TA̱ Jesús ni̱ka̱ʼa̱nra xa̱ʼa na̱ ndíku̱n sa̱tára ña̱ ku̱a̱ʼání na̱ yiví ndakaya̱na tiempo nu̱ú ndíʼi (Mat. 9:37; 24:14). Ña̱ ni̱ka̱ʼa̱n ta̱ Jesús xínuña chí ñuu Transcarpatia (Ucrania). U̱ni̱ ñuu ña̱ íyo kán, ki̱ʼva 50 congregación íyo ta yáʼaka 5,400 publicador kúúna. * Tá ná ndakaʼviyó ndiʼi na̱ yiví na̱ ndóo u̱ni̱ saá ñuu kán, ti̱xin ku̱mína kána iin na̱ kúú testigo Jehová.

¿Ndáa ki̱ʼva íyo na̱ yiví na̱ íyo ñuu yóʼo? “Na̱ yiví ñuu yóʼo íxato̱ʼónína Biblia, nda̱kúní tíinna ku̱a̱chi, va̱ʼaní kítáʼanna xíʼin na̱ veʼena ta chíka̱a̱nína ndeé ña̱ chíndeé táʼanna xíʼin inka na̱ yiví”, káchi ta hermano naní Vasile. Ta káʼa̱nkatura: “Va̱ása kándíxana ndiʼi ña̱ kándíxa miíyó, soo tá káʼviyó iin texto nu̱úna va̱ʼaní xíniso̱ʼona ña̱ káʼa̱nyó”.

Ña̱ natúʼunna iin ñuu nu̱ú íyo ku̱a̱ʼání na̱ kúú publicador yo̱ʼvi̱ loʼoña. Tá kúú iin congregación íyo ki̱ʼva 134 publicador ta 50 kuití veʼe íyo ña̱ natúʼunna. Ta ¿ndáaña kéʼéna xa̱ʼa ña̱yóʼo?

Ku̱a̱ʼání na̱ hermano chíka̱a̱na ndeé ta ku̱a̱ʼa̱nna inka ñuu nu̱ú kǒo ku̱a̱ʼá na̱ nátúʼun xa̱ʼa Ndióxi̱. Iin ta̱ hermano ta̱ kúúmií 90 ku̱i̱ya̱ ta̱ naní Ionash káchira: “Congregación ndi̱ʼi̱ ki̱ʼva iin na̱ publicador nátúʼunna u̱vi̱ veʼe. Vitin yi̱ʼi̱ nátúʼi̱n ñuu miíi̱, soo tá va̱ʼa loʼoka xi̱kunii̱, xi̱xa̱ʼi̱n xi̱natúʼi̱n iin ñuu ña̱ ndíka̱a̱ ki̱ʼva 160 kilómetro, ta tu̱ʼun húngaro xi̱natúʼi̱n”. Ku̱a̱ʼání ña̱ xíniñúʼu keʼé na̱ publicador tasaá kivi ku̱ʼu̱nna yóʼo. Ta̱ Ionash káchira: “Ña̱ ku̱ʼi̱n xíʼin tú tren ki̱ʼva ka̱a ku̱mí xi̱ta̱an xi̱ndakoi̱. Ta nda̱a̱ ka̱a i̱ñu̱ xi̱ku̱aá xi̱sandiʼi̱ xi̱natúʼi̱n chi hora yóʼo kúú ña̱ xi̱ndikó tú tren. U̱vi̱ á u̱ni̱ yichi̱ xi̱keʼíi̱ ña̱yóʼo ña̱ iin iin semana”. ¿Á ndákanixi̱ní ta̱ hermano yóʼo ña̱ va̱ása ndáyáʼvi ña̱ ke̱ʼéra? Miíra káʼa̱n ña̱yóʼo: “Ña̱ xi̱keʼíi̱ ña̱kán xi̱kusi̱íní-inii̱. Ta nda̱a̱ ni̱xa̱i̱ sa̱náʼi̱ iin na̱ familia na̱ xíkaní ndóo”.

Kúnda̱a̱va-iniyó xa̱ʼa sava na̱ hermano yóʼo ña̱ va̱ása kívi ku̱ʼu̱nna ñuu ña̱ íyo xíka, soo ndiʼina chíka̱a̱nína ndée nda̱a̱ na̱ xa̱a̱ chée, ña̱ va̱ʼa natúʼunna xíʼin na̱ yiví na̱ íyo ñuu nu̱ú ndóona. Xa̱ʼa ña̱yóʼo na̱ ni̱xa̱ʼa̱n tá ni̱xi̱yo ña̱ conmemoración ña̱ ku̱i̱ya̱ 2017 ti̱xin u̱ni̱ saá ñuu yóʼo, ku̱a̱ʼá xi̱kuuna nu̱ú na̱ publicador. Kúnda̱a̱-iniyó nda̱a̱ ndáaka ñuu ndóoyó íyoníka chiñu keʼéyó nu̱ú Ndióxi̱ (1 Cor. 15:58).