YEZU ukavua mumanyishe ne: bayidi bende bavua ne bua kunowa bintu bia bungi matuku a ku nshikidilu aa. (Mat. 9:37; 24:14) Tumonayi mudi mêyi ende au makumbane mu mushindu wa pa buawu mu tshitupa tshia buloba tshia Transcarpatie mu ditunga dia Ukraine. Mu bimenga bisatu patupu bidi bidiangane mutumba mu tshitupa atshi mudi bisumbu 50 ne bamanyishi bapite pa 5 400. * Bualu budi bukemesha budi ne: Bantemu ba Yehowa badi benza tshia binayi tshia bungi busanga bua bantu ba mu bimenga bisatu abi!

Bantu ba mu teritware au badi mushindu kayi? Vasile, muanetu mukuabu wa muaba au, udi wamba ne: “Bantu ba muaba eu badi banemeka Bible, mbanange buakane, badi ne malanda makole mu dîku, ne mbasue kuambuluishangana ne muoyo mujima. Kabatu misangu yonso bitaba malongesha etu to. Kadi paudi ubaleja bualu kampanda mu Bible, badi bakuteleja ne ntema yonso.”

Bushuwa, bena Kristo netu badi batuilangana ne imue ntatu ya wayi mushindu padibu bayisha mu tshitupa etshi tshidi ne bungi bua bamanyishi bupite bua bantu bonso badimu badi kabayi Bantemu. Tshilejilu, kudi tshisumbu tshimue tshidi ne bamanyishi 134 kadi tshikale anu ne nzubu 50 mu teritware watshi! Mmunyi mudi bamanyishi bapita ne lutatu elu?

Bena Kristo netu ba bungi badi badienzeja bua kuya kuyisha miaba idibu dijinga ne bamanyishi ba bungi. Muanetu Ionash udi ne bidimu 90 udi wamba ne: “Bungi bua bamanyishi budi buenza tshia bibidi tshia bungi bua nzubu idi mu teritware wa tshisumbu tshietu. Ntu nyisha mu musoko wetu, kadi too ne matuku mashale aa, kumpala kua makanda anyi a mubidi kukepela menemene, mvua kabidi ngenza luendu lua kilometre mitue ku 160 bua kuya kuyisha muaba uvuabu kabayi banji kukosela bamanyishi, mumvua nyisha mu tshiena Hongrie.” Bamanyishi batu badipangisha amue malu bua kuya kuyisha mu teritware mikuabu. Ionash udi wamba ne: “Mvua njuka pa dîba 4:00 wa mu dinda bua meme kupeta kawulu, ne nyisha too ne pa dîba 18:00 patu kawulu kapingana kuetu. Mvua ngenza nanku misangu ibidi anyi isatu ku lumingu.” Uvuaku mumone ne: bionso bivuaye wenza abi bivua ne mushinga anyi? Udi wamba ne: “Mushindu wa kuyisha au uvua mumpeteshe disanka dia bungi. Ngakapeta diakalenga dia kulongesha bena mu dîku kampanda dia kule bulelela.”

Bushuwa, muntu yonso wa mu bisumbu bia mu tshitupa etshi kena mua kuenza ngendu ya ntanta mile to. Kadi bamanyishi bonso, nansha bakulakaje, badi badienzeja bua kuyisha mu teritware yonso wa tshisumbu tshiabu. Bu tshipeta, mu 2017, bungi busanga bua bantu bavua babuele mu Tshivulukilu mu bimenga bisatu ebi buvua buamba kupita bungi bua bamanyishi badimu misangu ibidi, mmumue ne: tshia bibidi tshia bantu bonso ba mu bimenga bisatu ebi. Kakuyi mpata, muaba wonso uudi mua kuyisha, kudi anu “bia bungi bia kuenza mu mudimu wa Mukalenge.”​—1 Kol. 15:58.