HESUS a profetisá ku durante e tempu di fin, e kosecha lo tabata grandi. (Mat. 9:37; 24:14) E palabranan akí a resultá di ta bèrdat na Transcarpatia, Ukrania. Den solamente tres pueblito, pegá ku otro, tin 50 kongregashon i mas ku 5.400 publikadó. * Si nos konta tur e habitantenan di e tres pueblitonan ei huntu, nos ta mira ku 1 di kada 4 persona ta Testigu di Yehova!

Kon e hendenan den e teritorionan ei ta reakshoná? Un ruman hòmber ku yama Vasile a bisa: “Den nos área, e hendenan ta respetá Beibel. Nan ta stima hustisia; nan lasonan familiar ta fuerte i nan ta gusta yuda otro.” Vasile a agregá: “No ta tur biaha nan ta di akuerdo ku nos kreensianan. Pero, ora bo mustra nan un teksto di Beibel, nan ta skucha bo ku atenshon.”

Ta klaru ku den un teritorio ku hopi Testigu di Yehova, bo por haña bo ku algun desafio den e trabou di prediká. Por ehèmpel, tin un kongregashon ku 134 publikadó. Pero ta 50 kas so tin den e teritorio ei. Kiko e publikadónan ta hasi den un situashon asina?

Wèl, hopi ruman ta bai prediká kaminda tin nesesidat di mas predikadó. Un ruman hòmber di 90 aña ku yama Ionash a bisa: “E promedio di publikadó pa kada kas den nos teritorio ta 1 publikadó pa kada 2 kas.” El a sigui bisa: “Aworakí, mi ta bai prediká den pueblo. Resientemente, promé ku mi salú a bai atras, mi tabata biaha mas o ménos 160 kilometer pa bai un teritorio, kaminda mi tabata prediká na húngaro.” Sí, si bo ke yuda ku e trabou di prediká den un otro teritorio, bo mester hasi sakrifisio. Ionash a bisa: “Pa mi a kue trein, mi mester a lanta 4 or di mardugá. I mi tabata prediká te 6 or di anochi, ora mi por a kue trein pa regresá kas. Mi tabata hasi esei dos pa tres biaha pa siman.” Su esfuersonan tabata bale la pena? El a bisa: “Mi a haña hopi goso den sirbishi. Mi tabatin e onor di yuda un famia ku ta biba den un área isolá haña e bèrdat.”

Ta di komprondé ku no ta tur publikadó den kongregashon por biaha distansia largu. Pero, tur publikadó, inkluso e rumannan di mas edat, ta hasi nan esfuerso pa prediká na tur hende den nan teritorio. Na 2017, e asistensia na memorial di e tres pueblitonan ei huntu tabata kasi dòbel di e publikadónan, esta, mitar di tur e habitantenan. No tin duda, no ta importá unda nos ta sirbi. Ainda tin “hopi di hasi den e trabou di Señor.”—1 Kor. 15:58.