YESU wakayowoyerathu kuti ŵalondezgi ŵake ŵazamuŵa na vyakuvuna vinandi mu mazuŵa ghaumaliro. (Mat. 9:37; 24:14) Wonani umo mazgu ghake ghafiskikira ku chigaŵa cha Transcarpathia, Ukraine. Mu matawuni ghatatu pera agho ghali pafupi na pafupi mu chigaŵa ichi, muli mipingo 50 ndiposo ŵapharazgi ŵakujumpha 5,400. * Ŵakaboni mbanandi chomene mu matawuni ghatatu agha chifukwa munthu yumoza pa ŵanthu ŵanayi ŵaliwose ni Kaboni wa Yehova.

Kasi ŵanthu ŵali wuli mu chigaŵa ichi? Mubale Vasile, uyo wakukhala ku malo agha wakati: “Ŵanthu ŵa kuno ŵakulichindika chomene Baibolo, ŵakutemwa urunji, ŵakukolerana mu mbumba zawo, kweniso ŵakutemwa kovwira ŵanyawo.” Iyo wakatiso: “Ni nyengo zose yayi apo ŵakukolerana na ivyo tikugomezga. Kweni ŵakupulikizga chomene para waŵalongora ivyo Baibolo likuyowoya.”

Ŵabali na ŵadumbu ŵithu mu matawuni agha ŵakukumana na masuzgo para ŵakupharazga ku malo agha chifukwa ŵapharazgi mbanandi pakuyaniska na chiŵelengero cha ŵanthu. Mwachiyelezgero, mpingo unyake uli na ŵapharazgi 134, kweni mu chigaŵa icho ŵakupharazgako muli waka nyumba 50. Kasi ŵapharazgi ŵakuchita wuli?

Ŵabali na ŵadumbu ŵanandi ŵakuluta ku vigaŵa uko kukukhumbikwira ŵapharazgi ŵanandi mwakuti ŵakapharazgire ŵanthu ŵanandi. Mubali wa vyaka 90, zina lake lonash wakati: “Mu chigaŵa cha mpingo withu, mupharazgi waliyose wakwenera kupharazgira waka ŵanthu ŵaŵiri. Sono nkhupharazga mu muzi wane, kweni kumanyuma pambere nindambe kupulika vyakuŵinya muthupi, nkhendanga makilomita 160 kuluta ku malo uko kukakhumbikwiranga ŵapharazgi ŵanandi. Para naluta nkhapharazganga mu Chihungarian.” Ŵapharazgi ŵakwenera kujinora chomene kuti ŵalute ku vigaŵa vinyake kukawovwira. Lonash wakatiso: “Kuti nkhakwere sitima yapamtunda, nkhawukanga 4 koloko mulenji ndipo nkhapharazganga m’paka 6 koloko namise para sitima yikuweleraso kukaya. Nkhachitanga ivi kaŵiri panji katatu pa sabata.” Kasi wakuwona kuti wakasuzgikanga pawaka? Iyo wakati: “Nkhakondwanga chomene na uteŵeti uwu. Nili kovwira banja linyake kumanya unenesko.”

Ni waliyose yayi mu mpingo wa ku malo agha wangenda mitunda yitali ndipo ichi ntchakupulikikwa. Kweni tose kusazgapo ŵapharazgi awo mbachekuru, tikuyezgayezga kupharazga chigaŵa chose cha mpingo withu. Chifukwa chakuchita nthena, mu 2017, chiŵelengero cha awo ŵakiza ku Chikumbusko chikajumpha kaŵiri chiŵelengero cha ŵapharazgi wose. Panji tingati hafu ya chiŵelengero cha ŵanthu wose yikiza ku chikumbusko. Ntchakuwonekerathu kuti, kulikose uko mungateŵetera kuli “vyakucita vinandi mu mulimo wa Fumu.”—1 Kor. 15:58.