JA Jesús yalaxakan ojni skʼuluke jun aʼtel bʼa sjachʼjel ja sjekabʼanumik ja bʼa xchʼakulabʼil ja tyempo (Mat. 9:37; 24:14). Ja yaljelik jaw wan kʼotel smeranil bʼa jun modo jel chaʼanyabʼalil bʼa jun parte ja bʼa Transcarpatia (Ucrania). Pes kechanta bʼa oxe lugar mojan yiʼoj sbʼaj, ay 50 kongregasyon sok mas ja 5,400 cholumanik. * Ta kajtabʼantik ja swinkil ja oxe lugarik jaw, bʼa chane ixuk winik ayni jun taʼumantiʼ bʼa Jyoba.

¿Jastal ja ixuk winike ja bʼa territorio it? Jun jmoj-aljeltik sbʼiʼil Vasile, wa xyala: «Ja il jelni wa skisawe ja Biblia, jel chaʼanyabʼal wa xyilawe ja bʼa toji, jel tsoman aye soka spamilyaʼe sok wa skʼujolane bʼa skoltajel sbʼaje. Mini tolabida wa x-ochye akwerdo soka skʼuʼajel kiʼojtiki, pe yajni waxa jeʼayi jun teksto bʼa Biblia wani smaklaye lek».

Pe xcholjel bʼa jun lugar bʼa jel jitsan cholumanik, ja jmoj-aljeltiki wani stʼaspune jujuntik wokol bʼa mi jpetsaniltik wa x-ekʼ jbʼajtik. Jun sjejel, jun kongregasyon ayiʼoj 134 cholumanik sok kechan 50 naʼits bʼa xcholjel. ¿Jasa wa skʼulane ja cholumanik yuja jel tʼusan ja bʼa wa xcholoweʼi?

Jitsan jmoj-aljeltik wa skʼujolane bʼa wajel bʼa lugarik bʼa wa xkʼanxi mas cholumanik. Jun jmoj-aljeltik sbʼiʼil Ionash bʼa ayxa yiʼoj 90 jabʼil, wa xyala: «Ja bʼa jkongregasyon, jun choluman kechan yiʼoj chabʼ naʼits bʼa xcholjel. Ja wego, ja keʼn tixa wa xcholo ja bʼa jlugar. Yajni mito jel maloʼayukoni wala wajyon bʼa jun lugar mito tʼojubʼaluk maʼ oj xchol bʼa jun kʼumal húngaro, sok wa xkan junuk 160 kilometro snajtil». Ja cholumaniki jelni wa xchʼaka sbʼaje bʼa wajel ja bʼa lugarik it. Ja Ionash wa xyala: «Bʼa oj wajkon sok tren, wani la kʼeyon bʼa las 4 bʼa saʼan sakbʼel. Sok wa xcholo man las 6 bʼa och kʼakʼu, bʼa jatoni wa xkumxi ja tren. Wa xkʼulan ja it chabʼe ma oxe ekʼele ja semana». ¿Wan maʼ xyabʼ ja jmoj-aljeltik it mini lomuk ja jas skʼuluneji? Ja yeʼn wa xyala: «Ja tikʼe xcholjel it jelni gusto wa xya ajyukon. Sok ajyikuj ja cholal bʼa sjejelyi ja smeranil jun pamilya bʼa ti sbʼaje bʼa jun lugar jel najat».

Wani xkabʼtik stojol yuja jujuntik jmoj-aljeltik ja bʼa kongregasyonik jaw mi xbʼobʼ wajuke xcholjel bʼa mas najat, pe spetsanile, cha jachuk ja matik ayxa skʼujole wa skʼujolane bʼa oj xchol-e yabʼ spetsanil ja ixuk winik ja bʼa sterritorioʼe. Ja slekilal ilxi ja bʼa oxe lugar it, ja janekʼ wajye ja bʼa Conmemoración bʼa 2017 mastoni chabʼ ekʼele yuja janekʼ cholumanik ayi, wa xkʼan kaltik, snalan ja bʼa swinkil ja lugari. Wa xkʼuʼantik lek chikan bʼa wantik koltanel, jeltoni jas oj kʼulaxuk «ja ba yatel ja Cajualtiqui» (1 Cor. 15:58).