SISES ketin kohpada me ni imwin ahnsou, sapwellime tohnpadahk kan pahn perenki ahnsoun rahk ehu me inenen laud. (Mad. 9:37; 24:14) Kitail tehk ia duwen sapwellime mahsen eh pweida ni ahl tohrohr ehu wasa ehu nan Transcarpathia, Ukraine. Nanpwungen kahnimw siluhte nan Transcarpathia, mie mwomwohdiso 50 oh sounkalohk tohtohsang meh 5,400. * Met wehwehki me emen sang aramas pahmen en tohn kahnimw ko koaros wia Sounkadehdehn Siohwa!

Ia mwomwen kalohk nan wasa ko? Emen brother en wasao me adaneki Vasile nda: “Aramas ako kin wauneki Paipel, wauneki pwung pahrek, arail peneinei kan kin kerenpene, oh re uhdahn kin song en sewese emenemen.” E pil nda: “Re sohte kin ahnsou koaros pwungki dahme kitail kamehlele. Ahpw ni omw kin kasalehiong irail mehkot sang nan Paipel, re pahn rong kanahieng.”

Mehlel, riatail Kristian kan wasao kin lelohng ekei kahpwal ni arail kin kalohk nan wasa ehu me sounkalohk kan tohtohsang tohnihmw kan. Karasepe, nan ehu mwomwohdiso, mie sounkalohk 134 ahpw ihmw 50 te me mi nan wasahn kalohko! Ia duwen sounkalohk ko ar wiahda wekidekla kan ong irair wet?

Riatail Kristian tohto kin doadoahngki arail kehl, ahnsou de pil dahme re ahneki pwehn kak kalohk nan wasa kan me mie anahn laud ong sounkalohk. Emen brother me sounpar 90 me adaneki Ionash nda: “Nan at mwomwohdiso, emen sounkalohk kin ong tohnihmw riemen. I kin kalohk nan kisin kousapwo, ahpw me keren, ni paliwereiet eh luhluwetla, I pil kin seiloangki mpen mwail 100 kohla ni wasa ehu me mwomwohdiso saikinte pwukoahki oh I kin kalohk lokaiahki lokaiahn Hungary wasao.” Sounkalohk kan anahne wiahda tounmetei kan pwehn sewese wasahn kalohk teikan. Ionash nda: “Pwehn iang kisa, I anahne pirida kuloak 4 nin sohrahn oh kalohk lao kuloak 6 ni soutik, ni ahnsou me kisa pahn pwurala ni imweio. I kin wia met pak riau de siluh nan wihk ehu.” Ia duwe, e pehm me eh nannanti laud uhdahn katapan? E nda: “I diar peren laud nan wiepen kalohk wet. I ahneki pwais kaselel en sewese peneinei ehu me mi wasa doh ren sukuhlki padahk mehlel.”

Kitail wehwehki me kaidehn koaros nan mwomwohdiso kan nan wasao kak seiloakla wasa doh. Ahpw koaros, pil irail me mah kan, kin nantihong en kanekehla arail wasahn kalohko. Imwilahn met, nan pahr 2017, tohtohn irail kan me towehda Katamano sang kahnimw siluh pwukat kereniong pak riau tohto sang sounkalohk kan​—de elep en tohn wasa ko. E uhdahn mehlel, sohte lipilipil ia wasa kitail kin papah, kitail en ‘loalenohng atail doadoahk ong Kaun-o.’​—1 Kor. 15:58.