oghẹrẹ nọ ọ rọ rehọ obọdẹ edhere jọ rugba evaọ ẹkwotọ Transcarpathia, obọ Ukraine. Iwhowho-uvie nọ i bu vi idu isoi gbe egba ene (5,400) a rrọ ikoko udhuvẹ gbikpe evaọ ewho esa jọ nọ e kẹle ohwohwo. * A te ku ahwo nọ a rrọ ewho esa nana kugbe, omọvo evaọ udevie imane kpobi yọ Osẹri Jihova!

Ẹvẹ ẹkwotọ usiuwoma ota na ọ rrọ? Oniọvo-ọmọzae jọ nọ ọ rrọ ẹkwotọ na họ Vasile, ọ ta nọ: “Evaọ obonẹ, ahwo a wo adhẹẹ kẹ Ebaibol na gaga, a se uvi-oziẹ gboja, okugbe ọ rrọ iviuwou rai, yọ a re fiobọhọ kẹ ohwohwo.” Vasile ọ ta re nọ: “Orọnikọ ẹsikpobi a rẹ rọwo kugbe uwuhrẹ mai hi. Rekọ who te bi dhesẹ oware kẹ ae no Ebaibol na ze, a rẹ romatotọ gaviezọ kẹ owhẹ.”

Dede na, ibe Ileleikristi mai nọ e rrọ ẹkwotọ nana a rẹ rẹriẹ ovao dhe use-abọ oghẹrẹ sa jọ nọ a tẹ rrọ usiuwoma ota, evaọ oria otiọna nọ iwhowho-uvie e dafia nọ a tẹ rehọ ae wawo ahwo ẹkwotọ na. Wọhọ oriruo, ukoko jọ u wo iwhowho-uvie ẹgba ọvo gbe ọgbagbene (134), yọ iwou udhuvẹ gbikpe ọvọ e rrọ ẹkwotọ rai. Ẹvẹ iwhowho-uvie na a be sai ro fi use-abọ nana kparobọ?

Inievo na jọ buobu a be hai kpohọ ẹkwotọ ọfa nọ a jọ mae gwọlọ obufihọ iwhowho-uvie. Oniọvo-ọmọzae nọ a re se Ionash nọ ọ kpako te ikpe udhone gbikpe no ọ ta nọ: “Omọvo evaọ udevie imava kpobi nọ e rrọ ẹkwotọ usiuwoma ota mai yọ Osẹri Jihova. Taure oma u te ti mu omẹ uye họ ẹkẹ, mẹ jẹ hae ta usiuwoma evaọ iwhre mai je kpohọ iwhre efa nọ e rehọ emaele ẹgba ọvo (100) thabo no oria mai, yọ ẹvẹrẹ Hungary mẹ jẹ hae rọ ta usiuwoma evaọ obei.” Iwhowho-uvie a re gbobọnẹ eware jọ, fialoma via re a nyai fiobọhọ evaọ ekwotọ efa. Wọhọ oriruo, Ionash ọ ta nọ: “Mẹ rẹ kpama ighọjọ ene irioke re mẹ sai te oria nọ a rẹ jọ ro itreni ẹruoke, kẹsena mẹ vẹ ta usiuwoma rite ighọjọ ezeza owọwọ nọ itreni na o re ro zihe ze. Me re ru onana isiava hayo isiasa ẹkpoka.” Eme oniọvo na ọ ta kpahe omodawọ riẹ na? Ọ ta nọ: “Oghẹrẹ usiuwoma ota nana o be kẹ omẹ evawere gaga, onana u ru nọ mẹ sai ro fiobọhọ kẹ uviuwou jọ riẹ uzẹme na evaọ oria nọ usiuwoma o rẹ kaki te he.”

Ginọ uzẹme inọ orọnọ inievo nọ e rrọ ikoko sa-sa evaọ ẹkwotọ nana kpobi a be sai kpohọ ugbothabọ kẹ usiuwoma ota ha. Rekọ aikpobi na, te otu nọ ọ kpako no, a be daoma jọ iwhre rai na ta usiuwoma na ziezi. Onana u ru nọ ahwo nọ a bu te enwenọ akuava iwhowho-uvie nọ e rrọ ewho esa nana, hayo abọvo ahwo nọ a rrọ ewho esa na a rọ ziọ Ekareghẹhọ evaọ 2017. Avro ọ riẹ hẹ, “iruo buobu” e gbẹ riẹ nọ ma re “ru evaọ iruo Olori na” ghelọ oria nọ ma rrọ kpobi kẹhẹ.​—1 Kọr. 15:58.