JIZUS flaba ma na ténpu di fin, se disiplus ta tinha un grandi kodjéta ô bons rezultadu na trabadju di pregason. (Mat. 9:37; 24:14) Repara modi ki palavras di Jizus sta ta kunpri na sidadi di Transcarpathia, na Ukránia. Sô na três sidadi ki ta fika pértu di kunpanheru ten 50 kongregason i 5.400 publikador. * Si nu djunta tudu algen di kes três sidadi, nu ta odja ma na kada kuatu algen un é Tistimunha di Jeová!

I modi ki é pregason na kes sidadi? Un irmon ki txoma Vasile fla: “Pesoas di li ta ruspeta Bíblia, es ta sforsa pa faze kuzas dretu, ses família é unidu i es ta tenta djuda otus algen. Nen sénpri es ka ta konkorda ku kuzas ki nu ta kridita na el. Má óras ki nu mostra-s algun testu na Bíblia, es ta obi ku atenson.”

Irmons ku irmans ki ta prega na tiritóriu ki ten txeu Tistimunha di Jeová, tanbê ta pasa pa otus tipu di prubléma. Pur izénplu, na un kongregason ki ten 134 publikador ten sô 50 kaza pa da tistimunhu! Kuzê ki irmons ta faze na kel situason li?

Txeu irmon ta bai prega na lugar ki ten más nisisidadi. Un irmon di 90 anu ki txoma Ionash fla: “Na nos tiritóriu kada publikador ten dôs kaza pa prega. Gósi N ta prega li na sidadi, má kantu N tinha bon saúdi N ta viajaba uns 160 km pa un tiritóriu ki ka éra di ninhun kongregason. La N ta pregaba na língua úngaru.” Kes publikador ta faze txeu sforsu pa djuda na otus tiritóriu. Ionash tanbê fla: “Pa N panhaba konboiu, N ta labantaba kuatu óra di madrugada i N ta pregaba ti 6 óra tardi, na óra ki konboiu ta saíba. N ta fazeba kel-li dôs ô três bês pa simana.” Má kuzê ki Ionash ta atxa di tudu kel sforsu ki el ta fazeba? El fla: “N ta fikaba txeu kontenti. I N konsigi djuda un família ki ta moraba na un lugar lonji, konxe verdadi.”

É klaru ki txeu di es ka ta konsigi viaja pa bai djuda na otus tiritóriu. Má tudu es, ti kes algen di idadi, ta sforsa pa kubri ses tiritóriu. Kal ki foi rezultadu? Nunbru di kes algen ki bai sisti Komemorason na anu 2017 foi dôs bês más txeu di ki nunbru di publikador. Kel-li ta da kuazi metadi di tudu kes algen ki ta mora na kes três sidadi. Nu ka ten dúvida ma ka ta nporta undi nu ta mora, inda falta ‘txeu pa faze na óbra di Sinhor’. — 1 Cor. 15:58.