JESU aarathĩte atĩ arũmĩrĩri ake nĩ mangĩkagĩa na magetha maingĩ matukũ-inĩ maya ma mũico. (Mat. 9:37; 24:14) Ta rora ũrĩa ciugo ciake ihingĩte na njĩra ya mwanya gĩcigo-inĩ gĩa Transcarpathia, bũrũri-inĩ wa Ukraine. Nĩ kũrĩ taũni ithatũ iriganĩtie gĩcigo-inĩ kĩu ikoragwo na ciũngano 50 na ahunjia makĩria ma 5,400. * Mũndũ 1 harĩ andũ 4 thĩinĩ wa taũni icio nĩ Mũira wa Jehova!

Andũ a gĩcigo kĩu makoragwo matariĩ atĩa? Mũrũ wa Ithe witũ ũmwe wĩtagwo Vasile kuuma gĩcigo-inĩ kĩu oigire ũũ: “Andũ a gũkũ nĩ matĩĩte Bibilia, nĩ mendete maũndũ ma kĩhooto, famĩlĩ ciao nĩ ciendaine, na nĩ merutanagĩria mũno gũteithania. Ti hĩndĩ ciothe metĩkanagia na ũrĩa twĩtĩkĩtie, no mũndũ akĩmathomera Bibilia nĩ mamũthikagĩrĩria.”

Ma nĩ atĩ aarĩ na ariũ a Ithe witũ arĩa mahunjagia gĩcigo-inĩ kĩu kĩrĩ nĩ ahunjia aingĩ ũguo, nĩ macemanagia na moritũ matakoragwo kũndũ kũingĩ. Kwa ngerekano, nĩ harĩ kĩũngano kĩmwe gĩa kũu gĩkoragwo na ahunjia 134, no nyũmba cia kũhunjia nĩ 50 tu! Ahunjia mahiũranagia na ũndũ ũcio atĩa?

Aarĩ na ariũ a Ithe witũ aingĩ merutanagĩria magathiĩ kũhunjia kũndũ kũrĩa kũrĩ na bata mũnene wa ahunjia. Mũrũ wa Ithe witũ ũmwe wĩtagwo Ionash ũrĩ na mĩaka 90 oigire ũũ: “Gĩcigo-inĩ kĩrĩa kĩũngano gitũ kĩhunjagia, mũhunjia ũmwe no ahunjirie nyũmba igĩrĩ tu. Ngoretwo ngĩhunjia hakuhĩ na mũciĩ kuuma ndambĩrĩria gũthĩnio nĩ mwĩrĩ, no mbere ĩyo nĩ ndathiaga kĩndũ kilomita 160 kũhunjia gĩcigo-inĩ gĩtagaĩirũo kĩũngano o gĩothe, kũrĩa ndahunjagia na rũthiomi rwa Kĩhungaria.” No mũhaka ahunjia meime nĩguo mahote gũthiĩ kũhunjia kũndũ kũngĩ. Ionash oigire: “Ndabataraga gũũkĩra thaa ikũmi cia ũtukũ nĩguo ndigatigwo nĩ mũgithi, na ndahunjagia nginya thinacara cia hwaĩ-inĩ tondũ nĩrĩo mũgithi wacokaga. Ndekaga ũguo maita merĩ kana matatũ o kiumia.” Hihi nĩ onaga ta aarutaga wĩra wa kũhũũra maĩ na ndĩrĩ? Oigire ũũ: “Ũtungata ũcio nĩ watũmire ngĩe na gĩkeno kĩnene. Nĩ ndagĩire na mweke wa gũteithĩrĩria famĩlĩ ĩmwe kũu ĩĩrute ũhoro wa ma.”

Ti andũ othe thĩinĩ wa ciũngano cia kũu mahotaga gũthiĩ kũhunjia kũndũ kũraihu. O na kũrĩ ũguo, ahunjia othe nginya arĩa akũrũ nĩ merutanagĩria kũhunjia gĩcigo-inĩ kĩao mahinyĩtie. Nĩ ũndũ ũcio, mũigana wa andũ arĩa maathire Kĩririkano mwaka wa 2017 thĩinĩ wa taũni icio ithatũ, maarĩ nuthu ya andũ arĩa maikaraga taũni-inĩ icio, kana hakuhĩ maita merĩ ma ahunjia. Hatarĩ nganja, o na angĩkorũo nĩkũ tũratungata, kũrĩ o na “maũndũ maingĩ ma gwĩka wĩra-inĩ wa Mwathani.”—1 Kor. 15:58.