JESU ọ tare taghene idibo yi ine rhiẹromẹrẹn orhọ ọduado uvuẹn ọke oba na. (Matt. 9:37; 24:14) Djokarhọ oborẹ ẹmro i Jesu o rugba lele izede oghẹnrensan uvuẹn Transcarpathia, Ukraine. Emwa esa ri kẹrẹ ekete ọnana, i vwo ikoko ri te 50 ọrhẹ ighwoghwẹmro ri vrẹn 5,400. * Arha ghalẹ ihworho ri ha amwa esa na rhẹ akwa 4, akwa owu Iseri Jehova!

Me yẹ uruemru ihworho ri ha uvuẹn emwa enana? Omizu ọhworhare owu re se Vasile, nọ tare: “Ihworho na a dabu kerhọ ẹmro i Baibol na, aye i vwo omamọ onyerẹnkugbe uvwre ekrun aye, aye i vwo ọdamẹ kpahen orhienbro ọsoso, aye a ji damoma ha userhumu rẹn owuowọnwan. Ovẹnẹ ọ ha uvwre iyono ọwan ọrhẹ ọrẹ aye. Ọrẹn, ame i rhe dje emru rẹn aye nẹ i Baibol na rhe, aye na dabu kerhọ.”

Itiọrurhomẹmro, imizu ọwan a dẹrughwaroghwẹ ebẹnbẹn ezẹko, aye erhe ghwoghwo uvuẹn emwa enana. Jerẹ udje, ukoko owu o vwo ighwoghwẹmro ri te 134, ọrẹn, eghwa 50 ọvo yi ha ekete na! Marhẹ ighwoghwẹmro na, e ruẹ lele uvuẹn erhirhiẹ ọnana?

Imizu buebun ne ye ghwoghwo uvuẹn ekete ra mai guọlọ ighwoghwẹmro Uvie na. Omizu ọhworhare owu rọ ha ẹgbukpe 90, re se Ionash, nọ tare: “Uvuẹn okegbe ame, oghwoghwẹmro owuowu, o ghwoghwo uvuẹn eghwa eva. Mie ghwoghwo uvuẹn amwa na, ọrẹn, mie ji riẹ amwa owu re vwe kiki ghwoghwo te ra djẹ edjadjẹ i Hungary ro seri te iroko 100, ọrẹn, o vwo ji jiri na, mia rha sabu nya fọkiẹ emiamo-o.” Ighwoghwẹmro na, i sẹrerhumuji ekwakwa nẹ aye i sabu ya ha userhumu phia uvuẹn okegbe erọrọ. Ionash nọ tare, “Ni mi sabu vwa itreni, mia rhọmọ emrẹ ughwọdjọ 4 urhiọke, ni mie ghwoghwo te emrẹ ughwọdjọ 6 owuọwọn ro rhiẹ ọke itreni na ọnọ ghwẹrioma rie. Omaran yi mie ruẹ ọgbeva yanghene ọgbesa ọkprughwre.” Oma ọ merhen Ionash fọkiẹ omẹdamu ọnẹyen na? Nọ tare: “Mia mẹrẹn aghọghọ ọduado uvuẹn owian aghwoghwo na. Habaye, mi ji sabu ha userhumu rẹn ekrun owu avwaye yono urhomẹmro na.”

Itiọrurhomẹmro, orhiẹ ihworho ephian uvuẹn ikoko ri ha ekogho ọnana ya sabu riẹ ekete oseseri-i. Ọrẹn, aye ephian tobọ tẹ ighwoghwẹmro ri kpako ne, a damoma neneyo aye i wian okegbe aye mwidjẹn. Omarana, uvuẹn ẹgbukpe 2017, ihworho ri riẹ Ẹkarorhọ Uhwu i Jesu uvuẹn emwa esa na, ni joma bun te akwava ighwoghwẹmro ri ha avwaye yanghene owuobọ ihworho ri ha uvuẹn emwa esa na. O vwo ẹfro-o, o toro uphẹn ẹga re vwori-i, ọwan ephian i vwo “ewian buebun uvuẹn owian Ọrovwori na.”—1 Cor. 15:58.