KYAJ tqʼamaʼn Jesús qa kjawil kychmoʼn t-xnaqʼtzbʼen nim twitz awal toj mankbʼil tqʼijlalil (Mat. 9:37; 24:14). In japun kywi yol lu toj ambʼil jaʼlo ex mas kyoj junjun lugar te Transcarpatia (Ucrania). Oʼkx toj oxe tnam junx ateʼ, at 50 kʼloj okslal ex mas te 5,400 pakbʼal. * Noqpe qa ma qo ximen oʼkx tiʼj kyajlal xjal at kyoj oxe tnam lu, at jun testigo de Jehová tiʼj kyaje xjal.

¿Tzeʼn kymod xjal ateʼ kyoj tembʼil lu? «Tzalu in nok kynimen xjal Tyol Dios, in nok kyqʼoʼn toklen aju tzʼaqli, at nukʼbʼil kyxol nim ja xjal ex in nok tilil kyuʼn tuʼn tbʼaj kyonin kyibʼ kyxolx», atzun jlu in tzaj tqʼamaʼn jun erman Vasile tbʼi. Ax ikx tqʼamatl: «Mintiʼ in kubʼ qxnaqʼtzbʼil toj kywitz, pero aj t-xi tyekʼina jun taqikʼ Tyol Dios kye in nok kybʼiʼn».

Ax tok, aj kypakbʼan erman toj jun tembʼil jatumel at nim kyajlal pakbʼal, in che ok weʼ kywitz junjun nya bʼaʼn. Jun techel, at 134 pakbʼal toj jun kʼloj okslal ex oʼkx 50 ja at jatumel tuʼn kypakbʼan. ¿Tiʼ in bʼant kyuʼn aj kyok weʼ twitz jlu?

Ateʼ nim erman in nok tilil kyuʼn tuʼn kyxiʼ pakbʼal jatumel mintiʼxix pakbʼal at. In tzaj tqʼamaʼn jun erman Ionash tbʼi jlu, aju ma japun twi 90 abʼqʼi: «Toj kʼloj okslal jatumel in chinxe, oʼkx toj kabʼe ja jaku pakbʼan jun pakbʼal toj tembʼil te pakbʼabʼil. Jaʼlo atz in chin pakbʼane toj tnam, pero tej naʼmxtoq ttzaj mas yabʼil wiʼje, ax ikx in chinxe toj jun tembʼil jatumel mintiʼ jun okslal in pakbʼan, aju at toj 160 kilómetros tuʼntzun npakbʼane toj yol húngaro». Il tiʼj tuʼn tbʼant nim tiʼ kyuʼn pakbʼal tuʼntzun kyxiʼ onil kyoj tembʼil ik tzeʼn jlu. In tzaj tqʼamaʼn Ionash jlu: «Tuʼn nxiʼye toj tren, iltoq tiʼj tuʼn njaw weʼye a las 4 te prim. Ex in chin bʼajtoq pakbʼane a las 6 te qale, atzun ambʼil lu in meltzʼaj tren. In bʼanttoq jlu wuʼne kabʼe ex qa oxe maj toj seman». ¿In kubʼpe tnaʼn erman qa tzaj tqʼoʼn tbʼanel te tej tbʼant jlu tuʼn? Ax in tzaj tzaqʼwente: «Kubʼ nnaʼne tzalajbʼil tej npakbʼane ik tzeʼn jlu. Xi nqʼoʼne xnaqʼtzbʼil te jun ja xjal in nanqʼin najchaq».

Ax tok, kyoj kʼloj okslal lu mlay bʼant tuʼn kyxiʼ junjun erman najchaq, noqtzun tuʼnj, kykyaqilx in nok tilil kyuʼn, axpe ikx qeju o che tijen, tuʼn kypon kyukʼil kykyaqil xjal ateʼ toj tembʼil te pakbʼabʼil jatumel in che pakbʼan. Aju tbʼanel o tzaj tuʼn jlu, toj Nabʼitz Tkyimlen Jesucristo te 2017, kyoj qeju oxe tnam lu e pon chʼixme kabʼe maj kyajlal xjal ik tzeʼn kyajlal pakbʼal at, toj juntl yol, mij tiʼj kyajlal xjal at kyoj oxe tnam lu. In nel qnikʼ tiʼj qa noq jaxku tumel in qo ajbʼen, atx nim aqʼuntl tuʼn tbʼant tiʼj taqʼun Dios (1 Cor. 15:58).