NE ‵VALO mai a Iesu me ka aofia ana soko i se ‵katiga saito lasi ‵ki i te taimi tenei o te gataga. (Mata. 9:37; 24:14) Ke fakamaoni aka ne tatou a te ‵tonu o ana pati konā i se auala tu ‵kese i te kogā koga tenei e igoa ki a Transcarpathia, i Ukraine. I fakai e tolu i te kogā koga tenā, e nofo ki se 50 fakapotopotoga i ei, kae silia atu mo te 5,400 tino talai. * E tonu, e toko 1 se Molimau a Ieova ki te toko 4 tino māfai e tuku fakatasi te aofaki o tino i fakai e tolu konā!

E pefea a tino i koga talai konā? “A tino i konei e āva malosi ki te Tusi Tapu, fakatāua te fai mea tonu, e ma‵losi ‵ki olotou fesokotakiga faka-kāiga, kae fia‵fia tonu o fakatau fesoasoani,” ko pati a te taina ko Vasile. E toe fai mai a ia: “E se ‵lago mai faeloa latou ki ‵tou talitonuga. Kae kafai e fakaasi atu ne koe se manatu mai te Tusi Tapu, ka fakalogo‵logo faka‵lei mai eiloa latou.”

E tonu, e fakafesagai atu a ‵tou taina mo tuagane i konā mo fakalavelave kese‵kese māfai e talai atu i se koga telā e tokouke atu a tino talai i lō te aofaki o tino e ‵nofo i te koga tenā. E pelā me se fakaakoakoga, e tasi te fakapotopotoga e toko 134 tino talai i ei kae e 50 fua a fale o tino i te koga talai tenā! E mafai pefea o fakafesagai atu a tino talai ki te tulaga tenei?

Ko oti ne fakalauefa atu ne taina mo tuagane e tokouke a te lotou galuega ki koga kolā e lasi te manakoga i ei. “I te koga talai o te motou fakapotopotoga, e nofo ki se toko 1 o tino talai ki te 2 o fale,” ko pati a te taina ko Ionash, telā ko 90 ana tausaga. “E talai atu au i te fakai, kae fakamuli nei, i te taimi ko fakamasakisaki ei au, ne faimalaga atu au kāti i se ‵mao e 100 maila (160 km) ki se koga talai telā ne seki ‵tofi aka ke ga‵lue i ei, kae ne talai atu au i konā i te ‵gana Hungarian.” E talia ne tino talai a mea faiga‵ta e uke ke fesoasoani atu ki tino i nisi koga talai. “Ke maua ne au te tuleini, ne ala aka au i te 4:00 i te vaveao kae ne talai atu au ke oko loa ki te 6:00 i te afiafi māfai ko foki atu au ki te fale i te tuleini. Ne fai ne au a te mea tenā fakalua io me fakatolu taimi i te vaiaso,” muna Ionash. E mata, ne lavea ne ia te aoga o ana taumafaiga konā? “Ne maua ne au te fiafia lasi i te vaega tenā o te galuega talai,” ko ana pati. “Ne maua ne au te fiafia ke fesoasoani atu ki se kāiga i se koga ‵mao ke tauloto ki te munatonu.”

E manino ‵lei, me e se ko tino katoa i fakapotopotoga i te koga tenā e mafai o faima‵laga atu ki koga ‵mao. Kae ko tatou katoa, e aofia i ei a tino talai ma‵tua, e taumafai o ga‵lue malosi ke ‵kava faka‵lei a ‵tou koga talai. Tela la, i te 2017, toeitiiti ko tapolo a te aofaki o tino i fakai e tolu konei ne ‵kau atu ki te Fakamanatuga—io me ko te āfa o te aofaki o tino i koga konā. Tela la, e mautinoa eiloa, me faitalia so se koga e tavini atu i ei tatou, kae koi ‘uke eiloa ‵tou galuega e fai i te galuega a te Aliki.’—1 Koli. 15:58.