LI Jesuse laj yal ti ta slajebal kʼakʼale ep tstsobbeik sat tsʼunobil li yajtsʼaklomtake (Mat. 9:37; 24:14). Li kʼusitik laj yal Jesuse yakal chkʼot ta pasel li ta Transcarpatiae (Ucrania). Li tee oy oxib bikʼtal lumetik ti nopajtik noʼox xil sbaike, oy 50 tsobobbailetik xchiʼuk mas ta 5,400 jcholmantaletik. * Ti jech jchaptik ti kʼu yepal jnaklejetik oy li ta lumetik taje, jun li ta chanvoʼ krixchanoe jaʼ stestigo Jeova.

¿Kʼu yelan stalelal li krixchanoetik tee? Xi chal sloʼil li ermano Vasile: «Tstsakik ta venta li Vivliae, oy sbalil chilik li tukʼilale, lek tsobol li utsʼ alaliletike xchiʼuk chakʼik tajek persa tskolta sbaik ta jujuntal». Xi to chale: «Akʼo mi muʼyuk lek chilik skotol li kʼusi jchʼunojtike, pe lek chchikintaik kʼalal ta jkʼelbekutik li Vivliae».

Ta skoj ti oy ep jcholmantaletik ti bu ta xcholik mantale, oy onoʼox jtos chaʼtosuk vokoliletik. Yuʼun ta jun tsobobbaile oy 134 jcholmantaletik, pe kʼajomal noʼox 50 ta pʼej na ti bu chcholik mantale.

Li ermanoetike chakʼik tajek persa sventa xcholik mantal ti bu chtun mas jcholmantaletike. Xi chal jun ermano ti Ionash sbie xchiʼuk ti 90 xa sjabilale: «Li ta jtsobobbailkutike oy jun jcholmantal li ta chib jnaklejetike. Avie liʼ xa noʼox ta jcholmantale, pe kʼalal mas toʼox tsotsune nom chikʼot ta cholmantal ti te van 160 kilometro snamale, jaʼ chbat jcholbe mantal li krixchanoetik ti húngaro skʼopike xchiʼuk ti muʼyuk buchʼu chcholbatik mantale». Li ermanoetike ep kʼusitik tspasik sventa xbatik li ta cholmantale. Xi to chal li Ionashe: «Kʼalal chibat ta tren yoʼ xbat jcholmantale, ta chanib ora chilik ta sob xchiʼuk ta vakib to ora ta mal kʼakʼal chlaj koʼonton, yuʼun jaʼ to jech ora tsutal li trene. Taje, jech la jpas chaʼkoj oxkojuk ta xemana». Ti jech laj yakʼ persa li ermanoe, ¿mi oy sbalil laj yil? Oy, yuʼun xi to chale: «Ti jech li-ay ta cholmantale laj yakʼbun tajek muyubajel xchiʼuk jaʼ jun matanal laj kaʼi ti la jchanubtas jun utsʼ alalil ti nom to bu chʼikil li ta jteklume».

Li ta yoxibal bikʼtal jteklumetike oy onoʼox junantik ermanoetik ti mu xuʼ nom xbatik ta cholmantale, pe akʼo mi jech, ta bikʼit ta mukʼ chakʼik tajek persa sventa xcholik mantal. Toj lek kʼusi kʼot ta pasel yuʼunik li ta Snaʼobil slajel Kristo ta sjabilal 2017. Yuʼun ti kʼu yepal la stsob sbaik li oxib lumetik taje jutuk mu j-oʼlol x-echʼ yepal kʼuchaʼal li jcholmantaletike, jaʼ xkaltik, jutuk mu j-oʼloluk ayik li jnaklejetike. Jaʼ yuʼun chaʼa, mu ventauk ti bu chijtune ‹ep to kʼusi skʼan jpastik ta sventa li yabtel Kajvaltike› (1 Kor. 15:58).