JESÚS lichuwinalh pi kstalaninanin x’amakgolh makikgo lhuwa tamakgalan kxlisputni kilhtamaku (Mat. 9:37; 24:14). La uku kgantaxtuma umakgolh tachuwin anta kkachikin xla Transcarpatia (Ucrania). Akgtutu kachikinin nema lakatsunin wilakgolh, anan 50 congregaciones chu liwaka 5,400 tiku lichuwinankgo Dios. * Komo nakatsiyaw niku kgalhlit anan latamanin k’uma akgtutu kachikin, lata kgalhtati latamanin chatum xtatayana Jehová litaxtu.

¿La likatsikgo latamanin k’uma kachikinin? «Latamanin maxkikgo kakni Biblia, lhuwa xtapalh li’akxilhkgo tuku xa’akgstitum, makxtum wilakgo xfamiliajkan chu liskujkgo xlakata nalamakgtayakgo», chuna lichuwinan chatum tala wanikan Vasile. Nachuna wan: «Latamanin ni ankgalhin tatayakgo tuku kanajlayaw, pero akxni nakamasiyaniya tuku wan Biblia liwana kgaxmatkgo».

Xlikana, akxni nalichuwinana Dios niku anan lhuwa natalan tuwa tamakgkatsi. Akgtum li’akxilhtit, akgtum congregación kgalhi 134 tiku lichuwinankgo Dios chu kajwatiya kgalhikgo 50 chiki niku lichuwinankgo Dios. ¿Tuku tlawakgo uma natalan?

Lhuwa natalan lu liskujkgo xlakata namakgtayanankgo niku tlakg talakaskin tiku nalichuwinankgo Dios. Chatum tala tiku kgalhi 90 kata wanikan Ionash, lichuwinan: «Kkincongregacionkan chatum tala lakgchan nalichuwinan Dios k’akgtiy chiki. La uku akit klichuwinan Dios kkinkachikin, pero xapulana akxni ni lu xaktatatla, xakan k’akgtum kachikin niku ni xkinkalakgchanan nema wi 160 kilómetros xlilakgamakgat xlakata naklichuwinan Dios ktachuwin húngaro». Natalan liskujkgo xlakata na’ankgo k’uma kachikinin. Ionash lichuwinan: «Xlakata nakan ktren, xtalakaskin naktaki makgtati hora tsisa. Chu xaklichuwinan Dios makgchaxan hora kakgotanun, akxni xtaspita tren. Makgtiy o makgtutu chuna xaktlawa akgtum semana». ¿Makgkatsi uma tala pi tlan tuku kitaxtulh xlakata tuku liskujli? Xla kgalhtinan: «Akxni chuna xaktlawa lu xaklipaxuwa. Chu tlan kkamasiyanilh tuku xaxlikana akgtum familia nema lakgamakgat xwilakgolh».

Makgapitsi natalan tiku tapakgsikgo k’ama congregación ni matlanikgo makgat na’ankgo lichuwinankgo Dios, pero xputumkan asta tiku linkgoya kata lu liskujkgo xlakata nakalitachuwinankgo Dios latamanin. Chuna la xlilhuwa wilaka k’uma kachikinin liwaka itat kilaka akxni lakapastakka Akxni Tinilh Cristo kkata 2017. Xlikana, maski kaj xanikuta niku naskujnaniyaw Jehová, chuntiyaku lhuwa «kalimaxtu[w] kilhtamaku xlakata nalichuwinana[w] kiMalanakan» (1 Cor. 15:58).