GYISƐSE hanle kɛ ye ɛdoavolɛma bayɛ ma ɛdelɛ gyima kpole bie wɔ awieleɛ mekɛ ɛhye anu. (Mat. 9:37; 24:14) Suzu kɛzi ye edwɛkɛ ne ɛra nu wɔ adenle titili zo wɔ Transcarpathia, Ukraine la anwo nea. Wɔ azua nsa pɛ mɔɔ zuozua Transcarpathia la azo, asafo 50 yɛɛ nolobɔlɛma mɔɔ bo 5,400 la a wɔ ɛkɛ a. * Nɔhalɛ nu, saa ɛfa menli dodo mɔɔ wɔ azua nsa ɛhye mɔ azo la ɛbɔ nu na ɛye nuhua 4 ɛsie ahane a, 1 le Gyihova Dasevolɛ!

Kɛzi azɛlɛsinli ne anu de ɛ? Adiema nrenyia Vasile ka kɛ, “Menli mɔɔ wɔ ɛke la bu Baebolo ne kpalɛ, bɛkulo pɛlepɛlelilɛ, koyɛlɛ wɔ mbusua ne mɔ anu yɛɛ bɛbɔ mɔdenle kɛ bɛbaboa bɛ nwo.” Ɔtoa zo kɛ: “Tɛ mekɛ ne amuala a bɛdie yɛ diedi ne mɔ bɛto nu a. Noko saa ɛlɛkile bɛ debie wɔ Baebolo anu a, bɛtie ye kpalɛ.”

Nɔhalɛ nu, yɛ mediema ne mɔ yia ngyegyelɛ titili wɔ daselɛlilɛ nu wɔ ɛleka mɔɔ nolobɔlɛma anwo zonle tɛla menli mɔɔ wɔ azɛlɛsinli ne anu la. Kɛ neazo la, asafo ko lɛ nolobɔlɛma 134 noko azua 50 pɛ a wɔ ye azɛlɛsinli ne anu a! Kɛzi nolobɔlɛma ne di tɛnlabelɛ ɛhye anwo gyima ɛ?

Mediema dɔɔnwo bɔ mɔdenle ka edwɛkɛ ne wɔ ɛleka mɔɔ bɛhyia moalɛ dɔɔnwo la. Adiema nrenyia Ionash mɔɔ ɛnyia ɛvolɛ 90 la ka kɛ, “Saa ɛkyɛ azua mɔɔ wɔ yɛ asafo ne azɛlɛsinli ne anu la wɔamaa nolobɔlɛma a, 1 biala banyia azua 2. Meka edwɛkɛ ne wɔ namule nu, noko kolaa na me kpɔkɛdelɛ ne azɛkye la, ɛnee metu adenle kɛyɛ mayɛlɛ 100 (km 160) mekɔka edwɛkɛ ne wɔ azɛlɛsinli mɔɔ bɛnda bɛnyɛ nu gyima la wɔ Hungaria aneɛ nu.” Ɔwɔ kɛ nolobɔlɛma bɔ afɔle na bɛahola bɛaboa wɔ azɛlɛsinli gyɛne nu. Ionash ka kɛ, “Amaa me sa aha keteke ne la, medwazo nwonlomɔ 4:00, na meka edwɛkɛ ne too nɔsolɛ 6:00 mɔɔ keteke ne ɛlɛsia ahɔ sua nu la. Meyɛ zɔ fane nwiɔ anzɛɛ nsa wɔ dapɛne ne anu.” Asoo ɔte nganeɛ kɛ nvasoɛ rale ye mɔdenlebɔlɛ ne azo? Ɔka kɛ, “Me nye liele kpalɛ wɔ daselɛlilɛ foa ɛhye anu. Menyianle adenle memboale abusua bie mɔɔ bɛde moa la memaanle bɛzukoale nɔhalɛ ne.”

Ɔda ali kɛ, tɛ awie biala mɔɔ wɔ asafo mɔɔ wɔ ɛke anu la a bahola adu adenle ahɔ moa a. Noko, yɛ kɔsɔɔti mɔɔ nolobɔlɛma mɔɔ bɛyɛ mgbanyinli boka nwo la bɔ mɔdenle yɛ asafo ne azɛlɛsinli ne anu gyima kpalɛ. Ɛhye ati, menli mɔɔ hɔle Ngakyelɛlilɛ ne mɔɔ bɛvi azua nsa ɛhye mɔ azo wɔ 2017 la dodo bayɛ kɛyɛ nolobɔlɛma ne mɔnwo nwiɔ​—anzɛɛ menli mɔɔ wɔ azua nsa ne azo la foa ko. Nɔhalɛ nu, ɔnva nwo ɛleka biala mɔɔ yɛwɔ la, dahuu yɛlɛ “dɔɔnwo wɔ Awulae gyima ne anu” yɛyɛ.​—1 Kɔl. 15:58.