JESUS talem hao olketa disaepol bae hapi from harvest hem barava big long disfala taem bilong end. (Matt. 9:37; 24:14) Tingim hao toktok bilong hem barava fitim wanfala ples long Transcarpathia, long Ukraine. Long datfala ples, thrifala taon wea stap klosap tugeta garem 50 kongregeson and winim 5,400 pablisa nao stap long there. * Tru nao, staka long olketa pipol long thrifala taon hia hem olketa Jehovah’s Witness!

Hao nao pipol long datfala territory? Wanfala brata wea nem bilong hem Vasile, hem sei: “Pipol long hia respectim Bible, tinghae long stret samting, garem strong famili, and olketa barava laek for helpem olketa narawan.” Hem sei tu: “Olketa no evritaem agree witim wanem mifala bilivim bat taem iu showim olketa wanem Bible talem, olketa lisin gud.”

Tru nao, olketa brata and sista feisim samfala hard samting from olketa preach long area wea namba bilong olketa pablisa klosap kasem nao namba bilong population long datfala ples. Olsem example, wanfala kongregeson garem 134 pablisa bat 50-fala haos nomoa long datfala territory! Hao nao olketa pablisa long there deal witim datwan?

Staka brata and sista iusim taem and strong for preach long olketa area wea needim pablisa. Ionash, wanfala brata wea 90 year, hem sei: “Long territory bilong mifala wanfala pablisa savve preach long tufala haos nomoa bikos no staka haos long there. Mi savve preach long vilij bilong mi, and taem mi no sik yet, mi savve go preach tu long farawe territory wea stap samting olsem 160 kilometer from vilij bilong mi. Mi iusim Hungarian languis for preach long olketa long there.” Olketa pablisa long there mas mekem samfala sakrifaes for go long olketa territory olsem. Ionash sei tu: “For go long train, mi mas wekap long 4 o’klok long morning, and mi preach go kasem 6 o’klok long evening, taem train redi for go bak. Mi savve duim datwan tu or thrifala taem evri week.” Waswe, hem kasem gud samting from datwan? Hem sei: “Mi barava hapi for preach long farawe ples. Mi garem privilege for helpem wanfala famili wea stap long there for lane abaotem truth.”

No evriwan long olketa kongregeson wea stap raonem datfala area fit for preach long olketa farawe ples. Bat evriwan, nomata olketa olo pablisa tu, traem best for preach long evriwan long territory bilong olketa. From datwan, long 2017, olketa wea attendim Memorial from thrifala taon hia hem staka winim namba bilong olketa pablisa, or haf long population bilong datfala ples. So nomata wea iumi stap, staka waka stap for mekem iumi “busy long waka bilong Lord.”—1 Cor. 15:58.