YESU wangukambiya limu kuti akusambira ŵaki azamuvuna vinandi mu nyengu yakumaliya. (Mat. 9:37; 24:14) Mazu yanga ngafiskika mazuŵa nganu muchigaŵa cha Transcarpathia, ku Ukraine. Mu matawuni ngatatu pe muchigaŵa ichi, mwe mipingu 50 ndi apharazgi akujumpha 5,400. * Pa ŵanthu anayi ŵewosi a mumatawuni yanga, yumoza ndi Kaboni.

Kumbi muchigaŵa ichi muja ŵanthu a mtima wuli? Mubali munyaki zina laki Vasile wangukamba kuti: “Ŵanthu kunu atumbika Bayibolu, atanja urunji, awovyana ndi mtima wosi ndipuso mabanja ngawu ngakukoliyana ukongwa.” Iyu wangukamba so kuti: “Nyengu zinyaki akoliyana navu cha vo tigomezga. Kweni asani titiŵaŵerenge Bayibolu avwisiya ukongwa.”

Kweni abali ndi azichi akumana ndi masuzgu nganyaki asani apharazga muvigaŵa vo Akaboni mbanandi ukongwa. Mwakuyeruzgiyapu, mpingu unyaki we ndi apharazgi 134 kweni muchigaŵa chawu mwe nyumba 50 pe. Kumbi apharazgi achita wuli ndi suzgu lenili?

Abali ndi azichi anandi atijipereka kuchipharazga ko kukhumbika chovyu. Mubali munyaki wa vyaka 90 zina laki Ionash wangukamba kuti: “Muchigaŵa chidu, Kaboni yumoza wakhumbika kupharazgiya ŵanthu ŵaŵi pe. Ini ndipharazga mumuzi wo ndija. Kweni kali ndeche ndi nthazi, ndayendanga makilomita 160 kuchipharazga kuchigaŵa chakutali cho kulivi mpingu wo upharazgaku. Kwenuku ndapharazgiyanga ŵanthu a chineneru cha Chihungariya.” Apharazgi akhumbika kujipereka kuti akapharazgi ku vigaŵa vinyaki. Mubali Ionash wangukamba so kuti: “Kuti nkhasaniyi sitima, ndayukanga 4 koloku ndi mlenji ndipu ndapharazganga mpaka 6 koloku mazulu pa nyengu yo sitima yanyamukiyanga kuluta ko ndajanga. Ndachitanga viyo kaŵi pamwenga katatu pa sabata.” Kumbi iyu wawona kuti vo wachitanga venga va phindu? Ionash wangukamba kuti: “Ndakondwanga ukongwa ndi uteŵeti uwu. Kwenuku ndinguwovya banja linyaki kusambira uneneska.”

Ndi wosi cha mu mipingu yo ye muchigaŵa cha Transcarpathia wo angafiska kuchipharazga ku vigaŵa vakutali. Kweni apharazgi wosi ndi akukota viyo, atesesa kupharazga muchigaŵa chosi cha mpingu wawu. Ivi vinguchitiska kuti mu 2017 chiŵerengeru cha apharazgi mumatawuni ngosi ngatatu chibiliyemu kaŵi ndi ŵanthu wo anguza pa Chikumbusu, pamwenga kuti hafu ya ŵanthu wosi a mumatawuni yanga. Ivi vilongo kuti kosi ko tingateŵete, kwe “vakuchita vinandi mu ntchitu ya Ambuya.”—1 Akori. 15:58.